KŨRĨA irio cia kĩĩroho tũrĩ hamwe hĩndĩ ya igomano nĩ ũndũ ũtũrehagĩra gĩkeno kĩnene. Ningĩ kũrĩanĩra irio cia kĩĩmwĩrĩ hĩndĩ ta ĩyo nĩ kuongagĩrĩra gĩkeno giitũ.

Rĩrĩa Arutwo a Bibilia meekire kĩgomano gĩa thikũ inyanya Cedar Point, Ohio, Amerika, Septemba 1919, mũbango warĩ ageni marĩe na maikare mĩkawa-inĩ, ĩndĩ gũgĩũka ageni aingĩ mũno gũkĩra arĩa maatanyĩtwo. Nĩ ũndũ wa ũingĩ ũcio, aruti wĩra a mũkawa arĩa meehokeirũo kũhe andũ irio makĩrega wĩra o rĩmwe othe. Menenja ũrĩa warũgamĩrĩire nĩ arigirwo ũrĩa egwĩka, na nĩ ũndũ ũcio akĩũria kana thĩinĩ wa ageni arĩa mookĩte kĩgomano-inĩ nĩ harĩ andũ ethĩ mangĩerutĩire kũruta wĩra ũcio. Andũ aingĩ nĩ meerutĩire. Mwarĩ wa Ithe witũ Sadie Green aarĩ ũmwe wao. Oigire ũũ: “Rĩarĩ rita rĩakwa rĩa mbere kũruta wĩra ta ũcio no nĩ twakeneire mũno.”

Thutha ũcio nĩ kwagĩire na rũhonge rwa kũruga irio igomano-inĩ. Aarĩ na ariũ a Ithe witũ aingĩ a kwĩrutĩra nĩ maakenaga mũno magĩtungatĩra arĩa angĩ wĩra-inĩ ũcio. Ningĩ kũrutithania wĩra hamwe na Akristiano arĩa angĩ rũhonge-inĩ rũu, nĩ gwateithirie andũ aingĩ ethĩ kwĩigĩra mĩoroto ya kĩĩroho. Gladys Bolton nĩ aarutire wĩra rũhonge-inĩ rũu hĩndĩ ya kĩgomano kĩmwe mwaka wa 1937. Oigire ũũ: “Nĩ ndacemanirie na andũ kuuma kũndũ na kũndũ, na ngĩigua ũrĩa maahiũranagia na mathĩna mao. Hĩndĩ ĩyo nĩrĩo ndambĩrĩirie kũgĩa na mwĩhoko wa gũtuĩka painia.”

Beulah Covey oigire ũũ: “Nĩ ũndũ wa kĩyo kĩa arĩa marutaga wĩra rũhonge-inĩ rũu, gũtirĩ ũndũ ũrũgamaga.” O na kũrĩ ũguo, wĩra ũcio warĩ na moritũ maguo. Mwaka-inĩ wa 1969, Angelo Manera aamenyire atĩ nĩ aahetwo wĩra rũhonge-inĩ rwa kũruga rĩrĩa aakinyire Dodger Stadium, Los Angeles, California, kũrĩa gwekagĩrũo kĩgomano. Oigire ũũ: “Ndirĩ ndamaka ta ũrĩa ndamakire hĩndĩ ĩyo!” Ũndũ ũmwe maabataraga gwĩka warĩ kwenja mũtaro wa mita 400 wa kũrehe ngaasi kũrĩa kwarugagĩrũo.

Mwaka-inĩ wa 1982, bũrũri-inĩ wa Sierra Leone, aarĩ na ariũ a Ithe witũ maambire gũtũgũta gĩthaka magĩcoka magĩaka handũ ha kũrugĩra. Narĩo 1951, Frankfurt, Njĩrĩmani, ariũ a Ithe witũ maakomborire injini ya mũgithi ĩrĩa yateithagia kũruta mwaki wa kũruga thaburia 40 hamwe hamwe. Arĩa maaihũraga  irio, maaihũraga thani 30,000 harĩ ithaa rĩmwe. Nĩguo mahũthie wĩra wa gũthambia indo ũrĩa warutagwo nĩ andũ 576, athikĩrĩria nĩo meekuagĩra indo cia kũria nacio, ta iciko na hũma. Thĩinĩ wa Yangon, bũrũri-inĩ wa Myanmar, aarĩ na ariũ a Ithe witũ arĩa maarugaga nĩ meethemaga gwĩkĩra biribiri nyingĩ irio-inĩ cia ageni a kuuma mabũrũri mangĩ, nĩ ũndũ wa kũmarũmbũiya.

Annie Poggensee oigire atĩ kwara raini ndaihu ya kuoya irio kũrĩ na riũa ihiũ mũno hĩndĩ ya kĩgomano kĩrĩa kĩarĩ Amerika 1950, nĩ kwamũreheire kĩrathimo. Oigire ũũ: “Nĩ ndaagucĩrĩirio mũno nĩ ndeereti njega ĩrĩa yarĩ gatagatĩ ka aarĩ a Ithe witũ erĩ arĩa moimĩte Rũraya na boat.” Maaragĩrĩria ũrĩa Jehova aamateithĩtie gũkinya kĩgomano-inĩ kĩu. Annie oigire ũũ: “Gũtirĩ mũndũ ũngĩ kũu warĩ na gĩkeno tao. Maationaga gweterera ihinda iraya raini-inĩ na kũhĩa nĩ riũa ta arĩ ũndũ.”

Igomano-inĩ nyingĩ iria nene, kwaambagũo hema nene harĩa hararĩrũo, gũgacoka gũgakorũo na metha nyingĩ ndaya na igũrũ ũndũ andũ mekũrĩa marũgamĩte, nĩguo marĩe na ihenya mahe arĩa angĩ mweke. Ĩyo noyo njĩra ĩrĩa ĩngĩahũthĩkire hĩndĩ ĩyo kũhe andũ aingĩ ũguo irio ihinda-inĩ rĩa ranji. Mũndũ ũmwe ũtaarĩ Mũira wa Jehova oigire ũũ: “Ĩyo nĩ ndini ya magegania. Marĩaga marũgamĩte.”

Anene a njeshi na a thirikari, nĩ maagegaga mũno nĩ kuona ũrĩa twakoragwo na mũbango mwega. Thutha wa kũrora mũbango witũ wa kũruga na kũhe andũ irio kĩhaaro-inĩ kĩa Yankee Stadium, New York City, njeshi cia Amerika cierire mũnene wa njeshi wetagwo Faulkner wa British War Department oke o nake eyonere. Nĩ ũndũ ũcio, mũnene ũcio marĩ na mũtumia wake nĩ mookire kĩgomano kĩa “Ũthamaki Ũrĩa Ũtooranĩtie” kĩrĩa gĩekagĩrũo Twickenham, England, 1955. Oigire nĩ eyonera atĩ wendo nĩguo watwarithagia wĩra na mbere rũhonge-inĩ rwa kũruga.

Kwa ihinda rĩa mĩaka mĩingĩ, aarĩ na ariũ a Ithe witũ nĩ meerutagĩra rũhonge-inĩ rũu kũhe arĩa mookaga igomano irio njega na itarĩ cia goro. Ĩndĩ tondũ wĩra ũcio wakoragwo ũrĩ mũnene, kaingĩ wabataraga erutĩri aingĩ marute wĩra mathaa maingĩ na rĩngĩ o na morĩrũo nĩ icunjĩ imwe cia programu o na kana ciothe. Mĩbango ya kũhe andũ irio igomano-inĩ nĩ yahũthahũthirio kũndũ kũingĩ mĩaka-inĩ ya 1970. Thutha ũcio, mwaka-inĩ wa 1995 andũ makĩrũo mekuagĩre irio ciao magĩthiĩ igomano. Ũndũ ũcio nĩ wahotithirie arĩa maarugaga na arĩa maagayaga irio magĩe na mweke wa gũkenera maũndũ ma kĩĩroho na ũrũmwe wa Gĩkristiano. *

No mũhaka akorũo Jehova nĩ akenagio mũno nĩ arĩa maarutire wĩra na kĩyo nĩguo matungatĩre Akristiano arĩa angĩ! Andũ amwe no maigue makĩĩrirĩria mũno mahinda macio maakenagĩra kũruta wĩra rũhonge-inĩ rũu. No ma nĩ atĩ o na ũmũthĩ wendo noguo ũndũ ũrĩa mũnene ũtongoragia igomano citũ.—Joh. 13:34, 35.