Ũndũ ũmwe ũtũteithagia nĩ ũũmĩrĩru ũrĩa tuonaga kuuma kũrĩ famĩlĩ, arata, na athathaiya arĩa angĩ.

Ciugo njega na cia wendo kuuma kwĩ mũrata, no ikorũo ihaana ta maguta marĩa mahonagia na makahooreria. (Thim. 16:24; 18:24; 25:11) No Akristiano matiĩciragia o ũrĩa mangĩũmĩrĩrio. Nĩ merutanagĩria ‘kũũmĩrĩria andũ arĩa angĩ marĩ na thĩna o wothe, nĩ ũndũ wa kũũmĩrĩrio kũu o ene momagĩrĩrio nakuo nĩ Ngai.’ (2 Kor. 1:4; Luk. 6:31) Mũrori ũmwe wa ng’ongo thĩinĩ wa Mexiko wĩtagwo Antonio, nĩ eeyoneire ũndũ ũcio.

Rĩrĩa aathimirũo akĩoneka atĩ arĩ na mũrimũ wa kansa ya thakame (lymphoma), Antonio nĩ aaritũhĩirũo mũno. O na kũrĩ ũguo, nĩ aageragia kwĩgirĩrĩria ndakagĩo nĩ meciria mangĩmũraga ngoro. Na njĩra ĩrĩkũ? Aageragia kwĩririkania nyĩmbo cia Ũthamaki na agaciina nĩguo aigue na ecũranie ciugo ciacio. Ningĩ kũhoya na mũgambo mũnene o ũndũ ũmwe na gũthoma Bibilia nĩ kwamũhooragĩria mũno.

O na kũrĩ ũguo, ũmũthĩ Antonio nĩ onaga atĩ ũteithio wake mũnene woimanaga na athathaiya arĩa angĩ. Oigaga ũũ: “Rĩrĩa niĩ na mũtumia wakwa twaigua tũritũhĩirũo mũno, tuoragia mũthuri ũmwe wa kĩũngano wa famĩlĩ itũ oke tũhoe hamwe nake. Ũndũ ũcio nĩ watũũmagĩrĩria na ũgatũhooreria. Agĩcoka akĩongerera, “ma nĩ atĩ, nĩ ũndũ wa ũteithio wa andũ a famĩlĩ itũ na ariũ a Ithe witũ, nĩ twahotire gũtooria meciria mangĩtũũraga ngoro thutha wa kahinda kanini.” Nĩ acokagia ngatho mũno nĩ ũndũ wa gũkorũo na arata ta acio maamũrũmbũyagia na makamuonia wendo!

Kĩndũ kĩngĩ gĩtũteithagia hĩndĩ ya moritũ nĩ roho mũtheru ũrĩa weranĩirũo. Mũtũmwo Petero oigire atĩ roho mũtheru wa Ngai nĩ “kĩheo.” (Atũm. 2:38) Ũndũ ũcio nĩ weyonanirie rĩrĩa andũ aingĩ maitĩrĩirio roho hĩndĩ ya Bendegothito 33 Mahinda Maitũ (M.M.) O na kũrĩ ũguo, roho mũtheru nĩ kĩheo tũngĩheo o na ithuĩ. Na tondũ harĩa uumaga ndũngĩthira-rĩ, githĩ tũtiagĩrĩirũo kũhoyaga tũheo kwa ũingĩ?—Isa. 40:28-31.

Mũtũmwo Paulo nĩ aakirĩrĩirie moritũ maingĩ, o na kwĩ hĩndĩ aang’ethanagĩra na gĩkuũ. (2 Kor. 1:8-10) No Paulo ndetigagĩra mũno kũũrũo nĩ muoyo wake. Nĩ omagĩrĩrio nĩ kũmenya atĩ Ngai aarĩ hamwe nake. Aandĩkire ũũ: “Ngai na Ithe wa Mwathani Jesu Kristo arogathwo, o we Ithe witũ mwene tha, na Ngai mwene ũhoro wothe wa kũũmanĩrĩria, o we ũtũũmagĩrĩria mathĩna-inĩ maitũ mothe.” (2 Kor. 1:3, 4) Paulo ndeetĩkĩrire gũtoorio nĩ mathĩna make. Ithenya rĩa ũguo, magerio marĩa aakirĩrĩirie nĩ maamũteithirie kũgĩa na tha, akĩhota kũũmĩrĩria arĩa angĩ wega makĩria marĩ mathĩna-inĩ.

Thutha wa kũhona, Antonio nĩ aahotire gũcokerera wĩra wa kũgenda. Mbere ĩyo nĩ aarũmbũyagia athathaiya arĩa angĩ, no kuuma hĩndĩ ĩyo nĩ eekĩrire kĩyo kĩnene gĩa gũceeragĩra na gwĩkĩra ngoro arĩa arũaru. Kwa ngerekano, thutha wa gũceerera mũrũ wa Ithe witũ ũmwe waahiũranagia na mũrimũ mũnene, Antonio nĩ aamenyire atĩ ndeendaga gũthiĩ mĩcemanio. Antonio ataaragĩria atĩ, “ti atĩ mũrũ wa Ithe witũ ũcio ndeendete Jehova kana ariũ a Ithe witũ, no mũrimũ ũcio nĩ wamũritũhĩire meciria nginya akemena.”

Ũndũ ũmwe Antonio eekire nĩguo eekĩre mũrũ wa Ithe witũ ũcio ngoro nĩ kũmũũria ahoithie hĩndĩ ĩmwe macemanĩtie marĩ aingĩ. O na gũtuĩka mũrũ wa Ithe witũ ũcio ndoonaga ta agĩrĩire, nĩ eetĩkĩrire kũhoithia. Antonio ataaragĩria ũũ: “Aahoithirie wega mũno, na thutha ũcio, akĩhaana taarĩ mũndũ ũngĩ ngũrani. Akĩambĩrĩria kwĩyona e wa bata rĩngĩ.”

Ma nĩ atĩ, ithuothe twanacemania na ũritũ wa mũthemba mũna ũrĩ mũnene kana mũnini. Ĩndĩ o ta ũrĩa Paulo oigire, ũndũ ũcio no ũtũteithie kũũmĩrĩria arĩa angĩ hĩndĩ ĩrĩa marĩ na thĩna. Nĩ ũndũ ũcio-rĩ, rekei twĩciragie mĩnyamaro ya Akristiano arĩa angĩ na twĩgerekanagie na Ngai witũ Jehova, na njĩra ya kũũmagĩrĩria arĩa angĩ.