Reke Ĩĩ Yaku Ĩtuĩke Ĩĩ
Reke Ĩĩ Yaku Ĩtuĩke Ĩĩ
“Mũkĩaria-rĩ, ugagai ũũ, Ĩĩ-ni, ĩĩ-ni; Aca, aca.”—MAT. 5:37.
RORA KANA WAHOTA GŨCOKIA:
Jesu oigire atĩa igũrũ rĩgiĩ mĩĩhĩtwa?
Tũngiuga Jesu aarĩ kĩonereria kĩega gĩa kũhingia ciugo ciake nĩkĩ?
Nĩ maũndũ marĩkũ ũtũũro-inĩ witũ Ĩĩ itũ yagĩrĩirũo gũkorũo ĩrĩ Ĩĩ?
1. Jesu oigire atĩa igũrũ rĩgiĩ kwĩhĩta, na nĩkĩ?
KAINGĨ, Akristiano a ma matibataraga kwĩhĩta. Gĩtũmi nĩ tondũ nĩ mathĩkagĩra Jesu, ũrĩa woigire ũũ: ‘Mũkĩaria-rĩ, ugagai Ĩĩ-ni, Ĩĩ-ni.’ Eendaga kuonania atĩ mũndũ nĩ agĩrĩirũo kũhingia ciugo ciake. Atanaheana rĩathani rĩu, Jesu aambire kuuga ũũ: “Mũtikanehĩte o na atĩa.” Oigire ũguo akĩmenereria ũndũ andũ aingĩ mamenyerete mĩario-inĩ yao ya o mũthenya wa kwĩhĩtaga kaingĩ, o na matarĩ na muoroto wa gwĩka ũrĩa maroiga. Rĩrĩa mekwaria ũndũ “ũkĩrĩte ciugo” Ĩĩ kana Aca makĩenda kuuga ũndũ, andũ ta acio monanagia atĩ ti a kwĩhokeka na kwoguo matongoragio nĩ “ũrĩa mũũru.”—Thoma Mathayo 5:33-37.
2. Taarĩria nĩkĩ ti hĩndĩ ciothe kwĩhĩta gũkoragwo gwĩ kũũru.
2 Hihi ciugo cia Jesu ironania atĩ kwĩhĩta o guothe nĩ kũũru? Aca gũtingĩtuĩka ũguo. O ta ũrĩa twerutire gĩcunjĩ-inĩ kĩrĩa kĩhĩtũku, Jehova Ngai o na Iburahimu ndungata yake thingu nĩ meehĩtire na mĩĩhĩtwa nĩ ũndũ wa maũndũ ma bata. Ningĩ, Watho wa Ngai nĩ woigĩte andũ mehĩte kũngĩagĩire ngarari maũndũ-inĩ mamwe. (Tham. 22:10, 11; Ndar. 5:21, 22) Kwoguo, kwĩ hĩndĩ Mũkristiano angĩbatara kwĩhĩta atĩ nĩ ekwaria ma rĩrĩa araruta ũira igooti-inĩ. Ningĩ, rĩmwe na rĩmwe, Mũkristiano no one kwagĩrĩire kwĩhĩta nĩguo atĩtĩrithĩrie arĩa angĩ ũrĩa arenda gwĩka kana ateithie kũniina ngarari. Ma nĩ atĩ, rĩrĩa Jesu oririo kĩũria na mwĩhĩtwa nĩ mũthĩnjĩri Ngai mũnene, ndaakararanirie na ũndũ ũcio ĩndĩ aaririe ma arĩ mbere ya Sanhedrini ya Ayahudi. (Mat. 26:63, 64) No rĩrĩ, Jesu ndaabataraga kwĩhĩta akĩaria na mũndũ o na ũrĩkũ. O na kũrĩ ũguo, nĩguo atĩtĩrithie atĩ ciugo ciake nĩ cia kwĩhokeka, kaingĩ aambagĩrĩria ũhoro wake na ciugo ici cia mwanya: “Ndamwĩra atĩrĩ, o ma, ma.” (Joh. 1:51; 13:16, 20, 21, 38) Rekei tuone maũndũ mangĩ marĩa tũngĩĩruta kuumana na cionereria cia Jesu, Paulo, na andũ angĩ arĩa Ĩĩ yao yarĩ Ĩĩ.
JESU—KĨONERERIA KĨRĨA KĨEGA BIŨ
3. Jesu eerire Ngai ũndũ ũrĩkũ mahoya-inĩ, na Ithe wa igũrũ oigire atĩa?
3 “Niĩ ũyũ! Ndĩ gũũka, . . . Gwĩkaga o ũrĩa wendaga, wee Ngai.” (Ahib. 10:7) Kũgerera ciugo icio cia bata, Jesu nĩ eerire Ngai atĩ nĩ egwĩka ũrĩa wothe kwarathĩtwo igũrũ rĩgiĩ Mbeũ ĩrĩa yeranĩirũo, o hamwe na gwĩtĩkĩra ‘kũgũthwo ndiira ya kũgũrũ’ nĩ Shaitani. (Kĩam. 3:15) Gũtirĩ mũndũ ũngĩ ũrĩ werutĩra kũruta wĩra mũritũ ta ũcio. Akĩaria arĩ igũrũ, Jehova nĩ oigire atĩ nĩ eehokete Mũrũwe biũ, o na gũtuĩka ndeerire Jesu ehĩte atĩ nĩ angĩahingirie uuge wake.—Luk. 3:21, 22.
4. Jesu aarekire Ĩĩ yake ĩtuĩke Ĩĩ na gĩkĩro kĩrĩkũ?
4 Hĩndĩ ciothe Jesu nĩ eekaga maũndũ marĩa aahunjagia na njĩra ya kũreka Ĩĩ yake ĩtuĩke Ĩĩ. Jesu ndeetĩkĩririe ũndũ o na ũrĩkũ ũmũhĩngĩce atiganĩrie wĩra ũrĩa aaheetwo nĩ Ithe wa kũhunjia ũhoro ũrĩa mwega wa Ũthamaki wa Ngai, na gũtua andũ arĩa Ngai aagucĩrĩirie harĩ we arutwo. (Joh. 6:44) Bibilia nĩ ĩtaaragĩria Jesu aahingirie uuge wake na gĩkĩro kĩrĩkũ kũgerera ciugo ici ciũĩkaine mũno: “Ciĩranĩro cia Ngai-rĩ, o na ciigana atĩa, Ĩĩ-ni yacio yugagwo no ũndũ wake we.” (2 Kor. 1:20) Hatarĩ nganja, Jesu nĩwe kĩonereria kĩrĩa kĩega biũ kĩa mũndũ wahingirie maũndũ marĩa eerire Ithe. Rĩu, nĩ twĩcirie ũhoro wa mũndũ werutanĩirie biũ kwĩgerekania na Jesu.
PAULO—AARĨ MŨNDŨ WA KUUGA NA GWĨKA
5. Mũtũmwo Paulo aatũigĩire kĩonereria kĩrĩkũ?
5 “Ngũgĩĩka-atĩa, Mwathani?” (Atũm. 22:10) Kũgerera ciugo ici itarĩ cia ũhinga, Paulo, ũrĩa wetagwo Saulu hĩndĩ ĩyo, nĩ eetĩkĩrire ũtongoria wa Mwathani Jesu, ũrĩa watũũgĩrĩtio, aamumĩrĩra kĩoneki-inĩ nĩguo amũgirie kũnyarira arutwo a Kristo. Nĩ ũndũ wa ũndũ ũcio, Saulu akĩĩrira mĩthiĩre yake ya tene arĩ na wĩnyihia, akĩbatithio, na agĩĩtĩkĩra wĩra wa mwanya ũrĩa aaheirũo wa kũruta ũira wĩgiĩ Jesu kũrĩ ndũrĩrĩ. Kuuma hĩndĩ ĩyo, Paulo ndaigana gũtiga gwĩta Jesu “Mwathani” wake, na kũmwathĩkĩra nginya mũthia wa ũtũũro wake gũkũ thĩ. (Atũm. 22:6-16; 2 Kor. 4:5; 2 Tim. 4:8) Paulo ndaatariĩ ta angĩ arĩa Jesu oigire ũũ igũrũ rĩao: “Na ningĩ mũnjĩtaga Mwathani ũyũ, Mwathani ũyũ, nĩkĩ, na mũtiĩkaga maũndũ marĩa ndĩmwĩraga?” (Luk. 6:46) Ĩĩ-ni, Jesu erĩgagĩrĩra arĩa othe metĩkagĩra atuĩke Mwathi wao mahingagie ciugo ciao, o ta mũtũmwo Paulo.
6, 7. (a) Nĩ kĩĩ gĩatũmire Paulo acenjie mũbango wake wa gũceera Korintho rĩngĩ, na nĩkĩ arĩa maamũkagĩrĩra matiarĩ na kĩhooto gĩa kwaga kũmwĩhoka? (b) Twagĩrĩirũo gũkorũo na mwerekera ũrĩkũ harĩ arĩa mamũrĩtwo gũtũtongoria?
6 Paulo aahunjagia ndũmĩrĩri ya Ũthamaki arĩ na kĩyo kũndũ guothe thĩinĩ wa Asia Nini na Rũraya, akĩambĩrĩria na agĩceerera ciũngano nyingĩ. Rĩmwe na rĩmwe, nĩ onaga kwagĩrĩire kwĩhĩta nĩguo onanie ũũma wa maũndũ marĩa aandĩkire. (Gal. 1:20) Rĩrĩa andũ amwe a Korintho moigire atĩ Paulo ndangĩhokeka, aandĩkire ũũ agĩĩtetera: “O ta ũrĩa Ngai atũũraga arĩ o wa kwĩhokeka-rĩ, ũhoro ũrĩa tũtũire tũmũheaga ti wa kuuga rĩmwe, Ĩĩ, na rĩngĩ Aca.” (2 Kor. 1:18) Rĩrĩa aandĩkaga ciugo icio, Paulo oimĩte Efeso arĩ rũgendo-inĩ arorete Korintho atuĩkanĩirie Makedonia. Kĩambĩrĩria-inĩ, aabangĩte kwamba gũceera Korintho rĩngĩ atanathiĩ Makedonia. (2 Kor. 1:15, 16) Ĩndĩ, o ta arori arĩa magendaga ũmũthĩ, rĩmwe na rĩmwe ng’endo ciao nĩ ibataraga gũcenjio. Mogarũrũku ta macio matiĩkagwo nĩ ũndũ wa itũmi o ũguo kana cia mwĩyendo, no nĩ tondũ wa ũndũ ũterĩgĩrĩirũo. Ũhoro-inĩ wĩgiĩ Paulo, gĩtũmi gĩa gũcerithĩria iceera rĩake rĩa gũthiĩ Korintho kĩarĩ nĩ getha kĩũngano kĩgunĩke. Na njĩra ĩrĩkũ hihi?
7 Ihinda inini thutha wa kũbanga mĩbango yake ya mbere, Paulo nĩ aakinyĩrĩirũo nĩ ũhoro atĩ kwarĩ na nyamũkano na ũtharia thĩinĩ wa kĩũngano gĩa Korintho. (1 Kor. 1:11; 5:1) Nĩguo arũnge ũndũ ũcio, nĩ aandĩkire ciugo nditũ marũa-inĩ make ma mbere kũrĩ Akorintho akĩmataara. Na handũ ha kuuma Efeso athiĩ Korintho-rĩ, Paulo aathuurire kwamba kũhe ariũ a Ithe ihinda mahũthĩre ũtaaro wake nĩguo thutha-inĩ agĩcoka gũthiĩ kuo, iceera rĩake rĩkaamekĩra ngoro makĩria. Akĩmahe ũũma wa kĩrĩa gĩatũmire acenjie mĩbango yake, Paulo aandĩkire ũũ marũa-inĩ make ma kerĩ: “Ngai nĩwe ndatua mũira wa ngoro yakwa ũrĩa yatariĩ, atĩ ũndũ ũrĩa watũmire njage gũũka Korintho no kũmũiguĩra tha inyuĩ.” (2 Kor. 1:23) Rekei tũtikanatuĩke ta andũ acio mookagĩrĩra Paulo; ithenya rĩa ũguo, nĩ tuonanagiei gĩtĩo kĩnene kũrĩ arĩa mamũrĩtwo gũtũtongoria. Ma nĩ atĩ nĩ twagĩrĩirũo kwĩgerekania na Paulo, o ta ũrĩa eegerekanagia na Kristo.—1 Kor. 11:1; Ahib. 13:7.
CIONERERIA INGĨ NJEGA
8. Rebeka aatũigĩire kĩonereria kĩrĩkũ?
8 ‘Nĩ ngũthiĩ.’ (Kĩam. 24:58) Kũgerera ciugo icio nini, Rebeka nĩ aamenyithirie nyina na mũrũ wa nyina wendi wake wa kuuma mũciĩ mũthenya oro ũcio, athiĩ na mũndũ atoĩ, rũgendo rwa kiromita 800 nĩguo agatuĩke mũtumia wa Isaka mũrũ wa Iburahimu. (Kĩam. 24:50-58) Ĩĩ ya Rebeka yarĩ Ĩĩ, na agĩtuĩka mũtumia mwĩtigĩri Ngai na mwĩhokeku harĩ Isaka. Ũtũũro-inĩ wake wothe thutha ũcio, aatũũrire hema-inĩ arĩ mũgeni kũu Bũrũri-inĩ wa Kĩĩranĩro. Nĩ aarathimirũo nĩ ũndũ wa wĩhokeku wake agĩtuĩka ũcũwe wa Jesu Kristo, Mbeũ ĩrĩa yeranĩirũo.—Ahib. 11:9, 13.
9. Ruthu aahingirie atĩa ciugo ciake?
9 ‘Aca, no nĩ tũgũcokania nawe kwa andũ anyu.’ (Ruth 1:10) Ciugo icio nĩcio Ruthu na Oripa, atumia a ndigwa Amoabi, maikarire makĩĩraga nyaciara wao Naomi, ũrĩa wa ndigwa hĩndĩ ĩrĩa oimaga Moabi acoke Bethilehemu. Mũthia-inĩ, thutha wa kũringĩrĩrio nĩ Naomi, Oripa agĩcoka kwao. No Aca ya Ruthu yarĩ Aca. (Thoma Ruthu 1:16, 17.) Aatũũrire arĩ mwĩhokeku harĩ Naomi, agĩtigana biũ na famĩlĩ yao na ũthathaiya wa maheeni wa Moabi. Nĩ aathire na mbere arĩ mũthathaiya mwĩhokeku wa Jehova na akĩrathimwo amu nĩ atuĩkire ũmwe wa atumia arĩa atano a ndĩra cia Kristo magwetetwo nĩ Mathayo.—Mat. 1:1, 3, 5, 6, 16.
10. Isaia aarĩ kĩonereria kĩega harĩ ithuĩ nĩkĩ?
10 “Niĩ ũyũ haha! Ndũma niĩ.” (Isa. 6:8, NW) Mbere ya kuuga ciugo icio, Isaia nĩ onire kĩoneki kĩna riri kĩa Jehova aikarĩire gĩtĩ Gĩake kĩa ũnene igũrũ rĩa hekarũ ya Isiraeli. O akĩĩroragĩra kĩoneki kĩu, Isaia aiguire Jehova oria ũũ: “Nũũ ngũtũma, na nũ ũgũtũthiĩra?” Jehova aacaragia mũndũ wa gũkinyia ndũmĩrĩri Yake kũrĩ andũ Ake aremi. Isaia nĩ aahingirie ciugo ciake—Ĩĩ yake yarĩ Ĩĩ. Makĩria ma mĩaka 46, aatungatire arĩ na wĩhokeku arĩ mũnabii, akĩheana ndũmĩrĩri ciĩgiĩ matuĩro o hamwe na ciĩranĩro cia magegania ciĩgiĩ gũcokio kwa ũthathaiya wa ma.
11. (a) Nĩkĩ kũhingia ciugo citũ nĩ ũndũ wa bata mũno? (b) Kũrĩ na cionereria irĩkũ cia gũtũkaania cia andũ amwe arĩa mataaririe ma?
11 Jehova aandĩkithirie ũhoro wa cionereria icio thĩinĩ wa Kiugo gĩake nĩ ũndũ witũ nĩkĩ? Na kũreka Ĩĩ itũ ĩtuĩke Ĩĩ nĩ ũndũ wa bata mũno nĩkĩ? Bibilia ĩheanaga mũkaana ĩtekũhithĩrĩra atĩ mũndũ ‘ũthatagia ũhoro mũrĩkanĩre’ nĩ ũmwe wa arĩa ‘magĩrĩire kũũragwo.’ (Rom. 1:31, 32) Firauni wa Misiri, Zedekia Mũthamaki wa Juda, na Anania na Safira nĩ amwe a cionereria njũru iria cionanĩtio thĩinĩ wa Bibilia cia andũ arĩa Ĩĩ yao ĩtaigana gũtuĩka Ĩĩ. Hatirĩ o na ũmwe wao warigĩrĩirie wega, na cionereria ciao nĩ cia gũtũkaania.—Tham. 9:27, 28, 34, 35; Ezek. 17:13-15, 19, 20; Atũm. 5:1-10.
12. Nĩ ũndũ ũrĩkũ ũrĩtũteithagia kũhingia ciugo citũ?
12 Tondũ tũratũũra “matukũ marĩa ma kũrigĩrĩria-rĩ,” tũikaranagia na andũ “matarĩ atheru [matarĩ ehokeku, NW],” andũ “metuaga ta meamũrĩire Ngai, no kũrega nĩmaregaga hinya ũrĩa uumaga ũhoro-inĩ ũcio.” (2 Tim. 3:1-5) No mũhaka twĩthemage thiritũ ta icio njũru o ũrĩa tũngĩhota. Ithenya rĩacio, twagĩrĩirũo kũũnganaga kaingĩ na arĩa merutanagĩria hĩndĩ ciothe kũreka Ĩĩ yao ĩtuĩke Ĩĩ.—Ahib. 10:24, 25.
ĨĨ YAKU ĨRĨA YA BATA MAKĨRIA
13. Nĩ Ĩĩ ĩrĩkũ ya bata makĩria mũrũmĩrĩri wa Jesu Kristo oigaga?
13 Mwĩhĩtwa wa bata mũno ũrĩa mũndũ angĩĩhĩta wĩgiĩ wĩyamũrĩri wake harĩ Ngai. Nĩ harĩ maita matatũ ngũrani marĩa arĩa marenda gũtuĩka arutwo a Jesu magĩaga na mweke wa kuuga Ĩĩ magĩcokia ciũria ciĩgiĩ kana nĩ megwĩka kũna ũrĩa mabatiĩ gwĩka. (Mat. 16:24) Rĩrĩa athuri erĩ maraaria na mũndũ ũrenda gũtuĩka mũhunjia ũtarĩ mũbatithie-rĩ, nĩ mamũũragia, “Nĩ ũrenda kũna gũtuĩka Mũira wa Jehova?” Thutha-inĩ, rĩrĩa mũndũ ũcio akũrakũra kĩĩroho na akonania nĩ arenda kũbatithio, athuri nĩ maikaraga thĩ nake na makamũũria, “Nĩ wĩyamũrĩire Jehova na njĩra ya mahoya?” Mũthia-inĩ, mũthenya wa kũbatithio, o ũmwe wa arĩa mekũbatithio nĩ acokagia kĩũria gĩkĩ, “Thĩinĩ wa mũthingi wa igongona rĩa Jesu Kristo-rĩ, nĩ wĩrirĩte mehia maku na ũkeyamũrĩra Jehova nĩ getha wĩke wendi wake?” Na njĩra ĩyo, andũ acio erũ marĩ mbere ya aira aingĩ, makoiga Ĩĩ igũrũ rĩgiĩ mwĩhĩtwa wao wa gũtungatĩra Ngai tene na tene.
14. Twagĩrĩirũo gũikaraga tũgĩĩthuthuragia na njĩra ĩrĩkũ?
14 O na angĩkorũo no hĩndĩ ũrabatithirio kana ũkoretwo ũgĩtungatĩra Ngai mĩaka mĩingĩ, nĩ ũbatiĩ gũikaraga ũgĩĩthuthuragia na kwĩyũria ciũria ta ici: ‘Niĩ nĩ thiaga na mbere kũhingia Ĩĩ yakwa ĩrĩa ya bata makĩria ngĩĩgerekania na Jesu Kristo? Hihi nĩ ndĩrathiĩ na mbere gwathĩkĩra Jesu na njĩra ya kũiga mbere wĩra wa kũhunjia na gũtua andũ arutwo ũtũũro-inĩ wakwa?’—Thoma 2 Akorintho 13:5.
15. Nĩ maũndũ marĩkũ ũtũũro-inĩ witũ harĩ bata kũreka Ĩĩ itũ ĩtuĩke Ĩĩ?
15 Kũhingia mwĩhĩtwa witũ wa kwĩyamũrĩra Ngai nĩ kuuga atĩ ningĩ no mũhaka tũkorũo tũrĩ ehokeku harĩ maũndũ mangĩ ma bata. Kwa ngerekano: Hihi ũrĩ thĩinĩ wa kĩhiko? Gĩthiĩ na mbere gũtĩa mwĩhĩtwa wa bata ũrĩa wehĩtire atĩ nĩ ũrĩendaga na ũkarũmbũiya ũrĩa mũhikanĩtie nake. Hihi nĩ mwandĩkanĩire na mũndũ atĩ nĩ ũkũruta wĩra mũna kana ũkaiyũria bomu ĩgiĩ maũndũ ma gĩtheokrasi? Kĩhingie ciugo ciaku na wĩke ũrĩa woigire. Hihi nĩ harĩ mũndũ mũthĩni wagwĩtire ũrĩthiĩ mũrĩanĩre na ũgĩtĩkĩra? Ndũkanakĩage gũthiĩ o na hangĩgĩa na mũndũ ũngĩ ũragwĩta handũ hegega. Kana hihi nĩ harĩ mũndũ wacemanirie nake ũkĩhunjia nyũmba kwa nyũmba ũkĩmwĩra atĩ nĩ ũgaacoka ũmũteithie makĩria kĩĩroho? Kĩgerie ũrĩa wothe ũngĩhota Ĩĩ yaku ĩtuĩke Ĩĩ, na Jehova nĩ ekũrathima ũtungata waku.—Thoma Luka 16:10.
KŨGUNĨKA NĨ MŨTHĨNJĨRI NGAI MŨNENE O WE MŨTHAMAKI WITŨ
16. Tũngĩkorũo twagĩte kũhingia ciugo citũ twagĩrĩirũo gwĩka atĩa?
16 Bibilia yonanagia atĩ nĩ ũndũ wa gũkorũo tũtarĩ akinyanĩru, “ithuothe nĩtũhĩngĩcagwo nĩ maũndũ maingĩ,” makĩria rĩrĩa tũkwaria. (Jak. 3:2) Twagĩrĩirũo gwĩka atĩa tũngĩmenya atĩ tũtinahingia uuge witũ? Watho-inĩ wa Ngai ũrĩa aaheire Isiraeli, nĩ harĩ na mweke wa kuonia tha mũndũ ‘angĩaririe ũhoro na kanua gake atawĩcirĩtie wega.’ (Alaw. 5:4-7, 11) O na rĩu nĩ harĩ mũbango wa wendo harĩ Akristiano arĩa mangĩka rĩĩhia ta rĩu. Tũngiumbũrĩra Jehova rĩĩhia rĩrĩa twĩkĩte, nĩ atuohagĩra arĩ na tha kũgerera Mũthĩnjĩri Ngai witũ Mũnene, Jesu Kristo. (1 Joh. 2:1, 2) O na kũrĩ ũguo, nĩguo tũthiĩ na mbere gwĩtĩkĩrĩka harĩ Ngai, no mũhaka tũgĩe na maciaro maronania nĩ twĩrirĩte na njĩra ya kwaga gũcokagĩra mehia ta macio, na gwĩka ũrĩa wothe tũngĩhota kũrũnga ũndũ ũrĩa ũthũkĩtio nĩ gũkorũo twarĩtie tũtegwĩciria. (Thim. 6:2, 3) Hatarĩ nganja, nĩ wega gwĩciragia mbere ya kuuga ũndũ tũtangĩhota kũhingia.—Thoma Kohelethu 5:2.
17, 18. Nĩ kĩĩrĩgĩrĩro kĩrĩkũ kĩa magegania arĩa othe merutanagĩria kũreka Ĩĩ yao ĩtuĩke Ĩĩ maigĩirũo?
17 Githĩ athathaiya othe a Jehova arĩa merutanagĩria kũreka Ĩĩ yao ĩtuĩke Ĩĩ matirĩ na kĩĩrĩgĩrĩro kĩa magegania! Harĩ arĩa 144,000 aitĩrĩrie maguta, makaaheo muoyo ũtagathira kũrĩa igũrũ, o kuo magaatũũrania na Jesu Ũthamaki-inĩ wake “na mathamakage hamwe nake mĩaka ngiri ĩmwe.” (Kũg. 20:6) Nao andũ angĩ milioni nyingĩ, nĩ magaakenera irathimo iria ikoimana na Ũthamaki wa Kristo thĩinĩ wa thĩ paradiso. Hĩndĩ ĩyo, nĩ magaateithio makinyanĩre kĩĩmwĩrĩ na kĩĩmeciria.—Kũg. 21:3-5.
18 Thutha wa gũkorũo tũrĩ ehokeku hĩndĩ ya igerio rĩa mũico mũthia-inĩ wa Wathani wa Mĩaka Ngiri wa Jesu, tũtigacoka gũkorũo na gĩtũmi gĩa kwaga kwĩhoka ciugo cia mũndũ o na ũrĩkũ. (Kũg. 20:7-10) Ĩĩ ciothe igaatuĩka Ĩĩ, nacio Aca ciothe, ituĩke Aca. Gĩtũmi nĩ tondũ andũ othe arĩa magaakorũo kuo makegerekanagia biũ na Ithe witũ wa igũrũ, Jehova, ‘Ngai ũrĩa wa ma.’—Thab. 31:5.
[Ciũria cia Wĩruti]
[Mbica karatathi ka 28]
Kuuma kũbatithio nginya gũkua gwake, Jesu nĩ aahingirie maũndũ marĩa eerĩte Ithe
[Mbica karatathi ka 30]
Hihi wee wĩ mwĩhokeku harĩ Ĩĩ yaku ĩrĩa ya bata makĩria?
