Riboti Ya Mũcemanio Wa O Mwaka

Mũcemanio Warĩ na Ũrũmwe na Mĩbango ya Gũcanjamũra

 MĨCEMANIO ya o mwaka ya Watch Tower Bible and Tract Society ya Pennsylvania hĩndĩ ciothe nĩ ĩtũmaga andũ macanjamũke. Ũndũ ũcio nĩ wonekire wega mũcemanio-inĩ wa 127, ũrĩa wekirũo Njuuma, Oktomba 1, 2011! Ageni arĩa meetĩtwo kuuma mĩena yothe thĩinĩ wa thĩ maagomanire Nyũmba-inĩ ya Kĩgomano ya Aira a Jehova taũni-inĩ ya Jersey, New Jersey, Amerika U.S.

Gerrit Lösch wa Kĩama Kĩrĩa Gĩtongoragia nĩ aanyitire ũgeni andũ acio maarĩ na gĩkeno. Eerire acio mokĩte kuuma mabũrũri 85 atĩ nĩ makenagĩra ũrũmwe wa mwanya thĩ yothe. Ũrũmwe ta ũcio nĩ ũira mwega na nĩ ũgoocithagia Jehova. Ti itherũ, ũrũmwe nĩguo ũndũ ũrĩa waatĩtĩrithirio mũno mũcemanio-inĩ ũcio.

RIBOTI NJEGA KUUMA MEXIKO

Gĩcunjĩ kĩa mbere kĩa mũcemanio ũcio nĩ kĩonanirie ũrũmwe wa andũ a Jehova. Baltasar Perla nĩ aahoire ũhoro ariũ a Ithe witũ atatũ arĩa makoragwo nao famĩlĩ-inĩ ya Betheli ya Mexiko igũrũ rĩgiĩ kũnyitithanio kwa wabici ithathatũ cia rũhonge cia Amerika ya Gatagatĩ na wabici ya rũhonge ya Mexiko. Nĩ ũndũ wa kũnyitithanio kũu, famĩlĩ ya Betheli ya Mexiko rĩu ĩrĩ na andũ marĩ na ũndũire ũtiganĩte kuuma mabũrũri maingĩ. Gũũka kwa Aira angĩ a Jehova kuuma mabũrũri matiganĩte nĩ kũmahete mweke wa gwĩkĩrana hinya. Nĩ ta Ngai oire raba mũnene akĩbuta mĩhaka ya mabũrũri.

Ũritũ ũmwe woimanire na kũnyitithanio kũu warĩ gũteithia ahunjia matikaigue ta mamũranĩtio na ithondeka rĩa Jehova o na gũtuĩka wabici cia honge cia mabũrũri mao itiraruta wĩra. Nĩ ũndũ wa ũguo, o kĩũngano nĩ kĩhetwo andirethi ya intaneti nĩgetha o na iria irĩ kũraihu ihote kwaranĩria na wabici ya rũhonge ĩmwe kwa ĩmwe.

ŨHORO WA ICA IKUHĨ KUUMA JAPAN

James Linton kuuma wabici ya rũhonge ya Japan nĩ aatarĩirie ũrĩa ariũ a Ithe witũ maahutirio nĩ gĩthingithia na tsunami iria ciahũũrire bũrũri ũcio mweri wa Machi 2011. Aira aingĩ a Jehova nĩ maakuĩrĩirũo nĩ endwa ao na makĩũrũo nĩ indo ciao. Aira a Jehova a kũngĩ nĩ maaheanire nyũmba makĩria ma 3,100 na ngari magana maingĩ. Erutĩri arĩa maanyitanagĩra na Kamĩtĩ cia Mĩako nĩ maarutire wĩra mũingĩ wa gũthondeka mĩciĩ ya ariũ a Ithe witũ. Andũ makĩria ma 1,700 nĩ meerutĩire gũteithĩrĩria o kũrĩa guothe kwarĩ na bata. Gĩkundi kĩa erutĩri kuuma Amerika U.S. nĩ gĩateithĩrĩirie gwaka Nyũmba cia Ũthamaki rĩngĩ, na erutĩri 575 gĩkĩnyitanĩra wĩra-inĩ ũcio.

Mabataro ma kĩĩroho na ma kĩĩmeciria ma arĩa maagũmĩirũo nĩ maarũmbũirio na njĩra nene. Athuri a kĩũngano makĩria ma 400 nĩ maatungatĩire kũrĩa kwabataraga iceera rĩa ũrĩithi. Kĩama Kĩrĩa Gĩtongoragia nĩ kĩonanirie atĩ nĩ gĩatangĩkagĩra acio maagũmĩirũo amu nĩ gĩatũmire arori erĩ arĩa maceeragĩra wabici cia honge kũu makamomĩrĩrie. Ciugo na ciĩko cia Aira a Jehova thĩ yothe nĩ ciamomĩrĩirie mũno.

 ŨHOOTANI MACIRA-INĨ

Athikĩrĩria nĩ maategeire matũ Stephen Hardy kuuma wabici ya rũhonge ya Ngeretha akĩarĩrĩria ũhootani wa ica ikuhĩ maciira-inĩ. Kwa ngerekano, thirikari ya Faranja yetagia Aira a Jehova bũrũri-inĩ ũcio igoti rĩa dola cia Amerika milioni 82. Ũndũ ũcio nĩ waarĩrĩirio rĩrĩa Igooti rĩa Ihooto cia Ũmũndũ rĩa Rũraya (ECHR) rĩanyitire mbaru Aira a Jehova, rĩkiuga atĩ thirikari ya Faranja nĩ yaagararĩte Gĩcunjĩ gĩa 9 kĩa Ngirimiti ya Rũraya, ĩrĩa ĩgitagĩra wĩyathi wa kĩĩndini. Ciugo iria ciahũthĩrirũo itua-inĩ rĩu, cionanirie atĩ cira ũcio ndwegiĩ mbeca, amu cioigĩte ũũ: “Kũrega gũtĩa ngwatanĩro ya kĩĩndini, kũgeria kũmĩharagania, kũhũthĩra ciugo cia kũmĩagĩra gĩtĩo, macio mothe nĩ maũndũ ma kũingĩrĩra kĩhooto kĩrĩa ĩheetwo nĩ Gĩcunjĩ gĩa 9 kĩa Ngirimiti ĩyo.”

Ningĩ igooti rĩu rĩa ECHR nĩ rĩatuire itua rĩega rĩtũkoniĩ cira-inĩ wĩgiĩ Armenia. Kuuma 1965, Igooti rĩu rĩatũire rĩnyitĩrĩire atĩ Ngirimiti ĩyo ya Rũraya ndĩagitagĩra andũ matikaingĩragio ũtungata-inĩ wa mbirarũ kĩa hinya. Kamĩtĩ Nene ya Igooti rĩu rĩa Rũraya ĩgĩtua atĩ “mũndũ angĩrega kũingĩra ũtungata-inĩ wa mbirarũ, nĩ ũndũ wa ũndũ mũna mũritũ ũtangĩgarũrĩka,” Ngirimiti ĩyo ya Rũraya nĩyo yagĩrĩire gwĩtĩkĩria ũndũ ũcio. Itua rĩrĩ nĩ rĩgũtũma Armenia na mabũrũri mangĩ ta Azerbaijan na Turkey matĩe kĩhooto kĩu.

MĨBANGO YA GWAKA

Guy Pierce wa Kĩama Kĩrĩa Gĩtongoragia nĩwe waacokire kwaria na akiuga nĩ oĩ atĩ arĩa othe marĩ mũcemanio-inĩ no mende kũmenya ũhoro wĩgiĩ mĩako itũ Gĩtarũ-inĩ kĩa New York. Nĩ onanirie video ĩgiĩ ũrĩa wĩra ũrathiĩ na mbere Wallkill, Patterson, na ciea iria iragũrirũo ica ikuhĩ icigo-inĩ cia Warwick na Tuxedo, New York. Mwena wa Wallkill, nyũmba ya gũikara ĩrĩa ĩtaanyĩtwo kũrĩka mwaka wa 2014 ĩrĩ na rumu ingĩ 300.

Kwĩna mĩbango ya gwaka kĩea-inĩ kĩa ĩka 248 taũni-inĩ ya Warwick. Mũrũ wa Ithe witũ Pierce oigire ũũ: “O na gũtuĩka tũtiũĩ wendi wa Jehova wĩgiĩ Warwick, tũraaka kĩea-inĩ kĩu tũrĩ na muoroto wa gũthamĩria gĩikaro kĩnene gĩa thĩ yothe kĩa Aira a Jehova kuo.” Mĩbango nĩ ĩrahaarĩrio ya kũhũthĩra kĩea kĩa ĩka 50 kĩrĩa kĩrĩ kiromita 10 rũgongo rwa Warwick kũiga macini na indo cia gwaka. Mũrũ wa Ithe witũ Pierce oigire ũũ: “Mwako ũcio wetĩkĩrio, tũrerĩgĩrĩra kũrĩkia gwaka thutha wa mĩaka ĩna. Thutha ũcio gĩikaro kĩa Brooklyn no kĩendio.”

Mũrũ wa Ithe witũ Pierce oririe ũũ: “Hihi Kĩama Kĩrĩa Gĩtongoragia nĩ gĩcenjetie mwĩcirĩrie wakĩo wĩgiĩ gũkuhĩrĩria kwa mĩnyamaro ĩrĩa mĩnene?” Agĩcokia: “Aca. Mĩnyamaro ĩrĩa mĩnene ĩngĩkorerera mwako ũcio ũtarĩkĩte, ũcio ũngĩkorũo ũrĩ ũndũ mwega, mwega mũno!”

WĨMENYERERE MŨRŨTHI ŨKŨRARAMA

Stephen Lett, mũrũ wa Ithe witũ ũngĩ wa Kĩama Kĩrĩa Gĩtongoragia, agĩcoka akĩarĩrĩria rĩandĩko rĩa 1 Petero 5:8: ‘Ikaragai mũterigĩtwo, na mwĩhũgage. Atĩrĩ, Mũcukani, thũ yanyu, acangaga ta mũrũthi ũkũrarama, agĩcaragia mũndũ wa gũtambura.’ Mũrũ wa Ithe witũ Lett oigire atĩ maũndũ mamwe megiĩ mĩrũthi nĩ matũmaga ngerekano ya Petero yagĩrĩre harĩ gũtaarĩria ũrĩa Mũcukani ahaana.

Tondũ mĩrũthi ĩkoragwo na hinya na ihenya gũkĩra andũ, tũtiagĩrĩirũo kũgeria kũũrĩra kana kũrũa na Shaitani tũkĩhũthĩra hinya witũ. Nĩ tũrabatara ũteithio wa Jehova. (Isa. 40:31) Mũrũthi ũhĩtaga ũcemete, kwoguo no mũhaka twĩtheme nduma ya kĩĩroho kũrĩa Shaitani ethaga mũndũ wa gũtambura. O ta ũrĩa mũrũthi ũragaga gathiya kana gacaũ ka njagĩ, no taguo Shaitani atarĩ tha na eendaga gũtũũraga. Na thutha wa mũrũthi kũhũna, nyamũ ĩrĩa ũkũnyitĩte ndĩcokaga kũmenyeka, o ta ũrĩa  ‘mĩtũũrĩre ya kũrigĩrĩria’ ya arĩa Shaitani atamburĩte ‘ĩthũkaga kũrĩ ĩrĩa ya mbere.’ (2 Pet. 2:20) Nĩ ũndũ ũcio nĩ tũrabatara kũregana na Shaitani na tũrũmie biũ motaaro ma Bibilia marĩa twĩrutĩte.—1 Pet. 5:9.

KENAGĨRA GŨKORŨO ŨRĨ NYŨMBA-INĨ YA JEHOVA

Mwaria ũrĩa waarũmĩrĩire, Samuel Herd, wa Kĩama Kĩrĩa Gĩtongoragia oigire ũũ: “Ithuothe nĩ tũheetwo handũ nyũmba-inĩ ya Jehova.” Akristiano othe nĩ mahetwo handũ thĩinĩ wa “nyũmba” ya Ngai—hekarũ yake ya kĩĩroho—mũbango wa kũmũthathaiya kũgerera igongona rĩa ũkũũri rĩa Jesu. Harĩa tũheetwo nĩ hagĩrĩire kuonwo harĩ mweke wa bata. O ta Daudi, twendaga ‘gũikaraga nyũmba-inĩ ya Jehova matukũ mothe ma mĩoyo itũ.’—Thab. 27:4.

Mũrũ wa Ithe witũ Herd nĩ aagwetire Thaburi 92:12-14 agĩcoka akĩũria, “Jehova atũhotithagia atĩa kũgaacĩra?” Aacokirie ũũ: “Thĩinĩ wa paradiso ya kĩĩroho, Ngai nĩ atuonagia wendo, agatũgitĩra, na agatũnyotora na ũhoro wa ma. Nĩ tũmũcokagĩrie ngatho nĩ ũndũ wa maũndũ macio.” Mũrũ wa Ithe witũ Herd aacokire agĩĩkĩra athikĩrĩria ngoro ũũ: “Rekei tũiganagĩre gũkorũo tũrĩ nyũmba-inĩ ya Jehova—to kwa ihinda inini no nĩ nginya tene na tene.”

AKRISTIANO NĨ MATĨĨTE KIUGO KĨA NGAI

David Splane, o wa Kĩama Kĩrĩa Gĩtongoragia, aataarĩirie mĩario-inĩ ĩrĩa yarũmĩrĩire atĩ hĩndĩ ciothe Akristiano a ma nĩ makoretwo magĩtĩa Kiugo kĩa Ngai. Karine-inĩ ya mbere, nĩkĩo meehokire harĩ gũtua itua rĩgiĩ kũrua. (Atũm. 15:16, 17) No karine-inĩ ya kerĩ andũ amwe arĩa meĩtaga Akristiano arĩa maarutĩtwo ũũgĩ wa Kĩgiriki nĩ maambĩrĩirie kũhũthĩra ũũgĩ wao handũ ha Maandĩko. Thutha-inĩ, amwe makĩambĩrĩria kũhũthĩra mawoni ma atongoria me gatũ a ndini na athamaki a Roma ithenya rĩa ũrutani wa Bibilia, makĩrehe morutani maingĩ ma maheeni.

Mũrũ wa Ithe witũ Splane oigire atĩ, Jesu nĩ aahũthĩrire ngerekano kuonania atĩ gũtirĩ hĩndĩ kũngĩagire Akristiano a ma aitĩrĩrie maguta thĩinĩ wa thĩ nĩguo marũĩrĩre ũhoro wa ma. (Mat. 13:24-30) Tũtingĩhota kuuga tũrĩ na ma maarĩ a. O na kũrĩ ũguo, ihinda-inĩ rĩa karine nyingĩ, andũ aingĩ nĩ makoretwo makĩregana na morutani na mĩtugo  ĩtaratwarana na maandĩko. Amwe ao nĩ ta Mũthikabu Agobard wa Lyons karine-inĩ ya 9, Peter wa Bruys, Henry wa Lausanne, na Valdès (kana, Waldo) karine-inĩ ya 12, John Wycliffe karine-inĩ ya 14, William Tyndale karine-inĩ ya 16, na Henry Grew na George Storrs karine-inĩ ya 19. Ũmũthĩ Aira a Jehova mathiaga na mbere kũrũmia ithimi cia Kĩĩmaandĩko na gũtĩa Bibilia ĩrĩ mũthingi wa ũhoro wa ma. Nĩkĩo Kĩama Kĩrĩa Gĩtongoragia gĩthuurĩte rĩandĩko ritũ rĩa mwaka wa 2012 rĩkorũo rĩrĩ Johana 17:17: “Ũhoro waku nĩguo ũhoro-ũrĩa-wa-ma.”

MOGARŨRŨKU MANENE MEGIĨ ŨRUTANI NA ŨTUNGATA

Kĩmenyithia kĩrĩa gĩathomirũo nĩ Anthony Morris wa Kĩama Kĩrĩa Gĩtongoragia nĩ gĩataarĩirie mogarũrũku harĩ amishonarĩ na mapainia a mwanya. Kwambĩrĩria Septemba 2012, irathi cia Cukuru ya Bibilia ya Akristiano Arĩa Mahikanĩtie irĩĩkagĩrũo mabũrũri-inĩ mamwe. Muoroto wa Cukuru ya Gileadi nĩ ũcenjetio. Kwambĩrĩria Oktomba mwaka ũcio ũrathirire, aria othe marĩthiaga Gileadi marĩkoragwo moimĩte thĩinĩ wa ũtungata mũna wa mwanya wa hĩndĩ ciothe—marĩ amishonarĩ arĩa matathiĩte Gileadi, mapainia a mwanya, arori arĩa magendaga, kana arĩa matungataga Betheli. Arĩa maarĩkia cukuru ĩyo marĩhũthagĩrũo gwĩkĩra hinya andũ a Ngai marĩ wabici-inĩ cia honge, wĩra-inĩ wa gũthiũrũrũka, kana kũndũ kũrĩa kũrĩ andũ aingĩ magekĩre ciũngano ngoro wĩra-inĩ wa kũhunjia.

Mapainia a mwanya makĩria nĩ megũtũmwo icigo-inĩ iria irĩ kũraihu na irĩa ciĩikarĩtie. Kwambĩrĩria Janũarĩ 1, 2012, arĩa megũkorũo makiuma Cukuru ya Bibilia ya Ariũ a Ithe Witũ Arĩa Matahikanĩtie na Cukuru ya Bibilia ya Akristiano Arĩa Mahikanĩtie, marĩtũmagwo marĩ mapainia a mwanya mathiĩ icigo-inĩ iria irĩ kũraihu gwa kahinda makandandũre wĩra wa kũhunjia kuo. Marĩtũmagwo marĩ mapainia a mwanya mwaka rita rĩmwe ihinda rĩa mĩaka ĩtatũ. Arĩa marĩgĩaga na moimĩrĩro mega no mahũthĩrũo marĩ mapainia a mwanya a gũthiĩ na mbere.

Mũcemanio wa mwaka wa 2011 warĩ ihinda rĩa gĩkeno. Tũrerĩgĩrĩra Jehova nĩ ekũrathima mĩbango ĩyo mĩerũ ya kwandandũra wĩra witũ wa kũhunjia na kũrũmia ũrũmwe wa aarĩ na ariũ a Ithe witũ wa thĩ yothe nĩguo tũmũrehere ngumo na ũgooci.

[Mbica karatathi ka 18, 19]

Kũmamenya Wega Makĩria

Ningĩ mũcemanio-inĩ ũcio atumia kenda a ndigwa arĩa athuri ao maatungatagĩra thĩinĩ wa Kĩama Kĩrĩa Gĩtongoragia nĩ maahoirũo ũhoro. Aarĩ a Ithe witũ Marina Sydlik, Edith Suiter, Melita Jaracz, Melba Barry, na Sydney Barber nĩ moigire ũrĩa maamenyire ma na makĩingĩra ũtungata-inĩ wa hĩndĩ ciothe. O ũmwe wao nĩ aataarĩirie athikĩrĩria maũndũ ma bata aririkanaga, ũhoro wĩgiĩ mũrũme, na irathimo iria maakeneire hamwe. Makĩrĩkĩrĩria gĩcunjĩ kĩu gĩa kũhoya ũhoro, athikĩrĩria mainire rwĩmbo namba 86, rũrĩa rũkoragwo na kĩongo “Wanawake Waaminifu, Dada Wakristo.”

[Mbica]

(Igũrũ) Daniel na Marina Sydlik; Grant na Edith Suiter; Theodore na Melita Jaracz

(Mũhuro) Lloyd na Melba Barry; Carey na Sydney Barber

[Mbica karatathi ka 16]

(Nĩgetha wone ũhoro wothe, rora ngathĩti yo nyene)

Wabici ithathatũ cia honge rĩu irũgamĩrĩirũo nĩ wabici ya rũhonge ya Mexiko

[Mbica karatathi ka 16]

MEXIKO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Mbica karatathi ka 17]

Ũrĩa gĩikaro kĩnene gĩa thĩ yothe kĩa Aira a Jehova gĩgaakorũo kĩhaana taũni-inĩ ya Warwick, New York