Ndaciarirũo mwaka wa 1983. Ndĩ mũnyinyi ndiarĩ na mathĩna ma mwĩrĩ, no rĩrĩa ndakinyirie mĩaka ikũmi, ngĩambĩrĩria kũigua ruo rũingĩ mwĩrĩ wakwa wothe. Mĩaka ta ĩĩrĩ thutha ũcio, ndokĩrire mũthenya ũmwe rũcinĩ ngĩremwo nĩ gũthiĩ. Ndaageririe biũ gũthiĩ, no magũrũ makwa nĩ maathirĩte hinya biũ. Ndirĩ ndahota gũthiĩ kuuma mũthenya ũcio. Ningĩ mũrimũ ũcio nĩ watũmire mwĩrĩ wakwa wage gũkũra rĩngĩ. O na ũmũthĩ, mwĩrĩ wakwa no mũnini ta wa mwana.

Mĩeri mĩnini thutha wa kũrwara na kũremwo nĩ kuuma mũciĩ, nĩ twaceereirũo nĩ Aira a Jehova erĩ. Ageni mangĩaceerire gwitũ, kaingĩ nĩ ndehithaga no mũthenya ũcio nĩ ndaathikĩrĩirie atumia acio. Tũkĩaria nao nĩ maaririe ũhoro wĩgiĩ Paradiso, na ũndũ ũcio nĩ wandirikanirie maũndũ ndaiguĩte ndĩ na kĩndũ mĩaka ĩtano. Hĩndĩ ĩyo, mishonarĩ waikaraga Suriname wetagwo Jethro, nĩ ookaga gĩcagi-inĩ gitũ riita rĩmwe o mweri, na nĩ eerutaga Bibilia na baba. Jethro aanjĩkagĩra maũndũ na njĩra ya wendo na nĩ ndamwendete mũno. Ningĩ rĩmwe na rĩmwe nĩ twathiaga mĩcemanio ya Aira a Jehova ĩrĩa yekagĩrũo gĩcagi-inĩ gitũ tũrĩ na guka na cũcũ. Nĩ ũndũ ũcio rĩrĩa Florence, mũtumia ũmwe harĩ acio maanjeereire mũthenya ũcio aanjũririe kana no nyende kwĩruta makĩria, ngĩmwĩra no nyende.

Florence nĩ aacokire rĩngĩ marĩ na mũthuri wake Justus, na makĩambĩrĩria kũnduta Bibilia. Rĩrĩa maamenyire atĩ ndiahotaga gũthoma, nĩ maandutire gũthoma. Thutha wa ihinda ngĩmenya gũthoma. Hĩndĩ ĩmwe, Florence na mũthuri wake nĩ maanjĩrire atĩ nĩ megũthamĩra Suriname kũrĩa maatũmĩtwo makahunjie. Ũndũ wa kĩeha nĩ atĩ gũtiarĩ na mũndũ thĩinĩ wa Orealla ũngĩathiire na mbere kũnduta Bibilia. No wega nĩ atĩ Jehova ndaariganĩirũo nĩ niĩ.

Ihinda inini thutha ũcio, painia ũmwe wetagwo Floyd nĩ aathamĩire Orealla, na akĩngora gwitũ akĩhunjia nyũmba kwa nyũmba. Na rĩrĩa aanjĩrire ũhoro wĩgiĩ kwĩruta Bibilia, ngĩthekatheka. Akĩnjũria, “Nĩ kĩĩ gĩatũma ũtheke?” Ngĩmwĩra nĩ nderutĩte broshua ya Ngai Endaga Twĩke Atĩa? na ngambĩrĩria kwĩruta ibuku rĩa Ujuzi Uongozao Kwenye Uhai Udumuo Milele. * Nĩ ndaamũtaarĩirie kĩrĩa gĩatũmĩte ndige kwĩruta. Floyd nĩ aandutire gĩcunjĩ kĩrĩa gĩatigarĩte kĩa ibuku rĩa Ujuzi, no o nake nĩ aacokire agĩtũmwo kũndũ kũngĩ akahunjie. O rĩngĩ ngĩtigwo itarĩ na mũndũ ũngĩnduta Bibilia.

No mwaka-inĩ wa 2004, Granville na Joshua, arĩa maarĩ mapainia a mwanya nĩ maatũmirũo  kũhunjia gĩcagi-inĩ kĩa Orealla. Nĩ mookire gwitũ makĩhunjia nyũmba kwa nyũmba. Na rĩrĩa maanjũririe kana no nyende kwĩruta Bibilia, ngĩthekatheka. Nĩ ndamoririe kana no mandute ibuku rĩa Ujuzi kuuma kĩambĩrĩria. Ndeendaga kuona kana mekũnduta maũndũ o marĩa nderutĩte na arĩa twerutaga nao hau kabere. Granville nĩ aanjĩrire atĩ nĩ maambĩrĩirie gwĩka mĩcemanio kũu gĩcagi-inĩ. Nĩ ndeendaga gũthiĩ mĩcemanio, o na gũtuĩka ndioimĩte mũciĩ ihinda-inĩ rĩa mĩaka ta ikũmi. Kwoguo Granville nĩ ookire mũciĩ kũngĩra na akĩnjigĩrĩra igũrũ rĩa wheelchair na akĩndindĩka nginya Nyũmba-inĩ ya Ũthamaki.

Thutha wa ihinda, Granville akĩnjĩkĩra ngoro ndĩyandĩkithie Cukuru-inĩ ya Ũtungata wa Gĩtheokrasi. Aanjĩrire: “O na akorũo ndũrahota gũthiĩ, no ũhote kwaria. Mũthenya ũmwe nĩ ũkaruta mĩario ya andũ othe, na nĩ ũkahota kũmĩruta.” Ciugo icio ciake cia gwĩkĩra ngoro nĩ ciatũmire ngĩe na ũmĩrĩru.

Ngĩcoka ngĩambĩrĩria kũhunjagia hamwe na Granville. No barabara nyingĩ gĩcagi-inĩ gitũ itiarĩ njega, na kwoguo wheelchair ndĩngĩahotire gũthiĩ. Kwoguo ngĩũria Granville kana no anguage na wheelbarrow tũgĩthiĩ kũhunjia. Mũbango ũcio warĩ mwega mũno. Ĩpuro 2005, ngĩbatithio. Thutha wa kũbatithio, ariũ a Ithe witũ makĩmenyeria wĩra wa kũrũmbũiya mabuku na mũgambo thĩinĩ wa Nyũmba ya Ũthamaki.

Thutha ũcio mwaka wa 2007, nĩ twacemanirie na ũndũ mũritũ tondũ baba nĩ aakuire thutha wa kũgĩa na aksidenti ya gatarũ. Ũndũ ũcio nĩ wahutirie famĩlĩ itũ mũno. Granville nĩ aahoyaga hamwe na ithuĩ na agatũthomera maandĩko ma gũtwĩkĩra ngoro. Mĩaka ĩĩrĩ thutha ũcio nĩ twacemanirie na ũndũ ũngĩ mũritũ rĩrĩa Granville aakuire nĩ ũndũ wa aksidenti ya gatarũ.

Kĩũngano gitũ kĩnini gĩgĩtigwo gĩtarĩ na mũthuri wa kĩũngano, o tiga ndungata ĩmwe ya kĩũngano. Nĩ ndatuurirũo mũno rĩrĩa Granville aakuire tondũ aarĩ mũrata wakwa mũno. Nĩ aandeithagia mũno kĩĩroho, o na nginya kĩĩmwĩrĩ. Kiumia kĩrĩa aakuire, nĩ niĩ ndagaĩirũo wĩra wa gũthoma ibungo cia Mũrangĩri. Thutha wa gũthoma ibungo igĩrĩ cia mbere, ngĩambĩrĩria kũrĩra na gũita maithori itegũtigithĩria. Ndaabatarire kwehera hau mbere.

Nĩ ndaambĩrĩirie gũcokwo nĩ thayũ rĩrĩa ariũ a Ithe witũ kuuma kĩũngano-inĩ kĩngĩ maambĩrĩirie gũka gũtũteithia. Ningĩ wabici ya rũhonge nĩ yatũmire painia wa mwanya wetagwo Kojo kĩũngano-inĩ gitũ. Ũndũ ũngĩ wanjĩkĩrire ngoro mũno nĩ kuona mami na mũrũ wa maitũ ũrĩa mũnini makĩĩruta Bibilia na nginya makĩbatithio. Thutha ũcio Machi 2015, nĩ ndamũrirũo gũtuĩka ndungata ya kĩũngano. Thutha wa ihinda, nĩ ndarutire mĩario ya andũ othe riita rĩakwa rĩa mbere. Mũthenya ũcio, nĩ ndarĩrire nĩ ũndũ wa gĩkeno ndaririkana ciugo iria Granville aanjĩrĩte mĩaka ĩigana ũna mbere ĩyo: “Mũthenya ũmwe nĩ ũkaaruta mĩario ya andũ othe, na nĩ ũkahota kũmĩruta.”

Programu cia JW Broadcasting nĩ indeithĩtie kuona atĩ kũrĩ na Aira angĩ a Jehova marahĩtũkĩra ũndũ-inĩ ta ũrĩa ndĩrahĩtũkĩra. Ĩndĩ o na marĩ na mawathe matiganĩte, nĩ mahotaga kũhingia maũndũ maingĩ na magakorũo na gĩkeno. Ũndũ ũcio nĩ ũndeithĩtie kuona atĩ o na niĩ harĩ o maũndũ ingĩhingia. Wendi wakwa wa gũtungatĩra Jehova na hinya ũrĩa ndĩ naguo nĩ watũmire njoe ũpainia wa hĩndĩ ciothe. Na Septemba 2019, nĩ ndaamũkĩrire ũhoro iterĩgagĩrĩra. Nĩ ndaamũrirũo gũtuĩka mũthuri wa kĩũngano, kĩũngano-inĩ gitũ kĩa ahunjia ta 40.

Nĩ njokagia ngatho mũno nĩ ũndũ wa aarĩ na ariũ a Ithe witũ arĩa maandutire Bibilia na makĩndeithia gũtungatĩra Jehova. Makĩria ma maũndũ mothe, nĩ njokagĩria Jehova ngatho mũno tondũ ndarĩ ariganĩrũo nĩ niĩ.