1. Nĩ itua rĩrĩkũ rĩa bata andũ othe marabatara gũtua?

 ANDŨ othe ũmũthĩ marĩ na itua rĩa bata marabatara gũtua. Nĩ marabatara gũtua kana mekũnyita mbaru Jehova Ngai arĩ we ũrĩ na kĩhooto gĩa gũkorũo arĩ Mwathani igũrũ na thĩ, kana mekũnyita mbaru thũ yake, nĩwe Shaitani ũrĩa Mũcukani. O mũndũ no nginya athuure mwena ũmwe, no ndangĩikara hau gatagatĩ. Itua rĩrĩa megũtua, nĩrĩo rĩgaatũma mone muoyo wa tene na tene kana morũo nĩguo. (Mat. 25:31-33, 46) Hĩndĩ ya ‘thĩna ũrĩa mũnene’ nĩrĩo andũ mageekĩrũo rũũri rwa kũhonoka kana rwa kũniinwo.—Kũg. 7:14; 14:9-11; Ezek. 9:4, 6.

2. (a) Ibuku rĩa Ahibirania 10:35-39 rĩtwĩkĩraga ngoro gwĩka atĩa? (b) Ibuku rĩa Kũguũrĩrio rĩngĩtũteithia atĩa?

² Thoma Ahibirania 10:35-39. Angĩkorũo ũthuurĩte kũnyita mbaru wathani wa Jehova, nĩ ũtuĩte itua rĩa ũũgĩ. Rĩu ũrĩ na wendi wa gũteithia andũ arĩa angĩ gũtua itua rĩrĩa rĩega. No ũhũthĩre ũhoro ũrĩa ũrĩ ibuku-inĩ rĩa Kũguũrĩrio kũmateithia. Ibuku rĩu rĩa kũgegania nĩ rĩonanagia ũrĩa gũgaathiĩ harĩ andũ arĩa makararagia Jehova, na ningĩ rĩkonania irathimo iria igaakenerũo nĩ andũ arĩa manyitaga mbaru wathani wake marĩ na wĩhokeku. Nĩ twagĩrĩirũo gũthuthuria ma icio cia bata. Gwĩka ũguo nĩ kũrĩkĩraga hinya itua ritũ rĩa gũthiĩ na mbere gũtungatĩra Jehova. Ningĩ no tũhũthĩre maũndũ marĩa twĩrutĩte gũteithia andũ arĩa angĩ gũtua itua rĩrĩa rĩagĩrĩire na kũrĩrũmia.

3. Tũkwarĩrĩria maũndũ marĩkũ gĩcunjĩ-inĩ gĩkĩ?

³ Thĩinĩ wa gĩcunjĩ gĩkĩ, tũkwarĩrĩria ciũria ici: Gũgaathiĩ atĩa harĩ arĩa manyitaga mbaru wathani wa Ngai? Na gũgaathiĩ atĩa harĩ andũ arĩa manyitaga mbaru nyamũ ya gĩthaka ya rangi mũtune, ĩrĩa ĩtaarĩirio thĩinĩ wa ibuku rĩa Kũguũrĩrio?

4. Mũtũmwo Johana oonire gĩkundi kĩrĩkũ kĩrĩ na Jesu kũrĩa igũrũ?

⁴ Kũgerera kĩoneki, mũtũmwo Johana nĩ oonire ikundi igĩrĩ cia andũ maanyitaga mbaru wathani wa Jehova na makĩamũkĩra irathimo cia muoyo wa tene na tene. Gĩkundi kĩa mbere kĩarĩ na andũ 144,000. (Kũg. 7:4) Maagũrirũo kuuma gũkũ thĩ nĩguo magathondeke thirikari, kana Ũthamaki kũrĩa igũrũ marĩ na Jesu. Andũ acio marĩ hamwe na Jesu magaakorũo marĩ athani igũrũ rĩa thĩ. (Kũg. 5:9, 10; 14:3, 4) Kĩoneki-inĩ kĩu, Johana aamonire marũgamĩte hamwe na Jesu kĩrĩma-inĩ gĩa Zayuni kũrĩa igũrũ.—Kũg. 14:1.

5. Nĩ ũndũ ũrĩkũ ũgwĩkĩka ica ikuhĩ harĩ arĩa matigarĩte a arĩa 144,000?

⁵ Kuuma mahinda-inĩ ma atũmwo nginya ihinda-inĩ rĩrĩ, andũ ngiri nyingĩ nĩ makoretwo magĩthuurũo nĩguo matuĩke amwe a arĩa 144,000. (Luk. 12:32; Rom. 8:17) O na kũrĩ ũguo, Johana eerirũo atĩ no namba nini ya andũ acio magaakorũo matigarĩte gũkũ thĩ matukũ-inĩ ma mũthia. Acio magaakorũo ‘matigarĩte’ mageekĩrũo “mũhũũri” wa mũico wa kuonania nĩ metĩkĩrĩkĩte nĩ Jehova mbere ya thĩna ũrĩa mũnene kwambĩrĩria. (Kũg. 7:2, 3; 12:17) Thutha ũcio hĩndĩ ya thĩna ũrĩa mũnene, nĩ magaatwarũo igũrũ nĩguo manyitanĩre hamwe na acio angĩ a arĩa 144,000, arĩa maakuĩte marĩ ehokeku. Magaatuĩka athamaki hamwe na Jesu Ũthamaki-inĩ wa Ngai.—Mat. 24:31; Kũg. 5:9, 10.

6-7. (a) Nĩ gĩkundi kĩrĩkũ kĩngĩ Johana oonire, na nĩ ũndũ ũrĩkũ eerirũo ũkĩgiĩ? (b) Aitĩrĩrie maguta arĩa matigarĩte na andũ a “kĩrĩndĩ kĩnene” magĩrĩire gũkenio nĩ ũhoro ũrĩa ũrĩ thĩinĩ wa Kũguũrĩrio mũrango wa 7 nĩkĩ?

⁶ Thutha wa Johana kuona gĩkundi kĩa andũ arĩa magaathiĩ igũrũ, acokaga akona “andũ kĩrĩndĩ kĩnene.” Ngũrani na acio 144,000, kĩrĩndĩ kĩu gĩtingĩtarĩka. (Kũg. 7:9, 10) Nĩ ũndũ ũrĩkũ Johana aataarĩirio ũkĩgiĩ? Eerirũo ũũ: “Aya nĩ arĩa moimĩte thĩna-inĩ ũrĩa mũnene, na nĩ mathambĩtie kanjũ ciao na thakame ya Gatũrũme igatuĩka cia rangi mwerũ.” (Kũg. 7:14) Thutha wa andũ acio a “kĩrĩndĩ kĩnene” kũhonoka mĩnyamaro ĩrĩa mĩnene, nĩ magaatũũra thĩinĩ wa thĩ na makenere irathimo nyingĩ.—Thab. 37:9-11, 27-29; Thim. 2:21, 22; Kũg. 7:16, 17.

⁷ Tũkorũo tũrĩ na kĩĩrĩgĩrĩro gĩa gũgaathiĩ kũrĩa igũrũ kana gũgaatũũra gũkũ thĩ, hihi nĩ twĩtĩkĩtie atĩ nĩ tũkoona maũndũ marĩa marĩ thĩinĩ wa mũrango wa 7 wa ibuku rĩa Kũguũrĩrio makĩhinga? Nĩ twagĩrĩirũo gwĩtĩkia ũguo. Rĩgaakorũo rĩrĩ ihinda rĩa gũcanjamũra mũno harĩ ikundi icio igĩrĩ cia ndungata cia Jehova. Nĩ tũgaakena mũno nĩ ũndũ wa gũkorũo tũtuĩte itua rĩa kũnyita mbaru wathani wa Jehova. Nĩ ũndũ ũrĩkũ ũngĩ ibuku rĩa Kũguũrĩrio rĩtaarĩirie igũrũ rĩgiĩ thĩna ũrĩa mũnene?—Mat. 24:21.

8. Thĩna ũrĩa mũnene ũkaambĩrĩria atĩa, na andũ aingĩ mageeka atĩa?

⁸ O ta ũrĩa gĩcunjĩ kĩrĩa kĩhĩtũku kĩronanirie, ica ikuhĩ thirikari cia thĩ nĩ igũtharĩkĩra Babuloni Ũrĩa Mũnene, nĩwe ndini ciothe cia maheeni gũkũ thĩ. (Kũg. 17:16, 17) Ũndũ ũcio ũgaakorũo ũrĩ kĩambĩrĩria gĩa thĩna ũrĩa mũnene. Hihi thĩna ũcio nĩ ũgaatũma andũ aingĩ moke ũthathaiya-inĩ wa Jehova? Aca. Ngũrani na ũguo, Kũguũrĩrio mũrango wa 6 wonanagia atĩ ihinda-inĩ rĩu, andũ arĩa matagaakorũo magĩtungatĩra Jehova magaacaria ũgitĩri kuuma kũrĩ mathondeka ma gĩũteti na ma kĩbiacara ma thĩ ĩno marĩa maringithanĩtio na irĩma. Tondũ andũ acio matigaakorũo makĩnyita mbaru Ũthamaki wa Ngai, Jehova akaamona marĩ aregani.—Luk. 11:23; Kũg. 6:15-17.

9. Nĩ na njĩra ĩrĩkũ andũ a Jehova makooneka marĩ ngũrani hĩndĩ ya thĩna ũrĩa mũnene, na maumĩrĩro magaakorũo marĩ marĩkũ?

 ⁹ Ihinda-inĩ rĩu iritũ rĩa thĩna ũrĩa mũnene, andũ a Jehova ehokeku nĩ magaakorũo marĩ ngũrani na andũ arĩa angĩ. No o tu thĩinĩ wa thĩ magaakorũo magĩtungatĩra Jehova Ngai na makarega kũnyita mbaru “nyamũ ya gĩthaka.” (Kũg. 13:14-17) Mũrũgamo wao mũrũmu nĩ ũkaarakaria mũno arĩa mareganaga na Jehova. Nĩ ũndũ ũcio, ngwatanĩro ya mabũrũri nĩ ĩgaatharĩkĩra andũ a Ngai thĩinĩ wa thĩ yothe. Bibilia ĩtaga tharĩkĩro ĩyo tharĩkĩro ya Gogu wa Magogu.—Ezek. 38:14-16.

10. O ta ũrĩa Kũguũrĩrio 19:19-21 yonanĩtie-rĩ, Jehova ageeka atĩa rĩrĩa andũ ake magaatharĩkĩrũo?

¹⁰ Jehova ageeka atĩa rĩrĩa andũ ake magaatharĩkĩrũo? Augĩte ũũ: “Mangʼũrĩ makwa manene nĩ makaarahũka.” (Ezek. 38:18, 21-23) Kũguũrĩrio mũrango wa 19 nĩ ũtaarĩirie maũndũ marĩa makaarũmĩrĩra. Jehova nĩ agaatũma Mũrũ wake oke arũĩrĩre andũ ake na ahoote thũ ciao. “Mbũtũ cia igũrũ,” nĩcio araika ehokeku na arĩa 144,000, nĩ makaanyitanĩra na Jesu kũrũa na Gogu wa Magogu. (Kũg. 17:14; 19:11-15) Maumĩrĩro magaakorũo marĩ marĩkũ? Andũ o hamwe na mathondeka marĩa mothe mareganaga na Jehova nĩ makaaniinwo.—Thoma Kũguũrĩrio 19:19-21.

11. Nĩ ũndũ ũrĩkũ wa bata mũno ũgwetetwo ibuku-inĩ rĩa Kũguũrĩrio?

¹¹ Ta geria gwĩciria ũrĩa andũ ehokeku thĩinĩ wa thĩ makaaigua thutha wa kũhonoka rĩrĩa thũ cia Ngai ikaaniinwo. Na githĩ gũtigaakorũo na gĩkeno kĩnene? O na gũtuĩka nĩ gũgaakorũo na mbugĩrĩrio nene ya gĩkeno kũrĩa igũrũ rĩrĩa Babuloni Ũrĩa Mũnene akaanangwo, nĩ harĩ ũndũ ũngĩ ũkaarehe gĩkeno kĩnene. (Kũg. 19:1-3) Nĩguo ũndũ ũrĩa wa bata mũno ũgwetetwo thĩinĩ wa ibuku rĩa Kũguũrĩrio—“ũhiki wa Gatũrũme.”—Kũg. 19:6-9.

12. O ta ũrĩa Kũguũrĩrio 21:1, 2 yonanĩtie-rĩ, ũhiki wa Gatũrũme ũgeekĩka rĩ?

¹² Ũhiki ũcio ũgeekĩka rĩ? Arĩa 144,000 magaakorũo igũrũ ihinda inini mbere ya mbaara ya Hari–Magedoni kũrũo. O na kũrĩ ũguo, rĩu tirĩo ihinda rĩrĩa ũhiki wa Gatũrũme ũgeekĩka. (Thoma Kũguũrĩrio 21:1, 2.) Ũhiki wa Gatũrũme ũgeekĩka thutha wa mbaara ya Hari–Magedoni kũrũo na thũ ciothe cia Ngai kũniinwo.—Thab. 45:3, 4, 13-17.

13. Gũgaathiĩ atĩa hĩndĩ ya ũhiki wa Gatũrũme?

¹³ Gũgaathiĩ atĩa hĩndĩ ya ũhiki wa Gatũrũme? O ta ũrĩa ũhiki ũnyitithanagia mũthuri na mũtumia, no taguo ũhiki ũyũ wa mũhaano ũkaanyitithania Jesu Kristo arĩ we Mũthamaki na “mũhiki” wake, nĩwe arĩa 144,000. Kũnyitithanio kũu nĩkuo gũgaathondeka thirikari njerũ, ĩrĩa ĩgaathana gũkũ thĩ mĩaka 1,000.—Kũg. 20:6.

14-15. Kũguũrĩrio mũrango wa 21 ĩringithanĩtie arĩa 144,000 na kĩĩ? (Rora mbica ngothi-inĩ.)

¹⁴ Thutha ũcio, Kũguũrĩrio 21 ĩringithanĩtie arĩa 144,000 na itũũra ithaka mũno rĩrĩa rĩĩtĩtwo “Jerusalemu Njerũ.” (Kũg. 21:2, 9) Itũũra rĩu rĩarĩ na mahiga 12 ma mũthingi marĩa maandĩkĩtwo “marĩĩtwa 12 ma atũmwo arĩa 12 a Gatũrũme.” Ũndũ ũcio ũngĩakenirie Johana nĩkĩ? Tondũ nĩ oonire rĩĩtwa rĩake rĩandĩkĩtwo ihiga-inĩ rĩmwe rĩa macio. Na githĩ kĩu gĩtiarĩ gĩtĩo kĩnene?—Kũg. 21:10-14; Ef. 2:20.

¹⁵ Gũtirĩ itũũra rĩngĩ rĩngĩringithanio na rĩu. Rĩrĩ na njĩra nene ya thahabu theru, ihingo 12 cia ruru, thingo na mĩthingi yarĩo igemetio na mahiga ma goro, na rĩiganaine mĩena yothe. (Kũg. 21:15-21) No nĩ harĩ kĩndũ  rĩaagaga! Johana aaugire ũũ: “Ndionire hekarũ thĩinĩ warĩo, tondũ Jehova Ngai Mwene-Hinya-Wothe nĩwe hekarũ yarĩo, o nake Gatũrũme no hekarũ yarĩo. Ningĩ itũũra rĩu rĩtibataraga ũtheri wa riũa o na kana wa mweri, nĩ gũkorũo riri wa Ngai nĩguo ũrĩmũrĩkagĩra, na tawa warĩo nĩ Gatũrũme.” (Kũg. 21:22, 23) Arĩa othe marĩ thĩinĩ wa Jerusalemu ĩyo Njerũ magaakorũo hamwe na Jehova. Nĩ ũndũ ũcio matikaabatara gũkorũo na hekarũ. (Kũg. 22:3, 4) Ningĩ makĩrutĩra Ngai ũtungata mũtheru, magaatongoragio nĩ Jesu ũrĩa nĩ mũthĩnjĩri-Ngai mũnene kũrĩa igũrũ. (Ahib. 7:27) Itũmi icio nĩcio iratũma Jehova na Jesu merũo nĩo hekarũ itũũra-inĩ rĩu.

16. Nĩ irathimo irĩkũ andũ magaakenera hĩndĩ ya Wathani wa Mĩaka Ngiri wa Ũthamaki wa Ngai?

¹⁶ Arĩa aitĩrĩrie maguta nĩ makenaga mecũrania ũhoro wa itũũra rĩu. No o na arĩa marĩ na kĩĩrĩgĩrĩro gĩa gũgaatũũra gũkũ thĩ marĩ na gĩtũmi gĩa gũkenio nĩ itũũra rĩu. Hĩndĩ ya Wathani wa Mĩaka Ngiri wa Ũthamaki wa Ngai, Jerusalemu Njerũ nĩ ĩkaarehera andũ irathimo nyingĩ mũno. Johana oonire irathimo icio igĩtherera ta “rũũĩ rwa maĩ ma muoyo.” Na mĩena yerĩ ya rũũĩ rũu harĩ na “mĩtĩ ya muoyo” ĩrĩa ĩraruta mathangũ “ma kũhonia ndũrĩrĩ.” (Kũg. 22:1, 2) Andũ arĩa othe magaakorũo muoyo hĩndĩ ĩyo nĩ makaagunĩka kuumana na irathimo icio. Andũ othe arĩa athĩki nĩ magaathiĩ matuĩkĩte akinyanĩru. Gũtigaacoka gũkorũo na mĩrimũ, ruo, na maithori ma kĩeha.—Kũg. 21:3-5.

17. O ta ũrĩa Kũguũrĩrio 20:11-13 yonanĩtie-rĩ, nĩa makaagunĩka kuumana na Wathani wa Mĩaka Ngiri?

¹⁷ Nĩa makaagunĩka kuumana na irathimo icio cia magegania? A mbere kũgunĩka nĩ andũ kĩrĩndĩ kĩnene arĩa makaahonoka mbaara ya Hari–Magedoni, o hamwe na ciana iria hihi igaaciarũo hĩndĩ ya thĩ njerũ. No mũrango wa 20 wa Kũguũrĩrio ningĩ nĩ wĩranĩire atĩ arĩa akuũ nĩ makaariũkio. (Thoma Kũguũrĩrio 20:11-13.) Andũ “athingu” arĩa makuĩte, o hamwe na “arĩa matarĩ athingu” arĩa maakuire matagĩte na mweke wa kwĩruta ũhoro wĩgiĩ Jehova, othe nĩ makaariũkio. (Atũm. 24:15; Joh. 5:28, 29) Hihi ũguo nĩ kuuga atĩ andũ othe nĩ makaariũkio matũũre gũkũ thĩ hĩndĩ ya Wathani wa Mĩaka Ngiri? Aca. Arĩa maaremire na makĩrega gũtungatĩra Jehova matanakua matikaariũkio. Nĩ maaheirũo mweke, no makĩonania atĩ matiagĩrĩire  gũkaaheo muoyo thĩinĩ wa thĩ njerũ.—Mat. 25:46; 2 Thes. 1:9; Kũg. 17:8; 20:15.

18. Thĩ ĩgaakorũo ĩhaana atĩa gũkinyĩria mũthia wa mĩaka ĩrĩa 1,000?

¹⁸ Gũkinyĩria mũthia wa mĩaka ĩrĩa 1,000, andũ arĩa othe magaakorũo thĩinĩ wa thĩ magaakorũo matuĩkĩte akinyanĩru. Arĩa othe magaakorũo muoyo, matigaacoka kũhutio nĩ maumĩrĩro ma mehia marĩa maagairũo kuuma kũrĩ Adamu kĩambĩrĩria-inĩ. (Rom. 5:12) Kĩrumi kĩrĩa kĩaumanire na mehia ma Adamu gĩgaakorũo kĩeheretio biũ. Na njĩra ĩyo, arĩa magaakorũo thĩinĩ wa thĩ nĩ ‘magaacoka muoyo’ tondũ nĩ magaakorũo matuĩkĩte akinyanĩru gũkinyĩria mũthia wa mĩaka ĩrĩa 1,000.—Kũg. 20:5.

19. Gũkaabatarania igerio rĩa mũthia nĩkĩ?

¹⁹ Nĩ tũĩ atĩ Jesu nĩ aatũũrire arĩ mwĩhokeku harĩ Ngai o na rĩrĩa Shaitani aamũgeririe. No hihi nĩ andũ othe akinyanĩru magaakorũo mehaarĩirie gũtũũria wĩhokeku wao rĩrĩa Shaitani akaaheo mweke wa kũmageria? O mũndũ nĩ agaakorũo na mweke wa kuonania kana no atũũrie wĩhokeku wake rĩrĩa Shaitani akoohorũo kuuma irima-inĩ rĩrĩa rĩtarĩ gĩturi mũthia-inĩ wa mĩaka ĩrĩa ngiri. (Kũg. 20:7) Arĩa magaatũũria wĩhokeku ihinda-inĩ rĩu rĩa igerio rĩa mũthia nĩ makaaheo muoyo wa tene na tene na makenere wĩyathi wa ma. (Rom. 8:21) Nao arĩa makaaremera Jehova nĩ makaaniinwo tene na tene hamwe na Mũcukani na ndaimono ciake.—Kũg. 20:8-10.

20. Ũraigua atĩa igũrũ rĩgiĩ morathi ma kũgegania marĩa marĩ thĩinĩ wa ibuku rĩa Kũguũrĩrio?

²⁰ Hihi ũraigua atĩa thutha wa gũthuthuria na njĩra nguhĩ ibuku rĩa kũguũrĩrio? Na githĩ ti ũndũ wa gũcanjamũra kuona atĩ morathi macio ma kũgegania nĩ marakũhutia? Ĩ matiragũtindĩka wende gwĩta andũ arĩa angĩ moke tũnyitanĩre hamwe ũthathaiya-inĩ mũtheru wa Ngai witũ? (Kũg. 22:17) Hatarĩ nganja nĩ twacanjamũrũo nĩ maũndũ macio twarĩrĩria mageekĩka mahinda mokĩte, na tũkaigua tũkĩenda kuuga ciugo ici mũtũmwo Johana aaugire: “Ameni! Ũka, Mwathani Jesu.”—Kũg. 22:20.