1. Nĩ mũkaana ũrĩkũ mũtũmwo Paulo aandĩkĩire Akristiano aitĩrĩrie maguta?

MŨTŨMWO PAULO aaheanire mũkaana ũyũ: “Mũtige kwĩgerekanagia na mũtabarĩre ũyũ wa maũndũ.” (Rom. 12:2) Paulo eerekagĩria ciugo icio kũrĩ Akristiano a karine ya mbere. Nĩ kĩĩ gĩatũmire aheane mũkaana ta ũcio mũritũ kũrĩ arũme na atumia meeyamũrĩire Ngai na magaitĩrĩrio maguta kũgerera roho mũtheru?​—Rom. 1:7.

2-3. Shaitani ageragia atĩa gũtũma tũtiganĩrie Jehova, no tũngĩhota atĩa kweheria maũndũ marĩa “marũmĩte mũno” meciria-inĩ maitũ?

² Paulo aatangĩkaga tondũ Akristiano amwe nĩ maambĩrĩirie gũthũkio nĩ mwĩcirĩrie ũtarĩ mwega na irĩra cia andũ iria itheremagio nĩ thĩ ya Shaitani. (Ef. 4:17-19) Ũndũ ta ũcio no ũhaanĩke harĩ ithuĩ. Shaitani, o we ngai ya gũkũ thĩ, nĩ ahũthagĩra njĩra itiganĩte akĩgeria o ũrĩa wothe angĩhota gũtũma tũtiganĩrie Jehova. Kwa ngerekano, tũngĩkorũo na mwerekera wa kwenda kuonwo tũrĩ a bata na gwĩtũũgĩria, Shaitani no ahũthĩre ũndũ ũcio gũtũgeria. O na no agerie kũhũthĩra ũndũire, mũrerere, o na kana gĩthomo gitũ gũtũma tũgĩe na mwĩcirĩrie ta wake.

³ Hihi no tũhote kweheria maũndũ marĩa “marũmĩte mũno” meciria-inĩ maitũ? (2 Kor. 10:4) Ta rora macokio ma kĩũria kĩu thĩinĩ wa ciugo ici cia Paulo: “Nĩ gũtharũria tũratharũria mĩĩcirĩrie na ũndũ o wothe mũtũũgĩru ũrĩa ũreganaga na ũmenyo wa Ngai, na tũkanyita meciria mothe  mĩgwate nĩguo mathĩkagĩre Kristo.” (2 Kor. 10:5) Kũgerera ũteithio wa Jehova no tũhote kweheria mwĩcirĩrie mũũru. O ta ũrĩa ndawa ĩngĩteithia mũndũ kũhũũrana na thumu ũrĩa angĩkorũo anyuĩte, noguo Kiugo kĩa Ngai kĩngĩtũteithia kũhũũrana na mwĩcirĩrie mũũru wa thĩ ya Shaitani.

4. Aingĩ aitũ twabatarire gwĩka mogarũrũku marĩkũ twamenya ũhoro wa ma?

⁴ Ta wĩcirie mogarũrũku marĩa wekire rĩrĩa wamenyire ũhoro wa ma wa Kiugo kĩa Ngai na ũgĩtua itua rĩa gũtungatĩra Jehova. Nĩguo aingĩ aitũ tũhote gũtungatĩra Jehova, twabatarire gũtiga maũndũ mamwe mataarĩ mega. (1 Kor. 6:9-11) Nĩ tũkenaga mũno nĩ ũndũ wa ũrĩa Jehova aatũteithirie gũtooria mĩtugo ĩyo ĩtaarĩ mĩega!

5. Aroma 12:2 ĩtaarĩirie maũndũ marĩkũ merĩ tũbatiĩ gwĩka?

⁵ O na kũrĩ ũguo, tũtiagĩrĩirũo gwĩciria atĩ tũtirabatara gwĩka mogarũrũku mangĩ. O na angĩkorũo nĩ twatigire gwĩka mehia maritũ marĩa twekaga mbere ya kũbatithio, no tũrabatara gũthiĩ na mbere kwĩrutanĩria gwĩthema ũndũ o wothe ũngĩtũma tũcokerere maũndũ macio. Tũngĩka ũguo atĩa? Paulo ooigire ũũ: “Mũtige kwĩgerekanagia na mũtabarĩre ũyũ wa maũndũ, ĩndĩ mũgarũrũke na njĩra ya kũgarũrĩra meciria manyu.” (Rom. 12:2) Kwoguo no mũhaka twĩke maũndũ maya merĩ. Wa mbere, no mũhaka ‘tũtige kwĩgerekanagia’ na thĩ ĩno kana kũrũmĩrĩra mawoni mayo. Wa kerĩ, no mũhaka ‘tũgarũrũke’ na njĩra ya kũgarũrĩra meciria maitũ.

6. Ciugo cia Jesu thĩinĩ wa Mathayo 12:43-45 iratũruta ũndũ ũrĩkũ?

⁶ Ũgarũrũku ũrĩa Paulo aaragia ũhoro waguo to wa na igũrũ tu. Ũhutĩtie maũndũ mothe matwĩgiĩ. (Rora gathandũkũ, “ Nĩ Kũgarũrũka Kana nĩ Gwĩtua?”) Nĩ tũrabatara  kũgarũrĩra meciria maitũ, na ũguo nĩ kuuga mĩerekera na mawoni maitũ ma ngoro. Kwoguo o ũmwe witũ nĩ agĩrĩire kwĩyũria kĩũria gĩkĩ, ‘Hihi mogarũrũku marĩa ndĩreka nĩguo nduĩke Mũkristiano no ma igũrũ tu, kana nĩ ndĩreka mogarũrũku nginya na kũu thĩinĩ?’ Kĩũria kĩu nĩ kĩa bata. Thĩinĩ wa ciugo iria irĩ thĩinĩ wa Mathayo 12:43-45, Jesu nĩ oonanirie ũrĩa tũrabatara gwĩka. (Thoma.) Ciugo icio iratũruta ũndũ ũyũ wa bata: Kweheria meciria moru gwiki ti kũiganu, no nĩ tũrabatara gũthinga ithenya rĩrĩa rĩatigwo na njĩra ya gũkoragwo na meciria mega.

7. Tũngĩcenjia ũrĩa tũtariĩ na kũu thĩinĩ na njĩra ĩrĩkũ?

⁷ Hihi no tũhote gũcenjia mĩerekera itũ ya ngoro kana ũrĩa tũtariĩ na kũu thĩinĩ? Kiugo kĩa Ngai gĩcoketie ũũ: “Mwagĩrĩirũo gũthiĩ na mbere kwerũhio mwerekera ũrĩa ũtongoragia meciria manyu, na nĩ mwagĩrĩirũo mwĩhumbe ũmũndũ mwerũ ũrĩa wombirũo kũringana na wendi wa Ngai, na ũthingu wa ma na wĩhokeku.” (Ef. 4:23, 24) Kwoguo, no tũhote gũcenjia ũrĩa tũtariĩ na kũu thĩinĩ o na gũtuĩka ũndũ ũcio ti mũhũthũ. Kũregana na merirĩria moru na gũtiga gwĩka ciĩko njũru ti kũiganu. Tũrabatara gũcenjia “mwerekera ũrĩa ũtongoragia meciria” maitũ. Ũndũ ũcio ũhutĩtie kũgarũrĩra merirĩria maitũ, mĩerekera itũ, na itũmi iria itũmaga twĩke maũndũ matiganĩte. Ũndũ ũcio ũbataraga tũthiĩ na mbere kwĩrutanĩria tũtegũtiga.

8-9. Ũhoro wa mũrũ wa Ithe witũ ũmwe ũratũteithia atĩa kuona bata wa gũcenjia ũrĩa tũtariĩ na kũu thĩinĩ?

⁸ Rekei twĩcirie ũhoro wa mũrũ wa Ithe witũ ũmwe weendete mbaara na hau kabere. Thutha wa gũtiga kũnyua na kũrũa, nĩ aagĩrĩire kũbatithio, na ũndũ ũcio nĩ warutire ũira mwega itũũra-inĩ inini rĩrĩa aaikaraga. No hwaĩ-inĩ ũmwe, ihinda inini thutha wake kũbatithio nĩ aacemanirie na igerio ateerĩgĩrĩire. Mũthuri ũmwe warĩ mũrĩu nĩ aathiire kwa mũrũ wa Ithe witũ ũcio na akĩmũcogotha nĩguo marũe. Kĩambĩrĩria-inĩ mũrũ wa Ithe witũ nĩ eegirĩrĩirie kũrũa. No rĩrĩa mũthuri ũcio mũrĩu aaririe maũndũ moru megiĩ Jehova, mũrũ wa Ithe witũ ũcio nĩ aaremirũo kwĩgirĩrĩria rĩngĩ. Ooimire nja na akĩhũũra mũndũ ũcio. Nĩ kĩĩ gĩatũmire eke ũguo? O na gũtuĩka kwĩruta Bibilia nĩ kwamũteithĩtie kũregana na merirĩria make ma kũrũa, ndaahotete kũgarũrĩra mwerekera ũrĩa watongoragia meciria make. Na njĩra ĩngĩ, ndaacenjetie ũrĩa aatariĩ na kũu thĩinĩ.

⁹ O na kũrĩ ũguo, mũrũ wa Ithe witũ ũcio ndaakuire ngoro. (Thim. 24:16) Nĩ aathiire na mbere gũteithĩrĩrio nĩ athuri na agĩka mogarũrũku. Thutha-inĩ nĩ aagĩrĩire gũtuĩka mũthuri wa kĩũngano. No hwaĩ-inĩ ũmwe, hau nja wa Nyũmba yao ya Ũthamaki nĩ aacemanirie na igerio o ta rĩrĩa aacemanĩtie narĩo mĩaka ĩigana ũna hau kabere. Kwarĩ na mũndũ ũmwe mũrĩu weendaga kũhũũra mũthuri ũngĩ wa kĩũngano. Hihi mũrũ wa Ithe witũ ũcio eekire atĩa? Aaririe na mũndũ ũcio mũrĩu ahooreire na enyihĩtie, akĩmũteithia kũhoorera na nginya agĩteithia mũndũ ũcio watũgũgaga kũinũka. Mũrũ wa Ithe witũ eekire maũndũ na njĩra ngũrani nĩkĩ? Tondũ nĩ aacenjetie mwerekera ũrĩa watongoragia meciria make. Na kũu thĩinĩ, nĩ aacenjetie agatuĩka mũndũ mwĩnyihia na mwendi thayũ, na ũndũ ũcio ũkĩgoocithia Jehova!

10. Tũbatiĩ gwĩka atĩa nĩguo tũcenjie ũrĩa tũtariĩ na kũu thĩinĩ?

 ¹⁰ Mũndũ ndacenjagia na mũthenya ũmwe, na mogarũrũku timo merehaga. No tũbatare ‘kwĩrutanĩria biũ’ kwa ihinda rĩa mĩaka mĩingĩ. (2 Pet. 1:5) Mogarũrũku macio matiĩkĩkaga tondũ wa gũkorũo tũikarĩte ũhoro-inĩ wa ma ihinda rĩa mĩaka mĩingĩ. No mũhaka twĩke o ũrĩa wothe tũngĩhota nĩguo tũcenjie ũmũndũ witũ wa na thĩinĩ. Harĩ maũndũ maigana ũna ma bata mangĩtũteithia gwĩka ũgarũrũku ũcio. Rekei twarĩrĩrie mamwe mamo.

11. Mahoya mangĩtũteithia atĩa kũgarũrĩra mwerekera ũrĩa ũtongoragia meciria maitũ?

¹¹ Ũndũ wa mbere ũrĩa ũngĩtũteithia nĩ mahoya. Nĩ tũrabatara kũhoya o ta mwandĩki wa thaburi ũrĩa waandĩkire ũũ: “Atĩrĩrĩ Ngai, nyũmbĩra ngoro theru, na wĩkĩre thĩinĩ wakwa roho mwerũ, mũrũmu.” (Thab. 51:10) No mũhaka twĩtĩkĩre atĩ nĩ tũrabatara gũcenjia mwerekera ũrĩa ũtongoragia meciria maitũ na tũhoe Jehova atũteithie. Nĩkĩ no tũkorũo na ma atĩ Jehova nĩ egũtũteithia gwĩka mogarũrũku? No twĩkĩrũo ngoro nĩ kĩĩranĩro gĩkĩ kĩa Jehova kĩgiĩ Aisiraeli arĩa moomĩtie ngoro matukũ-inĩ ma Ezekieli: “Nĩ ngaamahe ngoro ĩrĩ na ũrũmwe, na njĩkĩre roho mwerũ thĩinĩ wao; na . . . ndĩmahe ngoro njororo ta nyama, [ũguo nĩ kuuga, ngoro ya gwathĩkĩra ũtongoria wa Ngai].” (Ezek. 11:19; kohoro ka magũrũ-inĩ) Jehova nĩ eehaarĩirie gũteithia Aisiraeli acio nĩguo macenjie, na nĩ ehaarĩirie gũtũteithia o na ithuĩ.

12-13. (a) Kũringana na Thaburi 119:59, tũrabatara gwĩcũrania ũndũ ũrĩkũ? (b) Nĩ ciũria irĩkũ wagĩrĩirũo kwĩyũria?

¹² Ũndũ wa kerĩ ũngĩtũteithia nĩ gwĩcũrania. Tũgĩthoma Kiugo kĩa Ngai na kinyi o mũthenya, nĩ tũrabatara kũhũthĩra ihinda gwĩcũrania kana gwĩciria na njĩra ndikĩru ũhoro ũrĩa twathoma nĩguo tuone nĩ meciria na mĩerekera ĩrĩkũ tũrabatara gũcenjia. (Thoma Thaburi 119:59; Ahib. 4:12; Jak. 1:25) Nĩ twagĩrĩirũo kũmenya mĩerekera ĩrĩa tũngĩkorũo nayo yumanĩte na ũũgĩ wa gũkũ thĩ. Nĩ tũbatiĩ gwĩtĩkĩra atĩ harĩ maũndũ moru tũngĩkorũo namo na twĩrutanĩrie kũhũũrana namo.

¹³ Kwa ngerekano no wĩyũrie ũũ: ‘Hihi nĩ ngoragwo na kaũiru o na akorũo no kanini ngoro-inĩ yakwa?’ (1 Pet. 2:1) ‘Hihi nĩ nyonaga ndĩ wa bata gũkĩra arĩa angĩ na gĩkĩro kĩna nĩ ũndũ wa mũrerere wakwa, gĩthomo, kana ũhoti wa kĩĩmbeca?’ (Thim. 16:5) ‘Hihi nĩ njiraga andũ arĩa matarĩ na indo ta iria ndĩ nacio kana arĩa moimĩte kũndũ kũngĩ?’ (Jak. 2:2-4) ‘Hihi nĩ njiguaga ngĩgucĩrĩrio nĩ indo cia thĩ ya Shaitani?’ (1 Joh. 2:15-17) ‘Hihi nĩ ngenagĩra maũndũ ma gwĩkenia marĩ na waganu na mbaara?’ (Thab. 97:10; 101:3; Amos 5:15) Macokio ma ciũria icio no magũteithie kuona mĩena ĩrĩa ũrabatara kwagagĩria. Tũngĩhota gũtharũria maũndũ marĩa “marũmĩte mũno” ngoro-inĩ citũ, nĩ tũrĩkenagia Ithe witũ wa igũrũ.​—Thab. 19:14.

14. Gũthuura arata ega nĩ kwa bata mũno nĩkĩ?

¹⁴ Ũndũ wa gatatũ nĩ gũthuura arata ega. Tũkĩmenyaga kana tũtekũmenya, mwĩcirĩrie witũ nĩ ũhutagio mũno nĩ arata aitũ tondũ mũceera na mũkũndũ akũndũkaga o take. (Thim. 13:20) Tũrĩ wĩra-inĩ kana cukuru, kaingĩ tũkoragwo na andũ matangĩtũteithia gũkũria mwĩcirĩrie ta wa Ngai. O na kũrĩ ũguo, no tuone arata arĩa ega biũ mĩcemanio-inĩ itũ ya Gĩkristiano. Mĩcemanio-inĩ ĩyo, nĩ twĩkĩragwo hinya kana tũkarahũrũo  kuonania “wendo na ciĩko njega.”​—Ahib. 10:24, 25, kohoro ka magũrũ-inĩ.

15-16. Shaitani ageragia gũcenjia mwĩcirĩrie witũ na njĩra ĩrĩkũ?

¹⁵ No ririkana atĩ Shaitani nĩ erutanagĩria mũno gũcenjia mwĩcirĩrie witũ. Ahũthagĩra njĩra o yothe gũthũkia mwĩcirĩrie mwega ũrĩa tũgĩte naguo kuuma Kiugo-inĩ kĩa Ngai.

¹⁶ Shaitani oragia o kĩũria kĩrĩa ooririe Hawa mũgũnda-inĩ wa Edeni: “Atĩ Ngai ooigire . . . ?” (Kĩam. 3:1) Thĩinĩ wa thĩ ĩno ĩrĩa ĩtongoragio nĩ Shaitani, kaingĩ nĩ tũiguaga ciũria ta ici iria ingĩtũma tũgĩe na nganja: ‘Atĩ Ngai ndetĩkagĩria ngomanio cia arũme kwa arũme na atumia gwa atumia? Atĩ Ngai ndendaga mũkũngũĩre Krismasi na mĩthenya ya gũciarũo? Atĩ Ngai ndangĩenda mwĩkĩrũo thakame? Atĩ Ngai ũrĩ wendo ndangĩenda mũnyitanĩre na andũ mwendete arĩa meheretio kĩũngano-inĩ?’

17. Twagĩrĩirũo gwĩka atĩa tũngĩkorũo na ciũria twĩyũragia ciĩgiĩ wĩtĩkio witũ? Akolosai 2:6, 7 yonanagia moimĩrĩro megũkorũo marĩ marĩkũ?

¹⁷ Nĩ tũrabatara gũkorũo tũtarĩ na nganja igũrũ rĩgiĩ maũndũ marĩa twĩtĩkĩtie. Angĩkorũo nĩ harĩ ciũria cia bata twĩyũragia ciĩgiĩ wĩtĩkio witũ na ciage gũcokio, no twambĩrĩrie gwĩkĩrĩra nganja maũndũ marĩa twĩtĩkĩtie. Mũthia-inĩ, nganja icio no ithũkie mwĩcirĩrie witũ na wĩtĩkio witũ. Gũkĩrĩ ũguo-rĩ, tũbatiĩ gwĩka atĩa? Kiugo kĩa Ngai gĩtwĩraga tũgarũrĩre meciria maitũ, nĩgetha twĩmenyagĩre “wendi wa Ngai ũrĩa mwega, wa gwĩtĩkĩrĩka na mũkinyanĩru.” (Rom. 12:2) Tũngĩĩrutaga kaingĩ, nĩ tũkwĩmenyera maũndũ ma ma marĩa twĩrutĩte kuuma Bibilia-inĩ. Nĩ tũkũgĩa na ma biũ atĩ ithimi cia Jehova nĩcio ciagĩrĩire. Tweka ũguo, tũkũhaana ta mũtĩ ũrĩ na mĩri mĩrũmu, ‘tũrũmĩte thĩinĩ wa wĩtĩkio.’​—Thoma Akolosai 2:6, 7.

18. Nĩ kĩĩ kĩngĩtũteithia kũhũũrana na ũgucania mũũru wa thĩ ĩno ya Shaitani?

¹⁸ Wee nowe ũngĩhota kũrũmia wĩtĩkio waku. Nĩ ũndũ ũcio, thiĩ na mbere kũgarũrĩra mwerekera ũrĩa ũtongoragia mwĩcirĩrie waku. Hoyaga kaingĩ, ũkera Jehova akũhe roho wake. Wĩcũranagie na njĩra ndikĩru, na ũikare ũgĩthuthuragia mwĩcirĩrie na mwerekera waku. Thuura arata ega, arĩa mangĩgũteithia kũgarũrĩra mwĩcirĩrie waku. Weka ũguo, nĩ ũkũhota kũhũũrana na ũgucania mũũru wa thĩ ĩno ya Shaitani na nĩ ũkũhota gũtharũria “mĩĩcirĩrie na ũndũ o wothe mũtũũgĩru ũrĩa ũreganaga na ũmenyo wa Ngai.”​—2 Kor. 10:5.