CIUGO icio ciaririo nĩ Daudi akĩgaathĩrĩria mũtumia aacemanĩtie nake. Mũtumia ũcio eetagwo Abigaili. Nĩ kĩĩ gĩatindĩkire Daudi amũgaathĩrĩrie, na tũngĩĩruta ũndũ ũrĩkũ kuumana na ngerekano ĩyo ya Abigaili?

Ihinda-inĩ rĩrĩa Daudi oraga kuuma kũrĩ Mũthamaki Saulu, nĩrĩo aacemanirie na mũtumia ũcio. Abigaili aahikĩtio nĩ Nabali, mũthuri warĩ mũtongu na warĩ na rũũru rũnene rwarĩithagĩrio irĩma-inĩ ciarĩ mwena wa mũhuro wa Juda. Kũrĩ hĩndĩ Daudi na arũme ake “maatuĩkĩte ta rũgiri” rwa kũgitĩra arĩithi a Nabali o hamwe na rũũru rwake. Thutha-inĩ, Daudi nĩ aatũmanĩire Nabali akĩmũhoya irio na akĩmũũria amũhe o ‘kĩrĩa angĩakorirũo nakĩo.’ (1 Sam. 25:8, 15, 16) Daudi ndaahoete maũndũ manene tũngĩririkana ũrĩa marĩ na arũme ake maagitĩire rũũru rwa Nabali.

No Nabali, ũrĩa rĩĩtwa rĩake riugaga “Mũndũ Ũtarĩ Wĩcirio” kana “Kĩrimũ,” eekire gĩĩko kĩratwarana na rĩĩtwa rĩake. Aaregire ihoya rĩu rĩa Daudi na akĩmũcokeria na njĩra njũru ĩtarĩ ya gĩtĩo. Kwoguo Daudi akĩĩhaarĩria kuoera Nabali ikinya nĩ ũndũ wa macokio macio moru mataarĩ na wĩcirio. Nabali na nyũmba yake yothe nĩ mangĩakorirũo nĩ ũũru nĩ ũndũ wa ũrimũ wake.—1 Sam. 25:2-13, 21, 22.

O ta mũthomi mũũgĩ ũrĩa wonaga kabere, Abigaili nĩ onire ũgwati ũrĩa ũngĩamakorire na kwoguo arĩ na ũcamba akĩoya makinya. Arĩ na gĩtĩo nĩ aathaithire Daudi na akĩmwĩra ecirie ũhoro wa ũrata wake na Jehova. Agĩcoka akĩhe Daudi, ũrĩa ũngĩacokire gũtuĩka mũthamaki, irio cia kũmaigana marĩ na arũme ake. Daudi nake agĩtĩkĩra atĩ Jehova aahũthĩrĩte Abigaili kũmũgirĩrĩria gwĩka ũndũ ũngĩatũmire ahĩtĩrie Ngai. Daudi eerire Abigaili ũũ: “Ũũgĩ waku ũrorathimwo, ningĩ o nawe, wee mwene, ũrorathimwo, o wee wagiria njite thakame ũmũthĩ.”—1 Sam. 25:18, 19, 23-35.

Nĩ ma tũtingĩenda kũhaana ta Nabali, twage kuonania ngatho nĩ ũndũ wa maũndũ mega marĩa twĩkĩirũo. Makĩria ma ũguo, rĩrĩa tuona ũndũ mũũru ũkĩenda kuumĩra, nĩ wega gwĩka o ũrĩa tũngĩhota kũũgirĩrĩria. No tuuge ciugo ta ici cia mwandĩki wa Thaburi ũrĩa werire Ngai ũũ: “Kĩndutage gũkũũrana maũndũ wega o na kũmamenya.”—Thab. 119:66.

Andũ angĩ no mone ũrĩa tũreka maũndũ na njĩra ya ũũgĩ kana ĩrĩ na ũtaũku. Makorũo nĩ megũtwĩra kana matigũtwĩra, mahota gũkorũo makiuga ta Daudi ũrĩa woigire, “Ũũgĩ waku ũrorathimwo.”