• Angĩgaathuurũo nĩ Ngai. “Niĩ mwene nĩ nyamũrĩte mũthamaki wakwa . . . Nĩ ngũkũhe ndũrĩrĩ ituĩke igai rĩaku o na ngũhe ituri cia thĩ ituĩke ciaku.”​—Thaburi 2:6, 8.

• Angĩgaaikarĩra gĩtĩ kĩa ũnene kĩa Mũthamaki Daudi. “Nĩ tũciarĩirũo mwana, nĩ tũheetwo kahĩĩ . . . Ha ũhoro wa kuongerereka kwa wathani wake o hamwe na thayũ, gũtigaakorũo na mũthia, gĩtĩ-inĩ kĩa ũnene kĩa Daudi na ũthamaki-inĩ wake nĩguo wĩhande ũrũmĩte wega.”​—Isaia 9:6, 7.

• Angĩgaaciarĩrũo Bethilehemu. “Nawe, Bethilehemu . . . , kuuma harĩ wee nĩ gũkooimĩra ũrĩa ũgaathana . . . Ũnene wake ũgaakinya o nginya ituri cia thĩ.”​—Mika 5:2, 4.

• Nĩ angĩkaaregwo nĩ andũ na oragwo. “Nĩ aanyararĩtwo, na ithuĩ tũkĩmuona ta atarĩ kĩene. . . . Aathecirũo nĩ ũndũ wa mehia maitũ; akĩhehenjwo nĩ ũndũ wa mahĩtia maitũ.”​—Isaia 53:3, 5.

• Nĩ angĩkaariũkio kuuma kũrĩ arĩa akuũ na atũũgĩrio. “Ndũkandiganĩria thĩinĩ wa Mbĩrĩra. Ndũkareka ũrĩa waku mwĩhokeku one irima. . . . Gũkoragwo na gĩkeno guoko-inĩ gwaku kwa ũrĩo tene na tene.”​—Thaburi 16:10, 11.

Historĩ-inĩ yothe ya andũ, mũndũ ũmwe tu nowe wahingirie maũndũ macio mataarĩirie Mwathani ũrĩa wagĩrĩire; mũndũ ũcio nĩ Jesu Kristo. O na mũraika ũmwe eerire Mariamu nyina wa Jesu ũũ: “Ngai nĩ akaamũhe gĩtĩ kĩa ũnene gĩa ithe Daudi, . . . na Ũthamaki wake ndũgaakorũo na mũthia.”​—Luka 1:31-33.

Jesu ndaatuĩkire mwathani thĩinĩ wa thĩ. No agaatha andũ kuuma igũrũ arĩ Mũthamaki wa Ũthamaki wa Ngai. Nĩkĩ nĩwe Mũthamaki ũrĩa wagĩrĩire? Reke tuone maũndũ marĩa Jesu eekire rĩrĩa aarĩ gũkũ thĩ.

•   Jesu nĩ aarũmbũyagia andũ. Jesu nĩ aateithirie athuri na atumia, andũ anyinyi na akũrũ, gũtekũmakania kũrĩa moimĩte kana ũhoti wao. (Mathayo 9:36; Mariko 10:16) Rĩrĩa mũndũ warĩ na mangũ aamũthaithire akĩmwĩra: “Angĩkorũo no wende, theria,” Jesu nĩ aaringirũo nĩ tha na akĩmũhonia.​—Mariko 1:40-42.

• Jesu nĩ aatũrutire ũrĩa tũngĩkenia Ngai. Ooigire ũũ: “Mũtingĩtungatĩra Ngai na mũtungatĩre Ũtonga.” Ningĩ ooigire atĩ twagĩrĩirũo gwĩkagĩra andũ arĩa angĩ maũndũ marĩa o na ithuĩ tũngĩenda matwĩkĩre. Makĩria ma ũguo, oonanirie atĩ Ngai nĩ arũmbũyagia maũndũ marĩa tũreka, maũndũ marĩa tũreciria, na ũrĩa tũraigua. Kwoguo nĩguo tũkenie Ngai, nĩ twagĩrĩirũo kũrora nĩ maũndũ marĩkũ marĩ ngoro-inĩ citũ. (Mathayo 5:28; 6:24; 7:12) Jesu nĩ aatĩtĩrithirie atĩ nĩguo tũkorũo na gĩkeno kĩa ma, nĩ twagĩrĩirũo kwĩruta maũndũ marĩa Ngai endaga twĩke na tũkameka.​—Luka 11:28.

• Jesu nĩ aatũrutire ũrĩa tũngĩenda andũ arĩa angĩ. Ciugo na ciĩko cia Jesu nĩ ciarĩ na ũgucania mũnene na nĩ ciahutirie ngoro cia athikĩrĩria ake. Bibilia yugaga ũũ: “Kĩrĩndĩ gĩkĩgegio nĩ njĩra yake ya kũrutana, tondũ aamarutaga ta mũndũ warĩ na wathani.” (Mathayo 7:28, 29) Aamarutire ũũ: “Endagai thũ cianyu.” O na nĩ aahoeire andũ arĩa maamũragire, akiuga: “Awa, mohere, nĩ gũkorũo matiramenya ũrĩa mareka.”​—Mathayo 5:44; Luka 23:34.

Jesu nĩ agĩrĩire biũ gũkorũo arĩ Mwathani wa thĩ tondũ nĩ arũmbũyagia andũ na njĩra ya wendo. No hihi akaambĩrĩria gwathana rĩ?