KĨHEO kĩngĩkorũo kĩrĩ kĩa mwanya nĩ kĩagĩrĩirũo gũtũtindĩka tuonanie ngatho citũ. Jesu nĩ onanirie ũndũ ũcio rĩrĩa aahonirie andũ ikũmi maarĩ na mũrimũ mũũru ũtaarĩ na kĩhonia matukũ-inĩ macio. Mũndũ ũmwe harĩ acio ikũmi nĩ ‘acokire, akĩgoocaga Ngai na mũgambo mũnene.’ Jesu oigire ũũ: “Andũ othe ikũmi nĩ maatherio, githĩ tiguo? Hakĩrĩ ũguo-rĩ, acio angĩ kenda makĩrĩ kũ?” (Luka 17:12-17) Tũreruta atĩa? No tũriganĩrũo na ihenya mũno nĩ ciĩko njega iria twekwo nĩ andũ angĩ.

Igongona rĩa Jesu nĩ kĩheo kĩa mwanya mũno. Nĩrĩo kĩheo kĩrĩa kĩnene mũno kĩanaheanwo. Nĩ ũndũ ũcio-rĩ, wagĩrĩirũo gwĩka atĩa nĩ ũndũ wa ũrĩa Ngai agwĩkĩire?

• Menya Mũheani kĩheo. Igongona rĩa Jesu rĩtikarehera  andũ othe irathimo mahinda mokĩte hatarĩ ũndũ mekĩte. Handũ ha ũguo, Jesu oigire ũũ akĩhoya: “Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa watũmire, nĩwe Jesu Kristo.” (Johana 17:3) Ũngĩrũo atĩ harĩ mũndũ wahonokirie muoyo waku rĩrĩa warĩ mwana-rĩ, na githĩ to wende kũmenya ũhoro wĩgiĩ mũndũ ũcio na kĩrĩa gĩatũmire akũhonokie? Jehova Ngai ũrĩa waheanire kĩheo kĩa igongona rĩa Jesu endaga ũmũmenye na ũgĩe ũrata wa hakuhĩ nake. Bibilia ĩtwĩraga ũũ: “Kuhĩrĩriai Ngai, nake nĩ ekũmũkuhĩrĩria.”—Jakubu 4:8.

• Onanagia wĩtĩkio harĩ igongona rĩa Jesu. “Ũrĩa wonanagia wĩtĩkio harĩ Mũriũ arĩ na muoyo wa tene na tene.” (Johana 3:36) Kuonania wĩtĩkio nĩ kuuga atĩa? Nĩ kuuga wonanie na ciĩko. Kuonania wĩtĩkio harĩ igongona rĩa Jesu kũbataraga ciĩko. (Jakubu 2:17) Nĩ ciĩko ta irĩkũ? Kĩheo gĩtuĩkaga gĩaku rĩrĩa watambũrũkia guoko na wakĩamũkĩra. Kwoguo no mũhaka wĩke ũndũ nĩguo wĩtĩkĩre igongona rĩa Jesu. Ũndũ ũrĩkũ? Wĩrute ũrĩa Ngai arenda ũikare, na wonanagie ũguo na ciĩko. * Hoyaga Ngai akuohagĩre mehia na akũhe thamiri njega. No mũhaka ũkorũo na ma biũ atĩ igongona rĩa Jesu nĩ rĩkaarehe thayũ, ũgitĩri, na kũgaacĩra kũrĩ andũ arĩa othe monanagia wĩtĩkio harĩ rĩo.—Ahibirania 11:1.

• Thiaga Kĩririkano gĩa gĩkuũ kĩa Jesu. Jesu nĩ aambĩrĩirie Kĩririkano kĩa o mwaka nĩguo tũririkanage igongona rĩrĩa aarutire. Akĩaria ũhoro wĩgiĩ kũririkana mũthenya ũcio, oigire ũũ: “Ĩkagai ũũ nĩguo mũndirikanage.” (Luka 22:19) Aira a Jehova nĩ magakũngũĩra gĩkuũ kĩa Jesu Njumaine, Ĩpuro 11, 2017, thutha wa riũa gũthũa. Gĩkũngũĩro kĩu gĩgakorũo kĩrĩ kĩa ithaa rĩmwe ũguo na nĩ gũgakorũo na mĩario ĩrataarĩria bata wa gĩkuũ kĩa Jesu na ũrĩa gĩgatũrehera irathimo cia gũtũũra. Mwaka ũcio ũrathirire, andũ ta milioni 20 thĩinĩ wa thĩ yothe nĩ maathire Kĩririkano gĩa gĩkuũ kĩa Jesu. Tũgũkũũria na gĩtĩo ũkaanyitanĩra na ithuĩ tũkĩonania ngatho citũ harĩ kĩheo kĩrĩa kĩnene mũno Ngai atũheete.