Ngai Etagwo Atĩa? Ngai we mwene oigĩte ũũ: “Niĩ nĩ niĩ Jehova. Rĩu nĩrĩo rĩĩtwa rĩakwa.” (Isaia 42:8) Rĩĩtwa rĩa Ngai rĩonekaga maita ta 7,000 thĩinĩ wa Bibilia. O na kũrĩ ũguo, Bibilia nyingĩ nĩ cieheretie rĩĩtwa rĩake na igekĩra marĩĩtwa ma gĩtĩo ta “Mwathani.” Ngai nĩ endaga ũtuĩke mũrata wake, na nĩkĩo endaga ‘ũkayagĩre rĩĩtwa rĩake.’—Thaburi 105:1.

Marĩĩtwa ma Jehova ma Gĩtĩo. Bibilia nĩ ĩhũthagĩra marĩĩtwa mangĩ ma gĩtĩo ma Jehova ta “Ngai, “Mwene-Hinya-wothe,” “Mũũmbi,” “Ithe witũ,” “Mwathani,” na “Mwathani Mũnene.” Bibilia nĩ ĩkoragwo na mahoya maingĩ marĩa andũ maahũthĩrire rĩĩtwa rĩa gĩtĩo, na rĩĩtwa rĩake Jehova.—Danieli 9:4.

 Ũrĩa Ngai Ahaana. Ngai nĩ roho ũtangĩoneka na maitho. (Johana 4:24) Bibilia yonanagia atĩ “gũtirĩ mũndũ ũrĩ wona Ngai.” (Johana 1:18) Bibilia yonanagia atĩ andũ no marakarie Ngai, kana matũme ‘akene.’—Thimo 11:20; Thaburi 78:40, 41.

Ngumo cia Ngai. Ngai ndakoragwo na mũthutũkanio kwerekera andũ a mĩrerere na ndũrĩrĩ itiganĩte. (Atũmwo 10:34, 35) Ningĩ nĩ “mũigua tha na mũcayanĩri, ndahiũhaga kũrakara na nĩ aiyũirũo nĩ wendo mwĩhokeku na ũhoro wa ma.” (Thama 34:6, 7) No Ngai nĩ arĩ ngumo inya iria nene.

Hinya. Tondũ nĩwe “Ngai Mwene-Hinya-Wothe,” hinya wake ndũrĩ mĩhaka na kwoguo no ahingie ũndũ o wothe ũrĩa eranĩire.—Kĩambĩrĩria 17:1.

Ũũgĩ. Gũtirĩ mũndũ ũrĩ ũũgĩ mũingĩ ta Ngai. Kĩu nĩkĩo gĩtũmaga Bibilia yuge atĩ Ngai nowe “wiki mũũgĩ.”—Aroma 16:27.

Kĩhooto. Hingo ciothe Ngai ekaga ũrĩa kwagĩrĩire. Mawĩra make makoragwo marĩ “makinyanĩru,” na “ndarĩ hĩndĩ agaga kĩhooto.”—Gũcokerithia Maathani 32:4.

Wendo. Bibilia yugaga atĩ “Ngai nĩ wendo.” (1 Johana 4:8) Ngai to kuonania onanagia wendo, no we mwene nĩ wendo. Wendo wake mũnene nĩguo ũtũmaga eke maũndũ marĩa mothe ekaga, na ũndũ ũcio nĩ ũtũgunaga na njĩra nyingĩ.

Ũrata wa Ngai Hamwe na Andũ. Ngai nĩ Ithe witũ wa igũrũ ũrĩ wendo. (Mathayo 6:9) No tũtuĩke arata ake tũngĩkorũo na wĩtĩkio harĩ we. (Thaburi 25:14) Ũrĩa kũrĩ nĩ atĩ, Ngai endaga ũmũkuhĩrĩrie kũgerera mahoya na ‘ũmũikagĩrie mĩtangĩko yaku yothe, tondũ nĩ akũrũmbũyagia.’—1 Petero 5:7; Jakubu 4:8.

Jesu ti Ngai. Jesu nĩ wa mwanya tondũ nowe wombirũo ĩmwe kwa ĩmwe nĩ Ngai. Kĩu nĩkĩo gĩtũmaga Bibilia ĩmwĩte Mũrũ wa Ngai. (Johana 1:14) Thutha wa Jehova kũũmba Jesu, aahũthĩrire Mũrũ ũcio wake wa irigithathi arĩ “mũruti wĩra njorua,” kũũmba indo ciothe na andũ othe.—Thimo 8:30, 31; Akolosai 1:15, 16.

 Jesu ndoigire atĩ nĩwe Ngai. Handũ ha ũguo, ooigire ũũ: “Njũkĩte ndũmĩtwo [nĩ Ngai] ndĩmũrũgamĩrĩre.” (Johana 7:29) Hingo ĩmwe Jesu akĩaria na mũrutwo ũmwe wake eetire Jehova “Awa na no we Ithe wanyu,” na “Ngai wakwa na no we Ngai wanyu.” (Johana 20:17) Thutha wa Jesu gũkua, Jehova nĩ aamũriũkirie agĩthiĩ igũrũ na akĩmũtũũgĩria mũno guoko-inĩ gwake kwa ũrĩo.—Mathayo 28:18; Atũmwo 2:32, 33.

Jesu Kristo no Agũteithie Gũkuhĩrĩria Ngai

Jesu ookire gũkũ thĩ gũtũruta ũhoro wĩgiĩ Ithe. Jehova ooigire ũũ igũrũ rĩgiĩ Jesu: “Ũyũ nĩ Mũrũ wakwa, ũrĩa nyendete. Mũthikagĩrĩriei.” (Mariko 9:7) Gũtirĩ mũndũ ũĩ Ngai wega gũkĩra Jesu. Jesu ooigire ũũ: “Gũtirĩ mũndũ ũĩ Awa tiga Mũriũ na mũndũ o wothe ũrĩa Mũriũ endaga kũguũrĩria.”—Luka 10:22.

Jesu akoragwo na ngumo ta cia Ithe biũ. Jesu aakoragwo na ngumo ta cia Ithe ũũ atĩ nĩ aangĩahotire kuuga ũũ: “Mũndũ o wothe ũnyonete nĩ onete Awa o nake.” (Johana 14:9) Jesu aagucagĩrĩria andũ harĩ Ngai na njĩra ya kuonania wendo ta wa Ngai harĩ ciugo na ciĩko ciake. Ooigire ũũ: “Nĩ niĩ njĩra na nĩ niĩ ũhoro ũrĩa wa ma na nĩ niĩ muoyo. Gũtirĩ mũndũ ũũkaga kũrĩ Awa atagereire harĩ niĩ.” (Johana 14:6) Ningĩ ooigire ũũ: “Athathaiya a ma magaathathayagia Awa na roho na ma, nĩ gũkorũo nĩ ta acio Awa acaragia mamũthathayagie.” (Johana 4:23) Ta wĩcirie ũndũ ũcio! Jehova aretha andũ tawe arĩa marenda kũmenya ũhoro wa ma ũmwĩgiĩ.