Famĩlĩ itũ yaikaraga gĩcagi-inĩ gĩtagwo Tellancourt mwena wa irathĩro wa France. Baba aarĩ wa kuuma France na mami nĩ wa kuuma Italy. Rĩrĩa ndaarĩ na mĩaka ĩnana, nĩ twathamĩire gatũũra gaaikaragwo nĩ athĩni ka Rome, bũrũri-inĩ wa Italy. Mũtũũrĩre witũ nĩ waritũhire mũno tũrĩ kũu. Aciari akwa nĩ maakararanagia mũno nĩ ũndũ wa mathĩna ma mbeca.

Rĩrĩa ndaarĩ na mĩaka 15, mami akĩnjĩra nyume mũciĩ thiĩ ngethe arata. Ngĩambĩrĩria kuumaga mũciĩ ngathiĩ ngaikara ihinda iraya itarĩ ndacoka. Thutha wa ihinda ngĩĩingĩria thiritũ-inĩ ya andũ mataarĩ ega. Mũthenya ũmwe, mũndũ woonekaga arĩ na ũrata nĩ ookire kũrĩ niĩ. Akĩhe ndawa cia kũrebia na ngĩtĩkĩra nĩguo nyoneke atĩ ndĩ mũndũ mũgima. Nĩ ndaambĩrĩirie kũnyuaga ndawa cia kũrebia na gwĩkaga maũndũ ma waganu. Nĩ ndaanyitirũo kĩa hinya maita maingĩ. Ũtũũro harĩ niĩ ũkĩaga bata; ndiamakaga kana nĩ ngũtũũra muoyo kana nĩ ngũkua. Nĩ ndaarĩ na ihooru mũno. Ndĩ na mĩaka 16, nĩ ndaageririe kwĩyũraga na njĩra ya kũnyua mũcuba wa njohi ngĩcoka ngĩiikia iria-inĩ. Nĩ ũndũ ũcio ngĩikara thikũ ithatũ itekwĩigua.

Ngĩambĩrĩria kuona ũtũũro ũrĩ wa bata, no ngĩtuĩka mũndũ wa maheeni na wa gwĩkaga maũndũ na ũhinya. Nĩ ndaakomanagia na andũ, ngamahuuhĩrĩria ndawa cia gũtũma merigwo marĩ kwao mũciĩ, ngacoka ngamaiya kĩndũ o gĩothe kĩega. Ikundi nene cia wĩki-naĩ nĩ ciahũthagĩra nĩguo nyendie ndawa ciao cia kũrebia bũrũri-inĩ wa Italy. Kaingĩ nĩ ndaanyitagwo nĩ borithi. Ũtũũro wakwa woonekaga ũtarĩ bata na ũtarĩ na muoroto. O na kũrĩ ũguo, nĩ ndeetĩkĩtie atĩ no mũhaka hakorũo harĩ gĩtũmi gĩakwa gũkorũo ndĩ muoyo. Ndaahoire Ngai, ngĩmũria ahe thayũ na gĩkeno mwaka ũmwe tu.

Rĩrĩa ndaarĩ na mĩaka 24, ngĩtua itua rĩa gũthamĩra bũrũri wa England. Nĩ ũndũ wa kũnyitanagĩra na andũ arĩa meendagia ndawa cia kũrebia, ũtũũro wakwa warĩ ũgwati-inĩ. Itanathama-rĩ, ngĩamba gũceerera mami no nĩ ndaamakire mũno kũmũkora akĩhunjĩrio nĩ mũthuri wetagwo Annunziato Lugarà. * Na tondũ ndaamũĩ arĩ mwĩki-naĩ,  ngĩigua guoya mũno na ngĩmũria nĩ kĩĩ eekaga gwitũ. Akĩnjĩra ũhoro wa maũndũ maingĩ marĩa agarũrĩire ũtũũro-inĩ wake nĩguo atuĩke Mũira wa Jehova, na akĩnjĩra atĩ ndaakinya England njaranĩrie na Aira a Jehova. Ngĩmwĩra nĩ ngeeka ũguo. No ndaakinya England, ndacokereire mĩtugo yakwa ĩrĩa ndaamenyerete.

Mũthenya ũmwe, nĩ ndaakorire Mũira wa Jehova akĩheana ngathĩti cia Mũrangĩri na Arahũkai! barabara-inĩ ĩmwe ya London. Nĩ ndaririkanire ũrĩa twarĩtie na Annunziato, na ngĩũria mũira ũcio wa Jehova kana no andute Bibilia.

Maũndũ marĩa nderutire kuuma Bibilia-inĩ nĩ maangegirie mũno. Kwa ngerekano, nĩ ndaahutirio mũno nĩ rĩandĩko rĩa 1 Johana 1:​9, rĩrĩa riugaga ũũ igũrũ rĩgiĩ Ngai: “Tũngiumbũra mehia maitũ, we nĩ mwĩhokeku na nĩ mũthingu, na kwoguo nĩ egũtuohera mehia maitũ na atũtherie.” Mũhari ũcio nĩ wandeithirie mũno tondũ ndaaiguaga itarĩ mũtheru o na hanini nĩ ũndũ wa ũtũũro ũrĩa ndaatũraga. O hĩndĩ ĩyo ngĩambĩrĩria gũthiĩ gĩthomo kĩa Aira a Jehova. Aira a Jehova nĩ maanyitire ũgeni wega mũno. Rĩrĩa ndonire ũrata wa hakuhĩ ũrĩa makoragwo naguo, ũndũ ũrĩa ndeeriragĩria mũno, nĩ ndeendire gũtuĩka ũmwe wao.

O na gũtuĩka ndiaritũhĩirũo mũno gũtiga ndawa cia kũrebia na mĩtugo yakwa mĩũru, nĩ ndaaritũhĩirũo mũno kweheria ngumo ciakwa njũru. Nĩ ndonire atĩ nĩ ndaabataraga kuonia andũ gĩtĩo na kũmeeciria. O na rĩu, no ndĩrarũa na ngumo imwe njũru. No Jehova nĩ andeithĩtie gwĩka mogarũrũku. Thutha wa kwĩruta Bibilia mĩeri ĩtandatũ, nĩ ndaabatithirio ngĩtuĩka Mũira wa Jehova. Kwarĩ mwaka wa 1997.

Thutha wa kũbatithio, nĩ ndaahikirie mũirĩtu wetagwo Barbara, ũrĩa o nake waatũĩkĩte Mũira wa Jehova ica ikuhĩ. Rĩrĩa ũmwe wa arata akwa a tene onire ũrĩa ndaagarũrũkĩte, akĩambĩrĩria kwĩruta Bibilia. Thutha wa ihinda, agĩtuĩka Mũira wa Jehova marĩ hamwe na mwarĩ wa nyina. Ningĩ, mwarĩ wa nyina na cũcũ, ũrĩa warĩ na makĩria ma mĩaka 80, akĩambĩrĩria kwĩruta Bibilia na atanakua nĩ aakoretwo abatithio.

Rĩu ndungatagĩra ndĩ mũthuri wa kĩũngano kĩa Aira a Jehova gĩa gwitũ, na tũrĩ na mũtumia wakwa nĩ tũhũthagĩra mahinda maingĩ kũhunjĩria andũ arĩa maikaraga London, arĩa maragia Gĩitaliano. Rĩmwe na rĩmwe nĩ njiguaga nguĩte ngoro nĩ ũndũ wa ũtũũro wakwa wa hau kabere, no Barbara nĩ anyũmagĩrĩria mũno. Rĩu, ndĩ na famĩlĩ njega ĩrĩa ndaatũũraga ndĩriragĩria, na nĩ ngĩĩte na Ithe ũnyendete ũrĩa ndeendaga kũgĩa nake. Ndaahoire Ngai ahe thayũ na gĩkeno mwaka ũmwe tu, no nĩ aheete makĩria ma ũguo!