Rora ũrĩa Bibilia ĩcoketie ciũria icio.

Atũmwo 24:15 yonanĩtie atĩ nĩ “gũkaariũkio andũ arĩa athingu na arĩa matarĩ athingu.” Andũ arĩa athingu nĩ arĩa maathĩkagĩra Ngai mbere ya makuĩte, kwoguo marĩĩtwa mao nĩ mandĩkĩtwo ibuku-inĩ rĩa muoyo. (Mal. 3:16) Nao andũ arĩa matarĩ athingu nĩ hamwe na arĩa maakuire matagĩte na mweke wa kwĩruta igũrũ rĩgiĩ Jehova, kwoguo marĩĩtwa mao matiandĩkĩtwo thĩinĩ wa ibuku rĩa muoyo.

Johana 5:28, 29 o nayo yaragia ũhoro wa ikundi o icio igĩrĩ igwetetwo thĩinĩ wa Atũmwo 24:15. Jesu aaugire atĩ “arĩa meekaga maũndũ mega” makaaumĩra “iriũkĩro rĩa muoyo, nao arĩa meekaga maũndũ moru moimĩre iriũkĩro rĩa gũtuĩrũo.” Andũ arĩa athingu meekaga maũndũ mega mbere ya makuĩte. Makaumĩra iriũkĩro rĩa muoyo tondũ marĩĩtwa mao nĩ mandĩkĩtwo ibuku-inĩ rĩa muoyo. O na kũrĩ ũguo, andũ arĩa matarĩ athingu meekaga maũndũ moru mbere ya makuĩte. Makaariũkio iriũkĩro rĩa gũtuĩrũo. Marĩĩtwa mao matiandĩkĩtwo thĩinĩ wa ibuku rĩa muoyo, na kwoguo nĩ makaaheo ihinda rĩa gũtuĩrũo kana ihinda rĩa kũrorũo mĩthiĩre yao. Ihinda-inĩ rĩu nĩ makaaheo mweke wa kwĩruta igũrũ rĩgiĩ Jehova nĩguo marĩĩtwa mao mandĩkwo thĩinĩ wa ibuku rĩa muoyo.

Kũguũrĩrio 20:12, 13 ĩtaaragĩria atĩ andũ arĩa othe makaariũkio nĩ makaabatara gwathĩkĩra “maũndũ marĩa maandĩkĩtwo ikũnjo-inĩ,” na maũndũ macio nĩ mawatho merũ marĩa Ngai agaatũhe thĩinĩ wa thĩ njerũ. Arĩa matagaathĩka nĩ makaaniinwo.—Isa. 65:20.

Danieli 12:2 yonanĩtie atĩ amwe arĩa makomete gĩkuũ-inĩ nĩ magookĩra “maheo muoyo wa tene na tene nao angĩ mokĩre maconorithio na matũũre mamenetwo tene na tene.” Mũhari ũcio waragia ũhoro wa ituĩro rĩa mũthia rĩa arĩa makaariũkio. Amwe makaaheo “muoyo wa tene na tene” na acio angĩ “matũũre mamenetwo tene na tene.” Kwoguo mũthia-inĩ wa mĩaka ĩrĩa 1,000, amwe nĩ makaaheo muoyo wa tene na tene, nao angĩ maniinwo tene na tene.—Kũg. 20:15; 21:3, 4.

Ta wĩcirie ngerekano ĩno. Andũ a ikundi icio igĩrĩ arĩa makaariũkio no maringithanio na andũ marenda gũthamĩra bũrũri ũngĩ. Andũ arĩa athingu matariĩ ta andũ arĩa mamũkagĩra visa ya kũruta wĩra kana ya gũikara bũrũri-inĩ ũngĩ kwa ihinda, na visa ĩyo nĩ ĩmahotithagia gwĩtĩkĩrĩka na kũgĩa na wĩyathi na gĩkĩro kĩna. Ngũrani na ũguo, andũ arĩa matarĩ athingu no maringithanio na andũ arĩa mamũkagĩra visa ya ihinda inini kana ĩrĩa ĩheagwo ageni. Andũ acio nĩ marabatara gwathĩkĩra na gũtĩa mawatho ma bũrũri ũcio mwerũ nĩguo metĩkĩrio gũthiĩ na mbere gũikara kuo. Ũndũ ũmwe na ũcio, andũ arĩa makaariũkio matarĩ athingu nĩ makaabatara gwathĩkĩra mawatho ma Jehova na makorũo na mĩthiĩre ĩrĩa yagĩrĩire nĩguo mathiĩ na mbere gũtũũra thĩinĩ wa Paradiso. Gũtekũmakania nĩ visa ya mũthemba ũrĩkũ mũndũ aheo agĩthiĩ bũrũri ũngĩ, andũ amwe mũthia-inĩ nĩ maheagwo marũa ma gũtuĩka raiya a bũrũri ũcio, na angĩ no macokio bũrũri wao. Itua rĩu rĩtuagwo kũringana na mĩerekera na mĩthiĩre ya mũndũ arĩ bũrũri ũcio mwerũ. Ũndũ ũmwe na ũcio, itua rĩa mũthia rĩa andũ arĩa othe makaariũkio rĩkaaringana na wĩhokeku wao na mĩthiĩre ĩrĩa magaakorũo nayo thĩinĩ wa thĩ njerũ.

Jehova nĩ Ngai wa tha nyingĩ na nĩ Ngai wa kĩhooto. (Gũcok. 32:4; Thab. 33:5) Nĩ akoonania wendo na njĩra ya kũriũkia andũ arĩa athingu na arĩa matarĩ athingu. No nĩ akerĩgĩrĩra othe matũũre kũringana na ithimi ciake cia mĩtugo. Andũ arĩa makaamwenda na matũũre kũringana na ithimi ciake no o tu mageetĩkĩrio gũthiĩ na mbere gũtũũra thĩinĩ wa thĩ njerũ.