GĨCUNJĨ KĨA WĨRUTI KĨA 20
RWĨMBO NA. 67 “Hunjia Kiugo kĩa Ngai”
Rekaga Wendo Ũgũtindĩke Gũthiĩ na Mbere Kũhunjia!
“Ũhoro ũrĩa mwega no mũhaka ũkaamba kũhunjio kũrĩ ndũrĩrĩ ciothe.”—MAR. 13:10.
ŨNDŨ ŨRĨA WARĨRĨIRIO
Nĩ tũkuona ũrĩa wendo ũtũtindĩkaga kũhunjia na ngoro yothe tũrĩ na kĩyo.
1. Nĩ maũndũ marĩkũ twerutire mũcemanio-inĩ wa o mwaka wa 2023?
HĨNDĨ ya mũcemanio wa o mwaka wa 2023, a nĩ twaamũkĩrire ũtaũku mwerũ wĩgiĩ maũndũ mamwe twĩtĩkĩtie, na tũkĩmenyithio mogarũrũku ma gũcanjamũra megiĩ ũtungata witũ. Kwa ngerekano nĩ twerutire atĩ o na thutha wa Babuloni Ũrĩa Mũnene kũniinwo, kwahoteka nĩ kũrĩ andũ amwe makaagarũrũka na moke ithondeka-inĩ rĩa Jehova. Ningĩ nĩ twerutire atĩ kwambĩrĩria Novemba 2023, ahunjia matirĩbataraga kũruta riboti ĩrĩ na maũndũ mothe marĩa marahingirie ũtungata-inĩ. Hihi mogarũrũku macio maronania atĩ wĩra witũ wa kũhunjia ti wa bata mũno na atĩ ndũrabatara kũrutwo na ihenya? Aca, ũguo tiguo kũrĩ.
2. Wĩra wa kũhunjia ũrabatara kũrutwo na ihenya nĩkĩ o ũrĩa matukũ marathiĩ? (Mariko 13:10)
2 O ũrĩa thikũ irathiĩ noguo wĩra wa kũhunjia ũrabatara kũrutwo na ihenya o na makĩria. Gĩtũmi nĩ tondũ ihinda rĩrĩa rĩtigarĩte nĩ inini mũno. Ta wĩcirie ũrĩa Jesu aarathire igũrũ rĩgiĩ wĩra wa kũhunjia matukũ-inĩ ma kũrigĩrĩria. (Thoma Mariko 13:10.) Kũringana na ibuku rĩa Mathayo, Jesu aaugire atĩ ũhoro ũrĩa mwega nĩ ũngĩkaahunjio thĩ yothe ĩrĩa ĩikaragwo “mũico” ũtanakinya. (Mat. 24:14) Kiugo “mũico” kĩrarĩrĩria mũthia wa mũtabarĩre ũyũ mũũru wa Shaitani. Jehova nĩ aigĩte ‘mũthenya na thaa,’ rĩrĩa mũico ũcio ũgaakinya. (Mat. 24:36; 25:13; Atũm. 1:7) O gwatuka, noguo tũkuhagĩrĩria mũthenya ũcio. (Rom. 13:11) No kamũira mũico ũkinyĩte, nĩ tũrabatara gũthiĩ na mbere kũhunjia.
3. Tũhunjagia nĩkĩ?
3 Ithuothe nĩ tũrabatara kwĩyũria kĩũria gĩkĩ kĩa bata: Tũhunjagia ũhoro ũrĩa mwega nĩkĩ? No tuuge atĩ wendo nĩguo ũtũtindĩkaga kũhunjia. Rĩrĩa twanyitanĩra wĩra-inĩ wa kũhunjia, tuonanagia atĩ nĩ twendete ũhoro ũrĩa mwega, nĩ twendete andũ arĩa angĩ, na makĩria nĩ twendete Jehova na rĩĩtwa rĩake. Rekei twarĩrĩrie maũndũ macio.
TŨHUNJAGIA TONDŨ NĨ TWENDETE ŨHORO ŨRĨA MWEGA
4. Twĩkaga atĩa rĩrĩa twamũkĩra ũhoro mwega?
4 Ta wĩcirie ũrĩa waiguire rĩrĩa wamũkĩrire ũhoro mwega, hihi wĩgiĩ mũndũ wa famĩlĩ yanyu ũgĩte mwana, kana ũkĩona wĩra watũire wethaga! Hatarĩ nganja nĩ weriragĩria kũmenyithia andũ anyu a famĩlĩ na arata aku ũhoro ũcio mwega. Hihi ũguo nĩguo waiguire rĩrĩa wamenyire ũhoro mwega o na makĩria wa Ũthamaki wa Ngai?
5. Waiguire atĩa rĩrĩa werutire rĩa mbere ma cia Bibilia? (Ningĩ rora mbica.)
5 Ta wĩcirie ũrĩa waiguire rĩrĩa werutire rĩa mbere ma cia Bibilia. Maũndũ mamwe wamenyire nĩ atĩ Ithe witũ wa igũrũ nĩ akwendete na nĩ endaga ũtuĩke wa famĩlĩ yake. Ningĩ nĩ werutire atĩ nĩ eranĩire gũkaaniina ruo na mathĩna, na ũkĩgĩa na kĩĩrĩgĩrĩro gĩa gũkoona endwa aku arĩa makuĩte makĩriũkio. (Mar. 10:29, 30; Joh. 5:28, 29; Rom. 8:38, 39; Kũg. 21:3, 4) No mũhaka akorũo maũndũ macio werutire nĩ maakũhutirie ngoro mũno. (Luk. 24:32) Nĩ wakenirio nĩ ma icio cia bata werutire, na ndũngĩakirire nacio.—Ringithania Jeremia 20:9.
Rĩrĩa twerutire rĩa mbere ma cia Bibilia, nĩ twahĩahĩaga kũmenyithia andũ arĩa angĩ ũhoro ũcio (Rora kĩbungo gĩa 5)
6. Ũreruta atĩa kuumana na ngerekano ya Ernest na Rose?
6 Ta wĩcirie ngerekano ĩno. Mũrũ wa Ithe witũ ũmwe wĩtagwo Ernest b aarĩ na kĩndũ mĩaka ikũmi rĩrĩa baba wao aakuire. Aaugire: “Ndeyũragia ũũ: ‘Hihi athiĩte igũrũ? Kana hihi ndikaamuona rĩngĩ?’ Nĩ ndaiguagĩra ũiru ciana iria ciarĩ na maithe.” Ernest kaingĩ nĩ aathiaga mbĩrĩra-inĩ ya ithe, agaturia maru akahoya ũũ: “Ndagũthaitha Ngai ũndeithie kũmenya kũrĩa baba arĩ.” Kĩndũ mĩaka 17 thutha wa baba wao gũkua, Ernest nĩ aahunjĩirio na agĩtĩkĩra kwĩruta Bibilia. Nĩ aakenire mũno rĩrĩa eerutire atĩ arĩa makuĩte gũtirĩ ũndũ moĩ tondũ nĩ ta makomete toro mũnene, na atĩ Bibilia ĩranĩire nĩ makaariũkio. (Koh. 9:5, 10; Atũm. 24:15) Mũthia-inĩ nĩ oonire macokio ma ciũria iria eeyũrĩtie kwa ihinda rĩa mĩaka mĩingĩ. Ernest nĩ aakenagio mũno nĩ ma cia Bibilia iria eerutaga. Mũtumia wake Rose o nake nĩ aambĩrĩirie kwĩruta na nĩ aakenagĩra ũhoro ũcio wa Ũthamaki. Maabatithirio mwaka-inĩ wa 1978. Nĩ maahĩahĩaga kũmenyithania ma icio cia Bibilia kũrĩ andũ a famĩlĩ, arata ao, na andũ angĩ arĩa mangĩendire gũthikĩrĩria. Ernest na Rose nĩ mahotete gũteithia makĩria ma andũ 70 gũkinyĩrĩra kũbatithio.
7. Kwenda ma cia Bibilia kuuma ngoro kũrĩtũtindĩkaga gwĩka atĩa? (Luka 6:45)
7 Angĩkorũo nĩ twendete ma cia Bibilia kuuma ngoro, hatarĩ nganja tũtingĩkira nacio. (Thoma Luka 6:45.) Tũrĩiguaga o ta arutwo a Jesu a karine ya mbere arĩa maaugire ũũ: “Tũtingĩtiga kwaria ũhoro wa maũndũ marĩa tuonete na tũkaigua.” (Atũm. 4:20) Nĩ twendete ũhoro wa ma mũno ũũ atĩ twendaga kũũmenyithania kũrĩ andũ aingĩ o ũrĩa kwahoteka.
TŨHUNJAGIA TONDŨ NĨ TWENDETE ANDŨ
8. Nĩ kĩĩ gĩtũtindĩkaga kũhe andũ arĩa angĩ ũhoro ũrĩa mwega? (Rora gathandũkũ, “ Enda Andũ Nĩguo Ũmatue Arutwo.”) (Ningĩ rora mbica.)
8 O ta Jehova na Mũrũ wake Jesu, o na ithuĩ nĩ twendete andũ arĩa angĩ. (Thim. 8:31; Joh. 3:16) Nĩ tũcayagĩra mũno arĩa matoĩ Ngai na arĩa ‘matarĩ kĩĩrĩgĩrĩro.’ (Ef. 2:12) Nĩ ũndũ wa mathĩna marĩa marĩ namo, mahota kũigua ta marĩ irima-inĩ iriku mũno. No ũhoro mwega ũrĩa tũkoragwo naguo wa Ũthamaki wa Ngai ũhaana ta mũkwa wa kũmagucia kuuma irima-inĩ rĩu. Kwenda andũ ta acio na kũmacaĩra nĩ kũrĩtũmaga twĩkĩre kĩyo gĩa kũmahunjĩria ũhoro ũrĩa mwega. Ũhoro ũcio mwega no ũmateithie kũgĩa na mwĩhoko na gũkorũo na ũtũũro mwega ihinda-inĩ rĩrĩ, na ũmahe kĩĩrĩgĩrĩro gĩa gũkaagĩa na “muoyo ũrĩa wa ma,” kana muoyo wa tene na tene thĩinĩ wa thĩ njerũ.—1 Tim. 6:19.
Kwenda andũ na kũmacaĩra nĩ kũrĩtũmaga twĩkĩre kĩyo gĩa kũmahunjĩria ũhoro ũrĩa mwega (Rora kĩbungo gĩa 8)
9. Nĩ ndũmĩrĩri ĩrĩkũ ya mũkaana tũheanaga ĩgiĩ ihinda rĩũkĩte, na tũmĩheanaga nĩkĩ? (Ezekieli 33:7, 8)
9 Ningĩ kwenda andũ nĩ gũtũtindĩkaga kũmahe ndũmĩrĩri ya mũkaana ĩgiĩ ũrĩa mũthia wa thĩ ĩno njũru ũkuhĩrĩirie. (Thoma Ezekieli 33:7, 8.) Nĩ tũcayagĩra andũ othe, nginya andũ aitũ a famĩlĩ arĩa matarĩ etĩkia. Aingĩ ao mathiaga na mbere na ũtũũro wao matekũmenya atĩ ica ikuhĩ nĩ gũkũgĩa na “thĩna mũnene ũtarĩ woneka kuuma kĩambĩrĩria gĩa thĩ nginyagia rĩu, na ndũkoneka rĩngĩ.” (Mat. 24:21) No twende mamenye maũndũ marĩa mageekĩka ihinda-inĩ rĩu rĩa ituĩro, atĩ ndini cia maheeni nĩ ikaaniinwo na thutha ũcio thĩ ĩno njũru ĩniinwo hĩndĩ ya Hari–Magedoni. (Kũg. 16:14, 16; 17:16, 17; 19:11, 19, 20) Nĩ ihoya ritũ atĩ andũ aingĩ o ũrĩa kwahoteka nĩ mekũiyũkia ndũmĩrĩri ĩyo na manyitanĩre na ithuĩ ihinda-inĩ rĩrĩ ũthathaiya-inĩ mũtheru. No gũgaathiĩ atĩa harĩ andũ arĩa mekwaga kũgarũrĩra ihinda-inĩ rĩrĩ, nginya andũ aitũ a famĩlĩ?
10. Nĩkĩ nĩ ũndũ wa bata gũthiĩ na mbere kũheana ndũmĩrĩri ya mũkaana?
10 O ta ũrĩa gĩcunjĩ kĩrĩa kĩhĩtũku gĩataarĩirie, no kũhoteke Jehova nĩ akaahonokia andũ arĩa makaagarũrĩra mwerekera wao mona Babuloni Ũrĩa Mũnene anangwo. Angĩkorũo nĩ gũgaathiĩ ũguo, ũkĩrĩ ũndũ wa bata o na makĩria gũthiĩ na mbere kũheana ndũmĩrĩri ĩyo ya mũkaana. Ta wĩcirie ũndũ ũyũ: Maũndũ marĩa tũrameera ihinda-inĩ rĩrĩ, kwahoteka nĩ makaaririkana mamwe mamo ihinda-inĩ rĩu. (Ringithania Ezekieli 33:33.) No gũkorũo nĩ makaaririkana ndũmĩrĩri ya mũkaana ĩrĩa twamaheaga, na mambĩrĩrie kũnyitanĩra na ithuĩ ũthathaiya-inĩ mũtheru matanacererũo mũno. O ta ũrĩa mũrangĩri ũmwe wa njera itũũra-inĩ rĩa Filipi aagarũrĩire mwerekera wake rĩrĩa kwagĩire “gĩthingithia kĩnene,” no kũhoteke andũ amwe arĩa matatũthikagĩrĩria ihinda-inĩ rĩrĩ nĩ makaagarũrĩra mwerekera wao rĩrĩa makeeyonera kwanangwo kwa Babuloni Ũrĩa Mũnene.—Atũm. 16:25-34.
TŨHUNJAGIA TONDŨ NĨ TWENDETE JEHOVA NA RĨĨTWA RĨAKE
11. Nĩ na njĩra ĩrĩkũ tũheaga Jehova riri, gĩtĩo, na hinya? (Kũguũrĩrio 4:11) (Ningĩ rora mbica.)
11 Gĩtũmi kĩrĩa kĩa bata makĩria gĩtũmaga tũhunjie ũhoro ũrĩa mwega nĩ atĩ nĩ twendete Jehova Ngai na rĩĩtwa rĩake itheru. Tuonaga kũhunjia kũrĩ njĩra ya kũgooca Ngai witũ twendete. (Thoma Kũguũrĩrio 4:11.) Nĩ twĩtĩkĩtie biũ atĩ Jehova Ngai witũ nĩ agĩrĩire kwamũkĩra riri, gĩtĩo, na hinya kuuma kũrĩ ndungata ciake. Tũmũheaga riri na gĩtĩo rĩrĩa twateithia andũ arĩa angĩ kũmenya atĩ “nĩwe wombire indo ciothe” na atĩ nĩwe ũtũheete muoyo. Tũmũheaga hinya witũ rĩrĩa twahũthĩra mahinda maitũ, hinya witũ, na indo citũ kũhunjia na kĩyo kũringana na ũhoti witũ. (Mat. 6:33; Luk. 13:24; Kol. 3:23) Kwoguo twendete kwaria ũhoro wĩgiĩ Jehova tondũ nĩ tũmwendete. Ningĩ nĩ twendete kwĩra andũ ũhoro wĩgiĩ rĩĩtwa rĩake na ũrĩa riugĩte. Nĩkĩ?
Tũheaga Jehova hinya witũ rĩrĩa twahũthĩra mahinda maitũ, hinya witũ, na indo citũ kũhunjia na kĩyo kũringana na ũhoti witũ (Rora kĩbungo gĩa 11)
12. Nĩ na njĩra ĩrĩkũ tũtheragia rĩĩtwa rĩa Jehova tũkĩhunjia?
12 Kwenda Jehova nĩ gũtũtindĩkaga gũtheria rĩĩtwa rĩake. (Mat. 6:9) Nĩ twĩrutanagĩria kũmenyithia andũ atĩ maũndũ moru marĩa Shaitani atheremagia megiĩ Jehova nĩ ma maheeni. (Kĩam. 3:1-5; Ayub. 2:4; Joh. 8:44) Tũrĩ ũtungata-inĩ nĩ tũkoragwo na wendi mũnene wa gũtetera Ngai witũ, na kũmenyithia arĩa othe mangĩenda gũtũthikĩrĩria ũrĩa atariĩ kũna. Twendaga andũ othe mamenye atĩ ngumo yake ĩrĩa nene nĩ wendo, atĩ athanaga na njĩra ya kĩhooto na ũthingu, na atĩ ica ikuhĩ Ũthamaki wake nĩ ũkũniina mathĩna mothe na ũtũme andũ othe makorũo na thayũ na gĩkeno. (Thab. 37:10, 11, 29; 1 Joh. 4:8) Rĩrĩa twatetera rĩĩtwa rĩa Jehova ũtungata-inĩ, tũkoragwo tũgĩtheria rĩĩtwa rĩake. Ningĩ nĩ tũiguaga tũiganĩire na tũrĩ na gĩkeno nĩ ũndũ wa kũmenya atĩ tũratũũra kũringana na rĩĩtwa ritũ. Tũngiuga ũguo nĩkĩ?
13. Nĩ kĩĩ gĩtũmaga tuone arĩ gĩtĩo kĩnene gwĩtwo Aira a Jehova? (Isaia 43:10-12)
13 Jehova nĩ atũthuurĩte tũtuĩke “aira” ake. (Thoma Isaia 43:10-12.) Mĩaka ĩigana ũna mĩhĩtũku, harĩ marũa ma Kĩama Kĩrĩa Gĩtongoragia maaugire ũũ: “Mweke ũrĩa wa mwanya mũno mũndũ angĩkorũo naguo nĩ gũtuĩka Mũira wa Jehova.” c Nĩkĩ? Ta wĩcirie ngerekano ĩno. Ũngĩbatara mũira wa gũgũtetera igooti-inĩ, hatarĩ nganja ũngĩthuura mũndũ ũĩ na wĩhokete, ũrĩa wĩthondekeire rĩĩtwa rĩega ũũ atĩ ũira wake no wĩhokwo. Kwoguo tondũ Jehova nĩ atũthuurĩte tũtuĩke aira ake, ũndũ ũcio ũronania atĩ nĩ atũĩ wega na atĩ nĩ arona twagĩrĩire kũmenyithania atĩ nĩwe Ngai ũrĩa wa ma. Tuonaga arĩ gĩtĩo kĩnene gũtuĩka aira ake, na nĩkĩo tũhũthagĩra mweke o wothe tuona kũmenyithania rĩĩtwa rĩake na kũmũtetera kuumana na maheeni marĩa matheremetio igũrũ rĩake. Gwĩka ũguo kuonanagia atĩ nĩ tũratũũra kũringana na rĩĩtwa rĩrĩa twĩrahagĩra gwĩtanio narĩo, nĩrĩo Aira a Jehova.—Thab. 83:18; Rom. 10:13-15.
TŨGŨTHIĨ NA MBERE KŨHUNJIA NGINYA MŨTHIA
14. Nĩ maũndũ marĩkũ tũrerirĩria kuona magĩkĩka ica ikuhĩ?
14 Nĩ tũrerirĩria mũno kuona maũndũ marĩa megwĩkĩka ica ikuhĩ! Tũrerĩgĩrĩra atĩ kũgerera ũteithio wa Jehova, andũ angĩ aingĩ nĩ megwĩtĩkĩra ũhoro wa ma, thĩna ũrĩa mũnene ũtanambĩrĩria. Ningĩ nĩ tũrakena kũmenya atĩ o na hĩndĩ ya thĩna ũcio mũnene ũtarĩ woneka thĩinĩ wa historĩ ya andũ, kwahoteka nĩ tũkoona andũ angĩ aingĩ magĩtigana na thĩ ĩno ya Shaitani na manyitanĩre na ithuĩ kũgooca Jehova.—Atũm. 13:48.
15-16. Nĩ wĩra ũrĩkũ tũgũthiĩ na mbere kũruta, na tũkũũruta nginya rĩ?
15 Kamũira ihinda rĩu rĩkinyĩte, tũrĩ na wĩra wa kũruta. Tũrĩ na mweke wa kũnyitanĩra wĩra-inĩ ũtakaarutwo rĩngĩ wa kũhunjia ũhoro ũrĩa mwega wa Ũthamaki wa Ngai thĩinĩ wa thĩ yothe. Makĩria ma ũguo, no mũhaka tũthiĩ na mbere kũheana ndũmĩrĩri ya mũkaana. Andũ nĩ marabatara kũmenya atĩ mũthia wa mũtabarĩre ũyũ mũũru wa maũndũ nĩ ũkuhĩrĩirie mũno. Tũngĩhingia haitũ, hĩndĩ ĩyo ya ituĩro yakinya nĩ makaamenya atĩ ndũmĩrĩri ĩrĩa twahunjagia yaumĩte kũrĩ Jehova Ngai.—Ezek. 38:23.
16 Gũkĩrĩ ũguo-rĩ, twagĩrĩirũo gũtua itua rĩrĩkũ? Tondũ nĩ twendete ũhoro ũrĩa mwega, tũkenda andũ arĩa angĩ, na makĩria tũkenda Jehova Ngai na rĩĩtwa rĩake, twagĩrĩirũo gũthiĩ na mbere kũhunjia tũrĩ na kĩyo na mĩtũkĩ nginya rĩrĩa Jehova akauga atĩ wĩra ũcio nĩ wakinya mũthia.
RWĨMBO NA. 54 “Ĩno Nĩyo Njĩra”
a Mũcemanio ũcio wa o mwaka wekirũo Oktomba 7, 2023, Nyũmba-inĩ ya Kĩgomano ya Aira a Jehova ya Newburgh gĩcigo-inĩ kĩa New York, U.S.A. Programu ĩyo ĩrĩ yothe nĩ yacokire ĩkĩonanio thĩinĩ wa JW Broadcasting®—Gĩcunjĩ kĩa 1 kĩoonanirio Novemba 2023, nakĩo Gĩcunjĩ gĩa 2 gĩkĩonanio Janũarĩ 2024.
b Rora gĩcunjĩ kĩa “Bibilia nĩ Ĩgarũraga Mĩtũũrĩre ya Andũ—Nĩ Ndaakenirio Mũno nĩ Macokio Mega na ma Kwĩhokeka ma Bibilia,” thĩinĩ wa ngathĩti ya Mũrangĩri ya Februarĩ 1, 2015.
c Rora ibuku rĩa Kitabu cha Mwaka cha Mashahidi wa Yehova rĩa 2007, kar. 3.
