1. Nĩ rĩ arĩa othe aitĩrĩrie maguta magaakorũo mathiĩte igũrũ?

 MĨAKA mĩingĩ mĩhĩtũku, andũ a Jehova nĩ meeyũragia ũũ: ‘Hihi Akristiano aitĩrĩrie maguta arĩa matigarĩte magaathiĩ igũrũ rĩ?’ Kũrĩ hĩndĩ tweciragia atĩ no kũhoteke amwe ao no magaakorũo gũkũ thĩ o na thutha wa Hari–Magedoni na maikare ihinda rĩigana ũna thĩinĩ wa Paradiso. No ngathĩti ya Mũrangĩri ya Julaĩ 15, 2013, nĩ yoonanirie atĩ aitĩrĩrie maguta othe arĩa magaakorũo matigarĩte gũkũ thĩ magaathiĩ igũrũ mbaara ya Hari–Magedoni ĩtanambĩrĩria.—Mat. 24:31.

2. Nĩ kĩũria kĩrĩkũ mũndũ angĩĩyũria, na nĩ maũndũ marĩkũ tũkwarĩrĩria gĩcunjĩ-inĩ gĩkĩ?

² No mũndũ no eyũrie ũũ: Gũgaathiĩ atĩa harĩ Akristiano arĩa a “ngʼondu ingĩ” arĩa magaakorũo magĩtungatĩra Jehova marĩ ehokeku hĩndĩ ya ‘thĩna ũrĩa mũnene’? (Joh. 10:16; Mat. 24:21) Andũ amwe no mone ta makaaigua matiganĩirio na matukanĩirũo rĩrĩa aarĩ na ariũ a Ithe witũ arĩa aitĩrĩrie maguta magaathiĩ igũrũ othe. Rekei twarĩrĩrie ngʼano igĩrĩ thĩinĩ wa Bibilia iria ingĩtũma mecirie ũguo. Thutha ũcio nĩ tũkwarĩrĩria itũmi iria ingĩtũteithia kwaga gũtangĩka nĩ ũndũ ũcio.

NĨ MAŨNDŨ MARĨKŨ MATAGEEKĨKA?

3-4. Nĩ ũndũ ũrĩkũ andũ amwe mangĩĩyũria, na nĩkĩ?

³ Andũ amwe no meyũrie kana hihi Akristiano arĩa a ngʼondu ingĩ nĩ magaatiganĩria ũhoro wa ma rĩrĩa ariũ a Ithe witũ a Kĩama Kĩrĩa Gĩtongoragia matagaakorũo ho nĩguo mamatongorie. No mecirie ũguo nĩ ũndũ wa ngʼano imwe tũthomaga thĩinĩ wa Bibilia. Reke twarĩrĩrie ngerekano igĩrĩ. Ya mbere nĩ ya rũgano rwĩgiĩ Jehoiada, Mũthĩnjĩri-Ngai Ũrĩa Mũnene, ũrĩa warĩ ndungata njĩhokeku ya Ngai. Marĩ na mũtumia wake Jehoshabeathu, nĩ maagitĩire kamwana geetagwo Jehoashu na magĩgateithia nginya gagĩtuĩka mũthamaki mwega na mwĩhokeku. Rĩrĩa Jehoiada aarĩ muoyo, Jehoashu nĩ eekaga maũndũ  mega. No rĩrĩa Jehoiada aakuire, Jehoashu agĩcenjia o na ihenya, akĩambĩrĩria gwĩka maũndũ moru. Agĩthikĩrĩria anene arĩa maarĩ oru, na kwoguo agĩtiga gũtungatĩra Jehova.—2 Maũ. 24:​2, 15-19.

⁴ Ngerekano ĩyo ĩngĩ nĩ ya Akristiano a karine ya kerĩ. Johana, ũrĩa warĩ mũtũmwo wa mũico gũkua, nĩ aateithirie Akristiano aingĩ gũikara marĩ ehokeku harĩ Jehova. (3 Joh. 4) O ta atũmwo acio angĩ a Jesu, Johana nĩ eerutanagĩria kũgitĩra kĩũngano kuumana na ũregenyũki ũrĩa watheremaga. (1 Joh. 2:18; 2 Thes. 2:7) No rĩrĩa Johana aakuire, ũregenyũki nĩ waambĩrĩirie gũtherema o na ihenya kĩũngano-inĩ ta mwaki wa gĩthaka. Na ihinda-inĩ rĩa mĩaka mĩnini, kĩũngano gĩa Gĩkristiano nĩ gĩathũkĩtio biũ.

5. Nĩ maũndũ marĩkũ matageekĩka?

⁵ Hihi ngʼano icio igĩrĩ cia Bibilia ironania atĩ ũndũ ta ũcio nĩ ũkaahaanĩka harĩ Akristiano arĩa a ngʼondu ingĩ rĩrĩa arĩa aitĩrĩrie maguta magaathiĩ igũrũ othe? Hihi hĩndĩ ĩyo Akristiano ehokeku arĩa marĩ gũkũ thĩ nĩ magaatiganĩria maũndũ marĩa marutĩtwo o ta Jehoashu, kana matuĩke aregenyũki ta Akristiano aingĩ a karine ya kerĩ? Aca gũtigaathiĩ ũguo! No tũkorũo na ma atĩ rĩrĩa arĩa aitĩrĩrie maguta magaathiĩ igũrũ othe, Akristiano arĩa a ngʼondu ingĩ nĩ magaathiĩ na mbere kũrũmbũiyo wega na maikare marĩ na hinya kĩĩroho. Tũngĩkorũo na ma atĩa na ũndũ ũcio?

ŨTHATHAIYA MŨTHERU NDŨGAATHAHIO

6. Nĩ mahinda marĩkũ matatũ tũkwarĩrĩria?

⁶ Nĩ kĩĩ kĩngĩtũma tũkorũo na ma atĩ ũthathaiya mũtheru ndũgaathahio o na mahinda-inĩ maritũ marĩa marĩ mbere? Nĩ tondũ wa maũndũ marĩa twĩrutĩte Bibilia-inĩ megiĩ mahinda marĩa tũratũũra. Mahinda maya nĩ ngũrani mũno na ma Aisiraeli na ma Akristiano a karine ya kerĩ. Nĩ ũndũ ũcio rekei tũthuthurie mahinda maya matatũ: (1) Ihinda rĩa Aisiraeli, (2) ihinda rĩa Akristiano a karine ya kerĩ thutha wa atũmwo gũkua, na (3) mahinda maitũ, marĩa nĩmo “ihinda rĩa . . . gũcookereria maũndũ mothe.”—Atũm. 3:​21, Holy Bible in Gĩkũyũ.

7. Aisiraeli ehokeku maagaga kũũrũo nĩ hinya nĩkĩ rĩrĩa athamaki ao na Aisiraeli aingĩ maaremagĩra Jehova?

⁷ Ihinda rĩa Aisiraeli. Musa eerire Aisiraeli ũũ ihinda inini atanakua: “Nĩ njũĩ wega atĩ thutha wakwa gũkua nĩ mũkaarema na mwehere njĩra-inĩ ĩrĩa ndĩmwathĩte.” (Gũcok. 31:29) Ningĩ Musa nĩ eerire Aisiraeli atĩ mangĩaremire, nĩ mangĩatwarirũo ithamĩrio. (Gũcok. 28:​35, 36) Hihi ciugo icio nĩ ciahingire? Ĩĩ. Kwa ihinda rĩa mĩaka mĩingĩ, athamaki aingĩ a Isiraeli nĩ maaremeire Jehova na magĩtũma andũ a Ngai maregenyũke. Nĩ ũndũ ũcio, Jehova nĩ aaherithirie Aisiraeli acio nĩ ũndũ wa ũremi wao na ndetĩkĩririe kũgĩe na athamaki thĩinĩ wa Isiraeli rĩngĩ. (Ezek. 21:​25-27) No Aisiraeli arĩa maarĩ ehokeku nĩ meekagĩrũo hinya mona ciugo cia Ngai ikĩhinga.—Isa. 55:​10, 11.

8. Hihi nĩ tũbatiĩ kũgega nĩ gũkorũo atĩ kĩũngano gĩa karine ya kerĩ nĩ gĩathahirio? Taarĩria.

⁸ Ihinda rĩa Akristiano a karine ya kerĩ thutha wa atũmwo gũkua. Hihi nĩ tũbatiĩ kũgega nĩ gũkorũo atĩ kĩũngano gĩa karine ya kerĩ nĩ gĩathahirio? Aca. Jesu nĩ aarathĩte atĩ nĩ kũngĩkaagĩa ũregenyũki mũnene. (Mat. 7:​21-23; 13:​24-30, 36-43) Mũtũmwo Paulo, mũtũmwo Petero, na mũtũmwo Johana nĩ moonanirie atĩ ũrathi ũcio wa Jesu nĩ waambĩtie kũhinga karine-inĩ ya mbere. (2 Thes. 2:​3, 7; 2 Pet. 2:1; 1 Joh. 2:18) Karine-inĩ ya kerĩ, nĩ kwagĩire na ũregenyũki kĩũngano-inĩ gĩa Gĩkristiano. Akristiano acio aregenyũki nĩ maatuĩkire gĩcunjĩ kĩa Babuloni Ũrĩa Mũnene, na nĩwe  ndini ciothe cia maheeni gũkũ thĩ. Kwoguo o na ũrathi ũcio wa Jesu nĩ wahingire.

9. Mahinda maya tũrĩ nĩ ngũrani atĩa na hĩndĩ ya Aisiraeli na hĩndĩ ya ũregenyũki mũnene ũrĩa waambĩrĩirie karine-inĩ ya kerĩ?

⁹ ‘Ihinda rĩa gũcokereria maũndũ mothe.’ Mahinda maya tũrĩ nĩ ngũrani na hĩndĩ ya Aisiraeli na hĩndĩ ya ũregenyũki mũnene ũrĩa waambĩrĩirie karine-inĩ ya kerĩ. Tũratũũra mahinda marĩkũ? Kaingĩ metagwo ‘matukũ ma kũrigĩrĩria’ ma mũtabarĩre ũyũ mũũru wa maũndũ. (2 Tim. 3:1) No Bibilia yonanagia atĩ rĩrĩa matukũ macio maambĩrĩirie, ningĩ nĩ kwambĩrĩirie ihinda rĩngĩ rĩa bata o na makĩria rĩtagwo “ihinda rĩa . . . gũcookereria maũndũ mothe.” (Atũm. 3:21) Ihinda rĩu rĩgũthiĩ na mbere kwa ihinda iraihu nginya rĩrĩa Ũthamaki wa Kĩĩmesia ũgaateithia andũ gũtuĩka akinyanĩru na ũgarũre thĩ ĩtuĩke paradiso. Ihinda rĩu rĩaambĩrĩirie mwaka wa 1914. Nĩ kĩĩ gĩacokirio? Jesu nĩ aatuirũo Mũthamaki kũrĩa igũrũ. Kwoguo Jehova akĩgĩa rĩngĩ na mũthamaki wa kũmũrũgamĩrĩra wa rũciaro rwa Mũthamaki Daudi. O na kũrĩ ũguo, ũthamaki ũcio toguo Jehova aacokirie. Kahinda kanini thutha ũcio, ũthathaiya mũtheru o naguo nĩ waambĩrĩirie gũcokio! (Isa. 2:​2-4; Ezek. 11:​17-20) Hihi kũrĩ hĩndĩ ũgaathahio rĩngĩ?

10. (a) Bibilia yarathĩte atĩa ũhoro wĩgiĩ ũthathaiya mũtheru mahinda-inĩ maya? (Isaia 54:17) (b) Morathi ta macio matwĩkĩraga ngoro nĩkĩ?

¹⁰ Thoma Isaia 54:17. Ta wĩcirie ũhoro wa ũrathi ũcio: “Gũtirĩ itharaita rĩa mbaara rĩthondeketwo nĩ ũndũ waku rĩkaagaacĩra”! Ciugo icio cia ũrathi nĩ irahinga mahinda-inĩ maya. Ningĩ ciugo ici cia gwĩkĩra ngoro o nacio nĩ irahinga: “Ariũ aku othe nĩ makaarutwo nĩ Jehova, naguo thayũ wa ariũ aku nĩ ũgaakorũo ũrĩ mũingĩ. Nĩ ũkaahandwo ũrũmĩte wega thĩinĩ wa ũthingu. . . . Ndũrĩ ũndũ ũgeetigĩra na ndũgakorũo na gĩtũmi gĩa kũigua guoya, nĩ gũkorũo ndũgaagũkuhĩrĩria.” (Isa. 54:​13, 14) O na “ngai wa mũtabarĩre ũyũ wa maũndũ,” Shaitani we mwene, ndarĩ na hinya wa kũgirĩrĩria wĩra wa kũrutana Bibilia ũrĩa andũ a Jehova mararuta ũmũthĩ. (2 Kor. 4:4) Ũthathaiya mũtheru nĩ ũcoketio, na gũtirĩ hĩndĩ ũgaathahio rĩngĩ. Ũgũtũũra tene na tene, tondũ gũtirĩ itharaita rĩthondeketwo nĩ ũndũ witũ rĩkaagaacĩra!

MAŨNDŨ MARĨA MAGEEKĨKA?

11. Nĩ kĩĩ kĩngĩtũma tũkorũo na ma atĩ Akristiano a kĩrĩndĩ kĩnene matigaatiganĩrio rĩrĩa arĩa aitĩrĩrie maguta magaathiĩ igũrũ?

¹¹ Gũgaathiĩ atĩa rĩrĩa aitĩrĩrie maguta magathiĩ igũrũ? Ririkana atĩ Jesu nĩwe Mũrĩithi  witũ. Nĩwe mũtwe wa kĩũngano gĩa Gĩkristiano. Jesu aaugire ũũ: “Mũtongoria wanyu nĩ ũmwe, nĩwe Kristo.” (Mat. 23:10) Gũtirĩ hĩndĩ Mũthamaki witũ akaaremwo kũhingia wĩra wake. Tondũ nĩ Kristo ũgaakorũo agĩtongoria, arũmĩrĩri ake arĩa magaakorũo gũkũ thĩ matikaabatara gwĩtigĩra. Nĩ ma tũtiũĩ maũndũ mothe megiĩ ũrĩa Kristo agaatongoria andũ ake ihinda-inĩ rĩu. Kwoguo rekei twarĩrĩrie ngerekano imwe cia Bibilia ingĩtũteithia kũgĩa na ũmĩrĩru.

12. Jehova aarũmbũirie andũ ake atĩa (a) rĩrĩa Musa aakuire? (b) thutha wa Elija gũthamĩrio gĩcigo-inĩ kĩngĩ agatungate kuo? (Ningĩ rora mbica.)

¹² Aisiraeli matanaingĩra Bũrũri wa Kĩĩranĩro, Musa nĩ aakuire. Gwathiire atĩa harĩ andũ a Ngai? Hihi nĩ maatigirũo thĩna-inĩ atĩ tondũ rĩu Musa ndaarĩ ho? Aca. Rĩrĩa rĩothe maatũũrire marĩ ehokeku, Jehova nĩ aamaheaga kĩrĩa gĩothe maabataraga. Musa atanakua, Jehova aamwĩrire aamũre Joshua atongoragie andũ ake. Musa nĩ aakoretwo akĩmenyeria Joshua mĩaka mĩingĩ. (Tham. 33:11; Gũcok. 34:9) Makĩria ma ũguo, kwarĩ na arũme angĩ aingĩ maatongoragia maũndũ, ta anene a andũ ngiri, anene a andũ igana, anene a andũ mĩrongo ĩtano, nginya anene a andũ ikũmi. (Gũcok. 1:15) Kwoguo andũ a Jehova maarĩ arũmbũiye. Ngerekano ĩngĩ nĩ ya Elija. Nĩ aakoretwo agĩtongoria maũndũ ũthathaiya-inĩ wa ma mĩaka mĩingĩ. No ihinda nĩ rĩakinyire Jehova akĩmũthamĩria mwena wa mũhuro gĩcigo-inĩ kĩa Juda agatungate kuo. (2 Ath. 2:1; 2 Maũ. 21:12) Hihi andũ ehokeku mĩhĩrĩga-inĩ ĩrĩa ikũmi ya Isiraeli maatigirũo thĩna-inĩ? Aca. Elija nĩ aakoretwo akĩmenyeria Elisha kwa ihinda rĩa mĩaka mĩingĩ. Ningĩ nĩ kwarĩ na ‘ariũ a anabii,’ arĩa hihi maabangĩtwo na makamenyerio maũndũ matiganĩte. (2 Ath. 2:7) Kwoguo kwarĩ na arũme aingĩ ehokeku maatongoragia andũ a Ngai. Jehova nĩ aathiire na mbere kũhingia muoroto wake na kũrũmbũiya athathaiya ake ehokeku.

13. Nĩ ũũma ũrĩkũ tũheetwo thĩinĩ wa Ahibirania 13:5b? (Ningĩ rora mbica.)

¹³ Tũrĩ na ngerekano icio meciria-inĩ-rĩ, ũgwĩciria gũgaathiĩ atĩa aitĩrĩrie maguta mathiĩ igũrũ othe? Tũtirabatara kũmaka. Bibilia ĩtũheaga ũũma ũyũ: Gũtirĩ hĩndĩ Jehova agaatiganĩria andũ ake arĩa magaakorũo gũkũ thĩ. (Thoma Ahibirania 13:5b.) O ta Musa na Elija, Akristiano aitĩrĩrie maguta arĩa maratongoria maũndũ ũmũthĩ nĩ mataũkagĩrũo bata wa kũmenyeria andũ arĩa angĩ. Kwa ihinda rĩa mĩaka mĩingĩ, Kĩama Kĩrĩa Gĩtongoragia nĩ gĩkoretwo gĩkĩmenyeria ariũ a Ithe witũ  a ngʼondu ingĩ gũtongoria maũndũ. Kwa ngerekano, nĩ gũkoretwo na cukuru nyingĩ cia kũmenyeria athuri a kĩũngano, arori arĩa magendaga, arĩa matungataga thĩinĩ wa Kamĩtĩ cia Wabici cia Honge, arĩa marũgamagĩrĩra maũndũ Betheli, na angĩ. Ningĩ Kĩama Kĩrĩa Gĩtongoragia nĩ gĩkoretwo gĩkĩmenyeria ateithia a kamĩtĩ itiganĩte cia kĩama kĩu. Ariũ a Ithe witũ acio rĩu nĩ marahingia maũndũ maingĩ marĩa mehokeirũo. Nĩ mehaarĩirie gũtwarithia na mbere wĩra ũcio wa kũrũmbũiya ngʼondu cia Kristo.

14. Nĩ ũndũ ũrĩkũ mũnene tũreruta?

¹⁴ Ũyũ nĩguo ũndũ ũrĩa mũnene tũreruta: Rĩrĩa aitĩrĩrie maguta magaathiĩ igũrũ othe ihinda inini mbere ya thĩna ũrĩa mũnene gũthira, ũthathaiya mũtheru thĩinĩ wa thĩ ũgaathiĩ o na mbere o ta ũrĩa gũkoretwo. Kwoguo andũ a Jehova magaathiĩ o na mbere kũmũthathaiya magĩtongorio nĩ Jesu Kristo. Nĩ ma hĩndĩ ĩyo andũ a Ngai nĩ magaatharĩkĩrũo nĩ Gogu wa Magogu, o we ngwatanĩro ya mabũrũri. (Ezek. 38:​18-20) No tharĩkĩro ĩyo ndĩgaikara ihinda iraihu na ndĩkagaacĩra. Ndĩgatũma andũ a Ngai matige gũthathaiya Jehova. Na hatarĩ nganja Jehova nĩ akaamahonokia! O na mũtũmwo Johana nĩ oonire kĩoneki-inĩ “kĩrĩndĩ kĩnene” kĩa Akristiano arĩa a ngʼondu ingĩ, na eerirũo atĩ ‘kĩrĩndĩ kĩu kĩneneʼ gĩgaakorũo kiumĩte “thĩna-inĩ ũrĩa mũnene.” (Kũg. 7:​9, 14) Kwoguo no tũkorũo na ma atĩ Jehova nĩ akaamagitĩra!

15-16. Kũringana na Kũguũrĩrio 17:​14, Akristiano arĩa aitĩrĩrie maguta magaakorũo magĩka atĩa hĩndĩ ya mbaara ya Hari–Magedoni, na ũndũ ũcio ũratwĩkĩra ngoro nĩkĩ?

¹⁵ No andũ amwe no meyũrie: ‘Hihi arĩa aitĩrĩrie maguta mageeka atĩa mathiĩ igũrũ?’ Bibilia ĩcokagia kĩũria kĩu ĩmwe kwa ĩmwe. Yonanagia atĩ mathondeka ma gĩũteti ma thĩ ĩno nĩ “makaarũa na Gatũrũme,” no matigatooria. Tũthomaga ũũ: “Gatũrũme nĩ akaamahoota.” Na nĩa makaamũteithĩrĩria? Mũhari ũcio wonanagia atĩ nĩ “arĩa metĩtwo na magathuurũo na ehokeku.” (Thoma Kũguũrĩrio 17:14.) Nĩa acio? Nĩ arĩa aitĩrĩrie maguta thutha wa gũthiĩ kũrĩa igũrũ. Kwoguo rĩrĩa aitĩrĩrie maguta arĩa magaakorũo matigarĩte gũkũ  thĩ magaathiĩ igũrũ ihinda inini mbere ya thĩna ũrĩa mũnene gũthira, wĩra ũmwe makaamba kũheo nĩ wa kũrũa mbaara. Ũcio nĩ ũndũ wa magegania! Akristiano amwe aitĩrĩrie maguta maarĩ arũi a mbaara matanatuĩka Aira a Jehova. Amwe maarĩ nginya ikundi-inĩ itiganĩte cia njeshi. No nĩ maacokire magĩtuĩka Akristiano a ma na makĩĩruta gũikarania na andũ arĩa angĩ na thayũ. (Gal. 5:22; 2 Thes. 3:16) Nĩ maatiganire na mbaara ta icio. No rĩrĩa magaathiĩ igũrũ, magaatungata hamwe na Kristo na araika, marũe mbaara ya mũthia na thũ cia Jehova.

¹⁶ Ta wĩcirie ũndũ ũyũ: Gũkũ thĩ, Akristiano amwe aitĩrĩrie maguta nĩ akũrũ, o na magakorũo matarĩ na hinya wa mwĩrĩ. No mathiĩ kũrĩa igũrũ magaakorũo marĩ ciũmbe irĩ na hinya makĩrutithania wĩra na Njamba ya Ita, Jesu Kristo. Thutha wa kũrũa mbaara ya Hari–Magedoni, nĩ magaakorũo na itemi rĩa gũteithia andũ matuĩke akinyanĩru. Hatarĩ nganja, nĩ makaahota gũteithia aarĩ na ariũ a Ithe witũ na njĩra nene o na makĩria me kũrĩa igũrũ gũkĩra marĩ andũ matarĩ akinyanĩru gũkũ thĩ!

17. Tũmenyaga atĩa atĩ ndungata ciothe cia Ngai nĩ igaakorũo irĩ ngitĩre hĩndĩ ya mbaara ya Hari–Magedoni?

¹⁷ Angĩkorũo wee ũrĩ ũmwe wa Akristiano arĩa a ngʼondu ingĩ-rĩ, hihi ũkaabatara gwĩka atĩa rĩrĩa mbaara ya Hari–Magedoni ĩkaambĩrĩria? Ũkaabatara o kwĩhoka Jehova na kũrũmĩrĩra ũtongoria wake. Ũtongoria ũmwe ũngĩbatara gũkaarũmĩrĩra nĩ ũyũ ũgwetetwo thĩinĩ wa Bibilia: “Mũingĩre rumu cianyu cia thĩinĩ, na mũhinge mĩrango mwaingĩra. Mwĩhithe ihinda inini nginya rĩrĩa marakara marĩkorũo mahĩtũkĩte.” (Isa. 26:20) Hĩndĩ ĩyo ndungata ciothe cia Ngai, kũrĩa igũrũ na gũkũ thĩ, igaakorũo irĩ ngitĩre. O ta mũtũmwo Paulo, tũrĩ na ma atĩ o na “thirikari kana maũndũ marĩa marĩ kuo rĩu kana maũndũ marĩa magooka . . . gũtirĩ kĩndũ kĩngĩhota gũtũtigithũkania na wendo wa Ngai.” (Rom. 8:​38, 39) Hingo ciothe ririkanaga atĩ Jehova nĩ akwendete, na gũtirĩ hĩndĩ agaagũtiganĩria!