Ngai eerire Adamu ũũ: “Mũthenya ũrĩa [ũkaarĩa maciaro ma mũtĩ ũcio], hatarĩ nganja no gũkua ũgaakua.” (Kĩambĩrĩria 2:17) Korũo Ngai oombĩte Adamu akũre acoke akue, hatingĩarĩ na bata wa kũmũhe watho ũcio. Adamu nĩ aamenyaga atĩ angĩaagire kũrĩa maciaro ma mũtĩ ũcio, ndangĩakuire.

Adamu na Hawa matiabataraga kũrĩa maciaro ma mũtĩ ũcio nĩguo makorũo marĩ muoyo, tondũ mũgũnda ũcio warĩ na mĩtĩ ĩngĩ mĩingĩ mangĩarĩire maciaro mayo. (Kĩambĩrĩria 2:9) Na njĩra ya kwaga kũrĩa maciaro ma mũtĩ ũcio, Adamu na Hawa nĩ maangĩonanirie atĩ nĩ marathĩkĩra ũrĩa wamaheete muoyo. Ningĩ nĩ maangĩonanirie nĩ maamenyaga atĩ Ngai nĩwe warĩ na kĩhooto gĩa kũmatongoria.

Nĩgetha tũtaũkĩrũo kĩrĩa gĩatũmire Adamu na Hawa makue, nĩ tũbatiĩ gũthuthuria ndeereti yatũhutirie ithuothe. Shaitani Mũcukani aahũthĩrire nyoka kũheenania. Bibilia yugaga: “Na rĩrĩ, nyoka nĩyo yehũgaga mũno gũkĩra nyamũ ciothe cia gĩthaka iria Jehova Ngai oombĩte. Nĩ ũndũ ũcio ĩkĩra mũtumia ũcio atĩrĩ: ‘Atĩ Ngai ooigire mũtikanarĩe matunda ma mũtĩ o wothe wa mũgũnda ũyũ?’”—Kĩambĩrĩria 3:1.

Nake Hawa agĩcokia atĩrĩ: “No tũrĩe matunda ma mĩtĩ ya mũgũnda ũyũ. No Ngai oigĩte ũũ ũhoro-inĩ wĩgiĩ matunda ma mũtĩ ũrĩa wĩ gatagatĩ ka mũgũnda ũyũ: ‘Mũtikanarĩe matunda maguo, na mũtikanaũhutie; nĩ gũkorũo mũngĩka ũguo no gũkua mũngĩkua.’” Nayo nyoka ĩkĩra mũtumia ũcio ũũ: “Aca mũtingĩkua. Nĩ gũkorũo Ngai nĩ oĩ atĩ mũthenya ũrĩa mũkaarĩa matunda ma mũtĩ ũcio, maitho manyu nĩ makaahingũka na mũtuĩke o ta Ngai, mũmenyage wega na ũũru.” Na njĩra ĩyo, Shaitani akĩonania atĩ Jehova nĩ mũheenania na nĩ harĩ ũndũ mwega aaimaga aciari aitũ a mbere.—Kĩambĩrĩria 3:2-5.

Hawa nĩ eetĩkirie ũrĩa eerirũo. Akĩrora mũtĩ ũcio. Akĩona ũrĩ mwega na wa kwendeka! Agĩtambũrũkia guoko, agĩtua maciaro maguo, na akĩambĩrĩria kũrĩa. Bibilia ĩcokaga ĩkoiga ũũ: “Thutha ũcio, rĩrĩa maarĩ hamwe na mũthuriwe, akĩmũhe nake akĩrĩa.”—Kĩambĩrĩria 3:6.

No mũhaka Ngai akorũo nĩ aaiguire ũũru mũno kuona ciana ciake eendete igĩthuura kwaga kũmwathĩkĩra! Hihi eekire atĩa? Jehova eerire Adamu: “Ũgaacoka tĩri-inĩ, tondũ nĩkuo warutirũo. Nĩ gũkorũo wee ũrĩ rũkũngũ na ũgaacoka o rũkũngũ-inĩ.” (Kĩambĩrĩria 3:17-19) Nĩ ũndũ ũcio, “matukũ mothe ma ũtũũro wa Adamu maarĩ mĩaka 930,  agĩcoka agĩkua.” (Kĩambĩrĩria 5:5) Adamu ndaathiire igũrũ kana agĩthiĩ gũikaraga ciikaro-inĩ ingĩ cia roho. Atanombwo nĩ Jehova kuuma rũkũngũ-inĩ, ndaatũũraga mbere ĩyo. Kwoguo rĩrĩa aakuire, aatigire gũkorũo arĩ muoyo akĩhaana o rũkũngũ rũrĩa oombĩtwo naruo. Ũcio warĩ ũndũ wa kĩeha!

Nĩ ũndũ wa gũthuura kwaga gwathĩka, Adamu na Hawa nĩ moorirũo nĩ mweke wa gũkorũo marĩ akinyanĩru na wa gũtũũra tene na tene. Nĩ maambĩrĩirie kũrwara na gũkũra, magĩtuĩka andũ matarĩ akinyanĩru na ehia. No moimĩrĩro ma mehia mao ma kwaga gwathĩka to o maahutirie. O na njiarũa ciao nĩ ciagaire mehia na kwaga gũkinyanĩra kwao. Aroma 5:12 yugaga ũũ: “Kũgerera harĩ mũndũ ũmwe mehia maatonyire thĩinĩ wa thĩ na gĩkuũ gĩgĩtonya nĩ ũndũ wa mehia, na kwoguo gĩkuũ gĩgĩtherema kũrĩ andũ othe tondũ nĩ meehĩtie othe.”

Bibilia ĩgĩtaarĩria mehia na gĩkuũ yugaga atĩ ihaana “taama ũrĩa ũhumbĩrĩte ikundi ciothe cia andũ o hamwe na gĩtambaya kĩrĩa gĩtumĩtwo gĩkahumbĩra ndũrĩrĩ ciothe.” (Isaia 25:7) Taama ũcio ũhumbagĩra andũ o ta rĩera rĩrĩ na thumu mũndũ atangĩhota kũrĩĩthema. Ũrĩa kũrĩ nĩ atĩ andũ “othe makuaga nĩ ũndũ wa Adamu.” (1 Akorintho 15:22) Kĩũria kĩrĩa o mũndũ eyũragia o ta ũrĩa mũtũmwo Paulo ooririe nĩ gĩkĩ: “Nũũ ũkũũhonokia kuuma harĩ mwĩrĩ ũrĩa ũrehaga gĩkuũ gĩkĩ?” Hihi harĩ mũndũ ũngĩtũhonokia?—Aroma 7:24.