Jehova erĩgagĩrĩra arĩa mahikanĩtie maikarage marĩ ehokeku harĩ mwĩhĩtwa wa kĩhiko. Akĩnyitithania mũndũ mũrũme wa mbere na mũndũ wa nja thĩinĩ wa kĩhiko-rĩ, Jehova oigire ũũ: “Mũndũ mũrũme nĩatigane na ithe na nyina, magwatane na mũka, nao erĩ matuĩke mwĩrĩ ũmwe.” Thuutha-inĩ Jesu Kristo nĩ aacokerire ciugo icio na akĩongerera ũũ: “Nĩ ũndũ ũcio-rĩ, arĩa Ngai agwatanĩtie mũndũ ndakanamatigithanie.” (Kĩambĩrĩria 2:24; Mathayo 19:3-6) Kwoguo-rĩ, Jehova na Jesu monaga kĩhiko kĩrĩ kĩrĩkanĩro gĩa gũtũũra na gĩthiraga tu o rĩrĩa ũmwe wa arĩa mahikanĩtie akua. (1 Akorintho 7:39) Tondũ kĩhiko nĩ mũbango mũtheru-rĩ, ndigano ti ũndũ wa kuoyũo na njĩra hũthũ. Ũũma nĩ  atĩ, Jehova nĩ athũire ndigano itarĩ na mũthingi wa Kĩĩmaandĩko.—Malaki 2:15, 16.

Mũthingi wa ndigano kũringana na Maandĩko nĩ ũrĩkũ? Jehova nĩ athũire ũtharia na ũhũri maraya. (Kĩambĩrĩria 39:9; 2 Samueli 11:26, 27; Thaburi 51:4) Ũũma nĩ atĩ onaga ũtharia wĩ ũndũ wĩ magigi ũũ atĩ nĩ etĩkĩrĩtie ũkorũo wĩ mũthingi wa ndigano. (Rora Gĩcunjĩ gĩa 9, kĩbungo kĩa 7, wone ũtharia ũhutĩtie maũndũ marĩkũ.) Hĩndĩ ĩrĩa mũndũ ũhikĩte kana akahikania atharia-rĩ, Jehova nĩ etĩkĩrĩtie ũcio ũngĩ mahikanĩtie nake amũũre kana nĩ egũtigana na ũcio ũtharĩtie kana nĩ egũthiĩ na mbere gũikarania nake. (Mathayo 19:9) Gũkĩrĩ ũguo-rĩ, ũcio ũtatharĩtie angĩamũra matigane-rĩ, ndangĩkorũo akiuna watho wa Jehova. O na kũrĩ ũguo kĩũngano gĩa Gĩkristiano gĩtiĩkagĩra ngoro mũndũ o na ũrĩkũ acarie ndigano. Ũũma nĩ atĩ, harĩ maũndũ mangĩtũma ũrĩa ũtatharĩtie age gũtigana na ũrĩa ũtharĩtie, makĩria angĩkorũo nĩ aherete kũna. No mũthia-inĩ-rĩ, arĩa marĩ na mũthingi wa gũtigana Kĩĩmaandĩko nĩo maagĩrĩire meamũrĩre kana nĩ megũtigana na metĩkĩre moimĩrĩro marĩa mangĩrehwo nĩ ndigano.—Agalatia 6:5.

Rĩmwe rĩrĩa maũndũ maakĩria njano-rĩ, Akristiano angĩ nĩ mamũrĩte kweherera kana gũtigana na mũndũ ũrĩa mahikanĩtie nake o na atatharĩtie. Bibilia ĩkĩarĩrĩria ũndũ ũcio yugaga wega atĩ, ũrĩa waamũra gwĩka ũguo ‘nĩaikare atekũhikio nĩ [kana atekũhikia] mũndũ ũngĩ, kana magĩcoke kũiguana’ rĩngĩ. (1 Akorintho 7:11) Mũkristiano ta ũcio ndarĩ na rũtha rwa kũhikania na mũndũ ũngĩ. (Mathayo 5:32) Ta wĩcirie maũndũ mamwe marĩa andũ amwe monete marĩ ta mũthingi wa kweheranĩra.

Kũrega kũhingia mabataro ma famĩlĩ. Famĩlĩ no ĩthĩnĩke mũno mũthuri angĩaga kũmĩhingĩria mabataro mayo ma mũthingi ma mũtũũrĩre, o na arĩ no ũhoti wa kũmahingia. Bibilia yugaga ũũ: “Mũndũ angĩikara ategũteithia andũ ao, o na makĩria andũ a gwake mũciĩ-rĩ, nĩ gũkaana akaanĩte ũrutani ũrĩa wa Wĩtĩkio, na nĩ mũũru gũkĩra mũndũ ũtarĩ etĩkia.” (1 Timotheo 5:8) Mũndũ ta ũcio angĩaga kũgarũrũka atigane na mĩthiĩre ĩyo yake, mũtumia no amũũre kana nĩ ekũbatara kwĩgitĩra na kũgitĩra ciana ciake na njĩra ya kweheranĩra na mũthuri wake. No rĩrĩ, athuri a  kĩũngano maagĩrĩirũo gũtuĩria wega Mũkristiano angĩthitangwo atĩ nĩ aregete kũhingia mabataro ma famĩlĩ yake. Mũndũ kũrega kũhingia mabataro ma kĩĩmwĩrĩ ma famĩlĩ yake no gũtũme eherio kĩũngano-inĩ.

Kũhũthĩra ũhinya. Mũndũ mũtoi no eke ũrĩa mahikanĩtie nake maũndũ moru ũũ atĩ ũgima wa mwĩrĩ na muoyo wa ũrĩa ũrahũrũo no ikorũo ũgwati-inĩ. Angĩkorũo mũndũ ũcio ũrahũthĩra ũhinya nĩ Mũkristiano-rĩ, athuri a kĩũngano nĩ magĩrĩirũo gũtuĩria thitango ĩyo. Marakara marũrũ na kũhũthĩra ũhinya nĩ maũndũ mangĩtũma mũndũ eherio kĩũngano-inĩ.—Agalatia 5:19-21.

Kũgirio biũ kũhingia maũndũ ma kĩĩroho. Mũndũ no athiĩ na mbere kũgiria ũrĩa mahikanĩtie nake kũhingia maũndũ ma kĩĩroho o na kana agerie kũmũtindĩkĩrĩria oine watho wa Ngai. Hangĩkinya ta hau-rĩ, mũndũ ũrĩa ũthathaiya wake ũrĩ ũgwati-inĩ no amũre kana kweherera ũrĩa mahikanĩtie nake noyo njĩra iki tu ya ‘kũigua Ngai kũrĩ kũigua andũ.’—Atũmwo 5:29.

Maũndũ-inĩ ta macio mothe twarĩrĩa-rĩ, hatirĩ mũndũ wagĩrĩire gũtindĩkĩrĩria mũndũ ũrĩa ũtarĩ na mahĩtia eheranĩre kana athiĩ na mbere gũikarania na mũthuri kana mũtumia wake. O na gũtuĩka arata agimaru kĩĩroho na athuri a kĩũngano no mateithĩrĩrie kana maheane ũtaaro kuuma thĩinĩ wa Bibilia-rĩ, matingĩmenya maũndũ mothe marĩa maathiaga na mbere gatagatĩ-inĩ ka mũthuri na mũtumia wake. Jehova no we tu ũngĩona maũndũ ta macio. Ũũma nĩ atĩ mũtumia kana mũthuri Mũkristiano ndangĩkorũo agĩtĩa Ngai na mũbango wa kĩhiko angĩongerera cumbĩ ũritũ wa mathĩna ma famĩlĩ, no getha tu eheranĩre na ũrĩa mahikanĩtie nake. Jehova nĩ onaga mĩbango yothe ya ũrambu ĩrĩa ĩtongoragia harĩ kweheranĩra, o na mũndũ angĩgeria atĩa kũmĩhitha. Ũũma nĩ atĩ, “indo ciothe ciikaraga itarĩ humbĩre, na iguũrĩtio maitho-inĩ make, we mwene ũhoro witũ.” (Ahibirania 4:13) No angĩkorũo ũndũ ũkĩrĩtie njano na ũngĩrehe ũgwati nĩ ũrathiĩ na mbere-rĩ, gũtirĩ mũndũ waagĩrĩirũo nĩ kũruta Mũkristiano mahĩtia ũrĩa mũthia-inĩ ũngĩamũra kweheranĩra na ũrĩa mahikanĩtie nake. Marigĩrĩrio-inĩ, “ithuothe no mũhaka tũkarũgama mbere ya gĩtĩ kĩa Ngai gĩa ituĩro.”—Aroma 14:10-12.