Maũndũ moru maambĩrĩirie thĩinĩ wa thĩ rĩrĩa Shaitani aaririe maheeni ma mbere. Kĩambĩrĩria-inĩ, Shaitani aarĩ mũraika mũkinyanĩru, no “ndeehandire wega ũhoro-inĩ ũrĩa wa ma.” (Johana 8:44) Aakũririe merirĩria ma kũheo ũthathaiya ũrĩa wagĩrĩire o Ngai wiki. Shaitani aaheenirie mũtumia wa mbere, Hawa, na akĩmũiguithia amwathĩkĩre handũ ha gwathĩkĩra Ngai. Adamu nĩ aanyitanĩire na Hawa kũremera Ngai. Itua rĩa Adamu rĩgĩtũma kũgĩe mathĩna na gĩkuũ.​—Thoma Kĩambĩrĩria 3:1-6, 19.

Rĩrĩa Shaitani aaheenirie Hawa age gwathĩkĩra Ngai, nĩ kwambĩrĩria aambagĩrĩria ũremi kwerekera ũnene wa Ngai, kana kĩhooto Gĩake gĩa gwathana. Andũ aingĩ nĩ manyitanĩire na Shaitani kũrega Ngai arĩ Mwathani wao. Kwoguo, Shaitani nĩwe “mũnene wa thĩ ĩno.”​—Thoma Johana 14:30; 1 Johana 5:19.

Mawĩra mothe ma Ngai nĩ makinyanĩru. Araika na andũ arĩa Ngai oombire maarĩ na ũhoti wa gwathĩkĩra Ngai na njĩra nginyanĩru. (Gũcokerithia Maathani 32:4, 5) Ngai aatũmbire tũrĩ na wĩyathi wa gwĩthuurĩra gwĩka wega kana gwĩka ũũru. Wĩyathi ũcio nĩ ũtũheaga mweke wa kuonania wendo witũ harĩ Ngai.​—Thoma Jakubu 1:13-15; 1 Johana 5:3.

Kwa ihinda, Jehova nĩ akirĩrĩirie ũremi kwerekera ũnene wake. Nĩkĩ? Nĩguo kuoneke atĩ andũ matingĩgunĩka nĩ ũndũ wa kwĩyatha matekũmwĩhoka. (Kohelethu 7:29; 8:9) Thutha wa mĩaka 6,000 ĩrĩa andũ makoretwo kuo, ũira nĩ wonekete wega.  Anene a gũkũ thĩ nĩ maremetwo kũniina mbaara, wĩki-naĩ, wagi wa kĩhooto, o hamwe na mĩrimũ.​—Thoma Jeremia 10:23; Aroma 9:17.

Ngũrani na wathani wa andũ, wathani wa Ngai nĩ ũgunaga arĩa mawĩtĩkagĩra. (Isaia 48:17, 18) Ica ikuhĩ, Jehova nĩ ekũniina thirikari ciothe cia andũ. No arĩa tu mathuuraga gũthamakĩrũo nĩ Ngai magaatũũra thĩinĩ wa thĩ.—Isaia 11:9.Thoma Danieli 2:44.

Wĩrorere video ya Ngai Etĩkĩrĩtie Mathĩna Nĩkĩ Nginya Ũmũthĩ?

Shaitani ooigire atĩ gũtirĩ mũndũ ũngĩtungatĩra Jehova o ũguo tũhũ. Hihi no wende kuonania atĩ ũndũ ũcio nĩ wa maheeni? No ũhote gwĩka ũguo! Wetereri wa Ngai ũtũheaga mweke ithuothe wa kuonania kana tũngĩenda wathani wa Ngai kana wa andũ. Tuonanagia itua ritũ kũgerera mũtũũrĩre witũ.​—Thoma Ayubu 1:8-12; Thimo 27:11.

No tũthuure Ngai atuĩke Mwathani witũ na njĩra ya kwĩruta ũhoro wa ũthathaiya wa ma kũringana na Kiugo kĩa Ngai, Bibilia na kũnyitanĩra naguo. (Johana 4:23) No tũrege Shaitani atuĩke mwathani witũ tũngĩĩthema maũndũ ma ũteti na mbaara, ta ũrĩa Jesu eekire.​—Thoma Johana 17:14.

Shaitani ahũthagĩra hinya wake kũgaathĩrĩria mĩtugo ya waganu. Rĩrĩa twaregana na mĩtugo ta ĩyo, arata amwe na andũ a mbarĩ citũ no matũnyũrũrie kana matũũkĩrĩre. (1 Petero 4:3, 4) Kwoguo no mũhaka tũtue itua. Hihi nĩ tũrĩnyitanagĩra na andũ arĩa mendete Ngai? Hihi nĩ tũrĩathĩkagĩra mawatho make marĩa monanagia atĩ nĩ mũũgĩ na nĩ arĩ wendo? Tweka ũguo-rĩ, nĩ tũrĩonanagia atĩ Shaitani aaririe maheeni rĩrĩa ooigire atĩ gũtirĩ mũndũ ũngĩathĩkĩra uuge wa Ngai rĩrĩa arĩ ũndũ mũritũ gwĩka ũguo.​—Thoma 1 Akorintho 6:9, 10; 15:33.

Wendo wa Ngai harĩ andũ ũtũheaga ũũma wa atĩ maũndũ moru na mathĩna nĩ igaathira. Arĩa monanagia atĩ nĩ metĩkĩtie ũguo magaakenera muoyo tene na tene thĩinĩ wa thĩ.​—Thoma Johana 3:16.