ANDŨ ta 50,000 nĩo maahotire rũgendo rũu rũnene kuuma Babuloni nginya Jerusalemu. No rĩrĩa maakinyire-rĩ, maakorire Jerusalemu ĩrĩ maganjo. Gũtirĩ mũndũ watũũraga kuo. Aisiraeli maarĩ mambĩrĩrie mwako mwerũ rĩngĩ.

Kĩndũ kĩa mbere kĩrĩa maambire gwaka nĩ kĩgongona. Haha nĩho handũ harĩa mangĩrutĩra Jehova magongona ma nyamũ, kana iheo. Thutha wa mĩeri mĩnyinyi yahĩtũka-rĩ, Aisiraeli makĩambĩrĩria gwaka hekarũ. No ĩndĩ thũ iria ciamarigicĩirie itiendaga Aisiraeli mamĩake. Kwoguo makĩgeria kũmetigĩrithia matigake. Mũthia-inĩ, thũ icio ikĩhũthĩra mũthamaki wa Perisia athondeke watho mwerũ wa kũrũgamia mwako.

Rĩu nĩ mĩaka 17 mĩhĩtũku kuuma Aisiraeli moima Babuloni. Jehova aatũmire anabii ake Hagai na Zekaria mere andũ maambĩrĩrie mwako rĩngĩ. Andũ makĩĩhoka ũteithio wa Ngai, na magĩathĩkĩra anabii. Makĩambĩrĩria mwako rĩngĩ, o na gũtuĩka watho woigaga gũtigakwo.

Rĩu mũnene ũmwe wetagwo Tatenai, wa Perisia agĩũka na akĩũria Aisiraeli maarĩ na kĩhooto kĩrĩkũ gĩa gwaka hekarũ. Aisiraeli magĩkĩmwĩra atĩrĩ, rĩrĩa maarĩ Babuloni, Mũthamaki Kurusu aamerire: ‘Ambatai, mũthiĩ Jerusalemu mũgaakĩre Jehova Ngai wanyu hekarũ.’

Nake Tatenai agĩtũma marũa Babuloni makũũria atĩ kana Kurusu, ũrĩa rĩu waarĩ mũkuũ, kana nĩoigĩte ũguo. O narua mũthamaki mwerũ wa Perisia agĩtũma macokio. Monanirie kũna atĩ Kurusu nĩoigĩte ũguo. Na nĩũndũ ũcio mũthamaki akĩandĩka ũũ: ‘Rekei Aisiraeli maakĩre Ngai wao hekarũ. Na ndamwatha mũmateithie.’ Thutha wa ta mĩaka ĩna hekarũ ĩkĩrĩka, nao Aisiraeli magĩkena mũno.

Mĩaka gakundi ĩkĩhĩtũka. Rĩu nĩ ta mĩaka 48 kuuma hekarũ yarĩka. Andũ thĩinĩ wa Jerusalemu nĩathĩni, na itũũra o hamwe na hekarũ ya Ngai itironeka irĩ thaka. Arĩ o kũu Babuloni-rĩ, Mũisiraeli ti Ezara akĩmenya atĩ harĩ bata wa gũcokereria hekarũ ya Ngai. Wahota kũmenya ũrĩa eekire?

Ezara agĩthiĩ kuona Aritashashita, mũthamaki wa Perisia, nake mũthamaki ũcio mwega akĩhe Ezara iheo nyingĩ mũno atware Jerusalemu. Nake Ezara akĩũria Aisiraeli arĩa maarĩ kũu Babuloni mamũteithĩrĩrie gũtwara iheo icio Jerusalemu. Ta andũ 6,000 makiuga nĩmegũthiĩ nake. Maarĩ na betha nyingĩ mũno na thahabu o na iheo ingĩ cia goro mũno cia gũkuua.

Rĩu Ezara aarĩ na kĩeha, tondũ kwarĩ na imaramari njĩra-inĩ. Imũndũ icio nĩingĩamatunyire betha na thahabu, o na imorage. Kwoguo Ezara agĩcokanĩrĩria andũ hamwe, ta ũrĩa ũrona mbica-inĩ. Rĩu makĩhoya Jehova nĩguo amagitĩre rũgendo-inĩ rũu rũraya rũa gũcoka Jerusalemu.

Jehova nĩamagitĩire. Na thutha wa rũgendo rwa mĩeri ĩna, magĩkinya thayũ Jerusalemu. Na githĩ ũndũ ũyũ ndũgũgĩtuonia atĩ Jehova no ahote kũgitĩra arĩa mamũcũthagĩrĩria amateithie?