HĨĨ, HĨ! Andũ mareka atĩa rĩu? Marahoya njaũ! Mareka ũguo nĩ kĩ?

Rĩrĩa Musa aikarire mũno kĩrĩma igũrũ, andũ makiuga: ‘Mũndũ ũcio ti Musa tũtiũĩ ũrĩa onete. Rekei twĩthondekere ngai ĩrĩa ĩrĩtũtongoragia kuuma bũrũri ũyũ.’

Haruni mũrũ wa nyina na Musa akiuga ũũ: ‘No wega. Tuai icũhĩ cia thahabu iria irĩ matũ, mũndehere.’ Rĩrĩa andũ maarehire-rĩ, Haruni agĩcitwekia na agĩthondeka njaũ ya thahabu. Andũ magĩkiuga ũũ: ‘Ũyũ nĩwe Ngai witũ ũrĩa watũrutire Misiri!’ Rĩu Aisiraeli makĩgĩa na gĩathĩ kĩnene, na magĩthathaiya njaũ ĩyo ya thahabu.

Rĩrĩa Jehova onire ũguo-rĩ, akĩrakara mũno. Agĩkĩĩra Musa: ‘Ũkĩra ũikũrũke na ihenya. Andũ nĩmethũkĩtie. Nĩmariganĩirũo nĩ maathani makwa na marainamĩrĩra njaũ ya thahabu.’

Musa akĩharũrũka kuuma kĩrĩma-inĩ o rĩo. Na rĩrĩa aakuhĩhĩirie-rĩ, ũũ nĩguo onire. Andũ nĩkũina maraina mathiũrũrũkĩirie njaũ ĩyo ya thahabu! Musa agĩcinwo nĩ marakara mũno, akĩnyuguta ihengere icio cierĩ cia maathani, na ikĩhehenjeka tũcũnjĩ tũingĩ mũno. Rĩu ningĩ akĩoya njaũ ĩyo ya thahabu na akĩmĩtwekũra. Agĩcoka akĩmĩthĩa ĩgĩtuĩka mũtutu.

Andũ aya meekire ũũru mũno. Rĩu Musa akĩĩra arũme amwe ao moe hiũ ciao cia njora. Musa akiuga, ‘Andũ acio oru arĩa mathathairie njaũ ya thahabu no mũhaka makue.’ Na rĩu arũme acio makĩũraga andũ 3,000! Na githĩ ũndũ ũyũ ndũragĩtuonia atĩ twagĩrĩirũo kwĩmenyerera tũthathayagie Jehova wiki tu, no ti ngai ingĩ cia maheni?