ŨYŨ nĩ Jesu e Kĩrĩma-inĩ kĩa Mĩtamaiyũ. Andũ aya ana me nake nĩ atũmwo ake. Nĩ ariũ a nyina Andarea na Petero, na ningĩ Jakubu na Johana. Ĩĩrĩa nĩ hekarũ ya Ngai ũrona o kũrĩa Jerusalemu.

Rĩu nĩ ta thikũ igĩrĩ kuuma Jesu ahaica njaũ ya ndigiri erekeire Jerusalemu. Nĩ mũthenya wa Kerĩ. Kĩroko-inĩ mũthenya ũcio Jesu aarĩ hekarũ-inĩ. Kũu thĩinĩ athĩnjĩrĩ-Ngai nĩ maageretie kũnyita Jesu mamũrage. No ningĩ nĩ metigagĩra gwĩka ũguo tondũ andũ nĩmendete Jesu.

‘Inyuĩ nyamũ cia thĩ na ciana cia nyoka!’ Ũguo nĩguo Jesu eetire atongoria acio a ndini. Ningĩ Jesu akiuga atĩ Ngai nĩangĩamaherithirie nĩ ũndũ wa maũndũ marĩa mothe moru mekĩĩte. Thutha ũcio Jesu agĩthiĩ Kĩrĩma-inĩ kĩa Mĩtamaiyũ, na hĩndĩ ĩyo atũmwo acio ana makĩambĩrĩria kũmũria ciũria. Wahota kũmenya ũrĩa maroria Jesu?

Atũmwo acio moragia ũhoro wa maũndũ marĩa magoka. Nĩ moĩ atĩ Jesu nĩakũnina maũndũ marĩa mothe moru thĩinĩ wa thĩ. No nĩ mendaga kũmenya rĩrĩa maũndũ macio mangĩekĩkire. Jesu agacoka rĩngĩ rĩ arĩ Mũthamaki?

Jesu nĩamenyaga atĩ arũmĩrĩri ake gũkũ thĩ matikahota kũmuona rĩrĩa agacoka rĩngĩ. Nĩ tondũ agakorũo arĩ igũrũ matu-inĩ, na matingĩhota kũmuona kuo. Kwoguo Jesu akĩĩra atũmwo ake mamwe ma maũndũ marĩa magekĩka gũkũ thĩ rĩrĩa agakorũo arĩ Mũthamaki kũu igũrũ. Mamwe ma maũndũ macio nĩ marĩkũ?

Jesu oigire atĩ nĩgũkagĩa na mbaara nyingĩ nene, andũ aingĩ nĩ makarũara na mahũte, uuni watho nĩ ũgakorũo ũrĩ mũingĩ mũno, na nĩ gũgakorũo na ithingithia nene mũno. Ningĩ Jesu akiuga atĩ ũhoro mwega wĩgiĩ ũthamaki wa Ngai nĩ ũkahunjio kũndũ guothe thĩinĩ wa thĩ. Hihi nĩ tũonete maũndũ maya magĩkĩka mahinda-inĩ maya maitũ? Ĩĩni! Na kwoguo no tũkorũo tũrĩ na ma atĩ rĩu Jesu nĩ arathana arĩ kũu igũrũ. O ihinda ikuhĩ nĩ ekũnina maũũru mothe thĩinĩ wa thĩ.