Aisiraeli aingĩ nĩ maacokereire kũhoya mĩhianano o rĩngĩ, na kwoguo Jehova akĩreka Afilisti mamahinyĩrĩrie. No nĩ kwarĩ na Aisiraeli amwe meendete Jehova. Ũmwe wao eetagwo Manoa. Marĩ na mũtumia wake matiarĩ na mwana. Mũthenya ũmwe Jehova nĩ aatũmire mũraika kũrĩ mũtumia wa Manoa akamwĩre ũũ: ‘Nĩ ũkaagĩa kahĩĩ na nĩko gakaahonokia Aisiraeli kuuma kũrĩ Afilisti. Kahĩĩ kau gagatuĩka Mũnaziri.’ Hihi nĩ ũĩ Anaziri maarĩ a? Maarĩ ndungata cia mwanya cia Jehova. Anaziri matietĩkĩrĩtio kwenja njuĩrĩ.

Thutha wa ihinda, Manoa nĩ aagĩire kahĩĩ na agĩgeta Samusoni. Rĩrĩa Samusoni aanenehire, Jehova akĩmũhe hinya mũingĩ. Nĩ angĩoragire mũrũthi na moko matheri. Harĩ hĩndĩ ĩmwe ooragire Afilisti 30 arĩ wiki. Afilisti nĩ maamũthũire mũno na maaikaraga magĩcaragia ũrĩa mangĩmũũraga. Ũtukũ ũmwe rĩrĩa Samusoni aarĩ toro itũũra-inĩ rĩa Gaza, maathiire makĩmweterera kĩhingo-inĩ gĩa itũũra rĩu nĩguo mamũũrage mũthenya ũyũ ũngĩ rũcinĩ. No Samusoni ookĩrire ũtukũ gatagatĩ na agĩthiĩ akĩmunya kĩhingo gĩa itũũra rĩu. Aakĩigĩrĩire ciande agĩgĩtwara gacũmbĩrĩ-inĩ ga Kĩrĩma kĩa Hebironi.

Thutha ũcio, Afilisti nĩ maathiire kũrĩ mũirĩtu ũrĩa maarĩ ũrata na Samusoni wetagwo Delila, na makĩmwĩra ũũ: ‘Nĩ tũgũkũhe icunjĩ ngiri ĩmwe na igana cia betha akorũo nĩ ũgũthiĩ gũtuĩria kĩrĩa gĩtũmaga Samusoni akorũo na hinya mũingĩ ũguo. Tũrenda kũmũnyita nĩguo tũmũikie njera.’ Delila nĩ eetĩkĩrire tondũ nĩ eendete mbeca. Kĩambĩrĩria-inĩ, Samusoni nĩ aaregire kũmwĩra kĩrĩa gĩatũmaga akorũo na hinya ũguo. Ĩndĩ Delila nĩ aamũtindĩkĩrĩirie nginya mũthia-inĩ Samusoni akĩmumbũrĩra. Aamwĩrire ũũ: ‘Ndirĩ ndenjwo njuĩrĩ tondũ ndĩ Mũnaziri. No ingĩenjwo, hinya ũcio no gũthira ũngĩthira.’ Samusoni nĩ aahĩtirie mũno nĩ ũndũ wa kũmumbũrĩra.

 Delila aathiire kũrĩ Afilisti o rĩo na akĩmeera ũũ: ‘Nĩ anjĩrĩte maũndũ mothe!’ Agĩcoka akĩreka Samusoni akome maru-inĩ make, na agĩta mũndũ ũngĩ agĩũka akĩmwenja njuĩrĩ yothe. Delila agĩcoka akĩmwĩra ũũ: ‘Samusoni, wĩ mũkore nĩ Afilisti!’ Samusoni agĩũkĩra, no hinya wake nĩ wathirĩte. Afilisti maamũnyitire, makĩmũkũũra maitho, na makĩmũikia njera.

Mũthenya ũmwe, Afilisti ngiri nyingĩ nĩ maacemanirie nyũmba-inĩ ya ngai yao yetagwo Dagoni. Maanagĩrĩra ũũ: ‘Samusoni nĩ aneanĩtwo harĩ ithuĩ nĩ ngai itũ! Nĩ arehwo nĩguo eke maũndũ ma gũtũthekia.’ Maamũigire gatagatĩ ga itugĩ cia nyũmba ĩyo na makĩambĩrĩria kũmũnyũrũria. Samusoni akĩhoya ũũ: ‘Jehova, ndagũthaitha ũhe hinya riita rĩngĩ rĩmwe tu.’ Gũkinyĩria hĩndĩ ĩyo njuĩrĩ ya Samusoni nĩ yakũrĩte rĩngĩ. Aatindĩkire itugĩ cia nyũmba ĩyo na hinya wake wothe. Nyũmba ĩyo ĩkĩmomoka yothe, na andũ arĩa othe maarĩ thĩinĩ nginya Samusoni magĩkua.