Thutha wa Musa gũtongoria rũrĩrĩ rwa Isiraeli kwa ihinda rĩa mĩaka mĩingĩ, ũtũũro wake warĩ hakuhĩ gũkinya mũico. Jehova aamwĩrire ũũ: ‘Wee tiwe ũkaaingĩria Aisiraeli Bũrũri wa Kĩĩranĩro. No nĩ ngũreka wone bũrũri ũcio.’ Musa agĩcoka akĩra Jehova athuure mũndũ ũngĩ wa gũtongoragia Aisiraeli. Nake Jehova akĩmwĩra: ‘Thiĩ kũrĩ Joshua ũmwĩre nĩ we ndathuura.’

Musa nĩ eerire Aisiraeli atĩ nĩ angĩakuire thutha wa ihinda inini na atĩ Joshua nĩwe Jehova aathuurĩte amatongorie nginya Bũrũri wa Kĩĩranĩro. Musa agĩcoka akĩra Joshua ũũ: ‘Ndũgetigĩre. Jehova nĩ egũgũteithia.’ Thutha ũcio Musa akĩambata Kĩrĩma kĩa Nebo kũrĩa Jehova aamuonirie bũrũri ũrĩa eerĩire Iburahimu, Isaaka, na Jakubu. Musa agĩcoka agĩkua arĩ na mĩaka 120.

Jehova akĩra Joshua ũũ: ‘Ringai Rũũĩ rwa Jorodani mũthiĩ Kanaani. Nĩ ngũgũteithia o ta ũrĩa ndĩrateithagia Musa. Tigagĩrĩra atĩ nĩ ũrathoma Watho wakwa o mũthenya. Ndũgetigĩre. Gĩa na ũmĩrĩru na ũthiĩ wĩke ũguo ndakwĩra.’

Joshua nĩ aatũmire andũ erĩ mathiĩ magatuĩrie itũũra rĩa Jeriko. Nĩ tũkwĩruta makĩria tuone ũrĩa  gwathiire rũgano-inĩ rũrĩa rũrũmĩrĩire. Rĩrĩa maacokire mooigire atĩ rĩu nĩrĩo rĩarĩ ihinda rĩega rĩa gũthiĩ Kanaani. Mũthenya ũrĩa warũmĩrĩire, Joshua akĩra Aisiraeli maambũre hema ciao. Agĩcoka akĩra athĩnjĩri-Ngai arĩa maakuuĩte ithandũkũ rĩa kĩrĩkanĩro mamatongorie merekeire Rũũĩ-inĩ rwa Jorodani. Rũũĩ rũu rwarĩ rũiyũru mũno, no rĩrĩa athĩnjĩri-Ngai acio maatobokirie magũrũ mao maĩ-inĩ, rũgĩtiga gũikũrũka na maĩ makĩhwa. Athĩnjĩri-Ngai acio maathiire makĩrũgama rũũĩ gatagatĩ, naruo rũrĩrĩ ruothe rwa Isiraeli rũkĩringa mwena ũrĩa ũngĩ. Hihi nĩ ũkuona ta kĩama kĩu kĩamaririkanirie ũrĩa Jehova aamekĩire Iria-inĩ Itune?

Mũthia-inĩ, thutha wa mĩaka ĩyo yothe, Aisiraeli makĩingĩra Bũrũri wa Kĩĩranĩro. Nĩ maangĩakire nyũmba na taũni. Nĩ mangĩarĩmire na mahande irio, thabibũ, na matunda. Kwarĩ na indo nyingĩ njega cia kũrĩa na kũnyua Bũrũri-inĩ wa Kĩĩranĩro, na nĩkĩo wetagwo bũrũri wa iria na ũũkĩ.