Rĩrĩa famĩlĩ ya Jakubu yarĩ bũrũri-inĩ wa Misiri, nĩ yaambĩrĩirie gwĩtagwo Aisiraeli. Thutha wa Jakubu na Jusufu gũkua, nĩ kwagĩire na Firauni ũngĩ. Nĩ aamakaga tondũ Aisiraeli nĩ maambĩrĩirie kũgĩa na hinya gũkĩra Amisiri. Ũndũ ũcio watũmire atue Aisiraeli ngombo. Aamarutithagia wĩra mũritũ wa mũgũnda na wa gũthondeka maturubarĩ. Ĩndĩ o ũrĩa Aisiraeli maarutithagio wĩra mũritũ nĩ Amisiri, noguo maingĩhaga. Tondũ ũndũ ũcio ndwakenirie Firauni, nĩ aathanire tũhĩĩ tuothe tũrĩa twaciaragwo nĩ Aisiraeli tũũragwo. Hihi no ũgerie kũhũũra mbica ũrĩa ũndũ ũcio wamakirie Aisiraeli?

Mũtumia ũmwe Mũisiraeli wetagwo Jokebedi nĩ agĩire na kahĩĩ kaarĩ gathaka mũno. Nĩguo akagitĩre, aagekĩrire gĩkabu-inĩ agĩcoka agĩkĩhitha mathanjĩ-inĩ ma Rũũĩ rwa Nailo. Mwarĩ wa nyina na kahĩĩ kau wetagwo Miriamu nĩ aaikarire hakuhĩ nĩguo one ũrĩa kũngĩathiire na mbere.

 Mũirĩtu wa Firauni nĩ aathire gwĩthamba rũũĩ-inĩ rũu na akĩona gĩkabu kĩu. Aakĩhingũrire agĩkora kaana na agĩkaiguĩra tha. Miriamu aamũririe ũũ: ‘No wende thiĩ ngagwĩtĩre mũtumia ũngĩkuongithĩria kaana gaka?’ Rĩrĩa mũirĩtu wa Firauni eetĩkĩrire, Miriamu aathire na akĩgĩĩra nyina, Jokebedi. Mũirĩtu wa Firauni eerire Jokebedi ũũ: ‘Oya kaana gaka ũnyongithagĩrie, na nĩ ndĩkũrĩhaga.’

Kaana kau kaneneha, Jokebedi nĩ agatwarĩire mũirĩtu wa Firauni, nake agĩgatua Musa na agĩkarera ta kaarĩ gake. Musa aakũrĩire nyũmba-inĩ ya mũthamaki na nĩ angĩagĩire na kĩrĩa gĩothe angĩendire. No Musa ndariganĩirũo nĩ Jehova. Nĩ aamenyaga atĩ ndaarĩ Mũmisiri, na kwoguo agĩthuura gũtungatĩra Jehova.

Musa arĩ na mĩaka 40, nĩ aatuire itua rĩa gũteithia Aisiraeli. Rĩrĩa onire Mũmisiri akĩhũũra Mũisiraeli ũmwe warĩ ngombo, aamũringire na hinya nginya agĩkua. Aacokire akĩmũthika mũthanga-inĩ. Rĩrĩa Firauni aaiguire ũhoro ũcio, nĩ aabangire kũũraga Musa. No Musa nĩ orire agĩthiĩ bũrũri wa Midiani na Jehova akĩmũgitĩra arĩ kũu.