GĨCUNJĨ KĨA 87
Pasaka ya Jesu ya Mũico
Ayahudi maakũngũyagĩra Pasaka o mwaka mũthenya wa 14, mweri-inĩ wa Nisani. Ũndũ ũcio wamaririkanagia ũrĩa Jehova aamahonoketie kuuma ũkombo-inĩ Misiri akamatwara Bũrũri wa Kĩĩranĩro. Mwaka-inĩ wa 33 Mahinda Maitũ (M.M.), Jesu na atũmwo ake nĩ maakũngũĩire Pasaka marĩ nyũmba-inĩ ĩmwe ya ngoroba Jerusalemu. Jesu aaugire ũũ matanarĩkia kũrĩa: ‘Ũmwe wanyu nĩ ekũngunyanĩra.’ Atũmwo nĩ maamakire mũno na makĩmũũria: ‘Nũũ hihi?’ Nake Jesu akĩmeera: ‘Nĩ mũndũ ũrĩa ngũhe mũgate ũyũ.’ Agĩcoka akĩnengera Judasi Mũisikariota mũgate. Judasi agĩũkĩra o hĩndĩ ĩyo na agĩthiĩ.
Jesu agĩcoka akĩhoya, akĩenyũranga mũgate, na akĩnengera atũmwo acio angĩ. Akĩmeera ũũ: ‘Rĩai mũgate ũyũ. Ũrũgamĩrĩire mwĩrĩ wakwa ũrĩa ngũneana nĩ ũndũ wanyu.’ Thutha ũcio akĩhoya nĩ ũndũ wa ndibei na akĩmahe. Akĩmeera ũũ: ‘Nyuai ndibei ĩno. Ĩrũgamĩrĩire thakame yakwa ĩrĩa ngũruta nĩguo andũ mohagĩrũo mehia. Ngũmwĩra na ma atĩ nĩ mũgatuĩka athamaki hamwe na niĩ kũrĩa igũrũ. Ĩkagai ũũ o mwaka nĩguo mũndirikanage.’ Arũmĩrĩri a Jesu nĩ macemanagia o mwaka hwaĩ-inĩ o ũcio wakũngũyagĩrũo Pasaka. Mũcemanio ũcio rĩu wĩtagwo Irio cia Hwaĩ-inĩ cia Mwathani.
Atũmwo marĩkia kũrĩa, nĩ maambĩrĩirie gũkararania igũrũ rĩgiĩ nũũ warĩ mũnene gatagatĩ-inĩ kao. No Jesu akĩmeera ũũ: ‘Ũrĩa mũnene gatagatĩ-inĩ kanyu nĩ ũrĩa wĩyonaga arĩ mũnini.
‘‘Mũrĩ arata akwa. Ndĩmwĩraga maũndũ mothe marĩa Awa endaga ndĩmwĩre. Ica ikuhĩ nĩ ngũthiĩ igũrũ kũrĩ Awa, no inyuĩ mũtikwamba gũka. Andũ nĩ marĩmenyaga atĩ mũrĩ arutwo akwa nĩ ũndũ wa ũrĩa mwendanĩte. No mũhaka mwendanage inyuĩ ene o ta ũrĩa niĩ ndĩmwendete.’
Mũthia-inĩ, Jesu nĩ aahoire Jehova agitĩre arutwo ake othe. Eerire Jehova amateithie nĩguo marutithanagie wĩra na thayũ. Nĩ aahoire rĩĩtwa rĩa Jehova rĩtherio. Jesu na atũmwo ake magĩcoka makĩina nyĩmbo cia kũgooca Jehova, na magĩthiĩ. Hĩndĩ ĩyo Jesu aarĩ hakuhĩ kũnyitwo.
“Mũtigetigĩre inyuĩ karũũru kanini, tondũ Ithe wanyu nĩ onete arĩ wega kũmũhe Ũthamaki.”—Luka 12:32
Icunjĩ Ingĩ Hihi Ũngĩenda Gũthoma
JESU—NĨWE NJĨRA, MA, NA MUOYO
Irio cia Hwaĩ-inĩ cia Mwathani
Jesu aambĩrĩirie kĩririkano gĩa gĩkuũ gĩake kĩrĩa arũmĩrĩri ake magĩrĩirũo nĩ gwĩkaga o mwaka mũthenya wa Nisani 14.
JESU—NĨWE NJĨRA, MA, NA MUOYO
Ũrutani Wĩgiĩ Wĩnyihia Pasaka-inĩ ya Mũico
Jesu nĩ aamakirie atũmwo rĩrĩa aarutire wĩra ũrĩa warutagwo nĩ ngombo.
JESU—NĨWE NJĨRA, MA, NA MUOYO
Mahoya ma Kũrĩkĩrĩria ma Jesu Rumu-inĩ ya Igũrũ
Onanirie atĩ aahingirie ũndũ wa bata makĩria gũkĩra gũteithia andũ makaahonokio.
CIŨRIA IRIA CIŨRAGIO KAINGĨ
Nĩ Kĩĩ Gĩtũmaga Aira a Jehova Maririkane Gĩkuũ kĩa Jesu na Njĩra Ngũrani na Ndini Iria Ingĩ?
Ningĩ nĩ gĩtagwo Irio cia Mwathani kana Kĩririkano, na nĩkĩo gĩkũngũĩro kĩrĩa kĩa bata mũno harĩ Aira a Jehova. Thoma wone ũrĩa Bibilia yugaga igũrũ rĩgiĩ gĩkũngũĩro kĩu.
