GĨCIGO GĨA 5
Ũrĩa Ũngĩtũũria Thayũ Hamwe na Andũ a Famĩlĩ
“Wĩhumbei mwĩhumbĩre wa ngoro ũrĩa . . . wa gũtugana, na kwĩnyihia, na kũhorera, o na gũkirĩrĩria.”
Rĩrĩa andũ mahikania, mathondekaga famĩlĩ njerũ. O na gũtuĩka nĩ ũgũthiĩ na mbere kwenda na gũtĩa aciari aku, ũrĩa mũhikanĩtie nake rĩu nĩwe mũndũ ũrĩa wa bata makĩria harĩ wee. Andũ amwe a famĩlĩ yanyu mahota kwaga kwamũkĩra ũndũ ũcio na njĩra njega. No motaaro ma Bibilia nĩ megũgũteitha kũgĩa na ũigananĩru, nĩguo ũtũũrie thayũ hamwe na andũ a famĩlĩ o ũkĩĩrutanagĩria gũthondeka ũiguano mwega thĩinĩ wa famĩlĩ yaku njerũ.
1 KORAGWO NA MAWONI MEGA KWEREKERA ANDŨ A FAMĨLĨ
ŨRĨA BIBILIA YUGAGA: “Tĩa thoguo na nyũkwa.” (Aefeso 6:2) O na ũngĩkorũo wĩ na mĩaka ĩigana, nĩ wagĩrĩire gũthiĩ na mbere gũtĩa aciari aku. Ririkana atĩ o na ũrĩa mũhikanĩtie nake nĩ abatiĩ kũrũmbũiya aciari ake. “Wendani ndũrĩ ũiru,” kwoguo ndũkanone ta ũrĩa mũhikanĩtie nake ekũnyihanyihia wendo wake gũkwerekera nĩ ũndũ wao.
ŨRĨA ŨNGĨKA:
-
Wĩtheme kũgweta ciugo nditũ ta, “Andũ anyu mationaga ta ndĩ wa bata” kana “Gũtirĩ hĩndĩ mami wanyu akenagio nĩ ũrĩa ndĩreka”
-
Geria kũmenya kĩrĩa kĩratũma ũrĩa mũhikanĩtie nake one maũndũ ũrĩa aramona
2 RŨMIA ITUA RĨAKU HARĨA HAGĨRĨIRE
ŨRĨA BIBILIA YUGAGA: “Mũndũ mũrũme nĩatigane na ithe na nyina, magwatane na mũka, nao erĩ matuĩke mwĩrĩ ũmwe.” (Kĩambĩrĩria 2:24) Rĩrĩa wahikania kana wahika, aciari aku no mone ta wagĩrĩire gũkorũo ũrĩ o rungu rwao na nĩ ũndũ ũcio no maingĩrĩre maũndũ kĩhiko-inĩ gĩaku gũkĩra ũrĩa magĩrĩire.
Wee na ũrĩa mũhikanĩtie nake mwagĩrĩire gwĩtĩkanĩria mĩhaka ĩrĩa mũkũigĩra aciari anyu mũcoke mũmamenyithie na njĩra ya wendo. No mũmahe ũhoro cararũkũ mũtekũmagĩra gĩtĩo. (Thimo 15:1) Kwĩnyihia, kũhorera, na gũkirĩrĩria no kũmũteithie kũgĩa na ũiguano hamwe na andũ a famĩlĩ na gũthiĩ na mbere ‘gũkiranĩrĩria mwendaine.’
ŨRĨA ŨNGĨKA:
-
Angĩkorũo nĩ ũrona ta andũ a famĩlĩ maraingĩrĩra ũtũũro wanyu mũno, arĩrĩriai ũndũ ũcio na ũrĩa mũhikanĩtie nake rĩrĩa maũndũ mahoreire
-
Ĩtĩkanĩriai ũrĩa mũkũhiũrania na maũndũ macio
