1. Tũkũgunĩka atĩa twathathaiya Ngai na njĩra ĩrĩa yagĩrĩire?

JEHOVA NGAI nĩ atũrũmbũyagia mũno na nĩ endaga tũgunĩke nĩ ũtongoria wake wa wendo. Tũngĩmũthathaiya na njĩra ĩrĩa yagĩrĩire-rĩ, nĩtũrĩkoragwo na gĩkeno na tũgethemaga mathĩna maingĩ ũtũũro-inĩ. Ningĩ nĩegũtũrathima na atũteithie. (Isaia 48:17) No rĩrĩ, kũrĩ na ndini magana maingĩ ciugaga atĩ irutanaga ma ĩrĩa ĩkoniĩ Ngai. No nĩ itiganĩte mũno harĩ morutani ma cio igũrũ rĩgiĩ Ngai nũũ na ũrĩa endaga twĩke.

2. Tũngĩĩruta atĩa njĩra ĩrĩa yagĩrĩire ya gũthathaiya Jehova, na nĩ ngerekano ĩrĩkũ ĩtũteithagia kũmenya ũguo?

² Ũngĩmenya atĩa njĩra ĩrĩa yagĩrĩire ya gũthathaiya Jehova? To nginya wĩrute na ũringithanie morutani ma ndini ciothe. Ũkũbatara tu o kwĩruta ũrĩa Bibilia ĩrutanaga kũna igũrũ rĩgiĩ ũthathaiya wa ma. Kwa ngerekano-rĩ, thĩinĩ wa mabũrũri maingĩ nĩ gũkoragwo na mbeca cia maheni. Ũngĩheo wĩra wa gũthuurania mbeca ta icio-rĩ, ũngĩcikũũrana atĩa? Hihi ũngĩgeria kũririkana ũrĩa mbeca ciothe cia maheni itariĩ? Aca. Wega nĩ kũhũthĩra kahinda gaku kwĩruta ũrĩa mbeca cia biũ ihaana. Thutha wa kũmenya ũrĩa mbeca cia biũ ihaana-rĩ, no ũhote gũkũũrana cia maheni nĩ irĩkũ. No taguo, tweruta ũrĩa tũngĩkũũrana ndini ya ma-rĩ, no tũhote kũmenya ndini cia maheni nĩ irĩkũ.

3. Kũringana na Jesu-rĩ, twagĩrĩirũo gwĩka atĩa okorũo nĩ tũkwenda gwĩtĩkĩrĩka nĩ Ngai?

³ Nĩ ũndũ wa bata tũthathaiye Jehova na njĩra ĩrĩa etĩkĩraga.  Andũ aingĩ metĩkĩtie atĩ ndini ciothe nĩ ikenagia Ngai, no ũguo tiguo Bibilia ĩrutanaga. O na kuuga tu atĩ mũndũ nĩ Mũkristiano ti kũiganu. Jesu oigire ũũ: “To mũndũ ũrĩa ũnjĩtaga, Mwathani ũyũ, Mwathani ũyũ, ũgatonya ũthamaki-inĩ wa Igũrũ; no ũrĩa wĩkaga ũrĩa Awa ũrĩa wĩ Igũrũ endaga.” Kwoguo-rĩ, nĩgetha twĩtĩkĩrĩke nĩ Ngai, no nginya twĩrute ũrĩa endaga twĩke, na tũwĩke. Jesu eetire arĩa matekaga wendi wa Ngai ũũ: “Inyuĩ mwĩkaga waganu.” (Mathayo 7:21-23) Ndini ĩtarĩ ya ma ĩhaana o ta mbeca cia maheni iria itarĩ bata o na hanini. O na gũthũkia mũno-rĩ, ndini ta ĩo nĩ ya gũte mũndũ.

4. Ciugo cia Jesu ciĩgiĩ njĩra igĩrĩ ciugĩte atĩa, na o njĩra ĩtongoragia nginya kũ?

⁴ Jehova aheete andũ othe gũkũ thĩ mweke wa kũgĩa na muoyo wa tene na tene. No rĩrĩ, nĩgetha tuone muoyo wa tene na tene thĩinĩ wa Paradiso-rĩ, no nginya tũthathaiye Ngai ũrĩa kwagĩrĩire na tũtũũre na njĩra ĩrĩa ĩtĩkĩrĩkĩte nĩwe. Ũndũ wa kĩeha nĩ atĩ andũ aingĩ nĩmaregaga gwĩka ũguo. Nĩkĩo Jesu oigire ũũ: “Tonyerai mũromo ũrĩa mũceke: nĩ gũkorũo mũromo nĩ mwariĩ, na njĩra nĩ njaramu ĩrĩa ĩkinyaga kũndũ kũrĩa gwa kũũrĩra, na andũ arĩa matonyagĩra ho nĩ aingĩ. Nĩ gũkorũo mũromo nĩ mũceke, na njĩra nĩ ngunderu ĩrĩa ĩkinyaga kũrĩa kwĩ muoyo, na andũ arĩa mamĩonaga nĩ anyinyi.” (Mathayo 7:13, 14) Ndini ya ma ĩtongoragia andũ nginya muoyo-inĩ wa tene na tene. Ndini ya maheni ĩtongoragia nginya kũndũ kũrĩa gwa kũũrĩra. Jehova ndendaga mũndũ o na ũrĩkũ ore, na nĩkĩo arahe andũ kũndũ guothe mweke wa kwĩruta ũhoro wake. (2 Petero 3:9) Nĩ ũndũ ũcio-rĩ, ũrĩa tũthathayagia Ngai nĩguo ũgaatũma tuone muoyo kana gĩkuũ.

5. Tũngĩmenya atĩa arĩa memenyeragia ndini ĩrĩa ya ma?

⁵ ‘Njĩra ĩrĩa ĩkinyaga kũrĩa kwĩ muoyo’ ĩngĩoneka atĩa? Jesu oigire atĩ ndini ĩrĩa ya ma ĩngĩkamenyeka na mĩthiĩre ya  arũmĩrĩri ayo. Oigire “nĩmũrĩmamenyaga nĩ ũndũ wa maciaro mao.” Na atĩ “mũtĩ ũrĩa mwega ũciaraga maciaro mega.” (Mathayo 7:16, 17) Na njĩra ĩngĩ-rĩ, arĩa memenyeragia ndini ĩrĩa ya ma mangĩkamenyakaga na wĩtĩkio wao na mĩthiĩre yao. O na gũtuĩka ti akinyanĩru na nĩmahĩtagia-rĩ, athathaiya a ma marĩ ta gĩkundi, nĩ mageragia gwĩka wendi wa Ngai. Reke twĩcirie maũndũ matandatũ marĩa monanagia arĩa memenyeragia ndini ya ma.

6, 7. Ndungata cia Ngai ikoragwo na mawoni marĩkũ megiĩ Bibilia, na Jesu aaigire kĩonereria kĩrĩkũ ũndũ-inĩ ũcio?

⁶ Bibilia nĩyo mũthingi wa ũrutani wa ndungata cia Ngai. Bibilia yo nyene yugaga ũũ: “Ũhoro o wothe wandĩkĩtwo Maandĩko-inĩ nĩwekĩrirũo nĩ Ngai ngoro-inĩ ya mũwandĩki, na wĩ na kĩguni ũhoro-inĩ wa kũrutana, na wa kũmenyithia andũ ũũru wao, na wa kũmakaania, o na wa kũmamenyeria mĩtũũrĩre ĩrĩa ĩringaine na ũthingu; nĩ getha mũndũ wa Ngai atuĩke mũkinyanĩru o gũkinyanĩra, na aikarage athagathagĩtwo kũna, nĩguo arutage wĩra ũrĩa wothe mwega.” (2 Timotheo 3:16, 17) Mũtũmwo Paulo aandĩkĩire Akristiano a ma ũũ: “Ningĩ nĩtũcokagĩria Ngai ngatho tũtegũtigithĩria nĩ ũndũ wa rĩrĩ, hĩndĩ ĩrĩa mwetĩkĩrire Ũhoro wa Ngai ũrĩa mwaiguire na ithuĩ-rĩ, mũtiawamũkĩrire ta arĩ ũhoro wa andũ, no ta arĩ Ũhoro wa Ngai,-na nĩ ma, nĩguo ũtariĩ.” (1 Athesalonike 2:13) Kwoguo wĩtĩkio na mĩtugo ya ndini ĩrĩa ya ma itiĩhocetie harĩ mawoni ma andũ kana maũndũ ma ndũire. Ciumanaga na Kiugo kĩa Ngai, Bibilia.

⁷ Jesu Kristo aaigire kĩonereria kĩega biũ nĩ ũndũ morutani make moimaga thĩinĩ wa Kiugo kĩa Ngai. Akĩhoya Ithe wake wa matu-inĩ oigire ũũ: “Ũhoro waku nĩguo ũhoro-ũrĩa-wa-ma.” (Johana 17:17) Jesu nĩeetĩkĩtie Kiugo kĩa Ngai, na ũrĩa wothe aarutanaga watwaranaga na Maandĩko. Jesu kaingĩ oigaga ũũ: “Nĩ haandĩke.” (Mathayo 4:4, 7, 10) Aacokaga akagweta ũrĩa rĩandĩko riugĩte. No taguo, ndungata cia Ngai ũmũthĩ itirutanaga maũndũ ma cio nyene. Ciĩtĩkĩtie atĩ  Bibilia nĩ Kiugo kĩa Ngai, na irũmĩtie mũthingi wa cio wa ũrutani harĩ ũrĩa yugaga.

8. Nĩ maũndũ marĩkũ mendekaga harĩ gũthathaiya Jehova?

⁸ Arĩa memenyeragia ndini ĩrĩa ya ma mathathayagia o Jehova tu na makamenyithia arĩa angĩ rĩĩtwa rĩake. Jesu oigire ũũ: “Turagia ndu ũgoocage Mwathani Ngai waku, na ũmũtungatagĩre o we wiki.” (Mathayo 4:10) Kwahoteka Jesu haha aagwetaga ũhoro wĩ thĩinĩ wa Gũcokerithia Maathani 6:13, harĩa rĩĩtwa rĩa Ngai we mwene rĩgwetetwo. Kwoguo, ndungata cia Ngai itithathayagia ũngĩ tiga o Jehova tu. Ũthathaiya ũcio nĩ hamwe na kwĩra andũ rĩĩtwa rĩa Ngai wa ma nĩ rĩrĩkũ na ũrĩa we atariĩ. Thaburi 83:18 yugaga ũũ: “Wee, o wee wĩtagwo JEHOVA, nowe wiki Ũrĩa-wĩ-Igũrũ-Mũno o igũrũ rĩa thĩ yothe.” Jesu nĩ aaigire kĩonereria harĩ gũteithia andũ mamenye Ngai, o ta ũrĩa aagwetire ihoya-inĩ rĩake: “Nĩnguũrĩirie andũ rĩĩtwa rĩaku arĩa wa’heire gũkũ thĩ.” (Johana 17:6) No taguo athathaiya a ma ũmũthĩ marutaga andũ arĩa angĩ ũhoro wa rĩĩtwa rĩa Ngai, matanya make, na ngumo ciake.

9, 10. Akristiano a ma monanagia na njĩra irĩkũ atĩ nĩ mendanĩte?

⁹ Ndungata cia Ngai cionanagia wendo wa ma, ũtarĩ wa kwĩyenda gatagatĩ-inĩ ga cio. Jesu oigire ũũ: “Nĩ ũguo andũ othe marĩmenyaga mũrĩ arutwo akwa, mwatũũra mwendaine.” (Johana 13:35) Akristiano a tene maarĩ na wendo ta ũcio gatagatĩ-inĩ kao o ene. Wendo ũcio Ngai atwĩraga tũkorũo naguo nĩ ũhootaga rũmena rũa gĩĩkabira, ndũrĩrĩ, na mũtũũrĩre, na ũkohithania andũ na ũrũmwe wa ma ũtangĩtigithũkanio. (Akolosai 3:14) Arũmĩrĩri a ndini cia maheni matikoragwo na ũrũmwe ta ũcio wa wendo. Tũmenyaga ũguo atĩa? Nĩ moraganaga o ene nĩ ũndũ wa rũmena rũa mabũrũri kana gĩĩkabira. Akristiano a ma matioyaga matharaita nĩguo moragane o ene kana kũũraga mũndũ ũngĩ o naũ. Bibilia yugaga ũũ: “Ciana cia Ngai nĩho imenyekagĩra, o na ciana cia mũcukani nacio: mũndũ o wothe ũrĩa ũtekaga maũndũ ma ũthingu, ũcio ti wa Ngai, o na kana ũrĩa ũtenda  mũrũ wa ithe. . . . [Twagĩrĩirũo] twendane; na tũtigatuĩke ta Kaini ũrĩa warĩ wa ũrĩa mũũru, na akĩũraga mũrũ wa nyina.”—1 Johana 3:10-12; 4:20, 21.

¹⁰ Nĩ ma, wendo wa ma to kwaga tu kũũraga arĩa angĩ. Akristiano a ma mahũthagĩra mahinda mao, hinya, na indo ciao meendeire nĩgetha mateithanie na mekĩrane ngoro. (Ahibirania 10:24, 25) Nĩ mateithanagia hĩndĩ ya mathĩna na nĩ ehokeku harĩ andũ arĩa angĩ. Nĩmahũthagĩra ũtaaro wa Bibilia ũrĩa uugĩte “twĩkage andũ othe wega.”—Agalatia 6:10.

11. Gwĩtĩkĩra Jesu Kristo arĩ ũrĩa Ngai ahũthagĩra gũtũhonokia nĩ kwa bata nĩkĩ?

¹¹ Akristiano a ma nĩmetĩkĩrĩte Jesu Kristo arĩ we ũrĩa Ngai ahũthagĩra gũtũhonokia. Bibilia yugaga ũũ: “Ũhoro wa kũhonokio ndũngĩoneka harĩ ũngĩ o na ũrĩkũ: nĩ ũndũ atĩrĩ, gũtirĩ rĩĩtwa rĩngĩ rĩanaheanwo gũkũ thĩ kũrĩ andũ rĩngĩagĩrĩra rĩa gũtũhonokia.” (Atũmwo 4:12) O ta ũrĩa tuonire thĩinĩ wa Gĩcunjĩ gĩa 5, Jesu nĩaarutire muoyo wake ũtuĩke igongona rĩa gũkũũra andũ arĩa aathĩki. (Mathayo 20:28) Ningĩ-rĩ, Jesu nĩwe ũrĩa ũthurĩtwo nĩ Ngai atuĩke Mũthamaki wa Ũthamaki wa igũrũ ũrĩa ũgaathana thĩ yothe. Na Ngai endaga twathĩkĩre Jesu na tũrũmĩrĩre morutani make okorũo nĩtũkwenda muoyo wa tene na tene. Nĩkĩo Bibilia yugaga ũũ: “Ũrĩa wĩhokete Mũriũ e na muoyo wa tene na tene; nake ũrĩa ũregete kũigua Mũriũ, we ndakona muoyo.”—Johana 3:36.

12. Nĩ maũndũ marĩkũ mendekaga harĩ mũndũ gũkorũo atarĩ gĩcunjĩ gĩa gũkũ thĩ?

¹² Athathaiya a ma o ti gĩcunjĩ gĩa thĩ ĩno. Jesu oigire ũũ rĩrĩa aacirithagio mbere ya mũtongoria Mũroma Pilato: “Ũthamaki wakwa ti wa na gũkũ thĩ.” (Johana 18:36) Gũtekũmakania bũrũri ũrĩa matũũraga-rĩ, arũmĩrĩri a ma a Jesu nĩ raia a Ũthamaki wake wa igũrũ, na kwoguo matiĩingĩragia o na hanini maũndũ-inĩ ma ũteti ma gũkũ thĩ. Matiĩingĩragia ngũĩ-inĩ cia gũkũ thĩ. O na kũrĩ ũguo-rĩ, athathaiya a Jehova matiingagĩrĩra andũ arĩa angĩ rĩrĩa mathuura gũtuĩka a kĩama kĩa ũteti,  kana kũrũĩra itĩ cia ũteti, kana gũikia kura. Na athathaiya a Ngai o na makorũo matiĩingĩragia ũteti-inĩ-rĩ, o nĩmathĩkagĩra watho. Nĩkĩ? Tondũ Kiugo kĩa Ngai kĩmeeraga ‘maiguage arĩa matuĩtwo aathani’ a gĩĩthirikari. (Aroma 13:1) Rĩrĩa aathani a gũkũ thĩ moiga andũ meke ũndũ ũraregana na watho wa Ngai-rĩ, athathaiya a ma marũmagĩrĩra kĩonereria kĩa atũmwo, arĩa moigire ũũ: “Nĩkwagĩrĩire tũigue Ngai kũrĩ kũigua andũ.”—Atũmwo 5:29; Mariko 12:17.

13. Arũmĩrĩri a ma a Jesu monaga Ũthamaki wa Ngai atĩa, na kwoguo nĩ ikinya rĩrĩkũ moyaga?

 ¹³ Arũmĩrĩri a ma a Jesu mahunjagia atĩ Ũthamaki wa Ngai noguo tu mwĩhoko harĩ andũ. Jesu aarathire ũũ: “Ũhoro-ũyũ-Mwega wa ũthamaki nĩũkahunjio thĩ yothe, ũtuĩke ũira kũrĩ ndũrĩrĩ ciothe; na hĩndĩ ĩo nĩrĩo ithirĩro rĩgakinya.” (Mathayo 24:14) Handũ ha kũũmĩrĩria andũ mehoke atongoria a gũkũ thĩ kũniina mathĩna mao-rĩ, arũmĩrĩri a ma a Jesu Kristo mahunjagia Ũthamaki wa Ngai wa igũrũ arĩ guo tu mwĩhoko harĩ andũ. (Thaburi 146:3) Jesu aatũrutire tũhoyage thirikari ĩo nginyanĩru rĩrĩa oigire ũũ: “Ũthamaki waku ũũke. O ũrĩa wendete Wee, nĩwĩkagwo gũkũ thĩ, o ta ũrĩa wĩkagwo kũu Igũrũ.” (Mathayo 6:10) Kiugo kĩa Ngai kĩarathĩte atĩ Ũthamaki ũcio wa igũrũ “ũkamemenda mothamaki macio mangĩ [marĩa marĩ kuo rĩu], ũmanine biũ, naguo ũtũũre wĩhandĩte tene na tene.”—Danieli 2:44.

14. Nĩ ndini ĩrĩkũ wee wĩtĩkĩtie nĩĩhingagia maũndũ marĩa mothe mendekaga ma ũthathaiya wa ma?

¹⁴ Kũringana na maũndũ macio twarĩrĩria-rĩ, ta wĩyũrie ũũ: ‘Nĩ ndini ĩrĩkũ ĩrutaga morutani mayo mothe thĩinĩ wa Bibilia na ĩkamenyithia andũ rĩĩtwa rĩa Jehova? Nĩ ndini ĩrĩkũ yonanagia wendo na njĩra ĩrĩa Jehova oigĩte, ĩna wĩtĩkio thĩinĩ wa Jesu, yo ti gĩcunjĩ gĩa thĩ ĩno, na ĩhunjagia atĩ Ũthamaki wa Ngai noguo tu mwĩhoko wa ma harĩ andũ? Harĩ ndini iria ciothe ciĩ gũkũ thĩ-rĩ, nĩ ĩrĩkũ ĩhingagia maũndũ macio mothe?’ Ihooto cionanagia wega atĩ nĩ Aira a Jehova.—Isaia 43:10-12.

15. O tiga gwĩtĩkia tu atĩ nĩ kũrĩ Ngai-rĩ, nĩ ũndũ ũrĩkũ ũngĩ endaga twĩke?

¹⁵ Kuuga tu atĩ nĩwĩtĩkĩtie Ngai ti kũiganu kũmũkenia. Bibilia yugaga atĩ o na ndaimono nĩ ciĩtĩkĩtie atĩ nĩ kũrĩ Ngai. (Jakubu 2:19) No nĩ tũĩ wega atĩ ndaimono itiĩkaga wendi wa Ngai na itikoragwo ciĩtĩkĩrĩkĩte harĩ we. Nĩgetha twĩtĩkĩrĩke nĩ Ngai-rĩ, gwĩtĩkia tu atĩ nĩ kũrĩ Ngai ti kũiganu, no mũhaka  twĩke wendi wake. Ningĩ no nginya tũtigane na ndini cia maheni na twĩtĩkĩre ũthathaiya wa ma.

16. Twagĩrĩirũo nĩ gwĩka atĩa igũrũ rĩgiĩ kũnyitanĩra na ndini cia maheni?

¹⁶ Mũtũmwo Paulo oonanirie atĩ tũtiagĩrĩirũo kũnyitanĩra o na hanini na ndini cia maheni. Aandĩkire ũũ: “Umai thĩinĩ wao, mũikare mwĩamũrĩte kũrĩ o, ũguo nĩguo Mwathani oiga, na mũtikanahutie kĩndũ kĩĩ thahu; na niĩ nĩngũmwĩtĩkĩra.” (2 Akorintho 6:17; Isaia 52:11) Kwoguo Akristiano a ma methemaga indo ciothe ihutainie na ũthathaiya wa maheni.

17, 18. “Babuloni ũrĩa Mũnene” nĩ kĩĩ, na twagĩrĩirũo ‘kuuma thĩinĩ wake’ na ihenya nĩkĩ?

¹⁷ Bibilia yonanagia atĩ mĩthemba yothe mwanya-mwanya ya ndini cia maheni nĩ gĩcunjĩ kĩa “Babuloni ũrĩa Mũnene.” * (Kũguũrĩrio 17:5) Rĩĩtwa rĩu rĩtũririkanagia itũũra rĩa tene rĩa Babuloni, kũrĩa ndini ya maheni yaambĩrĩirie thutha wa Kĩguũ kĩa hĩndĩ ya Nuhu. Morutani na mĩtugo mĩingĩ ĩkoragwo thĩinĩ wa ndini cia maheni ũmũthĩ yaambĩrĩirie Babuloni tene mũno. Kwa ngerekano-rĩ, Ababuloni maathathayagia ngai cia ũtatũ, kana ngai ithatũ ithatũ. Ũmũthĩ-rĩ, ũrutani wa mũthingi wa ndini nyingĩ nĩ Ũtatũ. No Bibilia ĩrutanaga wega atĩ kũrĩ Ngai o ũmwe tu wa ma, Jehova, na atĩ Jesu Kristo nĩ Mũrũ wake. (Johana 17:3) Ababuloni ningĩ meetĩkĩtie atĩ andũ nĩ makoragwo na muoyo ũtakuaga rĩrĩa mwĩrĩ wakua na no ũherithio icua-inĩ. Ũmũthĩ-rĩ, gwĩtĩkia atĩ kũrĩ muoyo kana roho ũtakuaga ũngĩherithio mwaki-inĩ, nĩ ũrutani wa ndini nyingĩ.

¹⁸ Tondũ ũthathaiya wa Babuloni ya tene watheremire thĩ yothe-rĩ, Babuloni ũrĩa Mũnene ũmũthĩ no akũũranwo wega ta ndini cia maheni ciothe hamwe. Na Ngai nĩarathĩte atĩ ndini icio ciothe cia maheni igaathira o rĩmwe. (Kũguũrĩrio 18:8) Nĩ wona nĩkĩ nĩ ũndũ wa bata wĩyamũre kuuma gĩcunjĩ  o gĩothe kĩa Babuloni ũrĩa Mũnene? Jehova Ngai arenda “uume thĩinĩ [wa Babuloni]” na ihenya kahinda gatanathira.—Kũguũrĩrio 18:4.

19. Ũkũgunĩka atĩa watungatĩra Jehova?

¹⁹ Nĩ ũndũ wa itua rĩaku rĩa gũtigana na ndini cia maheni-rĩ, andũ amwe mahota kũrega thiritũ yaku. No watungatĩra Jehova ũnyitanĩire na andũ ake-rĩ, nĩ ũkũgunĩka mũno gũkĩra ũũru o wothe ũrĩa ũngĩona. O ta arutwo a Jesu a tene arĩa maatigire indo ingĩ nĩguo mamũrũmĩrĩre-rĩ, nĩ ũkũgĩa na ariũ na aarĩ a ithe aingĩ a kĩroho. Ũgũkorũo ũrĩ ũmwe wa famĩlĩ ya thĩ yothe ya Akristiano milioni nyingĩ a ma, arĩa marĩkuonagia wendo wa ma. Na nĩ ũkũgĩa na kĩĩrĩgĩrĩro kĩega mũno kĩa muoyo wa tene na tene “hingo ĩrĩa ĩgoka thutha.” (Mariko 10:28-30) Hihi thutha wa kahinda, arĩa maagũtiganĩirie nĩ ũndũ wa wĩtĩkio waku nĩ marĩtuĩria ũrĩa Bibilia ĩrutanaga, na matuĩke athathaiya a Jehova.

20. Arĩa memenyeragia ndini ya ma merĩgĩrĩire kĩĩ mahinda mokĩte?

²⁰ Bibilia ĩrutanaga atĩ ica ikuhĩ Ngai nĩ ekũniina mũtabarĩre ũyũ mũũru wa maũndũ na ithenya rĩa guo arehe thĩ njerũ ĩna ũthingu rungu rwa wathani wa Ũthamaki wake. (2 Petero 3:9, 13) Ĩ ti thĩ njega ĩo! Na thĩinĩ wa thĩ ĩyo njerũ ĩna ũthingu-rĩ, gũgaakorũo na ndini o ĩmwe tu, ũthathaiya wa ma wa mũthemba ũmwe. Githĩ ti ũndũ wa ũũgĩ woe ikinya rĩrĩa rĩagĩrĩire o rĩu nĩguo ũnyitanĩre na athathaiya a ma?