Tũngĩkora mwana, twagĩrĩirũo kũmũũria kana no twarie na aciari ake. Ũndũ ũcio wonanagia nĩ tũratĩĩa ũnene wa aciari ake. (Thi 6:20) Mwana angĩtwĩra tũingĩre nyũmba, tũtiagĩrĩirũo kũingĩra. Aciari mangĩkorũo matarĩ kuo, twagĩrĩirũo gũgaacoka rĩngĩ.

O na angĩkorũo mwana nĩ mũnene, ta mĩaka 15 nginya 19, no wega kũũria kana aciari marĩ kuo. Angĩkorũo matirĩ kuo, no tũmũũrie kana nĩ mamwĩtĩkagĩria athuure kĩrĩa angĩenda gũthoma. Angĩkorũo nĩ mamwĩtĩkagĩria, no tũmũtigĩre ibuku kana tũmwerekerie harĩ jw.org/ki.

Rĩrĩa tũracokera mũndũ mwĩthĩ wakenirio nĩ ũhoro, twagĩrĩirũo kũmũũria kana no tuonane na aciari ake. Ũndũ ũcio ũgũtũteithia gũtaarĩria muoroto witũ wa kũmaceerera na tũmonie ũtaaro wa kwĩhokeka wĩgiĩ famĩlĩ ũrĩa ũkoragwo thĩinĩ wa Bibilia. (Thab 119:86, 138) Kuonania atĩ nĩ tũreciria na tũgatĩĩa aciari acio nĩ ũira mwega, na no gũtũhe mĩeke ĩngĩ ya kũhunjĩria famĩlĩ ĩyo ũhoro ũrĩa mwega.—1Pe 2:12.