Ndari 24:1-25
24 Rĩrĩa Balaamu oonire atĩ warĩ ũndũ mwega maitho-inĩ ma Jehova kũrathima Isiraeli, ndaathiire rĩngĩ gũtuĩria ũhoro kũgerera imenyithia cia ũragũri cia maũndũ moru,+ no aahũgũrire ũthiũ wake kwerekera werũ-inĩ.
2 Rĩrĩa Balaamu aatiirire maitho make akĩona Isiraeli ambĩte hema kũringana na mĩhĩrĩga yake,+ roho wa Ngai ũgĩũka igũrũ wake.+
3 Agĩcoka akiuga ciugo ici na njĩra ya thimo:+
“Ici nĩ ciugo cia Balaamu mũrũ wa Beori,Ciugo cia mũndũ ũhingũrĩtwo maitho,
4 Ciugo cia ũrĩa ũiguaga kiugo kĩa Ngai,O we ũrĩa woonire kĩoneki kĩa Mwene-Hinya-Wothe,O we ũrĩa ũinamĩrĩire atarĩ mũhumbĩre maitho:+
5 Kaĩ hema ciaku nĩ thaka-ĩ, wee Jakubu,Ciikaro ciaku igagĩthakara-ĩ, wee Isiraeli!+
6 Matambũrũkĩte kũndũ kũraihu o ta mĩkuru,+O ta mĩgũnda ĩrĩ hakuhĩ na rũũĩ,O ta thubiri iria Jehova ahandĩte,O ta mĩtarakwa ĩrĩ hakuhĩ na maĩ.
7 Maĩ maikaraga manyũrũrũkĩte kuuma ndoo-inĩ ciake igĩrĩ cia rũũa,Na mbeũ yake* ĩhandĩtwo hakuhĩ na maĩ maingĩ.+
Mũthamaki wake+ o nake agaatuĩka mũnene gũkĩra Agagi,+Naguo ũthamaki wake nĩ ũgaatũũgĩrio.+
8 Ngai nĩ kũruta araruta Isiraeli kuuma Misiri;Atariĩ o ta hĩa cia ndegwa ya gĩthaka harĩ o.
Nĩ ekũniina ndũrĩrĩ, iria imũhinyagĩrĩria,+Namo mahĩndĩ ma cio amatanuke, na amathecange na mĩguĩ yake.
9 Akomereire thĩ, agetandaiya o ta mũrũthi,Na o ta mũrũthi-rĩ, nũũ ũngĩgeria kũmwarahũra?
Arĩa makũrathimaga nĩ arathime,Nao arĩa makũrumaga nĩ anyite nĩ kĩrumi.”+
10 Nake Balaki akĩrakario mũno nĩ Balaamu. Balaki akĩhũũra hĩ na mangʼũrĩ akĩra Balaamu ũũ: “Ndĩragwĩtire ũrume thũ ciakwa,+ na rĩu gũtirĩ ũndũ weka tiga gũcirathima maita macio matatũ.
11 Rĩu kĩinũke. Ngũbangĩte gũkuonia gĩtĩo na njĩra nene,+ no rĩrĩ, Jehova nĩ agirĩrĩria ũtĩithio.”
12 Balaamu agĩcokeria Balaki ũũ: “Na githĩ ndierire atũmwo arĩa watũmĩte atĩrĩ,
13 ‘O na Balaki angĩĩhe nyũmba yake ĩiyũire betha na thahabu, ndirĩ hĩndĩ ingĩĩra njĩke* ũndũ wa kwagarara watho wa Jehova, ũrĩ ũndũ mwega kana mũũru. Ngwaria o ciugo iria Jehova ekũnjĩra’?+
14 Na rĩu nĩ gũthiĩ thiĩte kũrĩ andũ aitũ. Ũka ngũtaarĩrie ũrĩa andũ aya mageeka andũ aku ihinda rĩũkĩte.”*
15 Kwoguo akiuga ciugo ici na njĩra ya thimo:+
“Ici nĩ ciugo cia Balaamu mũrũ wa Beori,Ciugo cia mũndũ ũhingũrĩtwo maitho,+
16 Ciugo cia ũrĩa ũiguaga kiugo kĩa Ngai,O we ũrĩa ũrĩ na ũũgĩ wa Ũrĩa ũrĩ Igũrũ Mũno,Nĩ oonire kĩoneki kĩa Mwene-Hinya-WotheHĩndĩ ĩyo aainamĩrĩire atarĩ mũhumbĩre maitho:
17 Nĩ ngũmuona, no ti rĩu;Nĩ ngaamũrora, no ti ica ikuhĩ.
Njata+ nĩ ĩkooima harĩ Jakubu,Naguo mũthĩgi+ uume Isiraeli.+
Na hatarĩ nganja nĩ akaahehenja thiithi wa Moabi*+Na ihĩndĩ rĩa mũtwe rĩa ariũ othe a ngũĩ.
18 Na Edomu nĩ ĩgaatuĩka ya kwĩgwatĩrũo,+Ĩni, Seiru+ agaatuĩka gĩikaro gĩa thũ ciake,+Na hĩndĩ ĩyo Isiraeli onanie ũcamba wake.
19 Na harĩ mũndũ ũkooima harĩ Jakubu na agaathiĩ atooranĩtie,+Akaananga mũndũ o wothe wa itũũra rĩu ũrĩa ũhonokete.”
20 Rĩrĩa oonire Amaleki, agĩthiĩ na mbere na ciugo ciake na njĩra ya thimo akiuga:
“Amaleki nĩwe warĩ wa mbere harĩ ndũrĩrĩ,+No mũthia-inĩ nĩ agaathira.”+
21 Rĩrĩa oonire Akeni,+ agĩthiĩ na mbere na ciugo ciake na njĩra ya thimo akiuga:
“Gĩikaro gĩaku kĩrĩ na ũgitĩri, na kũrĩa ũikaraga kũhaandĩtwo igũrũ rĩa ndũmba ya ihiga.
22 No harĩ mũndũ ũgaacina itũũra rĩa Kaini arĩniine.
Nĩ kahinda kaigana atĩa gatigarĩte Ashuri ĩgũkuue ũrĩ mĩgwate?”
23 Na agĩthiĩ na mbere na ciugo ciake na njĩra ya thimo akiuga:
“Hĩ! Nũũ ũkaahonoka rĩrĩa Ngai ageeka maũndũ maya?
24 Meri igooka kuuma gĩcũa-inĩ gĩa Kitimu,+Na nĩ ikaanyarira Ashuri,+Na nĩ ikaanyarira Eberi.
Ĩndĩ o nake nĩ agaathira.”
25 Thutha ũcio Balaamu+ agĩũkĩra agĩcoka gwake. Balaki o nake agĩthiĩ na njĩra yake.
Tũũhoro twa magũrũ-inĩ
^ Kana “rũciaro rwake.”
^ Ũkk., “kuuma ngoro-inĩ yakwa.”
^ Kana “mũico wa matukũ.”
^ Kana “thikĩrĩrio cia mũtwe wa Moabi.”
