Ndari 11:1-35
11 Na rĩrĩ, andũ makĩambĩrĩria gũteta marĩ na marũrũ mbere ya Jehova. Rĩrĩa Jehova aamaiguire, agĩcinwo nĩ marakara, na mwaki kuuma kũrĩ Jehova ũkĩambĩrĩria kũmarĩrĩmbũkĩra na ũgĩcina andũ amwe kũu mĩthia-inĩ ya kambĩ.
2 Rĩrĩa andũ maambĩrĩirie gũkaĩra Musa, agĩthaitha Jehova,+ na mwaki ũcio ũkĩhora.
3 Kwoguo handũ hau hagĩtwo Tabera,* tondũ mwaki kuuma kũrĩ Jehova nĩ wamarĩrĩmbũkĩire.+
4 Kĩrĩndĩ kĩa andũ matukanĩte*+ arĩa maarĩ gatagatĩ-inĩ kao makĩonania merirĩria ma mwĩyendo,+ na Aisiraeli o nao makĩambĩrĩria kũrĩra rĩngĩ makiugaga ũũ: “Nũũ ũgũtũhe nyama tũrĩe?+
5 Na nĩguo tũririkanaga thamaki iria twarĩaga Misiri tũtekũgũra, nginya matunda ma rũkiri,* meroni, itũngũrũ cia mahuti, itũngũrũ cia ngwacĩ, na itũngũrũ thumu!+
6 No rĩu no kũhooha tũrahooha. Hatirĩ kĩndũ kĩngĩ tũrona tiga o maana maya.”+
7 Na rĩrĩ, maana+ macio maatariĩ ta mbegũ cia ndania,+ na maahaanaga ta ngamu ya bendora.
8 Andũ maathiaga kũu guothe makamongania na makamathĩa na gĩthĩi kana makamakima na mũũthĩ. Magacoka makamatherũkia nyũngũ-inĩ kana magathondeka mĩgate ya gĩthiũrũrĩ,+ na maacamaga ta keki ĩrĩ na mũrĩo ĩrugĩtwo na maguta.
9 Ime rĩagĩa kambĩ-inĩ ũtukũ, nĩrĩo namo maana macio maaitĩkaga igũrũ rĩarĩo.+
10 Musa akĩigua andũ makĩrĩra, kuuma famĩlĩ ĩmwe nginya ĩrĩa ĩngĩ, o mũndũ arĩ mũromo-inĩ wa hema yake. Na Jehova akĩrakara mũno,+ o nake Musa akĩigua ũũru mũno.
11 Musa agĩkĩũria Jehova atĩrĩ: “Nĩ kĩĩ gĩtũmĩte ũnyamarie ndungata yaku? Nĩ kĩĩ gĩtũmĩte njage gwĩtĩkĩrĩka maitho-inĩ maku, o nginya ũkanjigĩrĩra mũrigo wa andũ aya othe?+
12 Kaĩ arĩ niĩ ndagĩire nda ya andũ aya othe? Kaĩ arĩ niĩ ndamaciarire, atĩ nĩguo ũnjĩre atĩrĩ, ‘Makuue gĩthũri-inĩ gĩaku, o ta ũrĩa ndungata ĩkuuaga* mwana,’ nginya bũrũri-inĩ ũrĩa wehĩtire kũhe maithe mao ma tene?+
13 Ngũruta kũ nyama cia kũhe andũ aya othe? Nĩ gũkorũo maratinda makĩndĩrĩra makiugaga atĩrĩ, ‘Tũhe nyama tũrĩe!’
14 Ndingĩhota andũ aya othe ndĩ wiki; nĩ nditũhĩirũo mũno.+
15 Angĩkorũo ũũ nĩguo ũkũnjĩka-rĩ, ndagũthaitha ũnjũrage o rĩu.+ Angĩkorũo nĩ njĩtĩkĩrĩkĩte maitho-inĩ maku, ndũkareke nyone thĩna rĩngĩ.”
16 Jehova agĩcokeria Musa ũũ: “Njokanĩrĩria arũme 70 kuuma harĩ athuri* a Isiraeli, arĩa ũĩ atĩ nĩ athuri arĩa mehokeirũo maũndũ na anene a andũ,+ ũmatware hema-inĩ ya gũtũnganwo, na marũgame hau hamwe nawe.
17 Na niĩ nĩ ngũikũrũka+ na ngwarĩrie ũrĩ hau,+ na nĩ nguoya roho ũmwe+ ũrĩa ũrĩ naguo na ndĩũige igũrũ rĩao, nao nĩ marĩgũteithagia gũkuua mũrigo wa andũ acio nĩguo ndũkaũkuue ũrĩ wiki.+
18 Wagĩrĩirũo kwĩra andũ atĩrĩ, ‘Mwĩtheriei nĩ ũndũ wa rũciũ,+ nĩ gũkorũo hatarĩ nganja nĩ mũkaarĩa nyama, tondũ nĩ mũrĩrĩte na Jehova akamũigua+ na mũkoiga ũũ: “Nũũ ũgũtũhe nyama tũrĩe? Maũndũ maitũ maarĩ mega rĩrĩa twarĩ Misiri.”+ Hatarĩ nganja Jehova nĩ ekũmũhe nyama, na inyuĩ mũrĩe.+
19 Mũtigũcirĩa mũthenya ũmwe, kana mĩthenya 2 kana mĩthenya 5 kana mĩthenya 10 kana mĩthenya 20,
20 no mũgũcirĩa mweri mũgima, nginya ciume na maniũrũ na mũcinyire,+ nĩ gũkorũo nĩ mũregete Jehova, o we ũrĩa ũrĩ gatagatĩ-inĩ kanyu, na mũkarĩrĩra mbere yake, mũkiugaga ũũ: “Twoimire Misiri nĩkĩ?”’”+
21 Nake Musa akiuga: “Andũ arĩa marĩ na niĩ nĩ arũme 600,000+ a gũthiĩ na magũrũ, nawe no ũranjĩra ũũ, ‘Nĩ ngũmahe nyama, na nĩ mekũrĩa maiganie kwa ihinda rĩa mweri mũgima’!
22 O na ndũũru ciothe cia mbũri na ngʼondu na cia ngʼombe ingĩthĩnjwo-rĩ, hihi no cimaigane? Kana thamaki ciothe cia iria-inĩ ingĩtegwo-rĩ, hihi no cimaigane?”
23 Jehova agĩkĩra Musa atĩrĩ: “Kaĩ guoko kwa Jehova gwĩ gũkuhĩ?+ Rĩu nĩ ũkuona kana ũndũ ũrĩa ndĩroiga nĩ ũgwĩkĩka harĩ wee kana ndũgwĩkĩka.”
24 Kwoguo Musa akiuma na akĩra andũ ciugo cia Jehova. Na agĩcokanĩrĩria arũme 70 kuuma harĩ athuri a kĩrĩndĩ na akĩmarũgamia mathiũrũrũkĩirie hema ĩyo.+
25 Jehova agĩcoka agĩikũrũka arĩ itu-inĩ,+ akĩmwarĩria+ na akĩoya roho ũmwe+ ũrĩa aarĩ naguo akĩũiga igũrũ rĩa o ũmwe wa athuri acio 70. Na rĩrĩa roho ũcio wamagĩire, makĩambĩrĩria gwĩka ta anabii,*+ no matiekire ũguo rĩngĩ.
26 Na rĩrĩ, nĩ kwarĩ na arũme erĩ maatigĩtwo kambĩ-inĩ. Meetagwo Elidadi na Medadi. Naguo roho ũkĩambĩrĩria kũmagĩa, nĩ gũkorũo maarĩ amwe a arĩa marĩĩtwa mao maandĩkĩtwo, no matiathiĩte hema-inĩ ĩyo. Kwoguo makĩambĩrĩria gwĩka ta anabii kũu kambĩ-inĩ.
27 Mwanake ũmwe agĩthiĩ atengʼerete akĩmenyithia Musa atĩrĩ: “Elidadi na Medadi mareka ta anabii kambĩ-inĩ!”
28 Nake Joshua+ mũrũ wa Nuni, ndungata ya Musa kuuma wĩthĩ-inĩ wake, akĩmwĩra ũũ: “Musa mwathi wakwa, makaanie!”+
29 No we Musa akĩmũcokeria: “Kaĩ ũraigua ũiru handũ-inĩ hakwa? Aca tiga, na arĩ korũo andũ othe a Jehova nĩ anabii na Jehova amahe roho wake!”
30 Thutha-inĩ Musa agĩcoka kambĩ-inĩ marĩ hamwe na athuri* acio a Isiraeli.
31 Naruo rũhuho ruumĩte kũrĩ Jehova rũkĩhurutana na rũkĩambĩrĩria kũrehe tũmakia arũme kuuma iria-inĩ, rũgĩtũma tũgwe tũthiũrũrũkĩirie kambĩ+ itĩna rĩa rũgendo rwa mũthenya ũmwe mwena ũmwe na itĩna rĩa rũgendo rwa mũthenya ũmwe mwena ũrĩa ũngĩ, gũthiũrũrũkĩria kambĩ, na twarĩ mĩkono* ĩĩrĩ kuuma thĩ.
32 Kwoguo mũthenya ũcio wothe na ũtukũ wothe nginya mũthenya ũrĩa warũmĩrĩire, andũ maathiire o na mbere kũngania tũmakia arũme tũu. Gũtirĩ mũndũ wonganirie tũnyihĩire homeri* ikũmi, na magĩthiĩ na mbere gũtwanĩka kũndũ guothe gũthiũrũrũka kambĩ nĩ ũndũ wao ene.
33 No nyama irĩ o magego-inĩ mao, o na matatanukĩte, Jehova agĩcinwo nĩ marakara kwerekera andũ acio, na Jehova akĩambĩrĩria kũhũũra andũ acio ihũũra inene mũno rĩa kũmaniina.+
34 Nĩ ũndũ ũcio magĩta handũ hau Kibirothu-hataava,*+ nĩ gũkorũo nĩho maathikire andũ arĩa moonanirie merirĩria ma mwĩyendo.+
35 Andũ acio makiuma Kibirothu-hataava magĩthiĩ Hazerothu, na magĩikara kũu Hazerothu.+
Tũũhoro twa magũrũ-inĩ
^ Rĩĩtwa rĩu riugĩte “Kũhĩa,” ũguo nĩ kuuga, mwaki mũnene; rũrĩrĩmbĩ.
^ No kũhoteke nĩ andũ mataarĩ Aisiraeli arĩa maarĩ gatagatĩ-inĩ kao.
^ Kana “kiukamba.”
^ Kana “mũndũrũme mũreri akuuaga.”
^ Athuri arĩa meehokeirũo maũndũ.
^ Kana “makĩambĩrĩria kũratha.”
^ Athuri arĩa meehokeirũo maũndũ.
^ Mũkono ũmwe waiganaine na centimita 44.5 (inji 17.5). Rora Ũhoro Muongerere B14.
^ Homeri ĩmwe yaiganaine na lita 220. Rora Ũhoro Muongerere B14.
^ Rĩĩtwa rĩu riugĩte “Mbĩrĩra cia Thuti.”
