Nahumu 3:1-19
3 Kaĩ itũũra rĩrĩa rĩitithagia thakame rĩrĩ na haaro-ĩ!
Rĩiyũire maheeni biũ o na ũtunyani.
Gũtirĩ hĩndĩ rĩagaga kĩndũ gĩa kũhĩta!
2 Kũrĩ na mũgambo wa kĩboko na inegene rĩa magũrũ ma ngaari,Mbarathi ĩrateng’era na ngaari ya mbarathi ĩrarũgarũga.
3 Mũndũ ũratwarithia mbarathi, rũhiũ rwa njora rũrahenũka, na itimũ rĩrahenia,Andũ aingĩ arĩa moragĩtwo, na hĩba cia ciimba—Mĩĩrĩ ya arĩa makuĩte ndĩngĩtarĩka.
Mathiaga makĩhĩngagwo nĩ mĩĩrĩ ĩyo ya arĩa makuĩte.
4 Maũndũ macio mageekĩka tondũ wa ciĩko nyingĩ cia ũmaraya cia mũmaraya ũcio,O ũcio mũthaka na ũgucagĩrĩria, o we mũnene wa ũrogi,Ũrĩa ũtegaga ndũrĩrĩ na ũmaraya wake na agatega famĩlĩ nyingĩ na ũrogi wake.
5 “Atĩrĩrĩ, nĩ ngũgũũkĩrĩra,”* ũguo nĩguo Jehova mũnene wa ita ekuuga,+“Nĩ ngooya nguo ciaku na igũrũ ikũhumbĩre ũthiũ;Nĩ ngaatũma ndũrĩrĩ cione njaga yaku,Na mothamaki mone gĩconoko gĩaku.
6 Na nĩ ngaagũikĩria gĩkoNa ndũme ũnyararũo;Ngaagũtua kĩndũ gĩa kwĩrorerũo.+
7 Ũrĩa wothe ũgaakuona nĩ akoora+ oige atĩrĩ,‘Nineve nĩ anangĩtwo!
Nũũ ũkũmũiguĩra tha?’
Ingĩruta kũ andũ a gũkũũmĩrĩria?
8 Wee-rĩ, kaĩ ũrĩ mwega gũkĩra No-amoni,*+ itũũra rĩrĩa rĩarĩ mĩtaro-inĩ ya Nailo?+
Aathiũrũrũkĩirio nĩ maĩ;Iria nĩrĩo rĩarĩ ũtonga wake na norĩo rĩarĩ rũthingo rwake.
9 Ethiopia nĩyo yarĩ kĩhumo kĩa hinya wake mũingĩ, o hamwe na Misiri.
Puti+ na Alibia nĩo maagũteithagia.+
10 Ĩndĩ o nake nĩ aatwarirũo ithamĩrio;Nĩ aatahirũo.+
Ciana ciake nacio ikĩbacanio igĩtuĩka tũcunjĩ kona-inĩ ciothe cia barabara.*
Nĩ maacukĩire andũ ake arĩa atĩĩku mĩtĩ,Na andũ ake othe arĩa marĩ igweta nĩ mohetwo na bĩngũ.
11 O nawe nĩ ũkaarĩĩo nĩ ndibei;+Nĩ ũkeehitha.
Nĩ ũgaacaria handũ ha kũũrĩra nĩ ũndũ wa thũ.
12 Mĩĩgitio yaku yothe ĩtariĩ ta mĩtĩ ya mĩkũyũ ĩrĩ na matunda marĩa mambaga kwĩruha;Ĩngĩinainio, mekũgwa kanua-inĩ ka arĩa matamburaga.
13 Atĩrĩrĩ, thigari ciaku itariĩ ta atumia gatagatĩ-inĩ gaku.
Thũ ciaku nĩ ikaahingũrĩrũo ihingo cia bũrũri waku biũ.
Mwaki nĩ ũgaacina mĩgamba ya ihingo ciaku.
14 Taha maĩ nĩ ũndũ wa hĩndĩ ya kũrigicĩrio!+
Ĩkĩra mĩĩgitio yaku hinya.
Ikũrũka ũthiĩ ndoro-inĩ ũkie rĩũmba;Nyita kĩndũ gĩa gũthondeka maturubarĩ.
15 O na kũu mwaki no ũgaagũcina.
Rũhiũ rwa njora nĩ rũgaagũtema rũkũgũithie.+
Rũgaagũtambura o ta ũrĩa ciana cia ngigĩ ciĩkaga.+
Wĩingĩhie ũhaane o ta ciana cia ngigĩ!
Ti itherũ, wĩingĩhie ũhaane o ta ngigĩ!
16 Ũingĩhĩtie ahũũri biacara aku gũkĩra njata cia igũrũ.
Kaana ka ngigĩ keyũnũraga ngothi na gakombũka gagathiĩ.
17 Arangĩri aku matariĩ ta ngigĩ,Na anene aku matariĩ ta gĩkundi kĩa ngigĩ.
Maikaraga ciugũ-inĩ cia mahiga mũthenya wa heho,No rĩrĩa riũa rĩara, makombũka magathiĩ;Na gũtirĩ mũndũ ũmenyaga kũrĩa marĩ.
18 Arĩithi aku marĩ na toro, wee mũthamaki wa Ashuri;Andũ aku arĩa marĩ igweta maikaraga mĩciĩ-inĩ yao.
Andũ aku mahurunjũkĩte irĩma-inĩ,Na gũtirĩ mũndũ ũramacokanĩrĩria.+
19 Thĩna ũrĩa ũgũkorete ndũrĩ na kĩhonia.
Kĩronda gĩaku gĩtingĩhona.
Andũ arĩa othe marĩiguaga ũhoro waku nĩ marĩhũũraga hĩ;+Tondũ rĩrĩ, nũũ ũtarĩ wanyamarĩka nĩ ũndũ wa ũhinyanĩrĩria waku ũtarĩ mũthia?”+
