Isaia 40:1-31
40 “Ũmĩrĩriai, ũmĩrĩriai andũ akwa,” ũguo nĩguo Ngai wanyu ekuuga.+
2 “Arĩriai ngoro ya* itũũra rĩa Jerusalemu,Na mũrĩmenyithie atĩ wĩra warĩo wa kũrutithio kĩa hinya nĩ ũkinyĩte mũthia,Na nĩ rĩrĩkĩtie kũherithio nĩ ũndũ wa mahĩtia ma rĩo.+
Kuuma guoko-inĩ kwa Jehova nĩ rĩamũkĩrĩte mũcara wa* mehia ma rĩo mothe.”+
3 Harĩ mũgambo wa mũndũ ũranĩrĩra werũ-inĩ ũkoiga:
“Thondekai* njĩra ya Jehova!+
Thondekai barabara nene na nũngarũ+ ya Ngai witũ ĩtuĩkanĩirie werũ-inĩ.+
4 Mĩkuru yothe nĩ yambatĩrio,Na irĩma ciothe na tũrĩma ciaraganio.
Nakuo kũrĩa gũtarĩ kũigananu no mũhaka kũigananio,Na kũrĩa gũtarĩ kwaraganu kwaraganio gũtuĩke mũkuru mwaraganu.+
5 Naguo riri wa Jehova nĩ ũkaaguũranĩrio,+Na andũ othe nĩ makaawona marĩ hamwe,+Nĩ gũkorũo kanua ka Jehova nĩko koigĩte ũguo.”
6 Ta thikĩrĩria! Harĩ mũndũ ũroiga ũũ: “Anĩrĩra!”
Nake ũngĩ akoria atĩrĩ: “Ngwanĩrĩra njuge atĩa?”
“Andũ othe mahaana o ta nyeki nduru.
Wendo mwĩhokeku wao wothe ũhaana o ta mahũa ma gĩthaka.+
7 Nyeki nduru nĩ yũmaga,Namo mahũa makahooha,+Tondũ wa kũhurutwo nĩ mĩhũmũ ya* Jehova.+
Ti itherũ andũ mahaana o ta nyeki nduru.
8 Nyeki nduru nĩ yũmaga,Namo mahũa makahooha,No kiugo kĩa Ngai witũ gĩtũũraga tene na tene.”+
9 Thiĩ wambate kĩrĩma-inĩ kĩraihu,Wee mũtumia ũyũ ũrarehera Zayuni ũhoro mwega.+
Anĩrĩra na hinya biũ,Wee mũtumia ũyũ ũrarehera Jerusalemu ũhoro mwega.
Anĩrĩra, ndũgetigĩre.
Menyithia matũũra ma Juda atĩrĩ: “Ngai wanyu arĩ haha.”+
10 Na rĩrĩ, Jehova Mwathani Ũrĩa Mũnene nĩ agooka arĩ na hinya mũingĩ,Na guoko gwake nĩkuo gũgaathamaka nĩ ũndũ wake.+
Atĩrĩrĩ, ngerenwa yake arĩ nayo,Naguo mũcara ũrĩa arĩhanaga wĩ mbere yake.+
11 O ta mũrĩithi, nĩ akaarũmbũiya* rũũru rwake.+
Natuo tũgondu atũcokanĩrĩrie na guoko gwake,Na atũkuue gĩthũri-inĩ gĩake.
Nacio ng’ondu iria irongithia nĩ agaacitongoria o kahora.+
12 Nũũ wanathima maĩ na rũhĩ rwake+Na agathima* igũrũ na wariĩ wa rũhĩ rwake?*
Nũũ wanacokanĩrĩria rũkũngũ rwa thĩ kĩbaba-inĩ gĩa gũthima+Kana agathima irĩma na ratiriO natuo tũrĩma agatũthima na ratiri?
13 Nũũ wanathima* roho wa Jehova,Na nũũ ũngĩhota kũmũtaara arĩ ta mũtaarani wake?+
14 Nũũ anahoya ũtaaro nĩguo agĩe na ũtaũku,Kana nũũ ũmũrutaga njĩra ya kĩhooto,Kana akamũruta kũgĩa na ũmenyo,Kana akamuonia njĩra ya ũtaũku wa ma?+
15 Atĩrĩrĩ, ndũrĩrĩ ihaana o ta itaata rĩa maĩ rĩrĩ ndoo-inĩ,Na cionagwo itariĩ o ta karũkũngũ kanini karĩ ratiri-inĩ.+
Na rĩrĩ, we oyaga icigĩrĩra na igũrũ o ta rũkũngũ rũhinyu.
16 Nginya Lebanoni gũtingĩhota gũtũma mwaki ũikare ũgĩakanaga,*Na nyamũ ciakuo cia gĩthaka itingĩigana kũruta igongona rĩa njino.
17 Ndũrĩrĩ ciothe ihaana ta kĩndũ hatarĩ mbere yake;+Acionaga irĩ tũhũ mũtheri, na itarĩ kĩene.+
18 Hihi mũngĩringithania Ngai na ũ?+
Nĩ mũhianĩre wa kĩĩ mũngĩmũhaanania naguo?+
19 Bundi athondekaga mũhianano,*Nake mũturi wa cuma akaũhumbĩra na thahabu,+Na agatura tũmĩnyororo twa betha.
20 Athuuraga mũtĩ ũtuĩke mũhothi wake,+Mũtĩ ũtangĩbutha.
Agacaria bundi ũrĩ na ũũgĩNĩguo athondeke mũhianano wa gwacũhio ũrĩa ũtangĩgwa.+
21 Kaĩ mũtarĩ mwamenya?
Kaĩ mũtarĩ mwaigua?
Kaĩ mũtarĩ mwerũo kuuma o kĩambĩrĩria?
Kaĩ mũtarĩ mwataũkĩrũo kuuma rĩrĩa mĩthingi ya thĩ yathondekirũo?+
22 Nĩ harĩ Ũrĩa ũikaraga igũrũ rĩa gĩthiũrũrĩ gĩa thĩ,+Nao andũ arĩa maikaraga thĩinĩ wayo matariĩ o ta ndaahi.
Igũrũ arĩtambũrũkagia o ta neti,Na akarĩtambũrũkia o ta hema ya gũikarũo.+
23 Atũmaga anene matuĩke ta kĩndũ hatarĩNao atuanĩri ciira* a gũkũ thĩ akamaagithia kĩene.
24 Nĩ hinya kũmahanda,Nĩ ũndũ ũrĩ hinya kũhanda mbeũ ciao,Mũri wao ndũrũmĩte thĩ wega,Na mangĩhuuhwo nĩ kũũma momaga,Naruo rũhuho rũkamakuua o ta mahuti.+
25 “Hihi niĩ mũngĩĩhaanania na ũ njiganane nake?” ũguo nĩguo Ũrĩa Mũtheru ekuuga.
26 “Tiirai maitho manyu na igũrũ muone.
Nũũ wombire indo icio?+
Nĩ Ũrĩa ũcitongoragia ta mbũtũ agĩcitaraga;Aciĩtaga ciothe na marĩĩtwa.+
Tondũ wa ũhoti wake mũingĩ na hinya wake wa magegania,+Gũtirĩ o na ĩmwe yagaga.
27 Wee Jakubu, nĩ kĩĩ gĩtũmaga uuge, na wee Isiraeli, nĩ kĩĩ gĩtũmaga uuge atĩrĩ,‘Njĩra yakwa nĩ ĩhithĩtwo kuuma kũrĩ Jehova,Na ndionaga kĩhooto kuuma kũrĩ Ngai’?+
28 Kaĩ mũtarĩ mwamenya? Kaĩ mũtarĩ mwaigua?
Jehova, Mũũmbi wa ituri cia thĩ, nĩ Ngai wa tene na tene.+
Ndarĩ hĩndĩ anogaga kana akorũo nĩ hinya.+
Ũtaũku wake gũtirĩ mũndũ ũngĩhota kũũtuĩria.*+
29 Nĩ aheaga mũndũ ũrĩa mũnogu hinyaNao arĩa morĩtwo nĩ hinya akamongerera ũhoti.+
30 Tũmwana nĩ tũkaanoga na tũũrũo nĩ hinya,Nao anake nĩ makaahĩngwo na magwe,
31 No arĩa merĩgagĩrĩra Jehova nĩ magaacokererũo nĩ hinya.
Makombũkaga na mathagu o ta nderi.+
Magaateng’eraga na matiũrũo nĩ hinya;Magaathiaga na matinoge.”+
Tũũhoro twa magũrũ-inĩ
^ Kana “Ariai na njĩra ya kũũmĩrĩria.”
^ Kana “rĩamũkĩrĩte maita merĩ ma.”
^ Kana “Haarĩriai.”
^ Kana “roho wa.”
^ Kana “nĩ akaarĩithia.”
^ Kana “akoya mũigana wa.”
^ Nĩ wariĩ wa kuuma mũthia-inĩ wa kĩara kĩrĩa kĩnene nginya kaara karĩa kanini rĩrĩa rũhĩ rũtambũrũkĩtio. Rora Ũhoro Muongerere B14.
^ Kana hihi, “wanataũkĩrũo nĩ.”
^ Kana “gũtingĩruta ngũ cia kũigana.”
^ Kana “mũhianano wa gũtwekio.”
^ Kana “athani.”
^ Kana “ndũngĩtaũkĩka.”
