Isaia 22:1-25
22 Ĩno nĩ ndũmĩrĩri nditũ ĩkoniĩ Mũkuru wa Kĩoneki:*+
Nĩ kĩĩ kĩũru nawe tondũ inyuothe mũthiĩte nyũmba igũrũ?
2 Wee waiyũirũo nĩ ngũĩ,Itũũra rĩrĩ mbugĩrĩrio, taũni yambararĩte.
Andũ aku arĩa mooragirũo matioragirũo na rũhiũ rwa njora,O na matiakuĩrĩire mbaara-inĩ.+
3 Athani aku othe arĩa ahinyanĩrĩria nĩ morĩte marĩ hamwe.+
Nĩ maanyitirũo mĩgwate o na gũtahũthĩrĩtwo ũta.
Othe arĩa maarĩ kuo nĩ maanyitirũo mĩgwate,+O na gũtuĩka nĩ moorĩte magathiĩ kũraihu.
4 Nĩkĩo ndoigire ũũ: “Eheriai maitho manyu harĩ niĩ,Na nĩ ngũrĩra ndĩ na ruo rũingĩ.+
Mũtigatinde mũkĩnyũmĩrĩriaNĩ ũndũ wa mwanangĩko wa mwarĩ wa* andũ akwa.+
5 Nĩ gũkorũo nĩ mũthenya wa gũtukanĩrũo na gũtoorio na kũmaka,+Kuuma kũrĩ Mwathani Ũrĩa Mũnene, Jehova mũnene wa ita,Mũkuru-inĩ wa Kĩoneki.
Rũthingo nĩ rũkũmomorũo+Na kũgĩe kĩrĩro kĩrĩma-inĩ.
6 Elamu+ nĩ yoete thiakaHamwe na andũ mahaicĩte ngaari na mbarathi,*Na Kiri+ ĩkaguũria* ngo.
7 Mĩkuru yaku ĩrĩa mĩega biũ*Ĩkaaiyũra ngaari cia mbaara,Nacio mbarathi* irũgame harĩa ibatiĩ kũrũgama kĩhingo-inĩ,
8 Na gĩtaama* kĩa Juda nĩ gĩkeeherio.
“Mũthenya ũcio nĩ mũkaarora harĩa indo cia mbaara cigagwo Nyũmba ya Mũtitũ,+
9 na nĩ mũkoona mĩanya mĩingĩ ya Itũũra rĩa Daudi.+ Na nĩ mũgaacokanĩrĩria maĩ ma karia ka mwena wa mũhuro.+
10 Nĩ mũgaatara nyũmba cia Jerusalemu, na mũmomore nyũmba nĩguo muongerere rũthingo hinya.
11 Na nĩ mũgaathondeka karia gatagatĩ-inĩ ga thingo icio igĩrĩ ga gwĩkĩra maĩ ma karia karĩa gakũrũ, no mũtikaarora Mũũmbi Wako Ũrĩa Mũnene, na mũtikoona Ũrĩa wagathondekire tene.
12 Mũthenya ũcio Mwathani Ũrĩa Mũnene, Jehova mũnene wa ita,Nĩ akoiga kũgĩe kĩrĩro na gũcakaywo,+Mĩtwe yenjwo na kwĩhumbwo nguo cia makũnia.
13 No ithenya rĩa ũguo, kũrĩ na gĩkũngũĩro na gĩkeno,Ng’ombe igathĩnjwo o na ng’ondu igathĩnjwo,Nyama ikarĩo na ndibei ĩkanyuo.+
‘Nĩ tũkĩrĩei na tũnyue, tondũ rũciũ nĩ tũgaakua.’”+
14 Jehova mũnene wa ita agĩcoka akĩnguũrĩria ũũ matũ-inĩ makwa: “‘Inyuĩ andũ aya mehia maya matikũhumbĩrũo nĩ ũndũ wanyu o nginya mũkue,’+ ũguo nĩguo Mwathani Ũrĩa Mũnene, Jehova mũnene wa ita ekuuga.”
15 Ũũ nĩguo Mwathani Ũrĩa Mũnene, Jehova mũnene wa ita oigĩte: “Thiĩ kũrĩ mũramati ũyũ, kũrĩ Shebina,+ ũrĩa ũrũgamĩrĩire nyũmba,* ũmũũrie,
16 ‘Nĩ kĩĩ ũrenda gũkũ, na nũũ ũgũkoniĩ gũkũ, tondũ ũreyenjera mbĩrĩra gũkũ?’ Nĩ kwenja arenja mbĩrĩra yake handũ harĩa hatũũgĩru; nĩ gũicũhia araicũhia handũ hake ha kũhurũka* ndũmba-inĩ ya ihiga.
17 ‘Atĩrĩrĩ, Jehova nĩ agaakũharũrũkia na ũũru mũingĩ, wee mũndũ ũyũ, na akũnyite na hinya mũingĩ.
18 Nĩ agaakuoha akũrũmĩtie na akũharũrũkie ta mũbira bũrũri-inĩ mwariĩ. Kũu nĩkuo ũgaakuĩra, na nĩkuo ngaari ciaku cia mbarathi iria irĩ riri igaakorũo, gĩconoko harĩ nyũmba ya mwathi waku.
19 Na nĩ ngaakũrutũrũra kuuma gĩturũa-inĩ gĩaku na ngũingate wĩra-inĩ waku.
20 “‘Mũthenya ũcio nĩ ngeta ndungata yakwa Eliakimu+ mũrũ wa Hilikia,
21 na nĩ ngaamũhumba kanjũ yaku na ndĩmuohe mũcibi waku ndĩũrũmie,+ na neane wathani* waku guoko-inĩ gwake. Na nĩ agaatuĩka ithe wa aikari a Jerusalemu na a nyũmba ya Juda.
22 Na nĩ ngaaigĩrĩra cabi ya nyũmba ya Daudi+ kĩande-inĩ gĩake. Nĩ akaahingũra na gũtirĩ mũndũ ũkaahinga; akaahinga na gũtirĩ mũndũ ũkaahingũra.
23 Ngaamũhũũrĩra o ta mũcumarĩ handũ harũmu, na agaatuĩka ta gĩtĩ kĩa ũnene kĩrĩ riri harĩ nyũmba ya ithe.
24 Na nĩ magaacuuria harĩ we riri* wothe wa nyũmba ya ithe, njiarũa na rũciaro,* indo ciothe iria nini, indo iria itariĩ ta mbakũri, o hamwe na ndigithũ ciothe iria nene.
25 Jehova mũnene wa ita ekuuga atĩrĩ, “Mũthenya ũcio mũcumarĩ ũrĩa ũhũũrĩrĩirũo handũ harũmu nĩ ũkeeherio,+ na nĩ ũgaatinio ũgwe, naguo mũrigo ũrĩa ũracuurĩtio ho ũgwe ũthũkange, nĩ gũkorũo Jehova we mwene nĩ oigĩte ũguo.’”
Tũũhoro twa magũrũ-inĩ
^ No kũhoteke nĩ Jerusalemu.
^ Ici nĩ ciugo cia kũgerekania, hihi cia kuonania tha kana ũcayanĩri.
^ Kana “atwarithia a mbarathi.”
^ Kana “ĩkahaarĩria.”
^ Kana “Cianda ciaku iria njega biũ.”
^ Kana “Nao atwarithia a mbarathi.”
^ Kana “ũgitĩri.”
^ Kana “nyũmba ya mũthamaki.”
^ Ũkk., “ũikaro.”
^ Kana “ũnene.”
^ Ũkk., “ũritũ.”
^ Kana “thuuna.”
