Ezekieli 12:1-28
12 Kiugo kĩa Jehova gĩkĩnginyĩra o rĩngĩ ngĩrũo atĩrĩ:
2 “Mũrũ wa mũndũ, ũratũũra thĩinĩ wa nyũmba nemi. Makoragwo na maitho ma kuona, no mationaga, na matũ ma kũigua, no matiiguaga,+ nĩ gũkorũo o nĩ nyũmba nemi.+
3 No wee mũrũ wa mũndũ-rĩ, haarĩria mĩrigo yaku ya gũthiĩ ithamĩrio. Thutha ũcio, ũthiĩ ithamĩrio kũrĩ mũthenya o makĩĩyonagĩra. Uume mũciĩ ũthiĩ ithamĩrio kũndũ kũngĩ o makĩĩyonagĩra. Kwahoteka nĩ megũtaũkĩrũo nĩ ũndũ ũcio, o na gũtuĩka o nĩ nyũmba nemi.
4 Kũrĩ mũthenya o makĩĩyonagĩra, ũrute mĩrigo ĩyo yaku ya gũthiĩ ithamĩrio nja, na hwaĩ-inĩ o makĩĩyonagĩra, ũthiĩ ta mũndũ watwarũo ithamĩrio.+
5 “Ningĩ ũthegethe irima rũthingo-inĩ o makĩĩyonagĩra, na ũrutĩre indo ciaku ho.+
6 Na o makĩĩyonagĩra, ũigĩrĩre indo ciaku kĩande ũciumie kũrĩ na nduma. Ningĩ ũhumbĩre ũthiũ waku nĩguo ndũkone thĩ, nĩ gũkorũo nĩ ngũgũtua kĩmenyithia harĩ nyũmba ya Isiraeli.”+
7 Na niĩ ngĩka o ta ũguo ndathĩtwo. Kũrĩ mũthenya, ngĩruta mĩrigo yakwa ta ya gũthiĩ ithamĩrio nja, na hwaĩ-inĩ ngĩthegetha irima rũthingo-inĩ na guoko. Rĩrĩa kwagĩire nduma, ngĩoya indo ciakwa ngĩcikuua na kĩande o makĩĩyonagĩra.
8 Rũcinĩ kiugo kĩa Jehova gĩkĩnginyĩra o rĩngĩ ngĩrũo atĩrĩ:
9 “Mũrũ wa mũndũ, na githĩ andũ a nyũmba ya Isiraeli, o ĩyo nemi, matirakũũririe, ‘Nĩ kĩĩ ũreka?’
10 Meere atĩrĩ, ‘Jehova Mwathani Ũrĩa Mũnene oigĩte ũũ: “Ndũmĩrĩri ĩno ĩgiĩ mũtongoria+ ũrĩa ũrĩ thĩinĩ wa Jerusalemu o hamwe na nyũmba yothe ya Isiraeli itũũra-inĩ rĩu.”’
11 “Ũmeere atĩrĩ, ‘Niĩ ndĩ kĩmenyithia harĩ inyuĩ.+ O ta ũguo njĩkĩte, noguo o nao mageekwo. Nĩ magaatahwo matwarũo ithamĩrio.+
12 Mũtongoria ũrĩa ũrĩ gatagatĩ-inĩ kao agaakuua indo ciake na kĩande na oime kũrĩ na nduma. Agaathegetha irima rũthingo-inĩ na agererie indo ciake ho.+ Ningĩ nĩ akaahumbĩra ũthiũ wake nĩguo ndakone thĩ.’
13 Nĩ ngaamũikĩria neti yakwa, na nĩ akaanyitwo nĩ neti ĩyo yakwa ya gũtega.+ Thutha ũcio nĩ ngaamũtwara Babuloni, bũrũri wa Akalidei, no ndakaawona; na kũu nĩkuo agaakuĩra.+
14 Nao andũ arĩa othe mamũthiũrũrũkĩirie, arĩa mamũteithagĩrĩria o hamwe na thigari ciake, nĩ ngaamahurunja na mĩena yothe;+ na nĩ ngaacomora rũhiũ rwa njora ndĩmaingatithie.+
15 Na nĩ makaamenya atĩ niĩ nĩ niĩ Jehova rĩrĩa ngaamaharaganĩria ndũrĩrĩ-inĩ na ndĩmahurunje mabũrũri-inĩ.
16 No nĩ ngaahonokia amwe ao kuumana na rũhiũ rwa njora, ng’aragu, na mũrimũ mũũru, nĩguo makaaheana ũhoro wa mĩtugo yao ĩrĩ magigi kũrĩ ndũrĩrĩ cia kũrĩa magaathiĩ; na nĩ makaamenya atĩ niĩ nĩ niĩ Jehova.”
17 Na kiugo kĩa Jehova gĩkĩnginyĩra o rĩngĩ ngĩrũo atĩrĩ:
18 “Mũrũ wa mũndũ, wagĩrĩirũo kũrĩa mũgate waku ũkĩinainaga na ũnyue maĩ maku ũrĩ na kĩmako na mĩtangĩko.+
19 Ĩra andũ a bũrũri ũcio atĩrĩ, ‘Jehova Mwathani Ũrĩa Mũnene arera aikari a Jerusalemu thĩinĩ wa bũrũri wa Isiraeli ũũ: “Makaarĩaga mũgate wao marĩ na mĩtangĩko na makanyua maĩ mao marĩ na kĩeha kĩnene, nĩ gũkorũo bũrũri wao nĩ ũgaatuĩka kũndũ gũtiganĩrie biũ+ tondũ wa ũhinya wa arĩa othe matũũraga kuo.+
20 Matũũra marĩa maikaragwo nĩ makaanangwo, na bũrũri ũcio ũtuĩke kũndũ kwanangĩku;+ na nĩ mũkaamenya atĩ niĩ nĩ niĩ Jehova.”’”+
21 Na kiugo kĩa Jehova gĩkĩnginyĩra o rĩngĩ ngĩrũo atĩrĩ:
22 “Mũrũ wa mũndũ, nĩ thimo ĩrĩkũ ĩyo mũkoragwo nayo thĩinĩ wa Isiraeli, ĩyo yugaga, ‘Matukũ mahĩtũkaga, na gũtirĩ kĩoneki kĩhingaga’?+
23 Nĩ ũndũ ũcio meere atĩrĩ, ‘Jehova Mwathani Ũrĩa Mũnene oigĩte ũũ: “Nĩ ngaatũma thimo ĩyo ĩthire, na matikamĩgweta rĩngĩ ĩrĩ thimo thĩinĩ wa Isiraeli.”’ No ũmeere atĩrĩ, ‘Matukũ nĩ makuhĩrĩirie,+ na cioneki ciothe nĩ ikaahinga.’
24 Nĩ gũkorũo gũtikaagĩa kĩoneki kĩa maheeni rĩngĩ kana ũragũri wa kũheenania thĩinĩ wa nyũmba ya Isiraeli.+
25 ‘“Nĩ gũkorũo niĩ Jehova nĩ niĩ ngaaria. Kiugo o gĩothe ngoiga nĩ gĩkaahingio gĩtegũcererũo.+ Matukũ-inĩ manyu,+ inyuĩ nyũmba ĩno nemi, nĩ ngoigaga kiugo na ngakĩhingia,” ũguo nĩguo Jehova Mwathani Ũrĩa Mũnene oigĩte.’”
26 Kiugo kĩa Jehova gĩkĩnginyĩra o rĩngĩ ngĩrũo atĩrĩ:
27 “Mũrũ wa mũndũ, andũ a* Isiraeli maroiga ũũ, ‘Kĩoneki kĩu arona nĩ kĩa ihinda iraya kuuma rĩu, na araratha ũhoro wa ihinda iraya rĩgooka.’+
28 Nĩ ũndũ ũcio meere atĩrĩ, ‘Jehova Mwathani Ũrĩa Mũnene oigĩte ũũ: “‘Gũtirĩ kiugo o na kĩmwe gĩakwa gĩgaacererũo; ũndũ o wothe ngoiga nĩ ũkaahingio,’ ũguo nĩguo Jehova Mwathani Ũrĩa Mũnene oigĩte.”’”
Tũũhoro twa magũrũ-inĩ
^ Ũkk., “nyũmba ya.”
