Ayubu 26:1-14
26 Nake Ayubu agĩcokia akiuga atĩrĩ:
2 “Kaĩ nĩ ũteithĩtie ũrĩa ũtarĩ na ũhoti-ĩ!
Kaĩ nĩ ũhonoketie guoko kũrĩa gũtarĩ na hinya-ĩ!+
3 Nake ũrĩa ũtarĩ na ũũgĩ-rĩ, kaĩ nĩ ũmũheete ũtaaro mwega-ĩ!+
Kaĩ nĩ ũguũrĩtie ũũgĩ* waku mũingĩ-ĩ!
4 Nũũ ũrageria kwarĩria,Na nũũ ũkũhotithĩtie kwaria maũndũ ta macio?*
5 Arĩa magithĩtio hinya nĩ gĩkuũ nĩ mainainaga;Makoragwo rungu rwa iria na indo iria cikaraga kuo.
6 Mbĩrĩra* ĩkoragwo ĩrĩ njaga mbere ya Ngai,+Nakuo kũndũ kũrĩa kwa mwanangĩko* gũgaikara gũtarĩ kũhumbĩre.
7 Atambũrũkagia matu ma mwena wa rũgongo* igũrũ rĩa kũndũ gũtarĩ kĩndũ,+Nayo thĩ hatirĩ kĩndũ amĩcunjurĩtie nakĩo;
8 Akũnjaga maĩ thĩinĩ wa matu make,+Na matu macio matitumũkaga nĩ ũndũ wa ũritũ wamo;
9 Athiĩkaga gĩtĩ gĩake kĩa ũnene,Agatambũrũkia itu rĩake igũrũ rĩakĩo.+
10 Acoraga mũhaka* gatagatĩ ka matu na iria;+Agekĩra mũhaka gatagatĩ ka ũtheri na nduma.
11 Itugĩ iria itiiragĩrĩra igũrũ nĩ cinainaga;Ikanyitwo nĩ kĩmako nĩ ũndũ wa mũgambo wake mũnene.
12 Hinya wake ũtũmaga iria riunjugũke,+Naguo ũtaũku wake ũkoinanga nyamũ ĩrĩa nene ya iria-inĩ.*+
13 Mĩhũmũ yake ĩtũmaga* igũrũ rĩthere;Guoko gwake gũthecaga nyoka ĩrĩa ĩtambaga na ihenya.
14 Atĩrĩrĩ, ĩyo no mĩthia ya mawĩko make;+Maũndũ marĩa maiguĩtwo mamwĩgiĩ matariĩ ta mĩheehũ!
Nũũ ũngĩkĩhota gũtaũkĩrũo nĩ mũrurumo wake mũnene?”+
Tũũhoro twa magũrũ-inĩ
^ Kana “ũũgĩ ũrĩa ũrĩ ũguni.”
^ Ũkk., “Na nĩ mĩhũmũ (roho) ya ũ yumĩte thĩinĩ waku?”
^ Kana “Sheoli,” ũguo nĩ kuuga, mbĩrĩra ya mũhaano kũrĩa akuũ makomete. Rora Ũthathaũri wa Ciugo.
^ Kana “Nakuo Abadoni.”
^ Ũkk., “Atambũrũkagia mwena wa rũgongo.”
^ Ũkk., “gĩthiũrũrĩ.”
^ Ũkk., “Rahabu.”
^ Kana “Rũhuho rwake rũtũmaga.”
