Marũa Kũrĩ Aefeso 6:1-24
6 Inyuĩ ciana, athĩkagĩrai aciari anyu+ mũrĩ na ũiguano na Mwathani, nĩ gũkorũo ũndũ ũcio nĩ wa ũthingu.
2 “Tĩaga thoguo na nyũkwa,”+ nĩrĩo rĩathani rĩa mbere rĩrĩ na kĩĩranĩro:
3 “Nĩguo maũndũ maku mathiĩ wega* na ũtũũre ihinda iraya thĩinĩ wa thĩ.”
4 Na inyuĩ maithe-rĩ, mũtikarakaragie ciana cianyu,+ no thiĩi na mbere gũcirera mũgĩcirũngaga+ na mũgĩcitaaraga* na njĩra ya Jehova.*+
5 Na inyuĩ ngombo-rĩ, athĩkagĩrai athani anyu+ a gũkũ thĩ,* mũgĩĩtigagĩra na mũkĩinainaga mũrĩ na ngoro theru, ta ũrĩa mwathĩkagĩra Kristo,
6 to hĩndĩ ĩrĩa mũronwo, atĩ nogetha mũkenie andũ,*+ no mwĩkage ũguo mũrĩ ta ngombo cia Kristo, mũgĩkaga wendi wa Ngai na ngoro* yothe.+
7 Tungatagai mũrĩ na mwerekera mwega, ta arĩ Jehova*+ mũratungatĩra no ti andũ,
8 tondũ nĩ mũĩ atĩ ũndũ o wothe mwega mũndũ ekaga, nĩ akaarĩhwo nĩ Jehova,*+ arĩ ngombo kana arĩ mũndũ ũrĩ na wĩyathi.
9 O na inyuĩ athani-rĩ, ĩkagai ngombo cianyu o ta ũguo, mũtegũciĩhĩtĩra, nĩ gũkorũo nĩ mũĩ atĩ Mwathi wacio na wanyu arĩ igũrũ,+ na ndarĩ mũthutũkanio.
10 Ngĩrĩkĩrĩria-rĩ, thiĩi na mbere kũgĩa na hinya+ thĩinĩ wa Mwathani kũgerera ũhoti wa hinya wake.
11 Mwĩhumbei indo ciothe cia mbaara+ kuuma kũrĩ Ngai nĩguo mũhotage kũrũgama mwĩhandĩte mwĩtiirie mawara ma Mũcukani;
12 tondũ tũrĩ na mbaara,+ na tũtirarũa na mwĩrĩ na thakame, no tũrarũa na thirikari, na atongoria, na athani a thĩ a nduma ĩno, maroho moru+ marĩa marĩ igũrũ.
13 Kwoguo mwĩhumbei indo ciothe cia mbaara kuuma kũrĩ Ngai,+ nĩguo mũkaahota gwĩtiiria mũthenya ũrĩa wa ũũru, na mwarĩkia kũhingia maũndũ mothe, mũrũgame mwĩhandĩte.
14 Nĩ ũndũ ũcio-rĩ, rũgamai mwĩhandĩte, mwĩyohete mũcibi wa ũhoro ũrĩa wa ma njohero-inĩ cianyu,+ na mũkehumba gako ga gĩthũri karĩa ka ũthingu,+
15 na mwĩkĩrĩte iratũ magũrũ-inĩ manyu mwĩhaarĩirie kũhunjia ũhoro ũrĩa mwega wa thayũ.+
16 Makĩria ma indo icio ciothe-rĩ, oyai ngo ĩrĩa nene ya wĩtĩkio,+ ĩrĩa mũrĩhotaga kũhoria nayo mĩguĩ yothe ĩrĩa ĩrĩ mwaki ya ũrĩa mũũru.+
17 Ningĩ ĩtĩkĩrai ngũbia ya ũhonokio,+ na rũhiũ rwa njora rwa roho, na nĩruo kiugo kĩa Ngai,+
18 mũgĩthiaga na mbere kũhoya mahoya ma mĩthemba yothe+ na gũthaithana hingo ciothe thĩinĩ wa roho.+ Ũhoro-inĩ ũcio ikaragai mwĩiguĩte, mũgĩthaithanaga hingo ciothe nĩ ũndũ wa arĩa othe aamũre.
19 Ningĩ hoyagai nĩ ũndũ wakwa, nĩguo heagwo ciugo hĩndĩ ĩrĩa ndatumũra kanua, nĩgetha hotage kwaria na ũcamba ngĩmenyithania hitho ĩrĩa theru ĩgiĩ ũhoro ũrĩa mwega,+
20 ũhoro o ũcio niĩ ndĩ barũthi+ waguo njohetwo mĩnyororo, na ningĩ nĩguo hotage kwaria ũhoro waguo na ũcamba, o ta ũrĩa njagĩrĩirũo kwaria.
21 Rĩu-rĩ, nĩguo o na inyuĩ mũmenye ũhoro wakwa na ũrĩa ndĩrathiĩ na mbere, Tikiko,+ mũrũ wa Ithe witũ nyendete na ndungata njĩhokeku thĩinĩ wa Mwathani, nĩ ekũmũmenyithia maũndũ mothe.+
22 Ndĩramũtũma kũrĩ inyuĩ nĩ ũndũ wa gĩtũmi gĩkĩ, atĩ mũmenye ũrĩa ithuĩ tũtariĩ na nĩguo omĩrĩrie ngoro cianyu.
23 Ariũ a Ithe witũ marogĩa na thayũ na wendo hamwe na wĩtĩkio kuuma kũrĩ Ngai Ithe witũ, na Mwathani Jesu Kristo.
24 Ũtugi mũnene ũroikara hamwe na arĩa othe mendete Mwathani witũ Jesu Kristo na wendo ũtangĩthira.
Tũũhoro twa magũrũ-inĩ
^ Kana “Nĩguo ũgaacĩre.”
^ Kana “mũgĩcirutaga; mũgĩcitongoragia.”
^ Rora Ũhoro Muongerere A5.
^ Ũkk., “a kĩĩmwĩrĩ.”
^ Kĩngiriki, psy·kheʹ. Rora Ũthathaũri wa Ciugo.
^ Ũkk., “ti na ũtungata wa maitho ta mũrakenia andũ.”
^ Rora Ũhoro Muongerere A5.
^ Rora Ũhoro Muongerere A5.
