Maũndũ Marĩa Meekirũo nĩ Atũmwo 14:1-28
14 Na rĩrĩ, marĩ kũu Ikoniamu magĩtonya thunagogi-inĩ ya Ayahudi marĩ hamwe na makĩaria na njĩra njega mũno nginya andũ aingĩ Ayahudi na Angiriki magĩtuĩka etĩkia.
2 No Ayahudi arĩa matetĩkirie, magĩcogera andũ a ndũrĩrĩ na magĩthũkia meciria mao nĩguo mokĩrĩre ariũ a Ithe witũ.+
3 Nĩ ũndũ ũcio makĩhũthĩra ihinda iraya kũu makĩaria na ũcamba maheetwo hinya nĩ Jehova,* o we warutĩte ũira wĩgiĩ kiugo kĩa ũtugi wake mũnene, akĩmahe hinya wa kũringa ciama na gwĩka maũndũ ma magegania.*+
4 No rĩrĩ, andũ aingĩ a itũũra rĩu nĩ maagayũkanĩte; amwe maarĩ mwena wa Ayahudi no arĩa angĩ maarĩ mwena wa atũmwo.
5 Hĩndĩ ĩrĩa andũ a ndũrĩrĩ na Ayahudi hamwe na atongoria ao maageririe kũmeeka maũndũ ma kũmaagĩra gĩtĩo na kũmahũũra na mahiga,+
6 makĩmenyithio ũhoro ũcio na makĩũrĩra matũũra ma Likaonia, Listra na Deribe, na bũrũri ũrĩa warigicĩirie.+
7 Na marĩ kũu magĩthiĩ na mbere kũhunjia ũhoro ũrĩa mwega.
8 Na rĩrĩ, kũu Listra nĩ kwarĩ mũndũ warĩ muonju magũrũ. Aaciarirũo arĩ muonju na ndoimĩte etwarĩte.
9 Mũndũ ũcio aaikarĩte thĩ agĩthikĩrĩria Paulo akĩaria. Nake Paulo akĩmũrora wega, na rĩrĩa oonire atĩ aarĩ na wĩtĩkio wa gũtũma ahonio,+
10 akĩmwĩra anĩrĩire atĩrĩ: “Rũgama na magũrũ maku.” Mũndũ ũcio akĩrũga na igũrũ na akĩambĩrĩria gwĩtwara.+
11 Rĩrĩa kĩrĩndĩ kĩoonire ũrĩa Paulo eka, gĩkĩanĩrĩra na rũthiomi rwa Kĩlikaonia gĩkiuga atĩrĩ: “Ngai nĩ ituĩkĩte o ta andũ na igaikũrũka kũrĩ ithuĩ!”+
12 Makĩambĩrĩria gwĩta Baranaba Zeu, no Paulo makĩmwĩta Herime tondũ nĩwe watongoragia kwaria.
13 Hekarũ ya Zeu yarĩ njĩra-inĩ ya gũtonya itũũra-inĩ rĩu, nake mũthĩnjĩri-ngai wa Zeu, akĩrehe ndegwa na mahũa matumĩtwo ta thũmbĩ* ihingo-inĩ na eendaga kũruta magongona arĩ hamwe na kĩrĩndĩ.
14 No rĩrĩa atũmwo acio Baranaba na Paulo maaiguire ũguo, magĩtembũra nguo ciao, magĩtengʼera kĩrĩndĩ-inĩ na makĩanĩrĩra makiuga:
15 “Andũ aya, mũreka maũndũ maya nĩkĩ? O na ithuĩ tũrĩ andũ marĩ na mawathe o ta inyuĩ.+ Na tũramũhunjĩria ũhoro ũrĩa mwega nĩguo mũtigane na maũndũ maya ma tũhũ mũgarũrũkĩre Ngai ũrĩa ũtũũraga muoyo, o we wombire igũrũ na thĩ na iria na indo iria ciothe irĩ thĩinĩ wacio.+
16 Mahinda ma njiarũa cia tene nĩ eetĩkĩrĩtie ndũrĩrĩ ciothe irũmĩrĩre mĩthiĩre yacio,+
17 o na gũtuĩka ndaigana gwĩtiga atarĩ na ũira+ nĩ gũkorũo nĩ eekaga maũndũ mega, akamũhe mbura kuuma igũrũ na imera irĩ na maciaro,+ akamũhũnia na irio na akaiyũria ngoro cianyu gĩkeno.”+
18 No rĩrĩ, o na moigĩte maũndũ macio, ndwarĩ ũndũ mũhũthũ kũgirĩrĩria kĩrĩndĩ kĩu kũmarutĩra magongona.
19 No Ayahudi magĩkinya kuuma Antiokia na Ikoniamu na makĩiguithia kĩrĩndĩ,+ makĩhũũra Paulo na mahiga na makĩmũkururia makĩmũtwara nja ya itũũra rĩu magĩĩcirĩria atĩ aarĩ mũkuũ.+
20 No rĩrĩa arutwo maamũthiũrũrũkĩirie, agĩũkĩra na agĩtonya itũũra-inĩ. Mũthenya ũrĩa warũmĩrĩire makiuma kũu marĩ na Baranaba magĩthiĩ Deribe.+
21 Thutha wa kũhunjia ũhoro ũrĩa mwega itũũra-inĩ rĩu na gũtua andũ aingĩ arutwo, magĩcoka Listra, Ikoniamu, na Antiokia.
22 Magĩĩkĩra arutwo hinya,+ na makĩmekĩra ngoro maikare marĩ na wĩtĩkio makĩmeera: “No mũhaka tũingĩre Ũthamaki-inĩ wa Ngai kũgerera mathĩna maingĩ.”+
23 Ningĩ makĩamũra athuri nĩ ũndũ wao harĩ o kĩũngano,+ makĩhoya na makĩĩhinga,+ na makĩmaneana kũrĩ Jehova,* o we maakoretwo meetĩkia.
24 Magĩcoka makĩgerera Pisidia magĩthiĩ Pamfilia,+
25 na thutha wa kũhunjia kiugo Periga, magĩikũrũka magĩthiĩ Atalia.
26 Kuuma kũu magĩthiĩ Antiokia na meri, kũrĩa mbere ĩyo maaneanirũo ũtugi-inĩ mũnene wa Ngai nĩ ũndũ wa wĩra ũcio maakoretwo marĩkia.+
27 Rĩrĩa maakinyire na magĩcokanĩrĩria kĩũngano, makĩmeera maũndũ maingĩ marĩa Ngai eekĩte kũgerera harĩ o, na atĩ nĩ aahingũrĩire andũ a ndũrĩrĩ mũrango wa kũgĩa na wĩtĩkio.+
28 Nĩ ũndũ ũcio magĩikara hamwe na arutwo ihinda iraya.
Tũũhoro twa magũrũ-inĩ
^ Rora Ũhoro Muongerere A5.
^ Kana “morirũ.”
^ Kana “mahũa ma gĩthiũrũrĩ.”
^ Rora Ũhoro Muongerere A5.
