Athamaki wa Kerĩ 7:1-20
7 Nake Elisha akiuga atĩrĩ, “Thikĩrĩriai kiugo kĩa Jehova. Ũũ nĩguo Jehova ekuuga: ‘Rũciũ ihinda o ta rĩrĩ kĩhingo-inĩ gĩa* Samaria, gĩthimi kĩmwe gĩa sea* kĩa mũtu mũhinyu gĩkeendagio cekeri* ĩmwe, na ithimi igĩrĩ cia sea cia cairi ikeendagio cekeri ĩmwe.’”+
2 Hĩndĩ ĩyo mũnene ũrĩa mũthamaki eehokete akĩra mũndũ wa Ngai ũrĩa wa ma atĩrĩ: “O na Jehova angĩhingũra ihingo cia mũiyũro wa igũrũ-rĩ, hihi ũndũ ũcio no ũhinge?”*+ Nake akĩmwĩra: “Nĩ ũkeeyonera ũndũ ũcio na maitho maku mwene,+ ĩndĩ wee ndũkaarĩa indo icio.”+
3 Kwarĩ na andũ ana maarĩ na mangũ itonyero-inĩ rĩa kĩhingo gĩa itũũra,+ na makĩĩrana atĩrĩ: “Nĩ kĩĩ gĩgũgĩtũma tũikare thĩ haha nginya tũkue?
4 Tũngiuga, ‘Nĩ tũthiĩi thĩinĩ wa itũũra,’ na kũrĩ na ng’aragu itũũra-inĩ,+ tũgũkuĩra kuo. Na tũngĩikara haha, no tũgũkua. Nĩ tũgĩthiĩi kambĩ-inĩ ya Asiria. Mangĩaga kũniina mĩoyo itũ, nĩ tũgũtũũra muoyo, no mangĩtũũraga, tũgĩkue.”
5 Nao magĩgĩũkĩra hwaĩ-inĩ kũrĩ na nduma na makĩingĩra kambĩ-inĩ ya Asiria. Rĩrĩa maakinyire nyumĩrĩra-inĩ ya kambĩ ĩyo ya Asiria, gũtiarĩ na mũndũ kuo.
6 Tondũ Jehova nĩ aatũmĩte kambĩ ya Asiria ĩigue mũgambo wa ngaari cia mbaara na mbarathi, mũgambo wa mbũtũ nene.+ Kwoguo makĩĩrana ũũ: “Atĩrĩrĩ, mũthamaki wa Isiraeli nĩ akomborete athamaki a Ahiti na athamaki a Misiri moke matũũkĩrĩre!”
7 Magĩũkĩra o hĩndĩ ĩyo makĩũra hwaĩ-inĩ kũrĩ na nduma, magĩtiga hema ciao, mbarathi, ndigiri, na kambĩ yothe o ũrĩa yarĩ, makĩũra nĩguo mahonokie mĩoyo yao.
8 Rĩrĩa andũ acio maarĩ na mangũ maakinyire nyumĩrĩra-inĩ ya kambĩ, magĩtonya hema-inĩ ĩmwe na makĩambĩrĩria kũrĩa na kũnyua. Magĩkuua betha, thahabu, na nguo kuuma kuo na magĩthiĩ magĩcihitha. Ningĩ magĩcoka na makĩingĩra hema ĩngĩ magĩkuua indo kuuma kuo na magĩthiĩ magĩcihitha.
9 Mũthia-inĩ makĩĩrana atĩrĩ: “Ũndũ ũyũ tũreka ti mwega. Mũthenya ũyũ nĩ mũthenya wa ũhoro mwega! Tũngĩikara tweterere nginya rũcinĩ, no mũhaka tũngĩherithio. Rekei rĩu tũthiĩ tũkaheane ũhoro ũcio nyũmba-inĩ ya mũthamaki.”
10 Nĩ ũndũ ũcio, magĩthiĩ na magĩta arangĩri a ihingo a itũũra makĩmeera atĩrĩ: “Tũthiire kambĩ-inĩ ya Asiria, no gũtirĩ mũndũ uuma kuo—gũtirĩ mũndũ tũiguire. No mbarathi ciuma kuo na ndigiri ciohetwo na hema igũtigĩtwo o ũrĩa irĩ.”
11 O rĩmwe arangĩri a ihingo makĩmenyithania ũhoro ũcio na ũgĩtwarũo thĩinĩ wa nyũmba ya mũthamaki.
12 Nake mũthamaki agĩũkĩra o hĩndĩ ĩyo ũtukũ akĩra ndungata ciake atĩrĩ: “Rekei ndĩmwĩre ũrĩa Asiria matwĩkĩte. Nĩ moĩ atĩ tũrĩ ahũtu,+ nĩ ũndũ ũcio makiuma kambĩ-inĩ magĩthiĩ kwĩhitha mũgũnda-inĩ, makiuga, ‘Mekuuma itũũra-inĩ, na ithuĩ tũmanyite marĩ muoyo na tũingĩre itũũra-inĩ.’”+
13 Nayo ndungata ĩmwe yake ĩkiuga ũũ: “Reke andũ amwe moe mbarathi ithano harĩ iria itigarĩte thĩinĩ wa itũũra. Atĩrĩrĩ, mekũrigĩrĩria o ta kĩrĩndĩ gĩothe kĩa Isiraeli kĩrĩa gĩgũtigara gũkũ. Atĩrĩrĩ, mekũrigĩrĩria o ta kĩrĩndĩ gĩothe kĩa Isiraeli kĩrĩa gĩathirire. Rekei tũmatũme mathiĩ makone.”
14 Nĩ ũndũ ũcio makĩoya ngaari igĩrĩ irĩ na mbarathi, nake mũthamaki akĩmatũma kambĩ-inĩ ya Asiria akĩmeera: “Thiĩi mũkone.”
15 Nao makĩmarũmĩrĩra o nginya Jorodani, na njĩra ĩyo yothe yaiyũire nguo na indo iria Asiria maateaga makĩũra nĩ ũndũ wa guoya. Andũ acio maatũmĩtwo magĩcoka na makĩhe mũthamaki ũhoro ũcio.
16 Andũ magĩcoka magĩthiĩ na magĩtaha kambĩ ĩyo ya Asiria, nginya gĩthimi kĩmwe gĩa sea kĩa mũtu mũhinyu gĩkĩendio cekeri ĩmwe, na ithimi igĩrĩ cia sea cia cairi ikĩendio cekeri ĩmwe, kũringana na kiugo kĩa Jehova.+
17 Mũthamaki nĩ aamũrĩte mũnene ũrĩa eehokete atuĩke mũrũgamĩrĩri kĩhingo-inĩ, no andũ makĩmũrangĩrĩria hau kĩhingo-inĩ nginya agĩkua, o ta ũrĩa mũndũ wa Ngai ũrĩa wa ma eerĩte mũthamaki rĩrĩa aaikũrũkĩte kũrĩ we.
18 Gwekĩkire o ta ũrĩa mũndũ wa Ngai ũrĩa wa ma eerĩte mũthamaki atĩrĩ: “Rũciũ ihinda o ta rĩrĩ kĩhingo-inĩ gĩa Samaria, ithimi igĩrĩ cia sea cia cairi ikeendagio cekeri ĩmwe, na gĩthimi kĩmwe gĩa sea kĩa mũtu mũhinyu gĩkeendagio cekeri ĩmwe.”+
19 No mũnene ũcio nĩ eerĩte mũndũ wa Ngai ũrĩa wa ma atĩrĩ: “O na Jehova angĩhingũra ihingo cia mũiyũro wa igũrũ-rĩ, hihi ũndũ ta ũcio no ũhinge?”* Nake Elisha akĩmwĩra: “Nĩ ũkeeyonera ũndũ ũcio na maitho maku mwene, ĩndĩ wee ndũkaarĩa indo icio.”
20 Ũguo noguo gwekĩkire harĩ we, tondũ andũ nĩ maamũrangĩrĩirie hau kĩhingo-inĩ nginya agĩkua.
Tũũhoro twa magũrũ-inĩ
^ Kana “thoko-inĩ cia.”
^ Sea ĩmwe yaiganaine na lita 7.33. Rora Ũhoro Muongerere B14.
^ Cekeri ĩmwe yaiganaine na ngiramu 11.4. Rora Ũhoro Muongerere B14.
^ Ũkk., “kiugo kĩu no kĩhinge?”
^ Ũkk., “kiugo ta kĩu no kĩhinge?”
