Samueli wa Mbere 28:1-25
-
Saulu gũthiĩ Eni-doru kwa mũtumia waaragia na maroho (1-25)
28 Na rĩrĩ, matukũ-inĩ macio Afilisti magĩcokanĩrĩria mbũtũ ciao nĩguo makarũe na Isiraeli.+ Nĩ ũndũ ũcio Akishi akĩra Daudi ũũ: “Nĩ ũĩ wega atĩ hatarĩ nganja wee hamwe na arũme aku nĩ mũgũthiĩ hamwe na niĩ mbaara-inĩ.”+
2 Nĩ ũndũ ũcio Daudi akĩra Akishi atĩrĩ: “Hatarĩ nganja wee nĩ ũĩ ũrĩa ndungata yaku ĩgwĩka.” Akishi agĩkĩra Daudi ũũ: “Kĩu nĩkĩo gĩgũtũma ngũtue mũrangĩri wakwa wa hĩndĩ ciothe.”*+
3 Na rĩrĩ, Samueli nĩ aakuĩte, na andũ othe a Isiraeli makamũcakaĩra na makamũthika itũũra-inĩ rĩake Rama.+ Na bũrũri-inĩ wothe Saulu nĩ eeheretie andũ arĩa maragia na maroho na arĩa marathaga mohoro.+
4 Afilisti magĩgĩcokanĩrĩra na magĩthiĩ makĩamba hema Shunemu.+ Nĩ ũndũ ũcio Saulu agĩcokanĩrĩria andũ othe a Isiraeli, na makĩamba hema Giliboa.+
5 Rĩrĩa Saulu oonire kambĩ ya Afilisti, akĩnyitwo nĩ guoya, na akĩhũũra ngoro mũno.+
6 O na gũtuĩka Saulu nĩ aatuĩragia ũhoro harĩ Jehova,+ Jehova ndaigana kũmũcokeria ũndũ kũgerera iroto kana kũgerera Urimu+ o na kana kũgerera anabii.
7 Marigĩrĩrio-inĩ Saulu akĩra ndungata ciake ũũ: “Njetherai mũtumia waragia na maroho,+ nĩguo thiĩ ngatuĩrie ũhoro harĩ we.” Nacio ndungata ciake ikĩmwĩra ũũ: “Atĩrĩrĩ, Eni-doru+ nĩ kũrĩ mũtumia waragia na maroho.”
8 Nĩ ũndũ ũcio Saulu akĩĩhumba nguo ingĩ nĩguo ndakamenyeke na agĩthiĩ kũrĩ mũtumia ũcio ũtukũ arĩ hamwe na arũme ake erĩ. Saulu akĩmwĩra atĩrĩ: “Ndagũthaitha ũhũthĩre ũragũri, warie na maroho,+ ũndehere mũndũ ũrĩa ngũkwĩra.”
9 No rĩrĩ, mũtumia ũcio akĩmwĩra ũũ: “No mũhaka ũkorũo nĩ ũĩ ũrĩa Saulu eekire, ũrĩa bũrũri-inĩ wothe eeheririe andũ arĩa maragia na maroho na arĩa marathaga mohoro.+ Nĩ kĩĩ kĩragĩtũma ũgerie kũnjikia mũtego-inĩ nĩgetha njũragwo?”+
10 Nake Saulu akĩĩhĩta harĩ we na rĩĩtwa rĩa Jehova, akiuga ũũ: “O ta ũrĩa Jehova atũũraga muoyo, ndũkũgĩa na ihĩtia o na rĩmwe ũhoro-inĩ ũyũ!”
11 Mũtumia ũcio agĩkĩmũũria atĩrĩ: “Ũkwenda ngũrehere ũ?” Akĩmwĩra ũũ: “Ndehera Samueli.”
12 Rĩrĩa mũtumia ũcio oonire “Samueli,”*+ agĩkayũrũrũka na mũgambo wake wothe, akĩra Saulu ũũ: “Waheenia nĩkĩ? Wee nĩwe Saulu!”
13 Mũthamaki agĩkĩmwĩra atĩrĩ: “Ndũgetigĩre, nĩ kĩĩ ũrona?” Mũtumia ũcio akĩra Saulu ũũ: “Ndĩrona mũndũ ũroima na thĩ ũhaana ta ngai.”
14 O rĩo Saulu akĩmũũria atĩrĩ: “Ahaana atĩa?” nake akĩmwĩra ũũ: “Nĩ mũthuri mũkũrũ ũroima na thĩ, na ehumbĩte kagooti gatarĩ moko.”+ Nĩ ũndũ ũcio Saulu akĩmenya atĩ nĩ “Samueli,” agĩkĩinamĩrĩra agĩturumithia ũthiũ wake thĩ aturĩtie maru.
15 Nake “Samueli” akĩũria Saulu ũũ: “Nĩ kĩĩ gĩatũma ũũthumbũre woiga ndehwo?” Saulu akĩmũcokeria atĩrĩ: “Ndĩ thĩna-inĩ mũnene. Afilisti nĩ kũnjũkĩrĩra maranjũkĩrĩra, na Ngai nĩ anjehereire na rĩu ndanjokagĩria ũndũ kũgerera anabii o na kana kũgerera iroto;+ nĩkĩo ndĩragwĩta nĩgetha ũnjĩre ũrĩa njagĩrĩirũo gwĩka.”+
16 Nake “Samueli” akĩmwĩra atĩrĩ: “Nĩ kĩĩ kĩragĩtũma ũtuĩrie ũhoro harĩ niĩ kuona atĩ rĩu Jehova nĩ akwehereire+ na agatuĩka thũ yaku?
17 Jehova nĩ egwĩka ũrĩa ooigire kũgerera harĩ niĩ: Jehova nĩ egũtembũra ũthamaki kuuma moko-inĩ maku na aũheane kũrĩ mũndũ ũngĩ, nĩwe Daudi.+
18 Tondũ ndwaathĩkĩire mũgambo wa Jehova na ndwatharĩkĩire Aamaleki+ ũkĩaga kuonania marakara make, nĩkĩo Jehova agwĩkĩte ũguo ũmũthĩ.
19 Ningĩ Jehova nĩ ekũneana Isiraeli o hamwe nawe guoko-inĩ kwa Afilisti,+ na rũciũ wee+ hamwe na ariũ aku+ mũgaakorũo hamwe na niĩ. Ningĩ Jehova nĩ ekũneana mbũtũ ya Isiraeli moko-inĩ ma Afilisti.”+
20 O hĩndĩ ĩyo Saulu akĩgwa akĩaragana thĩ na akĩnyitwo nĩ guoya mũno nĩ ũndũ wa ciugo icio cia “Samueli.” Na akĩũrũo nĩ hinya biũ, tondũ ndaarĩte irio mũthenya ũcio wothe na ũtukũ ũcio wothe.
21 Rĩrĩa mũtumia ũcio aathiire harĩ Saulu na akĩona atĩ nĩ aatangĩkĩte mũno, akĩmwĩra ũũ: “Atĩrĩrĩ, ndungata yaku nĩ yathĩkĩra ũrĩa ũkuugĩte, na ndaingĩria muoyo wakwa ũgwati-inĩ+ na ndeka ũrĩa ũkũnjĩrĩte njĩke.
22 Rĩu ndagũthaitha ũthikĩrĩrie ũrĩa ndungata yaku ĩrenda gũkwĩra. Reke ngũrehere kĩenyũ kĩa mũgate; nĩgetha ũrĩe ũgĩe na hinya ũhote gũthiĩ rũgendo rwaku.”
23 No akĩrega akiuga ũũ: “Ndikũrĩa.” O na kũrĩ ũguo ndungata ciake o hamwe na mũtumia ũcio makĩmũringĩrĩria arĩe. Mũthia-inĩ akĩmathikĩrĩria na agĩũkĩra hau thĩ agĩikarĩra ũrĩrĩ.
24 Mũtumia ũcio aarĩ na njaũ norie kũu mũciĩ, agĩkĩmĩthĩnja* na ihenya na akĩoya mũtu akĩũkima akĩruga mĩgate ĩtarĩ mĩkĩre ndawa ya kũimbia.
25 Agĩciihũrĩra Saulu na ndungata ciake, na makĩrĩa. Thutha ũcio magĩũkĩra na magĩthiĩ ũtukũ o ro ũcio.+
Tũũhoro twa magũrũ-inĩ
^ Ũkk., “mũrangĩri wa mũtwe wakwa matukũ mothe.”
^ Kana “kĩndũ kĩahaanaga ta Samueli.”
^ Kana “agĩkĩmĩruta igongona.”
