Samueli wa Mbere 22:1-23
22 Daudi agĩkiuma kũu,+ akĩũra agĩthiĩ ngurunga-inĩ ya Adulamu.+ Rĩrĩa ariũ a nyina na nyũmba yothe ya ithe maaiguire ũhoro ũcio, magĩikũrũka kuo magĩthiĩ kũrĩ we.
2 Nao arĩa othe maarĩ thĩna-inĩ na arĩa maarĩ na thiirĩ o hamwe na arĩa maarĩ na mateta makĩũngana kũrĩ we, nake agĩtuĩka mũnene wao. Aarĩ na arũme ta 400.
3 Thutha-inĩ Daudi akiuma kũu agĩthiĩ Mizipe thĩinĩ wa Moabi na akĩra mũthamaki wa Moabi atĩrĩ:+ “Ndagũthaitha ũreke baba na maitũ maikare nawe nginya menye ũrĩa Ngai egwĩka ũhoro-inĩ wakwa.”
4 Nĩ ũndũ ũcio akĩmatiga na mũthamaki wa Moabi, na magĩikara nake ihinda rĩrĩa rĩothe Daudi aarĩ mwĩgitio-inĩ.+
5 Thutha wa ihinda mũnabii Gadi+ akĩra Daudi ũũ: “Tiga gũikara mwĩgitio-inĩ. Uma kũu ũthiĩ bũrũri-inĩ wa Juda.”+ Nĩ ũndũ ũcio Daudi akiuma kũu agĩthiĩ mũtitũ-inĩ wa Herethu.
6 Saulu akĩigua atĩ Daudi na arũme arĩa aarĩ nao nĩ monetwo. Hĩndĩ ĩyo Saulu aarĩ Gibea+ aikaire thĩ rungu rwa mũtĩ wa mũkarakaba handũ hatũũgĩru anyitĩte itimũ rĩake na guoko, nacio ndungata ciake ciothe ciarĩ hau imũthiũrũrũkĩirie.
7 Saulu agĩkĩra ndungata ciake icio ciamũthiũrũrũkĩirie atĩrĩ: “Ta thikĩrĩriai, inyuĩ Abenjamini. Hihi mũrũ wa Jesii+ o nake nĩ ekũmũhe ithaka na mĩgũnda ya mĩthabibũ inyuothe? Hihi nĩ ekũmwamũra inyuothe mũtuĩke anene a andũ ngiri na anene a andũ igana?+
8 Inyuothe nĩ mũbangĩte njama ya kũnjũkĩrĩra! Gũtirĩ mũndũ wamenyithirie rĩrĩa mũrũ wakwa niĩ mwene aathondekire kĩrĩkanĩro na mũrũ wa Jesii!+ Gũtirĩ o na ũmwe wanyu ũrĩ na tha na niĩ aamenyithie atĩ mũrũ wakwa niĩ mwene nĩ acogeire ndungata yakwa niĩ mwene ĩnjũkĩrĩre na ĩnjohie, ta ũrĩa kũrĩ ũmũthĩ.”
9 Nake Doegu Mũedomu,+ ũrĩa warĩ hau arũgamĩrĩire ndungata cia Saulu akĩmũcokeria ũũ:+ “Niĩ nĩ ndonire mũrũ wa Jesii oka Nobu kũrĩ Ahimeleku mũrũ wa Ahitubu.+
10 Na akĩmũtuĩrĩria ũhoro harĩ Jehova na akĩmũhe irio. O na akĩmũnengera rũhiũ rwa njora rwa Goliathu Mũfilisti.”+
11 O hĩndĩ ĩyo mũthamaki agĩtũmanĩra Ahimeleku mũrũ wa Ahitubu mũthĩnjĩri-Ngai na athĩnjĩri-Ngai othe a nyũmba ya ithe, arĩa maarĩ Nobu. Nĩ ũndũ ũcio othe magĩũka kũrĩ mũthamaki.
12 Saulu agĩkĩmwĩra ũũ: “Ta thikĩrĩria, wee mũrũ wa Ahitubu!” nake agĩcokia atĩrĩ: “Ĩ niĩ ũyũ haha, mwathi wakwa.”
13 Saulu akĩmũũria ũũ: “Nĩ kĩĩ gĩtũmĩte mũbange njama ya kũnjũkĩrĩra, wee na mũrũ wa Jesii, na njĩra ya kũmũhe mũgate na rũhiũ rwa njora na ũkamũtuĩrĩria ũhoro harĩ Ngai? Nĩ areganĩte na niĩ na araikara anjohetie, ta ũrĩa kũrĩ ũmũthĩ.”
14 Nĩ ũndũ ũcio Ahimeleku agĩcokeria mũthamaki atĩrĩ: “Nũũ gatagatĩ-inĩ ka ndungata ciaku ciothe ũkoragwo arĩ mwĩhokeku ta Daudi?+ Nĩ mũthoniwe wa mũthamaki+ na mũnene wa arangĩri aku na nĩ mũtĩĩku nyũmba-inĩ yaku.+
15 Kaĩ ũmũthĩ arĩ rĩo riita rĩa mbere kũmũtuĩrĩria ũhoro harĩ Ngai?+ Kũroaga gũtuĩka ũguo atĩ no njĩke ũndũ ta ũcio! Mũthamaki aroaga gũtuĩra ndungata yake mahĩtia o na kana nyũmba yothe ya baba, nĩ gũkorũo ndungata yaku ndĩroĩ ũndũ o na ũmwe wa maũndũ macio.”+
16 No mũthamaki akĩmwĩra ũũ: “No nginya ũkue,+ wee Ahimeleku, o hamwe na nyũmba yothe ya thoguo.”+
17 Nĩ ũndũ ũcio mũthamaki akĩra arangĩri* arĩa maamũthiũrũrũkĩirie ũũ: “Hũgũkĩrai athĩnjĩri-Ngai a Jehova mũmorage, tondũ nĩ manyitĩte Daudi mbaru! Nĩ maramenyaga atĩ nĩ kũũra arora no matiigana kũũmenyithia!” No ndungata cia mũthamaki itiendaga kuoya moko ma cio na igũrũ ciũrage athĩnjĩri-Ngai a Jehova.
18 Nake mũthamaki akĩra Doegu ũũ:+ “Hũgũkĩra athĩnjĩri-Ngai aya ũmorage arĩ we!” O rĩo Doegu Mũedomu+ agĩthiĩ akĩũraga athĩnjĩri-Ngai acio we mwene. Mũthenya ũcio akĩũraga arũme 85 meehumbĩte ebodi ya gatani.+
19 Ningĩ agĩtharĩkĩra Nobu+ itũũra rĩa athĩnjĩri-Ngai na rũhiũ rwa njora; mũndũrũme o hamwe na mũtumia, mwana o hamwe na gakenge, ndegwa, ndigiri, na ngʼondu, akĩũraga na rũhiũ rwa njora.
20 O na kũrĩ ũguo, mũriũ ũmwe wa Ahimeleku mũrũ wa Ahitubu, wetagwo Abiatharu,+ agĩĩthara akĩũra agĩthiĩ kũrũmĩrĩra Daudi.
21 Abiatharu akĩra Daudi atĩrĩ: “Saulu nĩ oraga athĩnjĩri-Ngai a Jehova.”
22 Nĩ ũndũ ũcio Daudi akĩra Abiatharu ũũ: “Mũthenya ũcio+ rĩrĩa Doegu Mũedomu aarĩ kũu, nĩ ndamenyire no mũhaka ere Saulu. Niĩ nĩ niĩ ndũmĩte gĩkuũ gĩkore andũ othe a nyũmba ya baba wanyu.
23 Nĩ tũikare nawe. Ndũgetigĩre, tondũ mũndũ wothe ũgũkorũo agĩcaria muoyo* waku egũkorũo agĩcaria muoyo* wakwa; wee ũrĩ rungu rwa ũgitĩri wakwa.”+
Tũũhoro twa magũrũ-inĩ
^ Ũkk., “atengʼeri.”
^ Kĩhibirania, ne′phesh. Rora Ũthathaũri wa Ciugo.
^ Kĩhibirania, ne′phesh. Rora Ũthathaũri wa Ciugo.
