Samueli wa Mbere 16:1-23
16 Mũthia-inĩ Jehova akĩra Samueli ũũ: “Nĩ nginya rĩ ũgũcakaĩra Saulu+ kuona atĩ nĩ ndĩmũregete atige gũkorũo arĩ mũthamaki wa Isiraeli?+ Iyũria rũhĩa rwaku maguta+ na uumagare. Ndĩrenda gũgũtũma kũrĩ Jesii+ ũrĩa Mũbethilehemu, tondũ nĩ ndĩthuurĩire mũthamaki kuuma harĩ ariũ ake.”+
2 No Samueli akĩmwĩra atĩrĩ: “Ingĩkĩhota atĩa gũthiĩ? Saulu aigua ũhoro ũcio no kũnjũraga ekũnjũraga.”+ Jehova agĩkĩmũcokeria ũũ: “Oya mori ũthiĩ nayo na uuge atĩrĩ, ‘Ndoka kũrutĩra Jehova igongona.’
3 Ũcoke wĩre Jesii oke igongona-inĩ rĩu; na nĩ ngũcoka ngwĩre ũrĩa ũgwĩka. Mũndũ ũrĩa ngũkuonia no mũhaka ũmũitĩrĩrie maguta handũ-inĩ hakwa.”+
4 Samueli agĩgĩka ũrĩa Jehova aamwĩrire. Rĩrĩa aakinyire Bethilehemu,+ athuri a itũũra rĩu no kũinaina maainainire rĩrĩa moonanire nake, magĩkĩmũũria atĩrĩ: “Hihi ũũkĩte ũrĩ na thayũ?”
5 Nĩ ũndũ ũcio akĩmeera ũũ: “Njũkĩte ndĩ na thayũ. Ndoka kũrutĩra Jehova igongona. Mwĩtheriei, na mũũke tũthiĩ na inyuĩ igongona-inĩ rĩu.” Agĩcoka agĩtheria Jesii na ariũ ake, thutha ũcio akĩmeta moke igongona-inĩ rĩu.
6 Na rĩrĩa maaingĩraga akĩona Eliabu,+ akĩĩra atĩrĩ: “Hatarĩ nganja ũrĩa mũitĩrĩrie maguta wa Jehova arũgamĩte haha mbere yake.”
7 No Jehova akĩra Samueli atĩrĩ: “Ndũkarore ũrĩa aroneka ahaana na ũraihu wake,+ tondũ nĩ ndĩmũregete. Nĩ gũkorũo maũndũ marĩa mũndũ aroraga timo maũndũ marĩa Ngai aroraga, tondũ mũndũ aroraga kĩrĩa kĩroneka na maitho, no Jehova aroraga ngoro thĩinĩ.”+
8 Jesii agĩgĩta Abinadabu+ na akĩmũhĩtũkĩria mbere ya Samueli, no akiuga atĩrĩ: “O na ũyũ tiwe Jehova athuurĩte.”
9 Jesii agĩcoka akĩrehe Shamahu,+ no akiuga atĩrĩ: “O na ũyũ tiwe Jehova athuurĩte.”
10 Jesii agĩkĩhĩtũkĩria ariũ ake mũgwanja mbere ya Samueli, no Samueli akĩra Jesii ũũ: “Jehova ndathuurĩte o na ũmwe harĩ aya.”
11 Thutha ũcio Samueli akĩũria Jesii atĩrĩ: “Aya nĩo ariũ aku othe?” Nĩ ũndũ ũcio akĩmwĩra ũũ: “Ũrĩa mũnini+ arĩ o nja nginyagia rĩu; nĩ kũrĩithia ararĩithia ng’ondu.”+ Samueli akĩra Jesii atĩrĩ: “Mũtũmanĩre oke, tondũ tũtigũikara thĩ kũrĩa o nginya rĩrĩa arĩũka haha.”
12 Nĩ ũndũ ũcio akĩmũtũmanĩra na akĩmũrehe. Na rĩrĩ, aarĩ mũtune, na aarĩ na maitho mathaka, na aarĩ mũthaka mũno.+ Jehova agĩkĩra Samueli ũũ: “Ũkĩra ũmũitĩrĩrie maguta, nĩ gũkorũo ũyũ nĩwe!”+
13 Nĩ ũndũ ũcio Samueli akĩoya rũhĩa rwa maguta+ na akĩmũitĩrĩria maguta ariũ a nyina meroreire. Naguo roho wa Jehova ũkĩambĩrĩria gũtũma Daudi agĩe na hinya kuuma mũthenya ũcio gũthiĩ na mbere.+ Thutha-inĩ Samueli agĩũkĩra agĩthiĩ Rama.+
14 Na rĩrĩ, roho wa Jehova nĩ weehereire Saulu,+ na roho mũũru kuuma kũrĩ Jehova nĩ wamũthumbũraga.+
15 Ndungata cia Saulu igĩkĩmwĩra atĩrĩ: “Rĩu ta rora ũrĩa roho mũũru kuuma kũrĩ Ngai ũragũthumbũra.
16 Reke mwathi witũ aathe ndungata ciaku ici irĩ mbere yaku icarie mũndũ ũrĩ na ũmenyeru wa kũhũũra kĩnanda kĩa mũgeeto.+ Na rĩrĩa rĩothe roho mũũru kuuma kũrĩ Ngai woka harĩ wee, akahũũra kĩnanda kĩu, nawe ũkaigua wega.”
17 Nĩ ũndũ ũcio Saulu akĩra ndungata ciake ũũ: “Njetherai mũndũ ũĩ kũhũũra kĩnanda wega, mũmũndehere.”
18 Ũmwe wa ndungata icio akiuga ũũ: “Atĩrĩrĩ, nĩ nyonete ũrĩa mũrũ wa Jesii ũrĩa Mũbethilehemu ahũũraga kĩnanda wega, na nĩ njamba ya ita ĩrĩ hinya na ũmĩrĩru.+ Nĩ oĩ kwaria wega, na nĩ mũthaka,+ na Jehova arĩ hamwe nake.”+
19 Nake Saulu agĩtũma atũmwo kũrĩ Jesii mamwĩre ũũ: “Ndũmĩra mũrũguo Daudi, ũrĩa ũrarĩithia rũũru.”+
20 Nĩ ũndũ ũcio Jesii akĩigĩrĩra mũgate ndigiri igũrũ, cuba ya ndibei ya rũũa, na kabũri kamwe na agĩcinengera mũrũwe Daudi athiĩ nacio kũrĩ Saulu.
21 Daudi agĩgĩkinya kũrĩ Saulu na akĩambĩrĩria kũmũtungatĩra.+ Saulu agĩkĩmwenda mũno, na Daudi agĩtuĩka mũndũ wa kũmũkuuagĩra indo cia mbaara.
22 Saulu agĩtũma ndũmĩrĩri ĩno kũrĩ Jesii: “Ndagũthaitha ũreke Daudi aikare ũtungata-inĩ wakwa, nĩ gũkorũo nĩ etĩkĩrĩkĩte maitho-inĩ makwa.”
23 Rĩrĩa rĩothe roho mũũru kuuma kũrĩ Ngai wokaga harĩ Saulu, Daudi ooyaga kĩnanda kĩa mũgeeto agakĩhũũra, nake Saulu akaigua ahoorera na akaigua wega, naguo roho ũcio mũũru ũkamweherera.+
