Athamaki wa Mbere 10:1-29
10 Na rĩrĩ, mũtumia mũthamaki wa Sheba akĩigua ũhoro wĩgiĩ Suleimani ũkonainie na rĩĩtwa rĩa Jehova,+ nĩ ũndũ ũcio agĩthiĩ kũmũgeria na ciũria nditũ.*+
2 Aakinyire Jerusalemu arũmĩrĩirũo nĩ ndungata nyingĩ mũno,+ na ngamĩra ikuuĩte maguta ma balisamu+ na thahabu nyingĩ mũno na mahiga ma goro. Agĩthiĩ agĩtonya harĩ Suleimani na akĩaria nake ũhoro wĩgiĩ maũndũ marĩa mothe maarĩ ngoro-inĩ yake.
3 Nake Suleimani akĩmũcokeria ciũria ciake ciothe. Gũtirĩ ũndũ o na ũmwe warĩ mũritũ mũno harĩ* mũthamaki kũmũtaarĩria.
4 Rĩrĩa mũtumia mũthamaki wa Sheba oonire ũũgĩ wothe wa Suleimani,+ nyũmba ĩrĩa aakĩte,+
5 irio iria ciaigagwo metha-inĩ yake,+ ũrĩa ndungata ciake ciaikaraga metha-inĩ, ũrĩa ndungata ciake ciatungataga metha-inĩ na nguo iria ciehumbaga, ndungata ciake iria ciamũrehagĩra gĩa kũnyua, na magongona make ma njino marĩa aarutaga hingo ciothe nyũmba-inĩ ya Jehova, akĩgega mũno.*
6 Nĩ ũndũ ũcio akĩra mũthamaki ũũ: “Ũhoro ũrĩa ndaiguire bũrũri-inĩ wakwa wĩgiĩ maũndũ marĩa ũhingĩtie* na wĩgiĩ ũũgĩ waku nĩ wa ma.
7 No ndietĩkirie ũhoro ũcio nginya rĩrĩa ndĩrokire ndĩreyonera na maitho makwa. Na atĩrĩrĩ, ndierĩtwo o na nuthu ya ũhoro ũcio. Ũũgĩ waku na ũgaacĩru waku nĩ ikĩrĩte na kũnene ũhoro ũrĩa ndaiguire.
8 Gũkena nĩ arũme aku, na gũkena nĩ ndungata ciaku iria irũgamaga mbere yaku hingo ciothe, ithikĩrĩirie ũũgĩ waku!+
9 Jehova Ngai waku arogoocwo,+ o we ũcio ũkenetio nĩwe agagũikarĩria gĩtĩ-inĩ kĩa ũnene kĩa Isiraeli. Nĩ ũndũ wa ũrĩa Jehova endete Isiraeli na wendo wa tene na tene, nĩ aagũtuire mũthamaki wa gũtuanĩra ciira na kĩhooto na ũthingu.”
10 Agĩcoka akĩhe mũthamaki taranda* 120 cia thahabu na maguta ma balisamu maingĩ mũno+ na mahiga ma goro.+ Gũtirĩ hĩndĩ ĩngĩ kwarehirũo mũigana ta ũcio wa maguta ma balisamu marĩa mũtumia mũthamaki wa Sheba aaheire Mũthamaki Suleimani.
11 Gĩkundi kĩa meri cia Hiramu kĩrĩa gĩakuuire thahabu kuuma Ofiri+ kĩarehire nginya mbaũ nyingĩ mũno cia mũthandari kuuma Ofiri+ na mahiga ma goro.+
12 Mũthamaki akĩhũthĩra mbaũ icio cia mũthandari gũthondeka itugĩ cia gũtiirĩrĩra nyũmba ya Jehova o hamwe na cia nyũmba ya mũthamaki, na agĩcihũthĩra gũthondekera aini inanda cia mũgeeto na inanda cia ndigi.+ Mbaũ ta icio cia mũthandari itirĩ ciarehwo rĩngĩ kana ikoneka rĩngĩ nginyagia ũmũthĩ.
13 Ningĩ Mũthamaki Suleimani akĩhe mũtumia mũthamaki wa Sheba kĩrĩa gĩothe eerirĩirie na akĩhoya, hatatarĩtwo kĩrĩa aamũheire kuumana na ũtaana wake.* Thutha ũcio mũtumia mũthamaki wa Sheba akiumagara agĩcoka bũrũri-inĩ wake, hamwe na ndungata ciake.+
14 Na rĩrĩ, thahabu ĩrĩa Suleimani aarehagĩrũo ihinda-inĩ rĩa mwaka ũmwe yarĩ na ũritũ wa taranda 666 cia thahabu,+
15 hatatarĩtwo ya kuuma kũrĩ ahũũri biacara na uumithio wa kuuma kũrĩ onjorithia na kuuma kũrĩ athamaki othe a Aarabu na mangavana a bũrũri.
16 Mũthamaki Suleimani agĩthondeka ngo 200 nene cia thahabu ndukanie na cuma ingĩ+ (o ngo yathondekirũo na cekeri* 600 cia thahabu)+
17 na ngo 300 nini cia thahabu ndukanie na cuma ingĩ (o ngo yathondekirũo na mina* ithatũ cia thahabu). Thutha ũcio mũthamaki agĩciiga Nyũmba-inĩ ya Mũtitũ wa Lebanoni.+
18 Ningĩ mũthamaki akĩhũthĩra mĩguongo gũthondeka gĩtĩ kĩnene mũno kĩa ũnene+ na agĩkĩhumbĩra na thahabu therie.+
19 Haarĩ na ngathĩ ya makinya matandatũ yathiĩte nginya gĩtĩ-inĩ kĩu kĩa ũnene, na gĩtĩ kĩu kĩa ũnene kĩarĩ na rwembea rwa gĩthiũrũrĩ mwena wakĩo wa na thutha, na gĩtĩ kĩu kĩarĩ na moko* mĩena yerĩ, na mĩrũthi ĩĩrĩ+ yarũgamĩte hakuhĩ na moko* macio.
20 Na haarĩ na mĩrũthi 12 yarũgamĩte makinya-inĩ macio matandatũ ma ngathĩ ĩyo, o mũrũthi warĩ mũthia-inĩ ũmwe wa makinya macio matandatũ. Gũtirĩ ũthamaki ũngĩ wathondekete kĩndũ ta kĩu.
21 Indo iria ciothe Mũthamaki Suleimani aanyuagĩra ciarĩ cia thahabu, na indo iria ciothe ciahũthagĩrũo Nyũmba-inĩ ya Mũtitũ wa Lebanoni+ ciarĩ cia thahabu therie. Gũtirĩ kĩndũ gĩathondeketwo na betha, nĩ gũkorũo betha ndĩoonagwo ta arĩ kĩndũ matukũ-inĩ ma Suleimani.+
22 Tondũ mũthamaki nĩ aarĩ na gĩkundi kĩa meri cia Tarishishi+ iria-inĩ hamwe na gĩkundi kĩa meri cia Hiramu. Riita rĩmwe harĩ mĩaka ĩtatũ, gĩkundi kĩu kĩa meri cia Tarishishi gĩokaga gĩkuuĩte thahabu na betha, mĩguongo,+ nũgũ, na tauthi.
23 Nĩ ũndũ ũcio Mũthamaki Suleimani nĩwe warĩ na ũtonga mũingĩ+ na ũũgĩ+ mũingĩ gũkĩra athamaki arĩa angĩ othe thĩinĩ wa thĩ.
24 Na andũ thĩinĩ wa thĩ yothe nĩ meethaga ũrĩa mangĩonanire na* Suleimani nĩguo maigue ũũgĩ wake ũrĩa Ngai eekĩrĩte ngoro-inĩ yake.+
25 O ũmwe wao aatwaraga kĩheo—indo cia betha, indo cia thahabu, nguo, indo cia mbaara, maguta ma balisamu, mbarathi, na nyũmbũ—na gwekagwo ũguo o mwaka o mwaka.
26 Na Suleimani agĩthiĩ na mbere kũingĩhia ngaari cia mbarathi na mbarathi;* aarĩ na ngaari cia mbarathi 1,400, na mbarathi* 12,000,+ na agĩciiga cikarage matũũra-inĩ ma ngaari cia mbarathi na hakuhĩ na mũthamaki kũu Jerusalemu.+
27 Mũthamaki agĩtũma betha ĩingĩhe thĩinĩ wa Jerusalemu o ta mahiga, na mbaũ cia mũtarakwa ikĩingĩha o ta mĩtĩ ya mĩkũyũ ya Shefela.+
28 Mbarathi cia Suleimani ciagũrĩtwo kuuma Misiri, na gĩkundi kĩa ahũũri biacara kĩa mũthamaki kĩagũraga mbarathi icio irĩ ndũũru* na thogora ũmwe.+
29 O ngaari ya mbarathi ĩrĩa yarutagwo Misiri yagũragwo icunjĩ 600 cia betha, nayo mbarathi yagũragwo icunjĩ 150 cia betha; magacoka magaciendia kũrĩ athamaki othe a Ahiti+ na athamaki a Siria.
Tũũhoro twa magũrũ-inĩ
^ Kana “na ndaĩ.”
^ Ũkk., “warĩ mũhithe harĩ.”
^ Ũkk., “agĩthirũo nĩ roho thĩinĩ wake.”
^ Kana “wĩgiĩ ciugo ciaku.”
^ Taranda ĩmwe yaiganaine na kilo 34.2. Rora Ũhoro Muongerere B14.
^ Ũkk., “kũringana na guoko kwa Mũthamaki Suleimani.”
^ Cekeri ĩmwe yaiganaine na ngiramu 11.4. Rora Ũhoro Muongerere B14.
^ Mina ĩmwe Maandĩko-inĩ ma Kĩhibirania yaiganaine na ngiramu 570. Rora Ũhoro Muongerere B14.
^ Kana “handũ ha kũigĩrĩra moko.”
^ Kana “handũ ha kũigĩrĩra moko.”
^ Ũkk., “meethaga ũthiũ wa.”
^ Kana “atwarithia a mbarathi.”
^ Kana “atwarithia a mbarathi.”
^ Kana hihi, “kuuma Misiri na kuuma Kue; ahũũri biacara a mũthamaki maacigũraga kuuma Kue,” hihi kũu nĩ Kilikia.
