Marũa ma Mbere Kũrĩ Akorintho 14:1-40
14 Thingatagai wendo, ĩndĩ thiĩi na mbere kwĩrutanĩria kwamũkĩra* iheo cia kĩĩroho, na makĩria kũratha mohoro.+
2 Nĩ gũkorũo mũndũ ũrĩa waragia na thiomi ndakoragwo akĩaria na andũ, no akoragwo akĩaria na Ngai, tondũ gũtirĩ mũndũ ũthikagĩrĩria,+ no aragia hitho iria theru+ kũgerera roho.
3 No rĩrĩ, mũndũ ũrĩa ũrathaga mohoro, nĩ akaga arĩa angĩ, akamekĩra ngoro na akamomĩrĩria kũgerera mĩario yake.
4 Mũndũ ũrĩa waragia na thiomi nĩwe wĩyakaga, no ũrĩa ũrathaga mohoro nĩ kĩũngano akaga.
5 Rĩu-rĩ, no nyende inyuothe mwaragie na thiomi,+ no makĩria ingĩenda mũrathage mohoro.+ Mũndũ ũrĩa ũrathaga mohoro nĩ akĩrĩte ũrĩa waragia na thiomi, o tiga akorirũo nĩ egũtaũra, nĩgetha kĩũngano gĩakwo.
6 No rĩrĩ ariũ a Ithe witũ, ingĩũka kũrĩ inyuĩ rĩu ngĩaragia na thiomi-rĩ, ingĩmũguna atĩa tiga ndĩmwarĩirie kũgerera ũguũrio+ kana ũmenyo+ kana ũrathi o na kana ũrutani?
7 Ũguo noguo gũkoragwo harĩ indo iria itarĩ muoyo iria irutaga mũgambo, ta mũtũrirũ kana kĩnanda kĩa mũgeeto. Tiga hakorirũo na ngũrani harĩ mĩgambo ĩrĩa ĩrarutwo-rĩ, kũngĩmenyeka atĩa rwĩmbo rũrĩa rũrainwo na mũtũrirũ ũcio kana kĩnanda kĩu?
8 Tondũ karumbeta kangĩruta mũgambo ũtaramenyeka wega-rĩ, nũũ ũngĩĩhaarĩria nĩ ũndũ wa mbaara?
9 Ũndũ ũmwe na ũcio, inyuĩ mwaragia na thiomi mũngĩaga kũhũthĩra ciugo andũ megũtaũkĩrũo na njĩra hũthũ-rĩ, mũndũ angĩkĩmenya atĩa ũrĩa mũroiga? Mũngĩkorũo mũkĩarĩria rĩera.
10 Thĩinĩ wa thĩ no gũkorũo nĩ kũrĩ thiomi mĩthemba mĩingĩ, ĩndĩ gũtirĩ rũthiomi rũtarĩ ũrĩa ruugaga.
11 Tondũ ingĩaga gũtaũkĩrũo nĩ rũthiomi, ingĩkorũo ndĩ mũgeni harĩ ũrĩa ũraria rũthiomi rũu, nake ũcio ũraria angĩkorũo arĩ mũgeni harĩ niĩ.
12 Nĩ ũndũ ũcio o na inyuĩ, tondũ nĩ mwĩriragĩria mũno iheo cia roho, mwĩrutanĩriei kũingĩhĩrũo nĩ iheo iria irĩakaga kĩũngano.+
13 Gũkĩrĩ ũguo-rĩ, ũrĩa ũkwaria na thiomi nĩ ahoyage nĩgetha akahota gũtaũra.+
14 Tondũ angĩkorũo ndĩrahoya ngĩaragia na thiomi, kĩheo gĩakwa kĩa roho nĩkĩo kĩrahoya, no meciria makwa matirĩ na maciaro.
15 Gũgũgĩkwo atĩa rĩu? Ngũhoya na kĩheo kĩa roho, no ningĩ nĩ ngũhoya na meciria makwa. Ngũina rwĩmbo rwa kũgooca na kĩheo kĩa roho, no ningĩ nĩ ngũina rwĩmbo rwa kũgooca na meciria makwa.
16 Mũngĩgooca na kĩheo kĩa roho-rĩ, mũndũ ũrĩa ũrĩ gatagatĩ-inĩ kanyu ũtarĩ ũmenyo mũingĩ angĩkiuga “Ameni” atĩa harĩ ngatho cianyu atekũmenya ũrĩa mũroiga?
17 Nĩ ma, mũracokia ngatho na njĩra njega, ĩndĩ mũndũ ũcio ũngĩ ndarakwo.
18 Ndĩracokeria Ngai ngatho tondũ njaragia na thiomi nyingĩ kũmũkĩra inyuothe.
19 O na kũrĩ ũguo, thĩinĩ wa kĩũngano nĩ kaba njarie ciugo ithano na meciria makwa,* nĩgetha ndute arĩa angĩ,* gũkĩra kwaria na thiomi+ ciugo ngiri ikũmi.
20 Ariũ a Ithe witũ, mũtigatuĩke twana tũnini ũhoro-inĩ wa gũtaũkĩrũo,+ ĩndĩ tuĩkai twana tũnini ũhoro-inĩ wa maũndũ moru;+ na mũtuĩke andũ agima ũhoro-inĩ wa gũtaũkĩrũo.+
21 Thĩinĩ wa Watho nĩ kwandĩke ũũ: “‘Ngwarĩria andũ aya na thiomi cia ageni na ndĩmarĩrie na mĩromo ya andũ a kũngĩ, na nginya hĩndĩ ĩyo no mekũrega gũũthikĩrĩria,’ ũguo nĩguo Jehova* ekuuga.”+
22 Nĩ ũndũ ũcio, kwaria na thiomi ti rũũri harĩ andũ arĩa metĩkĩtie ĩndĩ nĩ harĩ arĩa matetĩkĩtie,+ naguo ũrathi ti wa andũ arĩa matetĩkĩtie ĩndĩ nĩ wa arĩa metĩkĩtie.
23 Nĩ ũndũ ũcio kĩũngano gĩothe kĩngĩcemania handũ hamwe na othe marie na thiomi, no andũ arĩa matarĩ ũmenyo mũingĩ kana arĩa matetĩkĩtie maingĩre-rĩ, githĩ matikuuga atĩ nĩ mũthũkĩte ciongo?
24 No inyuothe mũngĩkorũo mũkĩratha mohoro, na mũndũ ũtetĩkĩtie kana mũndũ ũtarĩ ũmenyo mũingĩ aingĩre, nĩ ekũrũngwo na athuthurio biũ nĩ andũ acio othe.
25 Nacio hitho cia ngoro yake igakĩmenyeka, na nĩ ũndũ ũcio akegũithia agaturumithia ũthiũ wake thĩ na agathathaiya Ngai, akiugaga: “Hatarĩ nganja Ngai arĩ gatagatĩ-inĩ kanyu.”+
26 Ariũ a Ithe witũ, gũgũgĩkwo atĩa rĩu? Rĩrĩa mwacemania hamwe-rĩ, ũmwe akoragwo na thaburi, ũngĩ ũrutani, ũngĩ ũguũrio, ũngĩ thiomi, nake ũngĩ ũtaũri.+ Maũndũ mothe nĩ mekĩke nĩ ũndũ wa gwaka arĩa angĩ.
27 Na angĩkorũo nĩ harĩ mũndũ ũkwaria na thiomi, nĩ makorũo marĩ erĩ, na maingĩha mũno makorũo marĩ atatũ, o mũndũ riita rĩake, na hakorũo na mũtaũri.+
28 Ĩndĩ angĩkorũo hatirĩ na mũtaũri, nĩ aikare akirĩte kĩũngano-inĩ, eyarĩrie we mwene na arie na Ngai.
29 Anabii+ erĩ kana atatũ nĩ marie, nao arĩa angĩ makũũrane maũndũ marĩa mekwario.
30 No mũndũ ũngĩ angĩamũkĩra ũguũrio hĩndĩ ĩyo aikarĩte hau thĩ, mwaria ũcio wa mbere nĩ akire.
31 Tondũ inyuothe no mũrathage mohoro o mũndũ riita rĩake, nĩgetha andũ othe merute na andũ othe mekĩrũo ngoro.+
32 Nacio iheo cia roho cia anabii nĩ ciagĩrĩire kũhũthĩrũo wega nĩ anabii.
33 Nĩ gũkorũo Ngai ti Ngai ũtarĩ mĩbango ĩndĩ nĩ wa thayũ.+
O ta ũrĩa gũkoragwo ciũngano-inĩ ciothe cia arĩa aamũre,
34 atumia nĩ maikarage makirĩte marĩ thĩinĩ wa ciũngano, tondũ matiĩtĩkĩrĩtio kwaria.+ Ithenya rĩa ũguo-rĩ, nĩ menyihagie+ o ta ũrĩa Watho o naguo uugaga.
35 Angĩkorũo nĩ harĩ ũndũ marenda kwĩruta-rĩ, nĩ morie athuri ao marĩ kwao mũciĩ, nĩ gũkorũo nĩ ũndũ ũrĩ thoni mũtumia kwaria thĩinĩ wa kĩũngano.
36 Hihi kiugo kĩa Ngai kĩoimanire na inyuĩ, kana hihi no inyuĩ gĩakinyĩire?
37 Mũndũ o wothe angĩĩciria atĩ nĩ mũnabii kana arĩ na kĩheo kĩa roho, no mũhaka etĩkĩre atĩ maũndũ marĩa ndĩramwandĩkĩra inyuĩ nĩ rĩathani kuuma kũrĩ Mwathani.
38 No mũndũ o wothe angĩaga gũtindanĩra na maũndũ macio, ndagaatindanĩrũo nake.*
39 Nĩ ũndũ ũcio ariũ a Ithe witũ-rĩ, mwĩrutanagĩriei kũratha mohoro,+ no mũtikagirie kwaria na thiomi.+
40 No maũndũ mothe nĩ mekĩkage na mũtaratara o na mũbango mwega.+
Tũũhoro twa magũrũ-inĩ
^ Kana “gũcaria na kĩyo.”
^ Kana “ũtaũku.”
^ Kana “ndute arĩa angĩ na kanua.”
^ Rora Ũhoro Muongerere A5.
^ Kana hihi, “angĩkorũo mũndũ o wothe ndekũmenya, egũikara atekũmenya.”
