Marũa ma Mbere Kũrĩ Akorintho 11:1-34
11 Mwĩgerekanagiei na niĩ, o ta ũrĩa niĩ ndĩĩgerekanagia na Kristo.+
2 Nĩ ndamũgaathĩrĩria tondũ maũndũ-inĩ mothe nĩ mũndirikanaga na nĩ mũrũmĩtie biũ irĩra o ta ũrĩa ndamũkinyĩirie.
3 No ngwenda mũmenye atĩ mũtwe wa mũndũrũme o wothe nĩ Kristo;+ na mũtwe wa mũtumia nĩ mũndũrũme;+ na mũtwe wa Kristo nĩ Ngai.+
4 Mũndũrũme o wothe ũhoyaga kana akaratha mohoro arĩ na kĩndũ igũrũ rĩa mũtwe wake, nĩ mũtwe wake aconorithagia;
5 no mũtumia o wothe ũhoyaga kana akaratha mohoro+ atehumbĩrĩte mũtwe, nĩ mũtwe wake aconorithagia, nĩ gũkorũo angĩhaana ta mũtumia mwenje njuĩrĩ.
6 Nĩ ũndũ angĩkorũo mũtumia ndekwĩhumbĩra mũtwe, agĩrĩirũo kũrenga njuĩrĩ yake; no angĩkorũo kũrenga kana kwenja njuĩrĩ nĩ gũgũconorithia mũtumia-rĩ, agĩrĩirũo kwĩhumbĩra mũtwe.
7 Nĩ gũkorũo mũndũrũme ndagĩrĩirũo kũhumbĩra mũtwe wake, tondũ we nĩ mũhianĩre wa Ngai+ na riri wake, ĩndĩ mũtumia nĩ riri wa mũndũrũme.
8 Tondũ mũndũrũme ndooimire harĩ mũtumia, ĩndĩ mũtumia ooimire harĩ mũndũrũme.+
9 Na makĩria ma ũguo, mũndũrũme ndoombirũo nĩ ũndũ wa mũtumia, ĩndĩ mũtumia oombirũo nĩ ũndũ wa mũndũrũme.+
10 Nĩkĩo mũtumia agĩrĩirũo gũkorũo na rũũri rwa wathani igũrũ rĩa mũtwe wake, nĩ ũndũ wa araika.+
11 Ningĩ-rĩ, ũhoro-inĩ wĩgiĩ Mwathani, mũtumia ndatigithũkanĩtio na mũndũrũme, o nake mũndũrũme ndatigithũkanĩtio na mũtumia.
12 Nĩ gũkorũo o ta ũrĩa mũtumia ooimire harĩ mũndũrũme,+ no taguo mũndũrũme o nake aciaragwo nĩ mũtumia; no indo ciothe ciumĩte kũrĩ Ngai.+
13 Tuai arĩ inyuĩ: Hihi nĩ kwagĩrĩire mũtumia kũhoya Ngai atehumbĩrĩte mũtwe?
14 Kaĩ mũũmbĩre wa andũ ũtamũrutĩte atĩ njuĩrĩ ndaihu nĩ gĩconoko harĩ mũndũrũme,
15 no atĩ mũtumia angĩkorũo na njuĩrĩ ndaihu nĩ riri harĩ we? Tondũ aheetwo njuĩrĩ handũ ha kĩndũ gĩa kwĩhumbĩra.
16 No rĩrĩ, angĩkorũo nĩ harĩ mũndũ ũngĩenda gũkararia nĩguo arũmĩrĩre mũtugo ũngĩ-rĩ, ithuĩ tũtirĩ na mũtugo ũngĩ, o na ciũngano cia Ngai itirĩ.
17 No ngĩmũhe motaaro maya, ndiramũgaathĩrĩria, tondũ mĩcemanio yanyu ndĩmũgunaga, no nĩ kũmũthũkia ĩmũthũkagia.
18 Mbere ndaya, ndĩraigua atĩ rĩrĩa mwacemania kĩũngano-inĩ, nĩ mũkoragwo na ngayũkano gatagatĩ-inĩ kanyu; na nĩ ndĩretĩkia ũhoro ũcio na gĩkĩro kĩna.
19 Tondũ hatarĩ nganja nĩ gũkaagĩa na ikundi cia nyamũkano gatagatĩ-inĩ kanyu,+ nĩguo arĩa metĩkĩrĩkĩte gatagatĩ-inĩ kanyu o nao mamenyeke.
20 Rĩrĩa mwacemania handũ hana, mũtiĩkaga ũguo nĩguo mũrĩe Irio cia Hwaĩ-inĩ cia Mwathani.+
21 Tondũ rĩrĩa mũkũrĩa-rĩ, o mũndũ akoragwo arĩte irio ciake cia hwaĩ-inĩ mbere, nĩ ũndũ ũcio ũmwe agakorũo ahũtiĩ nake ũngĩ arĩĩtwo.
22 Kaĩ mũtakoragwo na nyũmba cia kũrĩĩra na kũnyuĩra? Kana nĩ kũnyarara mũnyararaga kĩũngano kĩa Ngai na mũgatũma arĩa matarĩ kĩndũ maigue thoni? Ingĩmwĩra atĩa inyuĩ? Hihi no ndĩmũgaathĩrĩrie? Ũndũ-inĩ ũcio, ndinamũgaathĩrĩria.
23 Tondũ ũndũ ũrĩa ndamũkĩrire kuuma kũrĩ Mwathani noguo ndamũkinyĩirie inyuĩ, atĩ ũtukũ+ ũrĩa Mwathani Jesu aakunyanĩirũo, ooire mũgate,
24 na thutha wa gũcokia ngatho, akĩwenyũranga na akiuga: “Ũyũ ũrũgamĩrĩire mwĩrĩ wakwa,+ ũrĩa ũkũneanwo nĩ ũndũ wanyu. Ĩkagai ũũ nĩguo mũndirikanage.”+
25 Thutha wa kũrĩa irio cia hwaĩ-inĩ, agĩka o taguo na gĩkombe,+ akiuga: “Gĩkombe gĩkĩ kĩrũgamĩrĩire kĩrĩkanĩro kĩrĩa kĩerũ+ kũgerera thakame yakwa,+ ĩkagai ũũ hĩndĩ o yothe mũgũkĩnyuĩra nĩguo mũndirikanage.”+
26 Nĩ gũkorũo hĩndĩ ĩrĩa yothe mũrarĩa mũgate ũyũ na mũkanyuĩra gĩkombe gĩkĩ, mũrathiĩ na mbere kũhunjia ũhoro wa gĩkuũ kĩa Mwathani, o nginya rĩrĩa agooka.
27 Nĩ ũndũ ũcio, mũndũ o wothe ũrĩaga mũgate kana akanyuĩra gĩkombe kĩa Mwathani ũrĩa gũtagĩrĩire, nĩ arĩkoragwo na mahĩtia ũhoro-inĩ wĩgiĩ mwĩrĩ na thakame ya Mwathani.
28 Mũndũ nĩ ambe ethuthurie we mwene atigĩrĩre atĩ nĩ agĩrĩire,+ na hĩndĩ ĩyo no arĩe mũgate na anyuĩre gĩkombe kĩu.
29 Nĩ gũkorũo mũndũ ũrĩa ũrĩaga na akanyua atekũmenya kĩrĩa mwĩrĩ ũrũgamĩrĩire, arĩaga na akanyua ituĩro harĩ we mwene.
30 Nĩkĩo aingĩ gatagatĩ-inĩ kanyu matarĩ na hinya na nĩ arwaru, na angĩ aingĩ magakoma gĩkuũ-inĩ.*+
31 No tũngĩtaũkĩrũo nĩ ũrĩa ithuĩ ene tũtariĩ, tũtingĩtuĩrũo.
32 No rĩrĩ, hĩndĩ ĩrĩa twatuĩrũo, nĩ Jehova*+ ũtũrũngaga, nĩguo tũtikanatuĩrũo hamwe na thĩ ĩno.+
33 Nĩ ũndũ ũcio ariũ a Ithe witũ-rĩ, rĩrĩa mũgũcemania hamwe kũrĩa irio icio, etanagĩrĩrai.
34 Mũndũ o wothe angĩkorũo arĩ mũhũtu, nĩ arĩe gwake mũciĩ, nĩgetha rĩrĩa mwacemania mũtikanatuĩrũo.+ No maũndũ macio mangĩ-rĩ, nĩ ngaamarũnga ndakinya kũu.
