Marũa ma Mbere Kũrĩ Akorintho 1:1-31
1 Nĩ niĩ Paulo, o niĩ ndetirũo nduĩke mũtũmwo+ wa Kristo Jesu nĩ ũndũ wa wendi wa Ngai, tũrĩ na mũrũ wa Ithe witũ Sosithene,
2 kũrĩ kĩũngano kĩa Ngai kĩrĩa kĩrĩ Korintho,+ inyuĩ mũtheretio mũrĩ na ũiguano na Kristo Jesu,+ na mũgetwo mũtuĩke andũ aamũre, mũrĩ hamwe na arĩa othe makayagĩra rĩĩtwa rĩa Mwathani witũ Jesu Kristo+ kũndũ guothe, o we Mwathani wao na nowe witũ:
3 Mũrogĩa na ũtugi mũnene na thayũ kuuma kũrĩ Ngai Ithe witũ, na Mwathani Jesu Kristo.
4 Nĩ njokagĩria Ngai wakwa ngatho hingo ciothe nĩ ũndũ wanyu tondũ wa ũtugi mũnene wa Ngai, ũrĩa mũheetwo thĩinĩ wa Kristo Jesu;
5 nĩ gũkorũo nĩ mũtongetio maũndũ-inĩ mothe thĩinĩ wake, harĩ ũhoti wothe wa kwaria na harĩ ũmenyo wothe,+
6 o ta ũrĩa ũira wĩgiĩ Kristo+ wĩkĩrĩtwo hinya gatagatĩ-inĩ kanyu,
7 nĩguo mũtikage kĩheo o na kĩmwe, o mwetereire mũno kũguũrio kwa Mwathani witũ Jesu Kristo.+
8 Ningĩ nĩ arĩmwĩkĩraga hinya o nginya mũico nĩguo mũtikanakorũo na ũndũ mũngĩcukĩrũo mũthenya ũrĩa wa Mwathani witũ Jesu Kristo.+
9 Ngai nĩ mwĩhokeku,+ o we wamwĩtire mũkorũo na ngwatanĩro hamwe* na Mũrũ wake, Jesu Kristo Mwathani witũ.
10 Na rĩu ariũ a Ithe witũ-rĩ, ndĩramũthaitha kũgerera rĩĩtwa rĩa Mwathani witũ Jesu Kristo, atĩ inyuothe mwaragie mũrĩ na ũiguano na gũtigakoragwo na ngayũkano gatagatĩ-inĩ kanyu,+ no mũkoragwo na ũrũmwe biũ mũrĩ na meciria mamwe na mũrĩ na njĩra ĩmwe ya gwĩciria.+
11 Nĩ gũkorũo andũ amwe a nyũmba ya Kiloe nĩ manjĩrĩte ũhoro wanyu ariũ a Ithe witũ atĩ kũrĩ na nyamũkano gatagatĩ-inĩ kanyu.
12 Ũrĩa ndĩrenda kuuga nĩ atĩrĩ, atĩ ũmwe wanyu oigaga: “Niĩ ndĩ wa Paulo,” Ũngĩ akoiga, “Niĩ ndĩ wa Apolo,”+ Ũngĩ akoiga, “Niĩ ndĩ wa Kefa,”* Ũngĩ akoiga, “Niĩ ndĩ wa Kristo.”
13 Kaĩ Kristo agayũkanĩte? Hihi Paulo nĩwe woragĩirũo mũtĩ-inĩ nĩ ũndũ wanyu? Ningĩ-rĩ, kaĩ mwabatithirio thĩinĩ wa rĩĩtwa rĩa Paulo?
14 Ndĩracokeria Ngai ngatho tondũ gũtirĩ o na ũmwe wanyu ndabatithirie o tiga Kirisipo+ na Gayo,+
15 nĩguo gũtikagĩe o na ũmwe ũkuuga atĩ mwabatithirio thĩinĩ wa rĩĩtwa rĩakwa.
16 Ningĩ nĩ ndabatithirie andũ a nyũmba ya Stefana.+ Acio angĩ-rĩ, ndiũĩ kana nĩ harĩ mũndũ ũngĩ ndabatithirie.
17 Nĩ gũkorũo Kristo ndaandũmire batithanagie, no aandũmire hunjagie ũhoro ũrĩa mwega;+ na ti na ũũgĩ wa kwaria,* nĩguo mũtĩ wa kũnyarirĩrũo* wa Kristo ndũkagithio kĩene.
18 Tondũ ũhoro wĩgiĩ mũtĩ wa kũnyarirĩrũo* nĩ ũrimũ harĩ arĩa marathira,+ no harĩ ithuĩ arĩa tũrahonokio-rĩ, nĩ hinya wa Ngai.+
19 Nĩ gũkorũo nĩ kwandĩke atĩrĩ: “Nĩ ngaatũma ũũgĩ wa andũ arĩa ogĩ ũthire, naguo ũmenyo wa arĩa marĩ na ũmenyo ndĩũrege.”*+
20 Mũndũ ũrĩa mũũgĩ-rĩ, akĩrĩ kũ? Mwandĩki-watho* arĩ kũ? Mũndũ ũrĩa ũĩ gũciira maũndũ mũtabarĩre-inĩ ũyũ wa maũndũ-rĩ,* arĩ kũ? Na githĩ Ngai ndatuĩte ũũgĩ wa thĩ ĩno ũrimũ?
21 Tondũ kũringana na ũũgĩ wa Ngai, thĩ ndĩamenyire Ngai+ kũgerera ũũgĩ wayo,+ Ngai oonire arĩ wega ahũthĩre maũndũ marĩa tũhunjagia, marĩa monagwo ta marĩ ũrimũ,+ nĩguo ahonokie arĩa metĩkagia.
22 Nĩ gũkorũo Ayahudi moigaga monio imenyithia,+ nao Angiriki macaragia ũũgĩ;
23 no ithuĩ tũhunjagia ũhoro wa Kristo kũũragĩrũo mũtĩ-inĩ, na ũndũ ũcio ũkahĩnga Ayahudi nao andũ a ndũrĩrĩ makawona ũrĩ ũrimũ.+
24 No rĩrĩ, harĩ arĩa metĩtwo, Ayahudi o hamwe na Angiriki, Kristo nĩwe hinya wa Ngai na ũũgĩ wa Ngai.+
25 Tondũ kĩndũ kĩa Ngai kĩrĩa kĩonagwo kĩrĩ ũrimũ, kĩrĩ ũũgĩ gũkĩra andũ, na kĩndũ kĩa Ngai kĩrĩa kĩonagwo gĩtarĩ hinya, kĩrĩ hinya gũkĩra andũ.+
26 Ariũ a Ithe witũ, nĩ muonete kũringana na gwĩtwo kwanyu atĩ, ti aingĩ anyu ogĩ kũringana na ithimi cia andũ,*+ ti aingĩ marĩ na ũhoti, o na ti aingĩ moimĩte famĩlĩ-inĩ irĩ igweta,+
27 no Ngai aathuurire indo cia thĩ iria cionagwo irĩ ũrimũ nĩguo aconorithie andũ arĩa ogĩ; na Ngai aathuurire indo cia thĩ iria cionagwo itarĩ hinya nĩguo aconorithie indo iria irĩ hinya;+
28 ningĩ Ngai aathuurire indo iria itarĩ kĩene cia thĩ na indo iria inyararagwo, indo iria cionagwo itarĩ cia bata, nĩguo aagithie kĩene indo iria cionagwo irĩ cia bata,+
29 nĩguo gũtikagĩe mũndũ o na ũmwe* ũkwĩraha maitho-inĩ ma Ngai.
30 No nĩwe ũtũmĩte mũgĩe ũiguano na Kristo Jesu, o ũcio ũtuĩkĩte harĩ ithuĩ ũũgĩ kuuma kũrĩ Ngai, ningĩ agatuĩka ũthingu,+ na ũtheru+ na kũrekererio kũgerera ũkũũri,+
31 nĩguo gũtuĩke o ta ũrĩa kwandĩkĩtwo atĩrĩ: “Mũndũ ũrĩa ũkwĩraha, nĩ erahe nĩ ũndũ wa Jehova.”*+
Tũũhoro twa magũrũ-inĩ
^ Kana “wamwĩtire mũnyitanagĩre.”
^ Nowe wetagwo Petero.
^ Kana “ciugo cia ũũgĩ.”
^ Rora Ũthathaũri wa Ciugo.
^ Rora Ũthathaũri wa Ciugo.
^ Kana “ndĩweherie.”
^ Nĩ mũndũ ũrĩa ũhĩgĩrĩire Watho.
^ Kana “mahinda-inĩ maya.” Rora Ũthathaũri wa Ciugo.
^ Kana “na njĩra ya kĩĩmwĩrĩ.”
^ Ũkk., “mwĩrĩ o na ũmwe wa nyama.”
^ Rora Ũhoro Muongerere A5.
