Aira a Jehova marũmagĩrĩra ũtaaro wa Bibilia wa kwaga gwĩtetera hingo ciothe rĩrĩa andũ mauga maũndũ moru mamegiĩ kana rĩrĩa manyũrũrio. Kwa ngerekano, thimo ĩmwe thĩinĩ wa Bibilia yugaga ũũ: “Mũndũ ũrĩa ũtaaraga mũnyũrũrania egĩĩragĩra gĩconoko.” (Thimo 9:7, 8; 26:4) Handũ ha gũkararania na andũ nĩ ũndũ wa kwaria maũndũ moru matwĩgiĩ, twĩciragia mũno ũrĩa tũngĩkenia Ngai.—Thaburi 119:69.

 O na kũrĩ ũguo, nĩ kũrĩ “hĩndĩ ya gũkira na hĩndĩ ya kwaria.” (Kohelethu 3:7) Nĩ ũndũ ũcio, nĩ twaranagĩria na andũ arĩa marĩ na ngoro njega arĩa makoragwo makĩenda kũmenya ũhoro wa ma, no nĩ twĩthemaga ngarari. Rĩrĩa tweka ũguo tũkoragwo tũkĩĩgerekania na ũrutani na kĩonereria kĩrĩa kĩaigirũo nĩ Jesu na Akristiano a tene.

•   Hĩndĩ ĩrĩa Jesu aathitangĩirũo maũndũ ma maheeni mbere ya Pilato no gũkira aakirire. (Mathayo 27:11-14; 1 Petero 2:21-23) Ningĩ ndaatindire agĩĩtetera rĩrĩa andũ maaugire atĩ aarĩ mũndũ mũkoroku na mũrĩĩu. Handũ ha ũguo, aarekire ciĩko ciake ciarie akĩhũthĩra ũtaaro ũrĩa uugaga ũũ: “Ũũgĩ ũtetagĩrũo nĩ moimĩrĩro maguo.” (Mathayo 11:19, kohoro ka magũrũ-inĩ) No rĩrĩa kwabatarania, Jesu arĩ na ũcamba nĩ aacokagĩria andũ arĩa maamũcambagia.—Mathayo 15:1-3; Mariko 3:22-30.

   Jesu aarutire arutwo ake kwaga gũkua ngoro rĩrĩa maigĩrĩrũo maũndũ ma maheeni. Aameerire ũũ: “Gũkena nĩ inyuĩ rĩrĩa andũ mekũmũnyũrũria na kũmũnyarira na kũmũigĩrĩra igenyo cia mĩthemba yothe mĩũru nĩ ũndũ wa rĩĩtwa rĩakwa.” (Mathayo 5:11, 12) Jesu ningĩ nĩ oonanirie atĩ rĩmwe na rĩmwe andũ mangĩaria maũndũ moru megiĩ arũmĩrĩri ake, arũmĩrĩri ake no mahũthĩre mweke ũcio kũhunjĩria andũ acio. Hĩndĩ ta ĩyo Jesu aaugire nĩ arĩhingagia kĩĩranĩro gĩkĩ: “Nĩ ngaamũhe ciugo na ũũgĩ ũrĩa akararia anyu marĩ othe hamwe matakahota gũkararia kana kũregana naguo.”—Luka 21:12-15.

•   Mũtũmwo Paulo eerire Akristiano methemage kũgucania na andũ arĩa mamakararagia tondũ maũndũ macio “matirĩ uumithio na nĩ ma tũhũ.”—Tito 3:9; Aroma 16:17, 18.

•   Mũtũmwo Petero eerire Akristiano matetagĩre wĩtĩkio wao hĩndĩ ĩrĩa kwahoteka. (1 Petero 3:15) O na kũrĩ ũguo, nĩ oonanirie atĩ kaingĩ njĩra ĩrĩa njega ya gwĩka ũguo nĩ kũgerera ciĩko citũ no ti ciugo. Aandĩkire ũũ: “Nĩ ũndũ wa gwĩkaga wega mũkirie mĩario ya kwaga ũmenyo ĩrĩa yaragio nĩ andũ matarĩ ogĩ.”—1 Petero 2:12-15.