Khyndiat sngi shuwa ba un ïap, u Jisu u la kren tang bad saw ngut ki synran jong u, kita ki dei u Petros, u Jakob, u Ioannis bad u Andrew. Katba u Jisu u dang ïathuhlypa ïa ki dak ka jingdon jong u ha ki sngi bakhatduh, u la kylli, “uno uba long u shakri bangeit bad bastad, ia uba u kynrad jong u u la buh halor kiba ha ïing jong u, ia kaban ai ha ki ia ka jingbam ha ka por kaba biang?” (Mathaios 24:3, 45; Markos 13:3, 4) U Jisu u la kular ïa la ki synran ba kum “u kynrad” jong ki, un sa thung ïa kito ki ban pynbiang ïa ki jingbam bakynja mynsiem na ka bynta ki nongbud jong u ha ki sngi bakhatduh. Une u shakri un kynthup ïano?

Ka dei ka kynhun barit jong ki nongbud ba la pynsleh jong u Jisu. Ïa une u shakri la ithuh bha da ka Kynhun Pynïaidkam jong ki Nongsakhi U Jehobah. Une u shakri u sam ïa ki jingbam bakynja mynsiem sha ki nongmane jong U Jehobah ha ka por ba biang. Ngi shaniah ha une u shakri bangeit sneng ba un ai ïa ngi “ia la ka bynta ka jingbam ha ka por babiang.”​—Loukas 12:42.

U pynïaid ïa ka ïing U Blei. (1 Timothi 3:15) U Jisu u la ai ha u shakri ïa ka kamram kaba khia ban pynïaid ïa ka kam jong ka seng U Jehobah ha ka pyrthei ban peit ïa ki jingdon jingem, ban pynïaid ïa ka kam ïalap bad ban hikai ïa ngi lyngba ki balang. Te, ban ai ïa ngi ïa kaei kaba ngi donkam, u shakri bangeit bad bastad u sam ïa ki jingbam bakynja mynsiem lyngba ki kot ki sla kiba ngi pyndonkam ha ka kam ïalap, kumjuh ruh lyngba ki prokram ba ngi ïoh na ki jingïalang bad ki jingïaseng asembli.

U shakri u ngeit ïa ka jingshisha jong ka Baibl bad ïa ka hukum ban ïalap ïa ka khubor babha, bad u long uba stad ha kaban sumar ïa kiei kiei ki jong u Khrist ha pyrthei. (Kam 10:42) U Jehobah u khring ïa bun ngut ki briew ban long ki Nongsakhi jong u bad u ïarap ïa u shakri bangeit bad bastad ban ai kyrhai ïa ki jingbam bakynja mynsiem.​—Isaiah 60:22; 65:13.

• U Jisu u la thung ïano ban bsa jingbam bakynja mynsiem ïa la ki synran?

• Ha kino ki rukom u shakri u long u bangeit bad bastad?