Bun ki briew ki tharai ba ki Nongsakhi U Jehobah ka dei ka kyrteng jong ka niam bathymmai. Hynrei, palat 2,700 snem mynshuwa, ïa ki shakri jong U Blei bashisha la khot “ki sakhi” jong u. (Isaiah 43:10-12) Haduh u snem 1931 la tip ïa ngi kum ki Khynnah Pule Baibl. Balei ngi la shim ïa ka kyrteng ki Nongsakhi U Jehobah?

Ka pynithuh ïa U Blei jong ngi. Katkum ki jingthoh barim, ka kyrteng jong U Blei, U Jehobah, ka paw da ki hajar sien ha ka Baibl. Ha kiba bun na ki jingpynkyllaktien, ïa kane ka kyrteng la bujli da ki kyrteng sin kum U Trai lane U Blei. Hynrei, U Blei bashisha u la pynithuh ïalade ha u Moses da ka kyrteng jong u hi, U Jehobah, da kaba ong: “Kane ka long ka kyrteng jong nga ha la ka rta.” (Eksodos 3:15) Ha kane ka rukom u la pynïapher ïalade na ki bleithaw baroh. Ngi sngewsarong ban shah khot da ka kyrteng bakhuid jong U Blei.

Ka batai ïa ka jingthmu jong ngi. Naduh u Abel ter ter, bun ki briew kiba hok ki la sakhi ïa la ka jingngeit ha U Jehobah. Ha ki spah snem mynshuwa, u Noah, u Abraham, ka Sara, u Moses, u Dabid, bad kiwei kiwei de, ki la ïa don bynta lang bad une “u lyoh ki sakhi katne katne.” (Hebru 11:4–12:1) Kumba u briew u sakhi na ka bynta jong uwei pat u baluilui ha ka ïingbishar, ngi ruh ngi la rai skhem ban ïathuh ïa ka jingshisha shaphang U Blei jong ngi.

Ngi bud ïa ka nuksa jong u Jisu. Ka Baibl ka khot ïa u “U Nongphla Uba iaineh bad Uba shisha.” (Jingpynpaw 3:14) U Jisu hi u la ong ba u la ‘pyntip ia ka kyrteng jong U Blei’ bad u la ïai “phla skhem ia ka jingshisha” shaphang U Blei. (Ioannis 17:26; 18:37) Namarkata, ki nongbud bashisha jong u Khrist ki dei ban phla bad pyntip ïa ka kyrteng jong U Jehobah. Kane ka dei kaei ba ki Nongsakhi U Jehobah ki pyrshang katba lah ban leh.

• Balei ki Khynnah Pule Baibl ki jied ïa ka kyrteng ki Nongsakhi U Jehobah?

• Naduh mynno U Jehobah u la don ki nongsakhi ha ka pyrthei?

• Uei u Nongsakhi bakhraw tam jong U Jehobah?