U Blei u la lum lang ïa ki nonghiar pateng jong u Abraham kum kawei ka jaitbynriew bad u la ai ha ki ïa ki hukum. U la khot ïa kata ka jaitbynriew “ka Israel” bad u la pynkhamti ha ki ïa ka jingmane bashisha bad ïa ka ktien jong u. (Salm 147:19, 20) Te ki briew na kiwei pat ki jaitbynriew ki lah ban ïoh jingmyntoi na ka Israel.—Pule Jenesis 22:18.

U Blei u la jied ïa ki nong Israel ban long ki nongsakhi jong u. Ki jingjia jong ki ha ka por hyndai ka pyni ba kumno ka jingkohnguh ïa ki hukum jong U Blei ka wanrah jingmyntoi ïa ki briew baroh. (Deuteronomi 4:6) Kumta, lyngba ki nong Israel, kiwei ruh kin ïoh jingtip shaphang U Blei bashisha.—Pule Isaiah 43:10, 12.

Katba nang ïaid ka por, ki Israel ki la duh noh ïa ka jingieit ba kyrpang jong U Blei bad U Jehobah u la bujli noh ïa kata ka jaitbynriew Israel da ka balang Khristan. (Mathaios 21:43; 23:37, 38) Mynta, ha ka jaka jong ki nong Israel, ki Khristan bashisha ki shakri kum ki nongsakhi U Jehobah.—Pule Kam 15:14, 17.

U Jisu u la lum lang ïa ki nongbud jong u bad u la bthah ïa ki ba ki dei ban ïalap bad pynlong synran ïa ki briew baroh. (Mathaios 10:7, 11; 24:14; 28:19, 20) Kumba ki jingsniew jong kane ka pyrthei ki la jan kut, kumta ruh mynta kane ka kam ka la jan kut. Ha ka sien kaba nyngkong eh, U Jehobah u la pynïatylli lang da ki phew lak ngut ki briew na ki jait bynriew baroh ha ka jingmane bashisha. (Jingpynpaw 7:9, 10) Ki Khristan bashisha ki ïatylli lang ban pynshlur bad ban ïarap iwei ïa iwei pat. Ha ka pyrthei baroh kawei, ki ïoh ka juh ka jinghikai na ka Baibl ha ki jingïaseng jong ki.—Pule Hebru 10:24, 25.

Ha ki snem 1870, kawei ka kynhun barit ka la sdang ban pule ïa ka Baibl bad ki la shem biang ïa ka jingshisha jong ka Baibl. Ki la tip ba u Jisu u la seng ïa ka balang Khristan ban ïalap, te ma ki ruh ki la sdang ban ïalap ha ka pyrthei baroh kawei. Ha u snem 1931 ki la shim noh da ka kyrteng Ki Nongsakhi U Jehobah.—Pule Kam 1:8; 2:1, 4; 5:42.

Ha ka spah snem banyngkong, ki balang Khristan ha bun ki ri, ki la ïoh jingmyntoi na ka jingdon jong ka kynhun synshar. Kane ka kynhun ka pdiang ïa u Jisu kum u khlieh jong ka balang. (Kam 16:4, 5) Kumjuh mynta, Ki Nongsakhi U Jehobah ha satlak ka pyrthei ki ïoh jingmyntoi na ka kynhun synshar jong ki rangbah kiba tbit. Kane ka kynhun ka peit ïa ki tnat treikam jong Ki Nongsakhi U Jehobah kum, ban pynkylla na kawei ka jait ktien sha kawei pat, ban shon bad ban sam ïa ki kot ki sla ki ban pynsngewthuh ïa ka Baibl ha palat 600 tylli ki jait ktien. Na kata ka daw ka Kynhun Synshar ka lah ban ai jingpynshlur na ka jingthoh bad ka pynïaid ïa palat 1,00,000 tylli ki balang ha satlak ka pyrthei. Ha kawei pa kawei ka balang ki briew kiba shemphang ki shakri kum ki rangbah balang ne ki nongsharai. Kine ki rangbah ki sumar ïa ki langbrot jong U Blei.—Pule 1 Petros 5:2, 3.

Ki Nongsakhi U Jehobah ki ïa trei lang ban ïalap bad ban pynlong synran ïa ki briew baroh. Kum ki apostol, ngi ïalap na kawei ka ïing sha kawei pat. (Kam 20:20) Ngi ai jinghikai ruh ïa ki briew kiba shida bad kiba ieit ïa ka jingshisha ban sngewthuh ïa ka Baibl. Hynrei, Ki Nongsakhi U Jehobah kim dei tang ka seng, ngi long kum shi ïing shi sem ba don u Kpa baieit. Ngi long kum shipara kiba phikir iwei ïa iwei. (2 Thessaloni 1:3) Ki briew jong U Blei ki long kiba ïatylli ban pynsngewbha ïa U Blei bad ban ïarap ïa kiwei, kane ka pynlong ïa ki ka ïing ka sem kaba kmen tam ha pyrthei.—Pule Salm 33:12; Kam 20:35.