U Jisu u la hikai ba ka jingbaptis ka long kaba donkam na ka bynta ki Khristan. (Pule Mathaïos 28:19, 20.) Hynrei ka jingbaptis ka dei kaei? Bad kaei kaba dei ban leh ban poi sha kata ka thong?

1. Ka jingbaptis ka dei kaei?

Ka kyntien “baptis” ka wan na ka ktien Grik kaba mut “ban pynngam” ha um. Ha ka por ba la pynbaptis ïa u Jisu, la pynngam ïa u ha ka Wah Jordan, bad u la “mih na ka um.” (Markos 1:9, 10, CL Baibl) Kumjuh ruh, la pynbaptis ïa ki Khristan bashisha mynta da kaba pynngam ïa ki ha um.

2. Ka jingbaptis ka pyni aïu?

Da kaba baptis, u briew u pyni ba u la aiti ïa la ka jingim ha U Jehobah. Hynrei kumno u briew u aiti ïalade? Shuwa ban shim ïa ka jingbaptis, u duwai bad u ong ha U Jehobah ba u kwah ban shakri ïa u. U kular ban mane tang ïa U Jehobah bad ban leh ïa ka mon U Blei kan long kaba kongsan tam ha ka jingim jong u. U jied ban “len ïalade, bad . . . bud” ïa ki nuksa bad ki jinghikai jong u Jisu. (Mathaïos 16:24) Ka jingaiti bad ka jingbaptis jong u kan pynlong ïa u ban don ka jingïadei kaba jan bha bad U Jehobah bad ki parabangeit.

3. Kumno ban poi sha ka jingbaptis?

Phi lah ban ïoh baptis da kaba pule bniah shaphang U Jehobah bad tei ïa la ka jingngeit ha u. (Pule Hebru 11:6.) Haba phi tip shuh shuh shaphang U Jehobah, ka jingngeit bad ka jingieid ïa u kan nang kham khlaiñ. Khlem artatien kane kan sa pynlong ïa phi ban kwah ban ïalap shaphang jong u bad ban bud ïa ki aiñ ki hukum jong u. (2 Timothi 4:2; 1 Ïoannis 5:3) Shisien ba u briew u im kumba U Jehobah u kwah bad u “ïai leh barobor ïa kaei kaba pynsngewbha ïa u,” u lah ban aiti ïa la ka jingim ha U Blei bad ïoh baptis.—Kolossai 1:9, 10, CL Baibl. a

 WAD SHUH SHUH

4. Ngi lah ban ïoh jinghikai na ka jingbaptis jong u Jisu

Ban tip shuh shuh shaphang ka jingbaptis jong u Jisu, pule Mathaïos 3:13-17, bad nangta sa ïa peit lang ïa kine ki jingkylli harum:

• Hato la pynbaptis ïa u Jisu ha ka por ba u dang khyllung?

• Kumno la pynbaptis ïa u? Hato la shu synreit da ka um?

Ynda u Jisu u la dep baptis, u la sdang ban leh ïa kawei ka kam bakyrpang kaba U Blei u la phah ïa u ban leh. Pule Loukas 3:21-23 bad Ïoannis 6:38, bad nangta sa ïa peit lang ïa kane ka jingkylli harum:

• Kaei ka kam kaba u Jisu u la buh nyngkong eh ha ka jingim jong u hadien ba u la dep baptis?

5. Phi lah ban poi sha ka thong jong ka jingbaptis

Haba pyrkhat shaphang ka jingaiti bad ka jingbaptis, lehse nyngkong ka i kumba ka eh. Hynrei, phi lah ban nang kiew ha ka jinglong mynsiem haduh ba phin da sngew skhem ban shim ïa kane ka rai kaba kongsan. Ban tip kumno kiwei ki la leh ïa kane, peit ïa ka VIDEO.

Pule Ïoannis 17:3 bad Jakob 1:5, bad nangta sa ïa peit lang ïa kane ka jingkylli harum:

• Kaei kaba lah ban ïarap ïa ngi ban pynkhreh na ka bynta ka jingbaptis?

1. Ngi aiti ïalade ha U Jehobah da kaba ïathuh ha u ba ngi kwah ban shakri ïa u junom

2. Ha ka por ba ngi baptis, ngi pyni paidbah ba ngi la aiti ïalade ha U Blei

 6. Ka jingbaptis ka pynlong ïa ngi kum shi ïing ha ka seng U Jehobah

Ynda ngi la dep baptis, ngi long kum shi ïing ha ka seng U Jehobah. Watla ngi wan na ki jaka bad ki dustur bapher bapher, baroh ngi don ïa ka juh ka jingngeit bad ngi im da ki juh ki jinghikai. Pule Salm 25:14 bad 1 Petros 2:17, bad nangta sa ïa peit lang ïa kane ka jingkylli harum:

• Kumno ka jingbaptis ka ktah ïa ka jingïadei jong phi bad U Jehobah bad hapdeng jong phi bad kito kiba mane ïa u?

 KI MAT BAKONGSAN

U Jisu u la hikai ba ki Khristan ki dei ban shim ïa ka jingbaptis. Shuwa ban ïoh baptis, ki nongpule Baibl ki dei ban don ka jingïadei kaba khlaiñ bad U Jehobah, ban im katkum ki aiñ jong u, bad ban aiti ïalade ha u.

Peit Biang

• Ka jingbaptis ka dei kaei, bad balei ka long kaba kongsan?

• Kaei ka jingïadei hapdeng ka jingaiti bad ka jingbaptis?

• Ki nongpule Baibl ki donkam ban leh aïu shuwa ban aiti ïalade bad shuwa ban baptis?